Salmos 89
89
1Hänˋ tä̱ä̱ꜘ kihꜗ Dio hi̱ˉ hnääꜗ jneˊ.
Läꜙ maˉngoonꜗ ja̱ˉbaˊ hlëëhnˊ kihˈ hi̱ˉ miˉteꜗ juuˈ kihꜗ.
2Jnäꜘ jwahnꜙ, läꜙ maˉlaꜗ ja̱ˉbaˊ heˉ läˉñihꜘ hohꜘ kihꜗ dsaꜙ.
Hiꜙ läꜙko̱hꜘ laꜗ gyʉʉhˈ jmɨˉgyʉʉꜙ heˉ saꜙ dsaˉlaˉsɨɨꜗ ji̱hˊko̱hꜘ, läꜙja̱ˉ laꜗ juˈdsooꜘ kyahꜗ.
3Hneˉ maˉjähˊ:
“Gaꜙjmeenꜗ ko̱o̱ˉ hmoohˊ kya̱a̱hˊ hi̱ˉ naˉlle̱e̱hˊ kya̱a̱nꜙ,
gaꜙbä̱ä̱hnˋ hñiinꜙ kya̱a̱hˊ David, gaꜙjwɨɨꜗ jnihꜘ:
4‘Hi̱ˉ la̱a̱ꜗ saˊju̱ˉ kya̱a̱hꜗ,
jmeenˋ le̱e̱yꜘ taˊ gaꜙläꜙjëꜙ johꜘ jmɨɨˊ chaˉ llahꜘ hneˉ.ʼ”
5Hneˉ DSAˉJØ̱Ø̱Hˈ kya̱a̱nꜙ, läꜙjë̱ë̱ꜙ hi̱ˉ tä̱ä̱hˊ gyʉʉhˈ
häyꜗ kyahꜗ kwa̱a̱t˜ kihꜗ juˈdsooꜘ kyahꜗ,
hiꜙ kihꜗ heˉ jʉhˉga̱a̱ˉ heˉ jmeehˉ.
6Jëëhꜘ saꜙ cha̱a̱ˉ jñahꜘ hi̱ˉ lihꜙ jmeeꜗ läꜙko̱o̱ˉ jmeehˉ hneˉ,
jeeˊ kihˈ hi̱ˉ la̱a̱ꜗ kya̱a̱hꜗ hi̱ˉ chaˉ beꜘ kihꜗ.
¿Hi̱i̱ˉ gaˊ jñahꜘ cha̱a̱ˉ hi̱ˉ la̱a̱ꜗ läꜙko̱o̱ˉ hneˉ DSAˉJØ̱Ø̱Hˈ kya̱a̱nꜙ?
7Läꜙjë̱ë̱ꜙ hi̱ˉ naˉjngëëˈ hi̱ˉ tä̱ä̱hˊ kya̱a̱hˊ hneˉ,
peerꜙ ga̱yhꜙ hneˉ.
Haˉ ko̱hꜘ saꜙ be̱e̱hꜘ hneˉ
jeeˊ kihˈ hi̱ˉ tä̱ä̱hˊ läꜙkuˊ läꜙji̱i̱ꜗ kyahꜗ.
8Hneˉ DSAˉJØ̱Ø̱Hˈ kya̱a̱nꜙ, hi̱ˉ la̱a̱ꜗ jʉʉˊ hløøꜘ,
¿hi̱i̱ˉ gaˊ jñahꜘ cha̱a̱ˉ hi̱ˉ la̱a̱ꜗ läꜙko̱o̱ˉ hneˉ?
Peerꜙ be̱e̱hꜘ hneˉ DSAˉJØ̱Ø̱Hˈ kya̱a̱nꜙ,
juˈdsooꜘ jmahꜗ baˊ hlëëhˊ.
9Maꜙkeꜙ be̱e̱ꜘ jmɨˉñeehꜚ, hneˉ baˊ hi̱ˉ jmeeꜙ hihꜙ kihꜗ,
hiꜙ jmeehˉ jä̱ꜙ tiiˊ maˊ hlu̱hꜙ.
