Salmos 28
28
1Hneˉ Dio kya̱a̱nꜙ hi̱ˉ hä̱ä̱˜ jnäꜘ,
ja̱a̱ˉ hneˉ baˊ chu̱u̱nꜘ kya̱a̱hˊ.
Taꜙ jmeeˉ läꜙko̱hꜘ hi̱ˉ saꜙ nuuˉ, je̱e̱hˋ kinꜙ.
Jëëhꜘ, cherˊmahꜗ saꜙ nuuhˉ kinꜙ, la̱a̱nꜗ läꜙko̱hꜘ hi̱ˉ naˉju̱u̱ˊ baˊ.
2Nʉʉˉ kinꜙ läꜙ maˊ kɨˊhoohnˊ ngɨɨnˊ beꜘ kyahꜗ,
hiꜙ läꜙja̱ˉ läꜙ maˊ choonꜙ goonꜙ jeeˊ chihˈ gwahꜙ naˉjngɨɨˈ kyahꜗ.
3Taꜙ jmeehˋ jnäꜘ ko̱ˉjø̱hꜘ kya̱a̱hˊ hi̱ˉ hñaaˉ dsëꜗ,
niꜙ kya̱a̱hˊ hi̱ˉ jmeeꜙ dsoˊkyeˉ.
Jëëhꜘ naˊhñaahꜗ gaˊ hlëëyhꜙ kya̱a̱hˊ dsaˉkya̱a̱yhˊ,
pero nehꜙ tuhˉdsëyꜗ jmeeyꜙ hʉʉˊdsëˉ hlɨɨhˈ.
4Miˉhmaahˊ jñeeyˈ läꜙko̱o̱ˉ teꜗ heˉ maˉjmeeyꜘ
hiꜙ läꜙko̱o̱ˉ teꜗ taˊ hlɨɨhꜗ heˉ maˉjmeeyꜘ.
Heeyhˋ wɨɨꜘ läꜙko̱o̱ˉ hnøøꜗ kiyhꜗ
kwa̱a̱t˜ kihꜗ läꜙjëꜙ heˉ maˉjmeeyꜘ.
5Kihꜗ heˉ saꜙ gaꜙtooyhˉ taˊ läꜙjëꜙ heˉ gaꜙjmeeꜘ Dio kihꜗ dsaꜙ hiꜙ läꜙja̱ˉ kihꜗ jmɨˉgyʉʉꜙ heˉ gaꜙjmeeyꜘ,
heˉja̱ˉ he̱e̱yꜗ goˉte˜ mahꜗ ji̱hˊko̱hꜘ saꜙ naayhꜙ.
6Jnaahˈ llu̱u̱ꜗ la̱a̱ꜗ Dio, hi̱ˉ maˉnuuˉ heˉ chu̱u̱nꜘ kya̱a̱yhˊ.
7Hñiiꜘ DSAˉJØ̱Ø̱Hˈ jnänˋ kwaꜙ beꜘ kinꜙ,
la̱a̱yꜗ läꜙko̱o̱ˉ ñeˈ heˉ hɨɨˉ dsaˉ jeeˊ lä̱ä̱˜ hñiiꜘ.
Kihꜗ bihꜗ chaˉ oˉjø̱hꜙ dsëˉ kinꜙ hiꜙ kwaꜙ bihꜗ beꜘ.
Kihꜗ heˉ jë̱ë̱ˉ dsënꜙ heˉja̱ˉ kwanˋ tiˊhmaahˊ kiyhˈ jeeˊ hänꜙ.
8Dio la̱a̱ꜗ beꜘ kihꜗ dsaˉ kya̱a̱yꜗ,
hiꜙ läꜙja̱ˉ hä̱ä̱y˜ dsaˉtaˊ jø̱ø̱hꜗ hi̱ˉ naˉlle̱e̱hˊ kya̱a̱yˈ.
9Hneˉ Dio kya̱a̱nꜙ, lä̱ä̱ˋ jeeˊ jwɨɨˉ kyahꜗ,
miˉjä̱ä̱ꜚ läꜙjë̱ë̱ꜙ hi̱ˉ la̱a̱ꜗ kya̱a̱hꜗ.
Hä̱ä̱yˋ läꜙko̱hꜘ ja̱a̱ˉ hi̱ˉ hä̱ä̱˜ jahꜘ
hiꜙ jä̱ä̱yꜙ läꜙjëꜙ jmɨɨˊ baˊ.
Currently Selected:
Salmos 28: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
