Salmos 61
61
1Hneˉ Dio kya̱a̱nꜙ, nʉʉˉ kinꜙ heˉ kɨˊhoohnˊ kyahˈ.
Jmeeˊ heꜗ heˉ chu̱u̱nꜘ kya̱a̱hˊ hneˉ.
2Waˊ haˉ chaˉ haˉ jeeˊ chehnˈ,
maꜙkeꜙ jeeˊ dsa̱a̱ˉ jmɨˉgyʉʉꜙ, kɨˊhoohnˊ ngɨɨnˊ kyahˈ.
Waˊraˉ gaꜙløøꜗ dsaˉhwa̱a̱nꜘ,
che̱e̱hꜙ jnäꜘ nëˊ ku̱u̱ˊ ñiiꜘ heˉ saꜙ të̱ë̱nꜗ.
3Jëëhꜘ, hneˉ hi̱ˉ kwaꜙ jeeˊ gyanˋ jeeˊ saꜙ hiiꜘ gooˉ kinꜙ.
Hneˉ la̱a̱hꜗ läꜙko̱hꜘ hneꜗ heˉ ñiiꜘ
jeeˊ lä̱ä̱nˊ hñiinꜙ kihꜗ hi̱ˉ naˉhøøhˊ kinꜙ.
4Hnoonꜗ gyanˋ tä̱ä̱ꜘ chaˊnehꜙ kyahꜗ.
Gyanˋ naˉjlë̱ë̱nˉ kya̱a̱hˊ saˊkyoohˉ,
jeeˊ saꜙ chaˉ heˉ leꜘ kinꜙ niꜙ miihˉ.
5Hneˉ Dio kya̱a̱nꜙ, maˉnʉʉhˉ baˊ hneˉ
läꜙjëꜙ heˉ maˉbä̱ä̱hnˋ hñiinꜙ kya̱a̱hˊ hneˉ.
Maˉkwëëhˋ jnäꜘ he̱e̱nꜚ
ja̱ˉbaˊ läꜙko̱hꜘ hyohꜙ läꜙjë̱ë̱ꜙ hi̱ˉ ga̱hꜙ hneˉ.
6Kihꜗ hi̱ˉ jmeeꜙ hihꜙ heꜘ, jmeeˊ waˊ jëëˈ gyihꜗ jmɨˉgyʉʉꜙ.
Waˊ cha̱a̱yˉ chaˉgaˊmiihˉ ji̱ˉñeˉ.
7Waˊ kya̱a̱hˊ waˊ jä̱hꜙ hnihꜘ tä̱ä̱ꜘ jeeˊ jmeeyꜙ hihꜙ.
Hä̱ä̱yˋ läꜙlluꜗ heˉ läˉñihꜘ hohꜘ
hiꜙ läꜙlluꜗ heˉ hnaahꜙ hnihꜘ.
8Läꜙja̱ˉ jmeenˋ jʉʉhˉ kyahˈ tä̱ä̱ꜘ.
Hiꜙ läꜙjëꜙ jmɨɨˊ baˊ miˊtenˋ heˉ gaꜙbä̱ä̱hnˋ hñiinꜙ.
Currently Selected:
Salmos 61: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
