Salmos 88
88
1Hneˉ DSAˉJØ̱Ø̱Hˈ kya̱a̱nꜙ, hi̱ˉ lä̱ä̱˜ dsaˉ, läꜙjmɨɨˈ läꜙhwëˈ chu̱u̱nꜘ kya̱a̱hˊ hneˉ mahꜗ kwahˈ beꜘ kinꜙ.
2Nʉʉˉ kinꜙ heˉ chu̱u̱nꜘ kya̱a̱hˊ hneˉ.
Jmeeˊ heꜗ kihꜗ läꜙjëꜙ heˉ ngɨɨnˊ kyahˈ.
3Jëëhꜘ maˉläˉdsë̱hꜙ dsënꜙ heˉ jëën˜ wɨɨꜘ.
Läꜙko̱hꜘ heˉ maˉchehnꜗ jeeˊ ju̱u̱ꜘ baˊ jnäꜘ laˉ.
4Läꜙko̱hꜘ heˉ maˉla̱a̱nꜚ kwa̱a̱t˜ hä̱ä̱nˊ nehꜙ toˉhø̱ø̱ˉ baˊ.
Läꜙko̱hꜘ hi̱ˉ saꜙ chaˉ beꜘ kihꜗ baˊ laˈ kinꜙ.
5Maˉjä̱nꜗ hñiinꜙ läꜙko̱hꜘ ja̱a̱ˉ hi̱ˉ naˉju̱u̱ˊ.
La̱a̱nꜗ läꜙko̱hꜘ ja̱a̱ˉ hi̱ˉ gaꜙju̱u̱ꜗ jeeˊ hniiˉ hi̱ˉ maˉhä̱ä̱ˊ nehꜙ toˉhø̱ø̱ˉ.
La̱a̱nꜗ läꜙko̱hꜘ ja̱a̱ˉ hi̱ˉ maˉgaaꜘ hohꜘ kihꜗ hiꜙ läꜙko̱hꜘ ja̱a̱ˉ hi̱ˉ maˉyaˉhë̱ë̱˜ jaˊgoohˉ.
6Läꜙko̱hꜘ heˉ maˉjwä̱ä̱hꜙ jnäꜘ nehꜙ tooˉ ñiihˊ,
jeeˊ naˉho̱o̱ˉ lähˉ jeeˊ saꜙ jnäꜘ saꜙ nʉʉhꜘ.
7Läꜙjëꜙ heˉ yaˉjë̱ë̱ˈ hohꜘ maˉjwähꜗ nëˊ kinꜙ.
Jëën˜ chaˉmiihˉ wɨɨꜘ heˉ maˉche̱e̱hꜗ nëˊ kinꜙ.
8Maˉjmeehˊ maˉläˉø̱ø̱ꜘ hi̱ˉ la̱a̱ꜗ omeꜚ kya̱a̱nꜙ
hiꜙ läꜙjë̱ë̱ꜙ hi̱ˉ heꜘ saꜙ läꜙjë̱ë̱yꜗ jnäꜘ.
La̱a̱nꜗ läꜙko̱hꜘ ja̱a̱ˉ hi̱ˉ hä̱ä̱ˊ nehꜙñeˈ
hi̱ˉ saꜙ chaˉ jeeˊ lä̱ä̱ꜘ.
9Läꜙji̱i̱hˈ ngooꜗ gaꜙtʉʉˊ mɨˊnënꜙ
kihꜗ heˉ jëën˜ chaˉmiihˉ heˉ wɨɨꜘ.
Läꜙjëꜙ jmɨɨˊ baˊ tëëhnꜙ hneˉ Dio kya̱a̱nꜙ,
hɨɨnꜙ maˉgoonꜙ taꜙ gyʉʉhˈ.
10¿Cheˊ jwaꜚ jmeehˈ gaˊ hneˉ heˉ jʉhˉga̱a̱ˉ kya̱a̱hˊ hi̱ˉ maˉnaˉju̱u̱ˊ?
¿Cheˊ jwaꜚ kwaˈ gaˊ hi̱ˉ maˉnaˉju̱u̱ˊ tiˊhmaahˊ kyahˈ?
11¿Cheˊ jwaꜚ dsaˉhäˋ gaˊ juꜗdsooꜘ kyahꜗ
jeeˊ tä̱ä̱hˊ hi̱ˉ naˉju̱u̱ˊ?
¿Cheˊ jwaꜚ dsaˉhäˋ gaˊ heˉ hnaahˉ hnihꜘ
jeeˊ dsaˉhe̱e̱ꜘ jmɨˉngoꜗ kihꜗ hi̱ˉ maˉnaˉju̱u̱ˊ?
12Jeeˊ kihˈ hi̱ˉ maˉnaˉju̱u̱ˊ jeeˊ moꜙsoꜙ jnäꜘ moꜙsoꜙ nʉʉhꜘ,
¿cheˊ jwaꜚ dsaˉhäˋ gaˊ taˊ lluˈ kyahꜗ
o cheˊ jwaꜚ dsaˉhäˋ gaˊ heˉ jʉhˉga̱a̱ˉ kyahꜗ jeeˊ ja̱ˉ?
13Pero jnäꜘ, chu̱u̱nꜘ kya̱a̱hˊ hneˉ DSAˉJØ̱Ø̱Hˈ kya̱a̱nꜙ.
Tiih˜ gaˊ gyanˊ ngɨɨnˊ kinꜙ.
14Hneˉ DSAˉJØ̱Ø̱Hˈ kya̱a̱nꜙ, ¿heˉlaˈ saꜙ jmäähꜙ jnäꜘ heˈ?
¿Heˉlaˈ dsaˉläˉø̱ø̱hꜘ hneˉ kinꜙ?
15Peerꜙ tiˉmeehˉ dsënꜙ heˉ dsaˉngëënꜘ wɨɨꜘ.
Läꜙji̱i̱hˈ maˊ mähnˈ, chaˉmiihˉ wɨɨꜘ heˉ maˉjëënꜗ kyahꜗ hneˉ,
hiꜙ naꜗ maˉjä̱nꜗ moꜙsoꜙ chaˉ beꜘ chaˉ kinꜙ.
16Nëˊ kinꜙ maˉngëëꜘ läꜙjëꜙ heˉ yaˉjë̱ë̱ˈ hohꜘ.
Läꜙjëꜙ heˉ gwaꜘ kyahꜗ maˉlë̱ë̱hꜙ jnäꜘ.
17Ko̱ˉllaˉji̱i̱h˜ baˊ jëën˜ wɨɨꜘ,
laꜗ läꜙko̱hꜘ jeeˊ dsaˉngëëꜘ jmɨɨˉ heˉ dsaˉjʉʉhˈ nëˊ kinꜙ.
Ko̱ˉjø̱hꜘ baˊ maˉja˜ läꜙjëꜙ heˉ ja̱ˉ nëˊ kinꜙ.
18Maˉjmeehˊ maˉläˉø̱ø̱ꜘ kinꜙ hi̱ˉ la̱a̱ꜗ omeꜚ kya̱a̱nꜙ,
läꜙkye̱ˉ hi̱ˉ maˊ jmeeꜙ ko̱ˉjø̱hꜘ kya̱a̱hˊ jnäꜘ.
Jeeˊ naˉho̱o̱ˉ baˊ maˉche̱e̱hꜙ dsaˉ kya̱a̱nꜙ.
Currently Selected:
Salmos 88: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
