Génesis 28

1Nii jaun jetaote rai calaohi Jacobo cotijiaain jetao: “Jiaonriha charijieeniji caa Canaan batane que ichaonacaauru enecuru que necoasaijiaaine. 2Padan-aram cuhin, ii riinaja Betoheri loreri asae nenihu. Aihate ii tanaa Laban cacunu que necoasaijiaai. 3Itolere ichana naineraneein nenaa Cana Coaunera ichorataanemiin arajiin nefaain lauri lauri neeuruha ii nefoerateeuru satiin chauratane sacuritaainne coina. 4Ii nefoerateeuru aina curuaecaain ichorataaneeine Cana Coaunera, caa ena eroraqui atane ichaonaanaja eroraneein neeichene coina. Nitohaneein tihane coinate Abaraaun rai aitelu Cana Coaunera”, naain jetao rai calaohi Jacobo cotijiaain cojiotae Isaca.

5Nitohaneein jetaote, Padan-aram cuha Jacobone coina, letoaa rai inaca Isacane jaun cuhin jetao Arameeoneein nenaa Betoheri calaohi acaauru neba Rebeca cona Laban loreri asae jetao nelu Jacobo.

Necoasaijiaa Esaone

6Nitohaneein Ititia benecuru Canaan ichaonacaauru que necoasaijiaa Jacobone jerelanaala, Cana Coaunera notaracae rai aitiin, Padan-aram necoasaijiaa cuhane coina letoaa inaca Isacane coaraane jaun jetaote, 7inae nii fojiaraauru ere tonoraain, Padan-aram cuha Jacobone que jetao nainae Esao. 8Nitohaneein Canaan ichaonacaauru Ititia benecuru que comasaihocane rautaain coaracureniha inacane que nainaain jetaote, 9Abaraaun calaohi Isamaeli coaraa cue Esao, rai cacunu Nebaihoti bai Malata raa comasainu quene coina, nii coroatajaain Cananeeocuru bene que comasaihocane ichoaae tacaain.

Beteli neseu Jacobo rai ecooca Cana Coaunerane

10Nii letoaa rai inacane jaun jetaote, Bereseba caje amuhin Haran jeloon cunaa bero cuhane jetao cue Jacobo. 11Nitohaneein cuujihane jana, inae sohane jaun nocohecane jaun jetaote, ecu nesurue janohane coina. Nitohaneein jetaote, ecu nihacoaa ajeri jaberocoorune jaun jetao, leinjiin raain que nibinaaoteein nichoae sini.

12Nitohaneein ecu sini jana jetaote, rai sinihu atane caje coaauneein, dede que tiaain niha esecarera tabaine jana jetao coaraje. Nii jana jetaote, nii esecarera que fauhin, iniin, naaonjoaaunre Cana Coaunera letono anjeraauru. 13Nii nainiha jetaote, ecu rohan chujujuaain: “Canune ii riinaja Abaraaun, chaca Isaca, naaonjoaihunri Coaunera neeunra. Ii, ii nefoerateeuru, naaonjoaineeichene raine, caa ena siniine jaa batane tereeunnicha. 14Ii nefoerateeurute atane bujuinaa jeeoneein nefaain, enoto mitu uuri cana ajaabiji nichajai jeloon, enoto mitu uuri cana raotono nichajai jeloon, enoto soo jeloon, naaonjoaihunri jeloon cuhin chauratane lomoritaain niha cuurureeincha.

Nii jaunte, ii, ii nefoerateeuru, naaonjoaineeichene aina cuaain rausiaenojoineein niha cuurureein satiin caa chauratane lomoritaain nenacaauru cachaaurura.

15Nii jaunna, chunijihun cuhine niha natiin ii beraicheeunnicha. Chaennechu, jelaiha caa ena neeine jaan atane que cauha uhine coina, ii cainareeunnicha. Caa ichei aitocoaaunne jaan nainaane cureeunni, ii nainatejelanaalara”, nae jetao Jacobo sinihu rai Cana Coaunera.

16Niritoha sinine caje nocohin jetaote: “Esinae rauhijiriin, cauna niha Cana Coaunerate. Nii saijieein: ‘Caute nera’, naain coitucuhaaunta”, naain suujua ereein jetao: 17“Caalaite, Cana Coaunera nenajaneein que banijiaain nenaa dede bacuujua necaihara”, naa suujuane jaun jetao, jataain jelai coasi Jacobo.

18Nii cojoanoo janohetiin nimichuhin jetaote, nii nibinaaoteein sinihane jaan ajeri jaberoco chujutaain jetao, nichoae erene choroe, “Caate, Cana Coaunera nenajaneein que banijiaain nenaa necaihara”, naane jaun Jacobo. 19Nii jana jetaote, ecu nelu Luz neein curuajaain nese. Ne jetaote, Betelineein nii nese curuaa core Jacobo, “Caalaite Cana Coaunera nenajanera”, naane jaun.

20Nitohaneein ecu neein jetaote: “Caa ena camu que canu coroatajaneein canu beraain, lenonichaaunne jaanu teein, necoreetihanune jaane maajeein teein, 21nii chatohanelanaala naaonjoaain nihanune coina cacorataaniha Cana Coaunerane, raurohin canu inaca nenajau turuhanunena, esinae rauhijiriin Cana Coaunerane esenetaain nere tonorareeunni. Nii caitoonjoan rijijieein ichaa Cana Coaunera nete 22caa ajeri cau quiicha chujuriai Cana Coaunera nenajaniha caalaine coujunacanereein. Nitohanihane banane laen, itolere bana jitariin carai iicha tei lechooncani, ichei tereeunnicha Cana Coaunera”, nae jetao Cana Coaunera rai Jacobo.

Currently Selected:

Génesis 28: URA

Highlight

Copy