Salmos 27
27
1DSAˉJØ̱Ø̱Hˈ kya̱a̱nꜙ baˊ hi̱ˉ chooꜙ waˊjeˉ kinꜙ
hiꜙ lä̱ä̱y˜ jnäꜘ kaˉlähꜘ,
¿hi̱i̱ˉ kihꜗ läꜙgohnꜙ?
DSAˉJØ̱Ø̱Hˈ kya̱a̱nꜙ baˊ heꜘ hi̱ˉ la̱a̱ꜗ beꜘ kinꜙ,
¿hi̱i̱ˉ gaˊ kihˈ läꜙgohnꜙ?
2Maˊ gaꜙku̱hꜗ hi̱ˉ hlë̱ë̱hˈ mahꜗ maˊ jngëëyhˈ jnäꜘ,
maˊ gaꜙku̱hꜗ hi̱ˉ saꜙ hnääꜗ jnäꜘ,
hiꜙ läꜙja̱ˉ hi̱ˉ naˉhøøhˊ kinꜙ mahꜗ maˊ te̱e̱yˈ kya̱a̱hˊ jnäꜘ,
hi̱ˉ heꜘ gaꜙtë̱hꜗ mahꜗ gaꜙsa̱a̱yꜗ.
3Maꜙkeꜙ ko̱o̱ˉ nääꜗ hløøꜘ gaꜙta̱a̱hˋ läꜙkuˊ läꜙ ji̱i̱ꜗ kinꜙ,
niꜙ läꜙja̱ˉ saꜙ hlaꜗ mɨˈdsënꜙ.
Maꜙkeꜙ te̱e̱yꜗ kya̱a̱hˊ jnäꜘ,
läꜙ maˉchaˉ ja̱ˉbaˊ oˉjø̱hꜙ dsëˉ kinꜙ kya̱a̱hˊ Dio.
4Ko̱o̱ˉ baˊ heˉ ngɨɨnˊ kihˈ DSAˉJØ̱Ø̱Hˈ jnänˋ,
heˉ laˉ baˊ hnoonˈ.
Heˉ gyanˋ gwahꜙ kiyhꜗ läꜙjëꜙ johꜘ jmɨɨˊ cha̱a̱nˉ baˊ,
mahꜗ chaˉ jwëˈ kinꜙ läꜙkyu̱u̱ꜙ jnihꜘ chaˉgaˊmiihˉ.
Hiꜙ läꜙdsa̱a̱˜ dsënꜙ haˉ ko̱hꜘ naˊhñaahꜗ saꜙ la̱a̱yꜗ,
hiꜙ jmeenꜙ biiꜗ läꜙngëënꜘ haˉ läꜙ laꜗ hʉʉˊdsëˉ kiyhꜗ.
5Waˊraˉ gaꜙllooꜗ jmɨɨˊ hlɨɨhꜗ,
hñiiꜘ Dio hmääꜗ jnäꜘ nehꜙ gwahꜙ kihꜗ,
hmääyꜗ jnäꜘ ñiihˊ gaˊ nehꜙ gwahꜙ kiyhꜗ.
Jeeˊ ñiiꜘ gaˊ kihˈ ku̱u̱ˊ hlooˉ lla̱a̱yꜗ jnäꜘ.
6Jeeˊ ja̱ˉ llaˉdsëënˋ kihˈ hi̱ˉ naˉhøøhˊ
hi̱ˉ tä̱ä̱hˊ läꜙkuˊ läꜙji̱i̱ꜗ kinꜙ.
Maˉlaꜙ maˉlɨhn˜ kiyhˈ, ja̱ˉgaˊ naꜙ
naˊka̱nˋ nehꜙ gwahꜙ kihꜗ Dio heˉ gaꜙtë̱ë̱yꜘ hyoyhꜙ.
Kihꜗ heˉ jë̱ë̱ˉ dsënꜙ, heˉja̱ˉ hoohnˊ ki̱ˉga̱a̱ˉ
hiꜙ hänˋ su̱ꜚ kihꜗ DSAˉJØ̱Ø̱Hˈ kya̱a̱nꜙ.
7Nʉʉˉ kinꜙ hneˉ DSAˉJØ̱Ø̱Hˈ kya̱a̱nꜙ,
läꜙjëꜙ heˉ chu̱u̱nꜘ kya̱a̱hˊ hneˉ.
Waˊ läˉñihꜘ hohꜘ jnäꜘ,
läꜙja̱ˉ ngëëhˋ kinꜙ heˉ chu̱u̱nꜘ kya̱a̱hˊ hneˉ.
8Tuhˉdsënꜙ gwaꜘ heˉ hnaahnꜚ hneˉ,
heˉja̱ˉ hnaahnꜙ hneˉ, DSAˉJØ̱Ø̱Hˈ kya̱a̱nꜙ.
9Taꜙ hmäähˋ hneˉ kinꜙ, taꜙ waˊ läꜙlle̱e̱hꜘ kya̱a̱hˊ jnäꜘ.
Taꜙ jmääꜙ jnäꜘ taꜙ kooꜘ, jnäꜘ hi̱ˉ jmeeꜙ taˊheꜗ kyahꜗ.
Ja̱a̱ˉ hneˉ baˊ hi̱ˉ kwaꜙ beꜘ kinꜙ.
Taꜙ kwaˉ jwëˈ jä̱nˋ hñiinꜙ hiꜙ niꜙ taꜙ be̱e̱ꜙ jnäꜘ,
jëëhꜘ hneˉ la̱a̱hꜗ Dio hi̱ˉ lä̱ä̱˜ jnäꜘ.
10Maꜙkeꜙ maaˋ kya̱a̱nꜙ tääˋ kya̱a̱nꜙ gaꜙbe̱e̱ꜗ jnäꜘ,
DSAˉJØ̱Ø̱Hˈ kya̱a̱nꜙ baˊ tëëꜙ jnäꜘ.
11Hneˉ DSAˉJØ̱Ø̱Hˈ kya̱a̱nꜙ, chiihˊ jnäꜘ heeˉ naˉ jmeenˋ.
Jä̱ä̱ꜙ jnäꜘ taꜙ jwëꜘ lluꜗ kyahꜗ,
jëëhꜘ läꜙkuˊ läꜙji̱i̱ꜗ kinꜙ tä̱ä̱hˊ hi̱ˉ naˉhøøhˊ kinꜙ.
12Taꜙ kwaˉ jwëˈ kihꜗ hi̱ˉ naˉhøøhˊ
jmeeyꜗ läꜙ hyohˉ dsëyꜗ kinꜙ.
Peerꜙ hnooyˉ juuˈ kinꜙ,
hlëëyhꜙ juuˈ taˉjuuˈ, jäyhꜘ jmeeyhꜙ jnäꜘ.
13Maꜙ baˊ jnäꜘ lloo˜ ko̱o̱ˉ jmɨɨˊ
kwaˈ DSAˉJØ̱Ø̱Hˈ kya̱a̱nꜙ beꜘ kinꜙ, jä̱ä̱ꜗ ja̱ˉgaˊ ju̱u̱nꜘ.
14Taꜙ waˊ lla̱a̱ˉ heˉ oˉjø̱hꜙ dsëˉ
heˉ kye̱hˊ kihꜗ DSAˉJØ̱Ø̱Hˈ jnänˋ.
Kwaˊ beꜘ, taꜙ jehꜙ hohꜘ,
waˊ chaˉ oˉjø̱hꜙ dsëˉ kyahꜗ kya̱a̱hˊ DSAˉJØ̱Ø̱Hˈ jnänˋ.
Currently Selected:
Salmos 27: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