10Hneˉ gaꜙjle̱e̱hˊ goˉte˜ Rahab, läꜙji̱i̱hˈ gaꜙju̱u̱yꜗ.
Kya̱a̱hˊ beꜘ kyahꜗ gaꜙjmeehˊ gaꜙsaaˊ gaꜙjñeeꜘ hi̱ˉ naˉhøøhˊ kyahˈ.
11Kyahꜗ baˊ hneˉ laꜗ gyʉʉhˈ hwaꜗ.
Hneˉ gaꜙjmeehˊ jmɨˉgyʉʉꜙ
hiꜙ läꜙjëꜙ gaˊ heˉ chaˉ nëˊ kihˈ.
12Hneˉ gaꜙjmeehˊ heˉ laꜗ taꜙ ñiiꜘ hiꜙ heˉ laꜗ taꜙ kye̱ꜗ.
Mohꜘ heˉ che̱e̱ˉ Tabor kya̱a̱hˊ mohꜘ heˉ che̱e̱ˉ Hermón,
heˉ ja̱ˉ miˉjnääꜙ haˉ ko̱hꜘ jø̱ø̱hˈ saꜙ la̱a̱hꜗ hneˉ.
13Haˉ ko̱hꜘ saꜙ be̱e̱ꜘ maˉgoohˉ.
Maˉgoohˉ raˉllu̱u̱ꜗ, peerꜙ be̱e̱ꜘ, ¿hi̱i̱ˉ lihꜙ llaˉdsëëˋ kihꜗ?
14Jeeˊ baˊ kihˈ heˉ lluꜗ jmahꜗ laꜗ hø̱ø̱hˈ.
Chaˊnëhˊ jeeˊ ñehꜘ, jnäꜘ heˉ läˉñihꜘ hohꜘ
hiꜙ läꜙja̱ˉ jnäꜘ juˈdsooꜘ kyahꜗ kaˉlähꜘ.
15Hneˉ DSAˉJØ̱Ø̱Hˈ kya̱a̱nꜙ,
lluꜗ laꜗ kihꜗ dsaˉ hi̱ˉ jë̱ë̱ˉ dsëꜗ häyꜙ kyahꜗ.
Jeeˊ jnäꜘ waˊjeˉ kyahꜗ gaꜙnääˊ hi̱ˉ heꜘ.
16Läꜙjëꜙ jmɨɨˊ baˊ jë̱ë̱ˉ dsëyꜗ kwa̱a̱t˜ kyahꜗ.
Cha̱a̱yˉ lluꜗ kihꜗ ja̱a̱ˉ hneˉ baˊ llahꜗ taˊ.
17Jëëhꜘ hneˉ kwëëh˜ hnihꜘ beꜘ heˉ jnaahˈ jwërte.
Kihꜗ heˉ lluꜗ hohꜘ heˉja̱ˉ dsaˉläˉchaˉ chaˉgaˊmiihˉ beꜘ kiyhꜗ.
18DSAˉJØ̱Ø̱Hˈ kya̱a̱nꜙ, hneˉ chehꜗ nëˊ kya̱a̱ꜗ jnäähꜗ.
La̱a̱hꜗ dsaˉtaˊ jø̱ø̱hꜗ kya̱a̱ꜗ jnäähꜗ,
hiꜙ la̱a̱hꜗ hi̱ˉ naˉjngëëˈ kya̱a̱ꜗ dsaˉ Israel.
19Ko̱o̱ˉ jmɨɨˊ, gaꜙjmeehˊ gaꜙhë̱ë̱ꜘ mɨˈnëˊ
hi̱ˉ naˉjngëëˈ kya̱a̱hꜗ läꜙ maˊ gaꜙhlëëhˊ kya̱a̱yhˊ.
Hiꜙ gaꜙchiiyhˊ: “Maˉhñaanꜙ ja̱a̱ˉ hi̱ˉ kwëëh˜ dsëꜗ.
