Génesis 27

Rai calaohichuru Esao, Jacobo, naaonjoaihunri cojiotaa Isacane

1Inae jataain biinaa nihane jaun jetaote, jacaa nota conone jaun maosane Isaca. Inae nitohanihane jaun jetaote, nii calaohi inana Esao cotijiaain jetao:

“Canu calaohi”, naane jana jetao:

“Chanaa te Ofa”, naa Esaone jana jetaote:

2“Iite inae jataain biinaa nihanune coaraaicha. Aihane jaun, inae chaabananijine oreeunnicha. 3Chajaain nii ichei tenuna amaain, lenone arinihu caraicha. 4Chaaen inae eruhine quiicha cojoaitei tocohaneein caohatiin jasiiteein jitohin carai uhaaune que lenonera. Inae que lenonichaaunne baihane, osichaaunne ajiniha, raotojoeein neein itolere sirichaneeine coina Cana Coaunera notaracae ii cojiotareeunnicha”, naa calaohi Esao rai Isacane jana jetaote, 5bujuaihu netiin aonaje Rebeca.

Nii jaun jetaote, lenone ariha cuha inaca Isaca rai Esaone caaijietocoriin jetao, 6-7nii calaohi ocoala Jacobo rai jetao:

“Aonaaun. Taa inana Esao raite: ‘Chaaelai lenone arinihu. Chaaen eruujueeine caohatiin jasiiteein, jitohin carai uhaaune que lenonichaaunne baiha, raotojoeein neriquiine coina Cana Coaunera notaracaae osichaaunne ajiniha ii cojiotaera’, naa ii inana rai chacane janane aonajeeun. 8Aihane jaun, caohachaain caa ichei aitocoaaunne aonaain quere tonoraaura, canu calaohi. 9Taa neeuruha irihurune jaan caje coroatajaain cabara narejeen coerenetonanai ranihu caraicha. Aihane, nii cojoaitiha chacane tocohaneein jasiiteein jitohete, 10rai teeite, que lenonihane baiha nii Esao raineein neeni que Cana Coaunera notaracae osihane ajiniha ii cojiotaainera”, nae jetao Jacobo rai neba.

11Nii jaun jetaote:

“Esinae chujian niqui. Nete jataain nujuhin nejesinanecojoae taa canu inana jaberoco, jana canu aihanune coaalanaalata. 12Inasirihanu canu mucuhin canu aonaa ofane jana, ujuinihanune caje cacoitucuhane, ‘Que nocoatijiaajene aihun’, naane, raotojoeein nihanune coina aitelanaala, cairichaaerinojoineein nihanune coina Cana Coaunera notaracae canu cojiotaane jerihata”, naa neba rai Jacobone jana jetaote:

13“Chajaaincha aihura, canu calaohi. Coaraain chujia aitohane, canu nichae nerotomii nii ii cojiotaane jaunra. Chajaaincha caa ichei caitoonjoan cabara narejeen raachanihura”, nae jetao rai neba.

14Nii jaun jetaote, cuhin nii cabara narejeen mucuhin amaain, neba rai tiha Jacobone jaun jetao, cojoaitiha Isacane tocohaneein caohatiin jasiiteein jitohin enoalae nii rai neba. 15Nitohaneein enoalaain jetaote, nii nihana Esao cajione loreri asae niicha rucujuei raain, nocoala Jacobo que curujuae. 16Nii baiha jetaote, nii neniha Jacobo ujuihurune jaan jelai bijihuru, nuluno, naaonjoaihunri conajae jetao cabara narejeen ujuhi que. Nitohaneein conajaain jetaote, nii caohatiin jasiiteein jitohin 17nichanaa lenone aina faan terate Jacobo que.

