Génesis 26

Gerarau cuha Isacane

1Nii bana jetaote, nii jelai batane sacuritaain nelu mijitena, jaiti ecu ichaohalu Abaraaun amurene bana aihalune tocohaneein. Nii jaun jetaote, nii ichaoha Filisteeocuru curuaanaa Abimeleene jaa Gerarau jetao ichaoha cuelu Isaca.

2Nii Gerarau nihane jana ecu rai ecocohin jetaote: “Jiaonriha Egiptoo cuhinera. Nii ichei bihanune jaaunacha neein ichaoora. 3Aihane jaun, ena cuhaneecha caa atane que neein ichaoora. Canune caohachaain iniha neein ii coroatajanereeunnicha. Ii, ii nefoerateeuru, naaonjoaihunri raine satiin caa atane tereeunni, nitohaneein ichacaaunne coina inae chaca Abaraaun rai aitosihanulune jaunra. 4Chaennechu, arasijieniji jeeoneein nefaauruha ii nefoerateeurune coina, coroatajanenajaain, acaauru rai satiin caa atane tiha cureeunnicha. Niichoae tacaainechu, ii nefoerateeuru aina cuaain, satiin caa chauratane que nenacaauru cachaauru rausiajereeunnicha, 5quere tonoraain, jerichaaunne rijijieein neein, caitoonjoan tonoraain, relaanune tonoraain nihalu Abaraaunne corenihara”, nae rai ecocohin Cana Coaunera.

6Niritoha rai Cana Coaunerane jaun, Gerarau ichaoha Isacane jana jetaote, 7rai sinijiera niha Rebecane coitucuuruhane coina caje bajaauruha nii ecu ichaonacaaurune jana jetao, comasai nihane suujueein: “Canu bai niha natiinta”, nae acaauru rai coasinacaan Isaca, jataain caohatoha Rebecane jaun jereein coaracuruhane, coreniha sohin jaooruha nii ecu ichaonacaauru cachaaurune que suujua irihane jaun.

8Inae ecu carajaaojoaain nihane jaun jetaote, nirijieein neenejeein nii rai comasai Rebeca mucuhin cutujuaain nichaajiha Isacane jana jetao, acuujua cuhane cuaain coaraje Abimelee. 9Nii jaun jetaote, Isaca cotiharateein jetao:

“Aihana jaunna, ii comasai niha taa Rebecate”, naa rai Abimeleene jaun jetao:

“Eejeen, aca chujiarana”, naa Isacane jaun jetao:

“Chaanate jana ii bainiha beeita”, naa Abimeleene jaun jetaote:

“Aitocoaaun chuhisi. ‘Jereein coaraquichene jecha coreniha casohin cajaoriquiche’, naain coaucaaunne jaunne chuhisi aitoonra”, naa Isacane jaun jetaote: 10“Chaanate nitohaneein canacaanu cairichaaeratihane jereeita. Bana chunucoha canacaanu tabaauru, taa ii comasai aina chatohaneein niicha jerei ichacuruhane jana nihanete, jataain banejelanaala osa que canacaanu sarureeicha”, nae jetao Isaca rai Abimelee.

11Niritiin jetaote, satiin rai cachaauru rai jetao:

“Chunucoha caa cacha rerohecaain, rai comasai rerohecaerate, sohin jaonojoiniha cureeincha”, nae jetao Abimelee.

12Nii bajaanaa cuhane ecu temule jaa Isacane jana, coroatajaniha Cana Coaunerane jaun jetaote, caohachaain rai omarohane jaun, arajiin rai temulecuru taojiae. 13Nii jaun jetaote, jataain necoriquijiaain itolere siriin naaonjoaelu.

14-15Nitohanihane jaun jetaote, jataain arajiin carenero, baca, rai cachaauru, naaonjoaihunri sirihane jaun jetao, que necoelai caaun, jaiti ichaohane bana rai cachaauru que inaca Abaraaun amure bajeratei acau raauruhane jaan atane jachuuru fuhacoaaure jetao atane que Filisteeocuru.

16Niichoae tacaain jetaotechu, necoelai caaun:

“Chajaain caalai caje amuura. Inae jataain canacaanu amurijiriin necoriquijiaain nenaa jereeicha”, nae jetao Isaca rai Abimelee.

17Nii jaun jetaote, Gerara bichatane caje fauhin amuhin, nii atane macararo que cuhin jetao, ecu jacari caje nenaa que neloanariteein ecu ichoaelu Isaca. 18Nitohaneein jetaote, jaiti ichaohane bana rai inaca amure rai atane jachu acau raauruhane jaan Filisteeocuru funojoin atane jachuuru nacoaauneein bajeein jetao, jeelai curuaatihacoaalu inaca amurene jaancha que curuaatihacoae Isaca. 19Nii baiha jetaote, nii atane macararo teein, acau netaojianajaanu que atane bajeeuruhane jaun jetao, atane suujuau acau ajiarojoeriti mitunaja eruure Isaca cachaauru. 20Ne jetaote, acaauru rai niha nii acau mitunaja beein jetao, Isaca rai carenero beraihurera aina jetao ita cotaaihure nii Gerara batane macararo carenero beraiha nenacaauru. Nitohaneein coreniha ita cotaihuruhane jaun jetaote, nii acau mitunaja jelai atane jachu curuaate, “Ita Cotaihurunaja”, neein Isaca.