Maˉlle̱e̱hnˋ ja̱a̱ˉ jeeˊ kihˈ jeeˊ jwɨɨˉ kinꜙ hi̱ˉ gyaꜗ jø̱ø̱hˈ.
20Gaꜙjë̱ë̱nꜙ David jmääyꜗ jmeeyꜗ taˊheꜗ kinꜙ.
Heˉja̱ˉ gaꜙta̱a̱hꜙ jnihꜘ naaˋ heˉ naˉjø̱ø̱ꜚ.
21Ji̱hˊko̱hꜘ saꜙ jmeeꜗ wë̱ë̱ꜘ beꜘ kinꜙ kya̱a̱yhˊ,
hiꜙ kya̱a̱hˊ beꜘ kinꜙ të̱ë̱yꜗ beꜘ.
22Niꜙ ja̱a̱ˉ hi̱ˉ naˉhøøhˊ kiyhˈ moꜙsoꜙ ka̱a̱yhꜗ,
niꜙ hi̱ˉ hñaaˉ dsëꜗ moꜙsoꜙ lihꜙ kya̱a̱yhˊ.
23Jmeenˋ sa̱ˊja̱a̱ꜗ chaˊnëyˊ läꜙjë̱ë̱ꜙ hi̱ˉ naˉhøøhˊ kiyhˈ.
Toꜙloꜙnëyˊ jmäähnˊ dsooˊ hi̱ˉ jmeeꜗ hñaaˉ dsëꜗ kiyhꜗ.
24Läˉñihꜘ dsënꜙ kiyhꜗ, niꜙ ko̱ˉhwëëꜘ saꜙ be̱e̱ꜚ jnihꜘ,
hiꜙ ngooꜗ ja̱ˉbaˊ chaˉ beꜘ kiyhꜗ kwa̱a̱t˜ kinꜙ.
25Toohnꜚ gooyˉ jmeeyꜗ hihꜙ läꜙji̱i̱hˈ jeeˊ hlaˉ jmɨˉñeehꜚ
läꜙ gaꜙtëꜘ jeeˊ hlaˉ jmɨˉjʉʉhˉ.
26Hi̱ˉ heꜘ sɨɨhꜙ jnäꜘ: ‘Hneˉ la̱a̱hꜗ tääˋ kya̱a̱nꜙ.
Hneˉ la̱a̱hꜗ Dio kya̱a̱nꜙ hi̱ˉ lä̱ä̱˜ jnäꜘ hiꜙ hi̱ˉ hä̱ä̱˜ jnäꜘ.ʼ
27Jnäꜘ jmääꜚ jnihꜘ läꜙko̱o̱ˉ gyʉ̱ʉ̱ˉ toˉnëˊ kya̱a̱nꜙ,
hiꜙ jmääꜚ jnihꜘ Rey jø̱ø̱hˈ
jeeˊ kihˈ läꜙjë̱ë̱ꜙ Rey hi̱ˉ cha̱a̱ˉ hwaꜗ laˉ.
28Läꜙhnaaꜙ jnihꜘ tä̱ä̱ꜘ,
ji̱hˊko̱hꜘ saꜙ lla̱a̱ꜙ heˉ gaꜙbä̱ä̱hnˋ hñiinꜙ kya̱a̱yhˊ.
29Maꜙlaꜙ hi̱ˉ la̱a̱ꜗ saˊju̱ˉ kiyhꜗ baˊ lla̱a̱nꜚ le̱e̱ꜘ Rey hi̱ˉ ko̱o̱ꜙ nëˊ kiyhˈ.
Jeeˊ gyayꜙ jmeeyꜗ hihꜙ, miˉheeꜙ tä̱ä̱ꜘ läꜙko̱hꜘ miˉheeꜙ gyʉʉhˈ jmɨˉgyʉʉꜙ.