18Nii jaun jetaote, nii inaca rene enohin jetao:

“Ofa, inae turuhanura”, naa Jacobone jaun jetao:

“Chariji canu calaohineeita”, naa Isacane jaun jetaote:

19“Canune ii calaohi ajicha Esao neeunra. Inae taonii carai chaitoonjoan ichacaaunra. Chajaain atiin nimichuhin nelauriaaute, caa canesari que lenoneein nii raotojoei ichaonaa que ichaohin itolere erora nihanune coina Cana Coaunera notaracae canu cojiotaaicha”, naa Jacobone jaun jetaote:

20“Saan ai. Inasiinte atiin sorotiin inesari eruujueeita, cacalabi”, naa Isacane jaun jetaote:

“Ii Coauneraneein nenaa Cana Coaunera cacorataanihane jaunne, sorotiin eruunra”, naa Jacobone jana jetaote:

21“Chajaau aihane canu rohanne, ii mucuhin chaonaera. Necha esinae rauhijiriin, canu calaohi ajicha Esao neeita”, naa Isacane jaun, 22rohan nelauriaa Jacobone jana jetaote, mucuhin aonaain: “Jacobo ereneeine, ii ere aonaaun niquicha. Nete ii bijihuru Esao bijinera”, nae jetao rai inaca Isaca. 23Nitohaneein jetaote, nii rai calaohi ocoala Jacobo coitucuene Isaca, cabara narejeen ujuhi caun, nii nihana Esao ujuhi tocohaneein jataain ujuitoha rai bijihurune jaun.

24Inae raotojoeein neein itolere erora nerichaaine coina cojiotaane rai jetaote:

“Esinae nachura canu calaohi Esao neeite”, naain nacoaauneein bajaa Isacane jana jetaote:

“Eejen. Canune ii calaohi Esao neeunra”, naa Jacobone jana jetaote:

25“Chajaain aihane, nii iicha sohi inesari que cacoracateeune que lenoneein raotojoeein neein itolere eroraneein neeine coina, ii cojiotaera cacalabi”, naa rai inacane jaun jetao, bino quene maajeein cocoaain, rai inaca coroaate Jacobo. Inae nainaain lenoneein bino cohin jetaote: 26“Chajaaute carohan nichuuntaain canu meri lioracaera canu calaohi”, naa Isacane jaun, 27rohan nichuuntaain nomeri lioracaa Jacobone jana jetaote, rai cajione juuno aonae Isaca. Nitohaneein aonaain jetaote:

“Saan. Esinaete chuhisi, canu calaohi juunone caa ii juunora.

Ichatane jana nenacaauru Cana Coauneraacha coaaunanojoihunru itolere rijitocohaca caa canu calaohi cajione juunora.

28Ichorataanemiin Cana Coaunerate, temule jaain neeine, ichei setejiaa elone caohachaain omarohin nihane arajiin neeine ichei tirico, conacai bino, naaonjoaihunricha.

29Chaentechu, arajiin cachaauru ii cachaneein niha curureeincha.

Satiin caa chauratane que nenacaaurute, ichei suujua acateein neeurureeincha.

Chaentechu, inejeraauru curuaanaaneein neeine jana, ii cachaneein niha cuurureeincha.

Chachaainti, baasoneein ichoharae. Niite cairichaaerinojoineein nereeincha.

Jana caohachaain iniha neite, caohachaain niha cureeincha”,

naain jetao, rai calaohi Jacobo cojiotae Isaca.

30Inae caohachaain niha Jacobone coina rai Cana Coaunera bajaain cojiotaa Isacane jana, enanejeein nii niha inacane jaan caje mituha Jacobone jana jetaote, lenone ariha cuhane caje cauha uhe Esao. 31Nitohaneein turuhin jetaote, nii rai aitoha inacane tocohaneein, caohatiin jasiiteein jitohin lenone jaain jetao inaca rai amaain:

“Chajaain nimichuhin nelauriaain, caa ii calaohi nichaaunne nesari que lenoneeute, raotojoeein neein itolere sirichaneein nihanune coina Cana Coaunera notaracae canu cojiotaaicha Ofa”, naa Esaone jana jetaote:

32“Chariji canu calaohineeita”, naa Isacane jana jetaote:

“Canune, ii calaohi ajicha Esao neeunra”, naane jana jetaote, 33nesoonetiin jetao:

