Salmos 91
91
1Hi̱ˉ hä̱ä̱ˊ gooˉ hi̱ˉ gyaꜗ gyʉʉhˈ,
maˉgyayꜗ chaˊnehꜙ kihꜗ hi̱ˉ chaˉ gaꜙläꜙjëꜙ beꜘ kihꜗ.
2Heˉja̱ˉ jwɨɨnꜚ DSAˉJØ̱Ø̱Hˈ kya̱a̱nꜙ:
“Hneˉ la̱a̱hꜗ oˉjø̱hꜙ dsëˉ kinꜙ,
hneˉ kwahˉ jeeˊ saꜙ hiiꜘ gooˉ kinꜙ.
Kyahꜗ hneˉ baˊ Dio kya̱a̱nꜙ kye̱nˊ oˉjø̱hꜙ dsëˉ.”
3Hñiiꜘ bihꜗ lä̱ä̱yꜗ hneˉ kihꜗ hi̱ˉ hɨɨˉ saˊläꜘ,
hiꜙ kihꜗ hi̱ˉ hnøøꜗ jngëëhꜗ hneˉ.
4Ta̱a̱yhꜙ hneˉ nehꜙ taˉkyooyꜘ,
mahꜗ läꜙja̱ˉ saꜙ hɨɨꜗ gooˉ kyahꜗ.
Hiꜙ miˉteyꜗ kya̱a̱hˊ juꜗdsooꜘ kiyhꜗ, heˉ ja̱ˉ laꜗ kyahꜗ
läꜙko̱hꜘ ñeˈ heˉ hɨɨˉ dsaˉ jeeˊ lä̱ä̱˜ hñiiꜘ.
5Läꜙja̱ˉ saꜙ läꜙga̱hꜗ kya̱a̱hˊ heˉ hiiꜘ gooˉ hwëˈ,
niꜙ kya̱a̱hˊ flecha heˉ jwä˜ dsaˉ jmɨɨˈ,
6niꜙ kya̱a̱hˊ dsooˊ heˉ jngɨɨhꜙ kihꜗ dsaˉ taꜙlaꜙ hwëˈ,
niꜙ heˉ jngɨɨhꜗ kihꜗ dsaˉ jmɨɨˈ hiiꜘ hyooˉ.
7Maꜙkeꜙ gaꜙsa̱a̱ꜗ naˉju̱u̱ˊ ko̱o̱ˉ mil dsaˉ kooꜘ kyahꜗ
hiꜙ gya̱a̱ꜗ mil gaꜙsa̱a̱ꜗ jwooˈ raˉllu̱u̱ꜗ,
pero kyahꜗ hneˉ saꜙ chaˉ heˉ leꜘ niꜙ miihˉ.
8Juˈdsooꜘ, maꜙraꜙ heˉ të̱ë̱hꜗ baˊ hneˉ jëëhˈ
haˉ läꜙ leꜘ kihꜗ hi̱ˉ hñaaˉ dsëꜗ heꜘ.
9Jëëhꜘ, maˉjmeehˊ baˊ hneˉ kwa̱a̱t˜,
DSAˉJØ̱Ø̱Hˈ jnänˋ la̱a̱ꜗ oˉjø̱hꜙ dsëˉ kyahꜗ.
Kihꜗ hi̱ˉ gyaꜗ gyʉʉhˈ maˉjmeehˊ hø̱ø̱hˈ jeeˊ lä̱ä̱hꜘ.
10Niꜙ ko̱o̱ˉ heˉ hlɨɨhˈ saꜙ jäꜙ nëˊ kyahˈ,
niꜙ ko̱o̱ˉ dsooˊ saꜙ të̱ë̱hꜗ hneˉ.
11Hñiiyꜘ kwa̱a̱yꜗ ángele kya̱a̱yꜗ
hi̱ˉ hä̱ä̱ꜗ hneˉ läꜙka̱a̱ˉ jeeˊ ngëhˉ.
12Jä̱ä̱yꜗ hneˉ naˉhä̱ä̱yˉ goohˉ,
mahꜗ saꜙ llaˉñuꜗ tɨɨhˊ kya̱a̱hˊ ku̱u̱ˊ.
13Leꜘ dsaˉngëëhꜘ jeeˊ tä̱ä̱hˊ león
hiꜙ jeeˊ tä̱ä̱hˊ jahꜘ la̱a̱ꜗ naˉhøøꜘ.
Maꜙkeꜙ gaꜙheehˊ kihˈ mɨɨhˉ hä̱ä̱ˈ,
saꜙ chaˉ heˉ leꜘ kyahꜗ niꜙ miihˉ.
14Jëëhꜘ DSAˉJØ̱Ø̱Hˈ jnänˋ jähꜘ:
“Taꜙlaꜙ kihꜗ heˉ hnääyꜗ jnäꜘ, heˉja̱ˉ baˊ lä̱ä̱ˊ jnihꜘ.
Cha̱a̱hˊ jnihꜘ läꜙlluꜗ heˉ maˉkyu̱u̱yꜙ jnäꜘ.
15Waˊraˉ gaꜙtëꜘ jeeˊ chu̱u̱yˈ kya̱a̱hˊ jnäꜘ,
je̱e̱hˊ baˊ jnäꜘ kiyhˈ,
kwaˋ baˊ jnäꜘ beꜘ kiyhꜗ maˊ cha̱a̱yˉ heˉ wɨɨꜘ.
Lä̱ä̱ˊ jnihꜘ hiꜙ lla̱a̱ꜚ jnihꜘ jø̱ø̱hˈ.
16Hiꜙ jmeenˋ cha̱a̱yˉ chaˉmiihˉ ji̱ˉñeˉ,
hiꜙ ngooꜗ baˊ jëëy˜ haˉ läꜙ lä̱ä̱ˊ jnihꜘ.”
Currently Selected:
Salmos 91: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