30ʼCherˊmahꜗ jo̱o̱yꜘ gaꜙtʉꜗ ley kinꜙ,
hiꜙ saꜙ gaꜙjmeeyꜘ heˈ madaꜚ kinꜙ,
31cherˊmahꜗ gaꜙhlä̱ä̱yhˉ kya̱a̱hˊ ley kinꜙ,
hiꜙ gaꜙjmeeyꜘ cha̱a̱yhˉ kya̱a̱hˊ madaꜚ kinꜙ,
32ja̱ˉgaˊ naꜙ kwanˋ kiyhˈ kya̱a̱hˊ sɨˊhmaˉ
kwa̱a̱t˜ kihꜗ heˉ cha̱a̱yhˉ hiꜙ kwa̱a̱t˜ kihꜗ dsoˊkyeˉ kiyhꜗ.
33Pero saꜙ tʉnꜚ heˉ hnaaꜙ jnihꜘ,
niꜙ saꜙ ko̱o̱nꜚ heˉ maˉkwëëhꜙ jnihꜘ.
34Saꜙ he̱e̱nꜚ hmoohˊ heˉ gaꜙjmeenꜗ kya̱a̱yhˊ,
niꜙ saꜙ hlä̱ä̱hnꜙ kya̱a̱hˊ juuꜗ heˉ gaꜙhlëëhnˋ.
35Ko̱o̱ˉ häˊ baˊ ja̱ˉ gaꜙtä̱ä̱nˋ hñiinꜙ,
jëëhꜘ ja̱a̱ˉ hi̱ˉ naˉjngëëˈ saꜙ leꜘ juuyꜗ.
Heˉja̱ˉ saꜙ juunˊ kihˈ David.
36Maꜙlaꜙ hi̱ˉ la̱a̱ꜗ saˊju̱ˉ kiyhꜗ baˊ le̱e̱ꜘ rey tä̱ä̱ꜘ.
Chaˊnënꜙ jeeˊ gyayꜙ jmeeyꜗ hihꜙ,
miˉheeꜙ tä̱ä̱ꜘ läꜙko̱hꜘ miˉheeꜙ hyooˉ.
37Miˉheeyꜙ tä̱ä̱ꜘ läꜙko̱hꜘ miˉheeꜙ sɨhˉ,
le̱e̱yꜘ läꜙko̱o̱ˉ ja̱a̱ˉ hi̱ˉ jmeeꜙ juˈdsooꜘ kinꜙ gyʉʉhˈ jmɨˉgyʉʉꜙ.”
38Pero hneˉ gaꜙbe̱e̱hꜙ hi̱ˉ naˉlle̱e̱hˊ kya̱a̱hˈ,
gaꜙjmäähˋ hnihꜘ taꜙ kooꜘ
maˊ gaꜙläꜙlle̱e̱hꜘ kya̱a̱hˊ hnihꜘ.
39Gaꜙhe̱e̱hꜙ hmoohˊ heˉ gaꜙjmeehˊ kya̱a̱hˊ hi̱ˉ jmeeꜙ taˊheꜗ kyahꜗ,
gaꜙjwähꜗ hwaꜗ coron kiyhꜗ.
40Gaꜙtuhꜗ naˊhyahˉ heˉ maˊ nooˉ nëˊ kihˈ dsaꜙ,
gaꜙsaˊ gaꜙhe̱e̱hꜙ goˉte˜ läꜙjëꜙ hneꜗ ñiiꜘ
jeeˊ maˊ dsaˉta̱a̱yhˋ høøyꜗ jeeˊ jwɨɨˉ kiyhꜗ.
41Läꜙjë̱ë̱ꜙ hi̱ˉ dsaˉngëëꜘ jeeˊ ja̱ˉ, hɨ̱ɨ̱y˜ läꜙjëꜙ heˉ hnøøyꜗ.
Läꜙjë̱ë̱ꜙ hi̱ˉ tä̱ä̱hˊ läꜙka̱a̱ˉ kooꜘ kihꜗ jeeˊ jwɨɨˉ ja̱ˉ,
miˉkwa̱yhꜗ kihꜗ dsaˉ heꜘ.
