Salmos 29
29
1Hnähꜘ ángele hi̱ˉ ka̱a̱hˊ, häˊ hnähꜘ kihꜗ Dio,
jmeeˊ hnähꜘ jʉʉhˉ kihꜗ hi̱ˉ chaˉ beꜘ kihꜗ.
2Häˊ hnähꜘ kihꜗ Dio jø̱ø̱hꜗ läꜙ lleˋ kihˈ,
jmeeˊ hnähꜘ jʉʉhˉ kiyhꜗ nehꜙ gwahꜙ naˊhñaahꜗ.
3Nʉʉhꜘ lleꜚ DSAˉJØ̱Ø̱Hˈ jnänˋ nëˊ jmɨˉñeehꜚ.
Dio hi̱ˉ gyaꜗ yaꜙjwɨɨꜗ jmeeꜙ nɨɨˉ.
Lleꜚ Dio jmeeꜙ hihꜙ läꜙka̱a̱ˉ jeeˊ hlaˉ jmɨˉñeehꜚ.
4Lleꜚ Dio nʉʉhꜘ kya̱a̱hˊ chaˉmiihˉ beꜘ.
Peerꜙ naˊhñaahꜗ laꜗ.
5Lleꜚ Dio jøø˜ hmaˉñihˊ, chiˉjøøy˜ jwɨˊdsuhꜗ chahˈ hmaˉñihˊ heˉ chaˉ hwaꜗ Líbano.
6Jmeeyꜙ kihꜗ hmaˉñihˊ ja̱ˉ
läꜙko̱hꜘ jmeeꜙ gyʉ̱ʉ̱ˉ kyaˊ hi̱ˉ chaˉhë̱ë̱ꜙ taꜙ gyʉʉhˈ.
Läꜙja̱ˉ jmeeyꜙ kihꜗ mohꜘ heˉ tø̱ø̱ꜘ hwaꜗ Líbano
hiꜙ läꜙja̱ˉ mohꜘ aSirión kaˉlähꜘ.
7Lleꜚ DSAˉJØ̱Ø̱Hˈ jnänˋ hyaˉ läꜙko̱o̱ˉ hyaˉ jeꜚñihꜗ.
8Lleꜚ DSAˉJØ̱Ø̱Hˈ jnänˋ jmeeꜙ jeh˜ hwaꜗ ki̱i̱ꜙ.
Jmeeyꜙ jeh˜ hwaꜗ ki̱i̱ꜙ heˉ che̱e̱ˉ Cades.
9Lleꜚ DSAˉJØ̱Ø̱Hˈ jnänˋ chiˉjøø˜ hmaˉhyooˉ,
jmeeyꜙ jä̱ꜙ kwahˉ mohꜘ.
Nehꜙ gwahꜙ kiyhꜗ, läꜙjë̱ë̱ꜙ baˊ jmeeꜙ jʉʉhˉ kiyhꜗ.
10DSAˉJØ̱Ø̱Hˈ jnänˋ baˊ hi̱ˉ jmeeꜙ hihꜙ
läꜙko̱o̱ˉ maˊ dsaˉjʉʉhˈ jmɨɨˉ.
Gyayꜗ la̱a̱yꜗ dsaˉtaˊ jø̱ø̱hꜗ gaꜙläꜙjëꜙ johꜘ jmɨɨˊ chaˉ.
11DSAˉJØ̱Ø̱Hˈ jnänˋ baˊ hi̱ˉ kwaꜙ beꜘ kihꜗ dsaˉ kya̱a̱yꜗ.
Miˉjä̱ä̱yꜗ mahꜗ jmeeyꜙ hiiꜘ tiiˊ kiyhˈ.
Currently Selected:
Salmos 29: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