21Nii baiha nacoaauneein acau mitunaja atane jachu bajeeuruhane jana, coreniha ita cotaihuruha nacoaauneein, ecu nenacaauru nii carenero beraihurera aina rai cachaaurune jaun jetaote, nii atane jachu acau netaojianaja jelai curuaate, “Ita que Nejerateeurunaja”, neein Isaca. 22Nitohaneein ita cotaitocuruha nii acau coreniha ecu nenacaauru carenero beraihurera aina rai cachaaurune jaun jetaote, jelai caje coriaae amuhin, acau netaojianajaanu que, leeocha atane jachu baje Isaca. Nii jana, inae coreniha ita cotaihurenihane jaun jetaote, “Jianacoonneein Ichaonaanaja”, neein, nii atane jachu jelai curuaate Isaca. Nitohaneein jetaote: “Inae laen cau jianacoon raotojoeein ichaohin nenaa coina, caohachaain ichaa Cana Coaunerara”, nae jetao Isaca.

23Jelai caje coaauneein Bereseba cuha Isacane jana jetaote, 24inae ecu turuhane cojoanotiin cuhane rai ecocohin jetao:

“Canune chaca Abaraaun Coaunera neeunra. Aihane jaun, jiaonriha chatoanai que casiinera. Canune iniha nereeunnicha.

Canu cacha Abaraaun corenihane, caohachaain iniha nereeunni. Chaennechu, arajiin nefaauruha ii nefoerateeurune coina ichareeunnicha”, nae jetao Cana Coaunera, Isaca rai.

25Niritoha rai Cana Coaunerane jaun jetaote, ecu teein ajerichuru caje leinjiin rori jaain jetao, lenonecuru sohin mocohin jetao Cana Coaunera coroaje Isaca. Nitohaneein jetaote, ecu neloanaritihane jaun, acau netaojianajaanu que atane bajeeure rai cachaauru.

Raotojoeein neeuruhane coina Isaca aina rucuhecuruha Abimeleene

26Gerara caje amuhin, Bereseba ichaoha Isacane jana jetaote, Gerara caje coaauneein Isaca coaraa cue Filisteeocuru curuaanaa Abimelee. Nitohaneein coaraa cuhane jana jetaote, corihaniha cuure rai belaicha Ahuzat, rai soondarooru curuaanaa cafitaaneein nenaa Ficol, naaonjoaihunri. 27Nii jana acaauru rai jetaote:

“Chanuna cacoharaa uhiche, inae carautaain cacoharaeneeichene jaun inara atane caje casitaaichelu natiin”, naa acaauru rai Isacane jaun jetaote:

28“Coajian atiin niritoha canacaanu raine ichei aitocoaanura. Caohachaain ichorataaniha Cana Coaunerane coaracaanune jaunne ichoharaa uhacaanu, raotojoeein ita aina ichaonaa coina rucuhena coina. 29Aonaunejian ichei aitocoaanura. Nabana chatoanai baaso ichaain canacaanu aina neeine coataara. Coatiha chatohaneein ii rerohecaain nerejetohaacaanulu canacaanu. Nenacaaen nejiha itolere bana jataain ii belaain coujuriu ita belaichaneein nenaa tocohaneein nerejetocoaanulu. Nii jaunne inae amuhine jana jataain ii belaain ii rai necoihacaanulu. Nii jaunna caohachaain ii coroatajaniha Cana Coaunerane coaracaanune jaun, ii coaraa uhacaanu caa ichei aitocoaanune tocohaneein ita rai rucuhena coina”, naaure jetao Isaca rai.

30Niritocuruha raine jaun coroaeca beseta ichaa Isacane jaun jetaote, nainaain lenoneein acau coore. 31Nii cojoanoo janone nimichuneein jetaote, ecu nejesinajeein Cana Coaunera notaracae netiin jetao, ita rai rucuhecure, raotojoeein ita belaichaneein neeuruhane coina. Nii baiha jetaote, ita belaichaneein neeuruhane coaarateein Isaca rai necoeein jetao cauha cuure.

32Nii bananeein jetaote, atane niicha bajeeuri cuhane acau eruuruhane jaun jetao, Isaca rai turuhin biha cuure rai cachaauru. 33Nii acau netaojianaja atane jachu jetaote, “Seba”, curuaa que curuaate Isaca. Nii jaun jetaote, enanetojoeein Beresebaneein curuajae nii ecu nenaa nese. “Rucuhena”, naane jetaote, nii “Seba”, nae.

Ititia bene que necoasaijiaa Esaone

34Jena choonca jaanacanihane cuhane jetaote, Ititiacuru lauri Beri cacunu Jodii raelu jetao Esao. Chaaen jetaotechu jeelai Ititiacuru laurineein nenaa Eloon cacunu Basemata raelu. 35Nii coroatajai Esao comasaineein nenacaauru Ititia benecuru jetaote, Rebeca aina Isaca ichao auhacaaure.

Currently Selected:

Génesis 26: URA

Highlight

Copy