Salmos 62
62
1Ja̱a̱ˉ Dio baˊ hi̱ˉ jmeeꜙ hiiꜘ tiiˊ kinꜙ.
Kihꜗ bihꜗ gwaꜘ heˉ dsaˉlä̱ä̱nꜘ.
2Hñiiꜘ bihꜗ la̱a̱yꜗ läꜙko̱hꜘ ku̱u̱ˊ hlooˉ jeeˊ leꜘ lä̱ä̱nˊ hñiinꜙ.
Hñiiꜘ bihꜗ kwayꜙ jeeˊ saꜙ hiiꜘ gooˉ tä̱hnꜙ.
3¿Heˉlaˈ ja̱a̱ˉ jnäꜘ baˊ te̱e̱hꜗ hnähꜘ kya̱a̱hˊ,
hnoohˉ hnähꜘ yaˊnäähˈ hnähꜘ nëˊ kinꜙ?
Jnäꜘ hi̱ˉ la̱a̱ꜗ läꜙko̱hꜘ naˊhyahˉ heˉ chihꜗ llaˊtɨɨˈ,
jnäꜘ hi̱ˉ la̱a̱ꜗ läꜙko̱hꜘ hmaˉjnëˈ heˉ maˉsoˊ maˉhlaꜗ.
4Ko̱o̱ˉ baˊ hʉʉˊdsëˉ kye̱hˊ hnähꜘ heˉ jwä̱ä̱hˈ jnäꜘ hwaꜗ.
Tɨh˜ hohꜘ hnähꜘ juuˈ taˉjuuˈ jmahꜗ baˊ.
Peerꜙ jnaahˈ hlëëhˊ hnähꜘ kinꜙ kya̱a̱hˊ hoohˊ hnähꜘ,
pero nehꜙ tuhˉhohꜘ hnähꜘ jwähꜘ hnähꜘ dsoˊjwɨɨꜘ.
5Ja̱a̱ˉ Dio baˊ jmeeꜙ hiiꜘ tiiˊ kinꜙ.
Kihꜗ bihꜗ chaˉ oˉjø̱hꜙ dsëˉ kinꜙ.
6Hñiiꜘ bihꜗ la̱a̱yꜗ läꜙko̱hꜘ ku̱u̱ˊ hlooˉ jeeˊ leꜘ lä̱ä̱nˊ hñiinꜙ.
Hñiiꜘ bihꜗ kwayꜙ jeeˊ saꜙ hiiꜘ gooˉ tä̱hnꜙ.
7Kihꜗ Dio baˊ gwaꜘ heˉ dsaˉlä̱ä̱nꜘ,
Dio baˊ hi̱ˉ jmää˜ jnäꜘ heˈ.
Kwayꜙ jeeˊ gyanˋ jeeˊ saꜙ hiiꜘ gooˉ niꜙ miihˉ.
8Hnähꜘ dsaˉgoon˜,
waˊ chaˉ tä̱ä̱ꜘ oˉjø̱hꜙ dsëˉ kyahꜗ kya̱a̱yhˊ.
Hlëëhˊ kya̱a̱yhˊ läꜙka̱a̱ˉ tuhˉhohꜘ hnähꜘ,
jëëhꜘ Dio kwaꜙ jeeˊ dsaˊtoohnˊ kooꜘ kiyhꜗ.
9Dsooꜘ baˊ, ko̱o̱ˉ dsaˉngëëꜘ baˊ la̱a̱ˈ dsaˉ jmɨˉgyʉʉꜙ.
Läꜙjø̱hꜗ läꜙmähꜗ ko̱ˉllaꜚ juuꜗ baˊ la̱a̱yˈ.
Waˊraˉ jähꜘ kihꜗ ko̱ˉjø̱hꜘ dsaˉta̱a̱yhˋ nehꜙ kyahꜗ hihꜙ,
niꜙ miihˉ saꜙ he̱e̱yꜗ läꜙko̱hꜘ hiiˉ lleꜘ.
10Taꜙ ka̱ˉ hnähꜘ oˉjø̱hꜙ dsëˉ kihꜗ heˉ hä̱ä̱hˈ hnähꜘ
niꜙ kihꜗ heˉ hë̱ë̱hˉ hnähꜘ.
Waˊraˉ gaꜙläꜙchahꜙ hnähꜘ kuuˊ,
taꜙ ka̱ˉ hnähꜘ oˉjø̱hꜙ dsëˉ kihꜗ.
11Johꜘ ji̱i̱h˜ saꜙ maˉjähꜘ Dio, ja̱ꜙ ko̱o̱ˉ häˊ maˉnuunꜗ,
kihꜗ bihꜗ chaˉ gaꜙläꜙjëꜙ beꜘ.
12Ja̱a̱ˉ hneˉ baˊ Dsaˉjø̱ø̱hˈ kya̱a̱nꜙ läˉñihꜘ hohꜘ kya̱a̱hˊ dsaˉ.
Hneˉ miˊhmaahˊ kihˈ läꜙja̱a̱ˉ läꜙja̱a̱ˉ,
läꜙko̱hꜘ teꜗ taˊ lluˈ heˉ maˉjmeeyꜘ.
Currently Selected:
Salmos 62: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