42Gaꜙkwahˊ jwëˈ gaꜙtë̱ë̱ꜘ beꜘ hi̱ˉ naˉhøøhˊ kiyhˈ,
gaꜙkwahˊ jwëˈ gaꜙläꜙcha̱a̱ꜙ lluꜗ hi̱ˉ hñaaˉ dsëꜗ heꜘ.
43Gaꜙjmeehˊ gaꜙbä̱hꜗ hoˊñeˈ kihꜗ dsaˉ kya̱a̱hꜗ,
saꜙ gaꜙkwahˊ niꜙ miihˉ beꜘ kiyhꜗ jeeˊ hniiˉ.
44Gaꜙhe̱e̱hꜙ heˉ maˊ la̱a̱yˈ jø̱ø̱hˈ,
gaꜙki̱i̱hˈ taˊ heˉ maˊ häˊ gooyˉ.
45Gaꜙjmeehˊ cha̱a̱yˉ miihˉ baˊ ji̱ˉñeˉ.
Gaꜙjmeehˊ gaꜙjä̱yꜘ gaꜙngëëꜘ jwë̱ë̱ˈ oˉhihꜙ.
46Hneˉ DSAˉJØ̱Ø̱Hˈ kya̱a̱nꜙ,
¿haˉ ko̱hꜘ ji̱i̱hˈ läꜙhɨɨˊ heˉ saꜙ miˊjnäähꜗ hñaahꜗ?
¿Cheˊ läꜙ maˉyaˉjë̱ë̱ˈ ja̱ˉbaˊ hohꜘ tä̱ä̱ꜘ
läꜙko̱hꜘ jeeˊ naˉcha̱a̱hˉ jeˉ?
47Miˉdsoohꜚ hohꜘ, miihˉ baˊ ji̱ˉñeˉ cha̱a̱nˉ jmɨˉgyʉʉꜙ laˉ.
Dsaˉ hi̱ˉ gaꜙlla̱a̱hˋ cha̱a̱yˉ miihˉ jmɨɨˊ baˊ.
48Haˉ cha̱a̱ˉ ja̱a̱ˉ hi̱ˉ cha̱a̱ˉ tä̱ä̱ꜘ mahꜗ saꜙ ju̱u̱yꜘ ji̱hˊko̱hꜘ.
Niꜙ ja̱a̱ˉ saꜙ lä̱ä̱ꜘ kihꜗ toˉhø̱ø̱ˉ.
49Hneˉ Dsaˉjø̱ø̱hˈ kya̱a̱nꜙ,
¿haˉ baˊ taꜙ ngooꜗ heˉ gaꜙjähˊ läꜙ maˊ toˉnëˊ, heˉ hnaahꜙ dsaˉ?
¿Haˉ baˊ taꜙ ngooꜗ heˉ gaꜙtä̱ä̱hˊ hñaahˈ kya̱a̱hˊ David hi̱ˉ miˉteꜗ kyahꜗ?
50Miˉdsoohꜚ hohꜘ haˉ ko̱hꜘ oˉhihꜙ saꜙ gaꜙjä̱ꜘ
hi̱ˉ jmeeꜙ taˊheꜗ kyahꜗ.
Peerꜙ chaˉmiihˉ oˉhihꜙ heˉ gaꜙlleˉ dsaˉ kinꜙ
heˉ kye̱nˊ nehꜙ tuhˉdsënꜙ.
51Läꜙnaˉ baˊ jmeeꜙ hi̱ˉ naˉhøøhˊ kyahˈ DSAˉJØ̱Ø̱Hˈ kya̱a̱nꜙ.
Läꜙnaˉ baˊ jmeeꜙ hi̱ˉ naˉhøøhˊ kihꜗ hi̱ˉ naˉlle̱e̱hˊ kya̱a̱hˈ.
52Pero jnaahˈ llu̱u̱ꜗ Dio hi̱ˉ cha̱a̱ˉ gaꜙläꜙjëꜙ johꜘ jmɨɨˊ chaˉ.
Amén, waˊ laˈ läꜙja̱ˉ.
Currently Selected:
Salmos 89: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
