Salmos 90
90
Libro Cuatro
(Salmos 90-106)
1Hneˉ Dsaˉjø̱ø̱hˈ kya̱a̱nꜙ,
hneˉ kwahˈ jeeˊ saꜙ hiiꜘ gooˉ dsaˊtoohˊ jnäähˈ
gaꜙläꜙjëꜙ johꜘ jmɨɨˊ chaˉ.
2Jä̱ä̱ꜗ ja̱ˉgaˊ leꜘ jmɨˉgyʉʉꜙ
hiꜙ jä̱ä̱ꜗ ja̱ˉgaˊ hyaꜙ chahˈhmaˉ nëˊ kihˈ,
läꜙ maˉcha̱a̱hˉ ja̱ˉbaˊ hneˉ Dio.
3Hneˉ hi̱ˉ jmeeꜙ le̱e̱ꜙ dsaˉ kaˉlähꜘ gwaahˊ.
Hneˉ hi̱ˉ sɨɨhꜙ dsaˉ:
“Waˊ le̱e̱hˉ hnähꜘ kaˉlähꜘ gwaahˊ.”
4Jëëhꜘ, ko̱o̱ˉ mil ji̱ˉñeˉ kyahꜗ hneˉ,
laꜗ läꜙko̱o̱ˉ ko̱o̱ˉ jmɨɨˊ heˉ gaꜙngëëꜘ llooꜘ,
o laꜗ läꜙko̱o̱ˉ ko̱ˉhnooˈ hwëˈ.
5Ko̱o̱ˉ gaꜙngëëꜘ baˊ gaꜙkwa̱a̱hˋ jnäähꜗ jmɨˉgyʉʉꜙ laˉ.
Laꜗ läꜙko̱o̱ˉ heˉ dsaˉngëëꜘ jmɨɨˉ täꜘ
hiꜙ laꜗ läꜙko̱o̱ˉ heˉ këꜙ baˊ dsaˉ,
laꜗ läꜙko̱o̱ˉ nuuˉ heˉ eehˉ taꜙlaꜙ tiih˜.
6Taꜙlaꜙ tiih˜ jnäꜘ naˊhñaahꜗ leˈ kihꜗ,
pero taꜙlaꜙ gaꜙhlooꜘ dsaˉsɨ̱hꜘ mahꜗ dsaˉu̱u̱ꜙ.
7Jëëhꜘ, kya̱a̱hˊ heˉ yaˉjë̱ë̱ˈ hohꜘ miˉlla̱a̱ꜙ jnäähˈ,
hiꜙ kya̱a̱hˊ heˉ lle̱e̱hꜘ maˉhe̱e̱ꜘ dsëˉ jnäähˈ goˉte˜.
8Läꜙjëꜙ dsoˊkyeˉ kya̱a̱ꜗ jnäähˈ maˉllooꜗ chaˊnëhˊ.
Hiꜙ läꜙjëꜙ dsoˊkyeˉ kya̱a̱ꜗ jnäähˈ
maˉmiˉjnäähˈ jeeˊ jnäꜘ waˊjeˉ kyahꜗ.
9Dsaˉlla̱a̱ꜙ ji̱ˉñeˉ kya̱a̱ꜗ jnäähˈ kwa̱a̱t˜ kihꜗ heˉ yaˉjë̱ë̱ˈ hohꜘ.
Läꜙko̱hꜘ heˉ cha̱a̱h˜ dsëˉ jnäähˈ baˊ dsaˉlla̱a̱ꜙ ji̱ˉñeˉ kya̱a̱ꜗ jnäähꜗ.
10To̱ꜙloꜙgyaꜘ dsë˜ gyiiꜘ ji̱ˉñeˉ baˊ cha̱a̱ˉ jnäähˈ.
Läꜙjë̱ë̱ꜙ hi̱ˉ kwëëh˜ dsëꜗ gaˊ miihˉ,
llaˉnääꜗ to̱ꜙloꜙgyaꜘ dsë˜ gyiiꜘgyaꜘ ji̱ˉñeˉ.
Pero kya̱a̱hˊ heˉ wɨɨꜘ baˊ hiꜙ kë̱ë̱ˉ chaˉmiihˉ taˊ kiyhˈ.
Hiꜙ cha̱hꜘ baˊ lla̱a̱ꜙ ji̱ˉñeˉ kihꜗ dsaˉ heꜘ,
ja̱ˉbaˊ läꜙko̱hꜘ dsaˉlaꜘ kihꜗ jeeˊ läꜙjë̱ë̱ꜙ jnäähˈ.
11¿Haˉ cha̱a̱ˉ hi̱ˉ kyʉʉh˜ haˉ ko̱hꜘ ji̱i̱hˈ yaˉjë̱ë̱ˈ hohꜘ?
¿Haˉ cha̱a̱ˉ ja̱a̱ˉ hi̱ˉ läꜙga̱hꜙ hneˉ läꜙko̱o̱ˉ lleˋ kihˈ?
12Miˊjnääˈ kya̱a̱ꜗ jnäähˈ haˉ läꜙ hä̱ä̱ˊ jnäähꜗ hñaaꜗ jnäähˈ
taˊko̱ˉji̱i̱hˈ cha̱a̱ˉ jnäähˈ.
Heehˋ jnäähˈ hʉʉˊdsëˉ lluꜗ kyahꜗ.
13Hneˉ DSAˉJØ̱Ø̱Hˈ kya̱a̱nꜙ,
ñaˉ kwaˊ beꜘ kya̱a̱ꜗ jnäähꜗ, taꜙ miˉhɨɨˊ.
Waˊ läˉñihꜘ hohꜘ kihꜗ hi̱ˉ jmeeꜙ taˊheꜗ kyahꜗ.
14Taꜙlaꜙ tiih˜ jmeeˊ cha̱a̱ˉ jnäähˈ lluꜗ kya̱a̱hˊ heˉ hnaahꜙ jnäähˈ,
mahꜗ jë̱ë̱ˉ dsëˉ jnäähˈ häˊ jnäähˈ kyahꜗ läꜙjëꜙ jmɨɨˊ taˊko̱ˉji̱i̱hˈ cha̱a̱ˉ jnäähˈ jmɨˉgyʉʉꜙ laˉ.
15Jmeeˊ jë̱ë̱ˉ dsëˉ jnäähˈ naꜗ,
ja̱ˉbaˊ läꜙko̱hꜘ teꜗ wɨɨꜘ heˉ maˉjëëˊ jnäähꜗ jä̱ä̱ꜗ,
hiꜙ ja̱ˉbaˊ läꜙko̱hꜘ teꜗ heˉ hlɨɨhˈ heˉ maˉngëëꜘ jnäähˈ.
16Miˊjnääˈ heˉ jʉhˉga̱a̱ˉ heˉ jmeehˉ
kihꜗ hi̱ˉ jmeeꜙ taˊheꜗ kyahꜗ hiꜙ kihꜗ dsaˉ kya̱a̱hꜗ.
17Waˊ miˉjä̱ä̱ꜗ Dio hi̱ˉ la̱a̱ꜗ DSAˉJØ̱Ø̱Hˈ jnänˋ läꜙjë̱ë̱ꜙ jneˊ.
Waˊ miˉjø̱ø̱yꜗ taˊ heˉ jmeeˉ jneˊ.
Läꜙja̱ˉ baˊ waˊ miˉjø̱ø̱yꜗ.
Currently Selected:
Salmos 90: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
