Salmos 19
19
Yuus najankamu aina nu nina senchirinka paan iwainawai
1Nayaim iisar
Yuuska senchirtinapita
tusar nekainaji.
Nayaim iisar
Yuus najanamuka pegkeraiti tuinaji.
2Tsawai
tura káshia nusha wainkur
Yuuska senchirtinapita
tusar nekainaji.
3Chichainachiat, Yuusa chichamenka antukcharu ainayat,
4ni najankamu aina nunaka etsa watainmaya aina,
tura etsa akatainmaya aina,
tura ashi shuar nugkanmaya ainasha nekaawaruiti.
Etsanka Yuus nayaimpinam apujsauwaiti.
5Shuar yama nuwan nuatak nina kanutairinia nantaki shir aneas jinna numamtuk,
tura shuar tseketnum nepetmak shir anena numamtuk etsagka jinui.
6Tura yáki waka ataksha akawai,
tuma asamtai ni sukuashmauka pegke atsawai.
7Yuus jintinkartamuka pegkeraiti,
tumau asa pujut yamarman sukartawai.
Tura chicham umiktarma Yuus timauka pegkeraiti.
Tumau asa shuar nekachu ainancha nekamtiknaiti.
8Tura Yuus wina chichamur umirtuktarma ta nuka pegkeraiti.
Tuma asamtai nu chichaman antukar uminaka shir enentaimsar pujuinawai.
Yuusa chichamegka pegker asa, shuar ainan pegker enentaimtikratnaiti.
9Yuus umirmauka nekas pegkeraiti.
Tura nina chichamegka pegke nagkankashtinaiti.
Tuma asamtai apu Yuus wina chichamur umirtuktarma ta nuka
nekas umirmainaiti.
10Yuusa chichamegka oron nagkasau shir pegkeraiti.
Tura napa yumirin nagkasau shir pegker asamtai nukap wakeruinawai.
11Wika amina umirin asan,
amina chichamrumin nekaan tunaurinchau pujustasan wakerajai.
Nuna umiknaka pegker pujustinaitjai.
12Shuarka nigki enentaimsagka tunaurinka nekamaitsui.
Apuru, wii nekachu asan, tunaun takau ayajai.
Wii tumamurka ame tsagkurturta.
13Tura wika amina umirin asamtai,
wina emematairka ame jurutkita.
Ememata nu nepetkati tusamka tsagkamrukaipa.
Turutawakmin wika tunaurinchau agkan pujustatjai.
14Apuru, wina ayamrutin asam, tura wina uwemtikrin asam,
wina chichamur aina, tura enentaimmaur ainasha nekas pegker amajtursata tusan tajame.
Currently Selected:
Salmos 19: hubDBL
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
