Salmos 30
30
1Hneˉ DSAˉJØ̱Ø̱Hˈ kya̱a̱nꜙ, hänˋ kyahˈ, jëëhꜘ maˉlä̱ä̱hˋ jnäꜘ.
Saꜙ maˉkwahˊ jwëꜗ kihꜗ hi̱ˉ naˉhøøhˊ mahꜗ ngɨɨyꜗ kinꜙ.
2Hneˉ Dio DSAˉJØ̱Ø̱Hˈ kya̱a̱nꜙ,
gaꜙngɨɨnˋ beꜘ kyahꜗ heˉja̱ˉ gaꜙmiꜙhlä̱ä̱hˈ jnäꜘ.
3Hneˉ DSAˉJØ̱Ø̱Hˈ kya̱a̱nꜙ, maˉlä̱ä̱hˋ jnäꜘ heˉ maˊ ju̱u̱nꜘ.
Maˉjmeehˊ cha̱a̱nˉ mahꜗ saꜙ nɨɨnˋ jeeˊ laˈ toˉhø̱ø̱ˉ.
4Hnähꜘ hi̱ˉ naˉjngëëˈ kya̱a̱ꜗ DSAˉJØ̱Ø̱Hˈ jnänˋ, häˊ hnähꜘ kiyhꜗ.
Häˊ hnähꜘ kihꜗ hi̱ˉ naˉjngëëˈ goˉte˜.
5Heˉ lle̱e̱yꜘ, dsaˉläˉhɨɨˊ ko̱ˉhwëëꜘ baˊ,
pero heˉ lluꜗ dsëyꜗ, saꜙ lla̱a̱ꜙ ji̱hˊko̱hꜘ.
Maꜙkeꜙ läꜙta̱a̱ˈ hwëꜗ gaꜙkɨˊ gaꜙhoohˊ jneˊ,
pero waˊraˉ gaꜙjnäꜗ, jäꜙ jë̱ë̱ˉ dsëˉ jneˊ.
6Hʉʉˊdsëˉ heˉ gaꜙjmeenꜗ läꜙko̱o̱ˉ maˊ cha̱a̱nˉ lluꜗ, maˊ la̱a̱nꜙ:
“Ji̱hˊko̱hꜘ saꜙ chaˉ niꜙ ko̱o̱ˉ heˉ jmeeꜗ tä̱hnꜙ.”
7Jëëhꜘ, hneˉ DSAˉJØ̱Ø̱Hˈ kya̱a̱nꜙ,
heˉ lluꜗ hohꜘ gaꜙjmeehˊ kinꜙ läꜙko̱o̱ˉ mohꜘ heˉ saꜙ jehꜗ.
Pero kë̱ë̱ˉ gaˊ saꜙ gaꜙjmäähˋ jnäꜘ heˈ la̱a̱nꜙ,
heˉja̱ˉ gaꜙhe̱e̱ꜗ dsënꜙ.
8Hneˉ DSAˉJØ̱Ø̱Hˈ kya̱a̱nꜙ, ja̱a̱ˉ hneˉ baˊ chu̱u̱nꜘ kya̱a̱hˊ.
Kihꜗ DSAˉJØ̱Ø̱Hˈ jnänˋ ngɨɨnˊ läꜙ maˊ cha̱a̱nˉ heˉ cha̱a̱nˉ.
9¿Heeˉ yaˊjøøꜚ ka̱hꜗ waˊraˉ gaꜙju̱u̱nꜗ
mahꜗ jä̱ä̱yꜗ jnäꜘ taꜙ toˉhø̱ø̱ˉ?
¿Cheˊ jwaꜚ häꜗ hi̱ˉ maˉlë̱ë̱˜ gwaahˊ kyahˈ,
cheˊ jwaꜚ jmeeyhꜗ juuˈ kihꜗ dsaˉ heˉ miˉtehˋ baˊ hneˉ juuˈ kyahꜗ?
10Hneˉ DSAˉJØ̱Ø̱Hˈ kya̱a̱nꜙ,
nʉʉˉ kinꜙ hiꜙ waˊ läˉñihꜘ hohꜘ jnäꜘ.
Waˊ la̱a̱hˈ hneˉ hi̱ˉ kwaꜙ beꜘ kinꜙ.
11Gaꜙhnähˊ heˉ kɨˊhoohnˊ,
gaꜙjmeehˊ jë̱ë̱ˉ dsënꜙ läꜙji̱i̱hˈ hnoonꜗ jmeenˋ ja̱ˊ.
Gaꜙjñuuhˊ heˉ tiˉmeehˉ dsënꜙ
mahꜗ gaꜙjmeehˊ cha̱a̱nˉ lluꜗ.
12Kihꜗ heˉja̱ˉ saꜙ gyanˋ tiiˊ hänˋ kyahꜗ hneˉ DSAˉJØ̱Ø̱Hˈ kya̱a̱nꜙ.
Kwanˋ tiˊhmaahˊ kyahˈ tä̱ä̱ꜘ, DSAˉJØ̱Ø̱Hˈ kya̱a̱nꜙ.
Currently Selected:
Salmos 30: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
