Génesis 29

Haraun turuha Jacobone

1Niritohane baiha jetaote, jelai caje amuhin, enoto mitu jeloon nenacaauru atane jetao cue Jacobo.

2Nirijieein bero cuhane cuujihane jana jetaote, nii bero rohan jetao ne acau netaojianaja atane jachu. Nii jana jetaote, nii acau netaojianaja atane jachu rohan nebetacaa neeure nichata turiin carenerocuru, nii atane jachu cajeecha acau raain cocoanajaain sirinaacuruha acaauru beraichacurune jaun.

Nii acau netaojianaja atane jachu jetaote, ajeri tabai que fueraain ne. 3Nitohaneein jetaote, ecu satiin netaojiaauruhane cohacuruhane jana, inae satiin ecu netaojiaauruha nii carenerocuru aina beraihurerane jana jetao, nii fuera ajeri elonaaure nii carenero beraihurera, caje acau raain carenerocuru cocoaauruhane coina. Inae nainaain carenerocuru cocoaain jetaote, nacoaauneein nii atane jachu fuure nii ajeri que.

4Nitohaneein ecu carenero beraihurera eruhin jetaote:

“Chaa cajena unaaneeiche cachaauru”, naain acaauru caje bajaa Jacobone jana jetaote:

“Canacaanune Haraun caje unaanichaanura”, naauruhane jana jetaote:

5“Saan. Taa jana, Nacoro calaohi Laban coitucuhichene”, naa acaauru raine jaun jetaote:

“Eejeen. Coitucuhacaanu chujiarana”, naauruhane jaun jetaote:

6“Raurohina niha”, naa Jacobone jaun jetaote:

“Eejeen. Raurohinte ne Laban. Tajiha chujiara uujue rai cacunu Raqueri, carenerocuru uhaainna”, naauruha nii carenero beraihurerane jana jetaote: “Saan”, naain jetao: 7“Chanuna jana chaaen nii carenerocuru funaa jeriquiche, jaiti ecuun niha enotone jaun sonaa cataina jerihane coaalanaala. Acau que cocoanajaain, jelaiha amanajaauchete lenonecurumiin”, naa Jacobone jaun jetao:

8“Jaiti nainenihahacaanu, saain turuuruha carenerocuru aina beraichacurune cohaca nihacaanune jaun. Inae saain lauri laurichuru carenero beraihurera, turuuruhanena laen, caa atane jachu fuera ajeri joaracarichaanuhin canacaanu carenero beraichanihacaanune, caje acau raain que satiin carenerocuru cocoaacaanune coinara”, naaure jetao nii carenero beraihureraauru.

9Niritiin jaiti acaauru aina ereereeca Jacobone jana jetaote, tajiha inaca rai carenerocuru uhaain jetao turuha uhe Raqueri, aca berainajaera nihane jaun. 10Nii jana coaariin jetaote, inae tanaa Laban rai niha nii carenerocurune coitucuhane jaun jetao, soroneein cuhin, nii atane jachu fuera ajeri joaracaain jetao, acau raain que nii carenerocuru cocoae Jacobo. 11Nii baiha jetaote, nii Raqueri rai ereein, nomeri lioracaain jetao, nejera rijijieein nenaa nihane coitucuhin chanae. 12Nitohaneein Laban calaohi rijineein, Rebeca calaohi nihane biha Jacobone jaun jetaote, soroneein cuhin inaca rai biha cue Raqueri.

13Nii jaun jetaote, turuha bai calaohi Jacobone inaaoriin jetao, soroneein jeluhariin coineteein, que baluunetiin jetao nomeri liosiin loreri asae amae Laban.

Nii baiha acaauru ichaonijihanai que nereretaain, Rebeca calaohi nihane biha Jacobone jaun jetaote: 14“Esinae rauhijiriinte chuisi, canejera caje nejanoanaaneein neeine jaun, cacoichana caje janonaa neeicha”, nae jetao rai Laban.

Leara, Raqueri, naaonjoaihunri coreniha amihaniha Jacobone

Nitohaneein Laban rene turuhin jetaote, le ateein jetao Laban aina nelu Jacobo. 15Inae namihaneeon que coroatajaneein le ateein aina nihane baiha jetaote:

“Nijiaonriha caraaineeine coreniha core colane amihaneei carainera. Inaaojoaain ichoretihanune jereeita”, naain jetao Jacobo caje bajae Laban.