“Charijina jaiti turueneeine jana carai caohatiin lenone ichaain tiha uhane jaun, inae nainaain que lenoneein, raotojoeein ichaohin itolere sirichaneein nihane coina inae cojiotaanune jaun, inae raineein nedae nii ichei banijiaain nenaa”, naa rijijijianeein rai inaca Isacane aonaain jetaote, 34obajeein chanaain jetao:

“Carai netonai, raotojoeein neein itolere sirichaneein nihanune coina canu cojiotaaura Ofa”, naa ehequiin Esaone jaun jetaote:

35“Inae ichoaichaniha turuhin cacoritaa chocohalane jaun, nii ichei banihateein quiicha rucujuei tihanu raicha”, naa rai inaca Isacane jaun jetaote:

36“Nitohaniha ichaone jauntejian, Jacoboneein curuaateeurelu. Inae quete coroata sareein catohaneein cacairichaane. Jauriaanejeeinte, rai nihana nihanune rai neeninu ruluelu. Ena coaiteen, caque banijiaain nenaa rulue cacaje. Taa jana charijieeniji, caque banihateein chaelainiji rucuhequinete Ofa”, naa Esaone jaun jetaote:

37“Aonaaun. Canune chocoala Jacobo rai, chamurijiriin curuaanaa neein nihane jaanu teeun rai. Chaennechu, satiin naraaichuru, rai cachaneein neeuruhane coina aitiin, temule jaane caohachaain tihane arajiin tirico siriin, conacaine maajeein sirihane coina aitoonra. Aihana jaun, chana jana nohane ichei tereeunte cacalabi”, naa Isacane jana jetaote:

38“Atiin canuhetonai cojiotaau, canuhetonai chaelainiji sirichaaunne coinara Ofa”, naa ehequiin chanaain nacoaauneein conujiha Esaone jaun jetaote:

39“Saan, aiha chuhisicha cacalabi. Coriaaete nii uha elone jaan atane caohacha omaroha temulene jaan caje neriquiincha.

40Chaentechu, ichaajenihane ijiabereeo cocoaeratiha curiquiin ishabere quera.

Chaentechu, chocoala cachaneein niha curiquiincha.

Nete, inae caohachaain laraajiin neeine bana, caje amuriquiincha”,

naain jetao Esao cojiotae rai inaca Isaca.

Sohin jaoha Esaone coataa soroha Jacobone

41Nitohaneein que banijiaain nenaa tiha Jacobo rai inacane caje coaauneein jetaote: “Inae oha caa canu inacane janane, coinaderaanune jianichaaunne baiha, caa canu ocoala Jacobo sohin jaoreeunnicha”, naain jetao que necousuujuae Esao.

42Nii Jacobo que necousuujuaa Esaone inaaoriin jetaote, Jacobo cotiharateein jetao:

“Aonaaun. Cairichaeriine acatiha tacaainte, ishohin ijiaohane coina, ii que necousuujuae taa inana Esaora. 43Aihana jaun, caohachaain caa ichei aitocoaaunne aonaaun; chajaain ena Haraun cuhin soronihute, canu cona Laban loreri asae neeicha. 44-45Ecu aina neeu, nii rai baaso ichaaine baiteein iniha obaaecane jianiha iinanane reentiaaincha. Inae iniha obaaecane baitihane janane, chunucoaacuru que beratereeunni, jelaiha cauha uhine coinara. Coatiha le jiichoo cuhane coroatajai cacoereje nequichene itajihanune jerihaaunta”, nae jetao Jacobo rai Rebeca.

46Niritohane baiha jetaote:

“Jataainne nererojoecaeriin ichaoon, caa Esao comasaihuru Ititia benecuru corenihara. Caa aiha nejerane rijijieein caa Canaan ichaonacaauru Ititia bene raa comasainu que Jacobonete, letananocoriin caohachare ohanunera”, nae jetao Isaca rai Rebeca.

Currently Selected:

Génesis 27: URA

Highlight

Copy