Salmos 22
22
Waitaku pujusar Yuus emematku kantammau
1¡Wina Yuusru, wina Yuusru! ¿Urukamtai winasha inaitusume?
¿Urukamtai wina uwemtikrurtasmesha winatsme?
¿Urukamtai wii útkun untsumkaisha pachittsume?#Mt 27.46; Mr 15.34
2Wina Yuusru,
tsawaisha,
tura káshisha amina untsuajme.
¡Turasha ame umirtachu asaakmin
wika ayamran pujatsjai!
3Turasha ameka pegkeraitme.
Ametme apumka,
tumau asaakmin
israelita aina emematramainawai.
4Ina uuntri ainaka, amina nekaspapita turamiaru ainawai.
Tumawaru asarmatai ame nitaka ayamrukuitme.
5Nitaka yainkata tusar untsurmakaruiti,
turamainakai agkan pujusarti tusam yaigkuitme.
Amini nekaspapita tuina asar chichamrumin umirtamaina asarmatai,
nitaka tsanuachuitme.
6Turasha wika shuarjai metekchauwaitjai,
antsu maaya numamtinaitjai.
Tumau asamtai aishmag aina tura nuwa aina wishikruinawai.
Tura ashi shuar aina nakitruinawai.
7Ashi nitaka wina waitkar, pegkerchau chichartuinak,
wishikruinak muuken peainawai.
8Tumainak chichartuinak:
“Yuusnaka nekaspapita tusa tinayi,
tutai asa Yuus yaigti. Nina nekas aneakka uwemtikrati turutainawai”.
9Turasha ame winaka akinati turutin asaakmin
wina nukuru ampujen egkeman akinawaitjai.
Tura nina nukuri takusam muntsun muntsuak
ayamrati tusam turutin asam,
ame winaka ayamtikruyame.#Mt 27.39-43
10Ame, wika akiintsaig kuitamrauwaitme.
Tura wina nukurun ampujen pujaig,
ameka wina Yuusur ajakuitme.
11Wii waittsatin tsawan ashi jeayi,
ima winakka inaitusaipa.
Wina yainmainka pegkesha atsawai.
12Wina kajertin ainaka Basánnumia vaca aishmagkri kajen aina iman asar,
wina mantuawartasa tentatkarai.
13Nutikruawar uun yawa kajen wagka shinak uruka,
imatainak wina mantuawartasa tsekentruinawai.
14Wika entsa nugkanam ukaarauwa numamtinaitjai,
wina ukunchrusha ukuinarua numamtin ainawai.
Tura kuntut etseekam yumirinna numamtuk,
wina enentairuigka kakaarchamnau nekapeajai.
15Yaikim jujuwa numamtuk wina suwersha jujuawai.
Tura wina inairusha mayapkatairuin pemturkayi.
¡Jakau iturmainait numamtuk winaka nugka juyujuyuntunam ajuantam aepruknume!
16Shuar pegkerchaun takau aina
yawaya numamtuk nukap tuartukarai.
Turutawarmatai naweruigka, tura uwejruisha
achiintrau nekapeajai.
17Nuna tuma asan, wina ukunchur ainanka ashi nekapmamainaitjai.
Wina kajertin ainaka urukatig tusar tuke iiru pujuinawai.
18Wina jaanchrun jukiartasa
yáki nepetmakat, nu jukiti tusar
chikichik nakurutain nakuruawar jaanchrun jukiartin ainawai.#Mt 27.35; Mr 15.24; Lc 23.34; Jn 19.24
19Turasha ametme, apu, wina senchimtikrinmeka.
¡Winaka ikurkipa!, ¡wári taam wina yainkata!
20Nita kuchirijai maawarai tusam ayamrutkata.
Shuar yawaya numamtin aina nu maawarai tusam surimrukta.
21Uun yawaya numamtin aina nu,
mantuawarai uwemtikrurta.
Tura vaca aishmagkri kajen nina kachurijai
shuaran maina iman aina nu
mantuawarai ayamrutkata.
22Wina yatsur ainan amina pachisan ujakartajai,
tura nitajai iruuntran amina emematkun kantamruattajme.#He 2.12
23Atum Jacob weantutiram
Yuus umirin ainatirmeka,
¡ni senchirtin asamtai
ememattarma!
24Yuuska umtsuk, shuar kuitrinchau aina
waitak pujus yainkata
tusa tamaka yaitskeka inaitsuk
tuke yainaiti.
25Wina Yuusru, ima aminak ememattatjame.
Wii amina ememattatjame tusan tinaitjam
nunaka shuar ame etegkamu aina
nukap tuakmaunam umiktatjai.
26Kuitrinchau ainaka
yutain yuawar ejémarartin ainawai.
Yuusan umirkattsa wakeruinaka nina emematiartin ainawai.
Nuna tumainak nukap uwí pujustin ainawai.
27Ashi nugkanmaya shuar ainatiram,
tura chikich chicham chichau ainatirmesha
ina Yuusri aujsattsarum nina emtin tikishmatratarma.
28Yuusaiti apuka
tumau asa ashi nugkanam inamui.
29Atum atsumtsuk pujuinatirmesha,
atum chikichik tsawantin jakatin asarum,
atumi senchirijaig iwáku pujachu asarum,
Yuus tsuntsumruarum ememattarma.
30Wii weantu ainaka Yuusan emematainak
nina pachisar tuke etseriartin ainawai.
31Tura chikich aina atak akinawarsha
Yuus takasmau pegker aina nuna,
tura wainchatai ainan nukap iwainarua nuna nekawartin ainawai.
Currently Selected:
Salmos 22: hubDBL
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