16Nii jana jetaote, coroatajaain cacunuque Laban. Rai nihana curuaa jetaote Learane. Jana rai nocoasai curuaa jetaote Raquerine. 17Nii Leara jetaote, rai nota que baasonejeein necoharae. Jana Raqueri jetaote, itolereneein jaberoco quene maajeein caohate. 18Nii jaun jetaote, jataain nii Raqueri jereein coaraane jana, niritoha rai Labanne jaun jetao:

“Taa ii cacunu ocoasai Raqueri corenihachane, core colane caainsi jaanacaneein amihanereeun ii raicha”, naa Jacobone jaun jetaote:

19“Saan, aihujia aihane. Aihane jaun chujian canihacha neeun. Caohachariha chujia, nabana nejelau cacha rai tesichaaunne ajiniha ii rai tihanunera”, nae jetao rai Laban.

20Nii jaun jetaote, inae nitohaneein ita rai rucuhecuruhane jaun jetao, caainsi jaanacaneein Raqueri coreniha amihanelu Jacobo. Ne jetaote, rai carajaelanaala situe nii caainsi jaanacani, jataain Raqueri jerihane jaun.

21Inae nii aitohane tocohaneein caainsi jaanacaneein amihaneein jetaote:

“Chajaain laen carai ii cacunu uhaaune aina nesirihatihacaanura. Inae taolu ita rai rucuhecalune tocohaneein coreniha amihanihanu caainsi jaanacaneeinne nainaanura”, nae jetao Laban rai Jacobo.

22Nii jaun jetaote, ita raauruhane coina beseta ichaain jetao, jitariin rai laurijiracuru cotihajacoae Laban.

23Nii cojoanotiin cuhane jetaote, Jacobo rai Leara tiha Labanne jaun jetao, niqui aina sini Jacobo.

24Chaaen jetaotechu, leinjiin coseenra Silfa que Leara belai rai inaca Laban, rai chaelai icharaanu que.

25Nii cojoanoo janone jetaote, Leara aina sinihane que nainaain jetao:

“Chanuna catohaneein cacairichaai. Tajia, Raqueri coreniha iniha amihanihanu caainsi jaanacaneeinneta. Nii saijieein chaanate jataain cacoritaaita”, naa Laban rai Jacobone jaun jetaote: 26“Aihanu chuhisicha. Coatihajian nitohanihahacaanu canacaanu. Nii ninana amurijiriin chaabana nelanajanaa nainihei rai nocoasaita. 27Caa Leara aina, ita raaichene jaan semana nainaautejia, nacoaauneein Raqueri aina ita raaichera. Naineriquiin najian nacoaauneein caainsi jaanacaneein amihanenaa naineei caraine”, nae jetao Jacobo rai Laban.

28Nii jana jeriha Jacobone jaun jetaote, inae nii Leara aina, ita raauruhane jaan semana nainaane jana jetao, Raqueri que Jacobo comasaijiae Laban.

29Chaaen jetaotechu, leinjiin coseenra Bilaa te Raqueri rai, rai chaelai icharaanu que Laban. 30Nitohaneein Raqueri raain jetaote, Leara belaihane amuritoheriin jataain belai, jaiti coreniha Laban rai caainsi jaanacaneein amihaniha nerai nihane saijieein.

Jacobo calaohichuru

31Ne jetaote nitohaneein Leara jerelanaala, que jaolecoha Jacobone coaraane jaun jetao, canaanai siriha Learane coina jetao ichae Cana Coaunera. Jana Raqueri jetaote, canaanai sirina inaelanaala, nirijieein nihane coina jetao ichae.

32Nii jaun jetaote, leinjiin calaojoiin jetao, Robeenneein curuaateein jetao: “Inae jerihane laen, canu jereein cacoelairichaain casinijerara. Cana Coaunerate, itolere bana inaderaaeriin cacoharaane jaun, catohaneein canu rai canaanai tera”, nae jetao Leara.

33Nii baiha nacoaauneein leinjiin calaojoiin jetaote, Simeeonneein curuaateein jetao: “Cana Coaunerate, caque nererojoecaaeriha casinijerane coaraane jaun, nacoaauneein carai leinjiin canu calaohi tera”, nae jetao Leara.

34Nii baiha nacoaauneein leinjiin calaojoiin jetaote, Lebineein curuaateein jetao: “Inae caa nichatajaain aina calaohichaaunne jaunte, jerihane cacoelaain canu jerereein casinijerara”, nae jetao.

35Nii baiha nacoaauneein leinjiin calaojoiin jetaote, Jodaneein curuaateein jetao: “Ena cuhanena laen, Cana Coaunera coroajereeunnicha”, nae jetao Leara. Nii baiha jetaote, inae canaanai sirihane jianelu Leara.

Currently Selected:

Génesis 29: URA

Highlight

Copy