Génesis 25
25
Cetura aina Abaraauncha foerateeuri
(1Cr 1.32-33)
1Nii baiha jetaote, nacoaauneein necoasaijiaelu, Cetora neein niicha curuaateeuri que Abaraaun. 2Nii Cetora aina niicha siriilu calaohichuru jetaote, Simrami, Jocosan, Medan, Madian, Isbaco, Soha, naaonjoaihunrinelu. 3Nii Jocosan jetaote, Seba, Dedaan, naaonjoaihunri inacaneein nelu.
Nii Jocosan calaohi Dedaan caje nefoeratenaaneein jetaote neeurelu Asoreeocuru, Letoseeocuru, Leeomeeocuru, naaonjoaihunri.
4Nii Abaraaun calaohi Madian calaohichuru jetao, Efa, Eferi, Hanoco, Abida, Ereda, naaonjoaihunri. Satiin acaauru jetaote, Abaraaun aina Cetora foeratenojoineein nenacaaurunelu. 5Ne jetaote, nitohanihane saijieein, Sara calaohi Isacaacha, inae oha rai inaca Abaraaunne jana, itolere niicha sirii eroraneein nelu. 6Jana, nii leeocha enecuru aina niicha sirii calaohichuru jetaote, jaiti ichaohane bana, niicha sirii que belainajaain jetao, rai calaohi Isaca caje amuuruhane coina, enoto mitu uuri nichajai que nenaa atane que jetao letoanajaelu Abaraaun.
Oha Abaraaunne jana conautecuruhane
7Nii baiha neein jetaote, inae itolereneein lefasha caainsi choonca saoqui jaanacaain ichaohin jetao, 8jataain inae biinaa nihane caaun ohelu Abaraaun. Nitohaneein ohin jetaote, rai coitucueracuru aina niha cuelu.
9Inae nitohaneein oha Abaraaunne jana jetaote, rai atane rucuheca cuure rai calaohichuru Isaca, Isamaeli, naaonjoaihunri, Ititia laurineein nenaa Zoar calaohi Eforoon rai atane Mamere uuriniha enoto mitu jeloon nenaa Macpelau ajeri jioararo cuhane teein. 10Nii atane jetaote, Ititiacuru caje ichaohane bana coretelu acaauru atane bananu que Abaraaun. Nitohaneein jetaote, nii comasai Sara amure rucuhecuruhane jaaun teein jetao, ecu rohan teein Abaraaun rucuhecure. 11Nitohaneein oha rai inaca Abaraaunne baiha jetaote, “Ichaohin cana coaaraneein nenaa rai”, acau mitunajaau rohan ichaoha Isacane jana jetao, raotojoeein ichaohane coina cojiotae Cana Coaunera.
Isamaeli foeratenojoihuru
(1Cr 1.28-31)
12Caaurute, Sara coseenra Egipto bene Acara aina Abaraaun calaohi Isamaeli calaohichuru curuaacurune, acaauru inana que nunuheteein.
13Nebaihoti te, jauriaanejeein Acara calaohichuru ajichaneein nenaa nelu.
Que jauriineeinte nelu Sedara.
Que jauriineeinte nelu Abeli.
Que jauriineeinte nelu Mibasa.
14Que jauriineeinte nelu Misami.
Que jauriineeinte nelu Doma.
Que jauriineeinte nelu Masa.
15Que jauriineeinte nelu Adara.
Que jauriineeinte nelu Tema.
Que jauriineeinte nelu Jetora.
Que jauriineeinte nelu Nafisi.
Que jauriineeinte nelu Sedama.
16Caaurute Sara coseenra Egipto bene Acara aina Abaraaun calaohi Isamaeli calaohichuru lechoonca coroatajaihuri curuaacurune. Nii acaauru curuaacha que jetaote, rai natane curuaateein, nenajane maajeein curuaateein, naaonjoaain neeurelu. Le cacha cachaauru jetaote, jeelai cachaauruhacha curuaanaaneein nelu.
17Lefasha nichatachoonca caainsi jaanacaneein ichaohi ohin jetaote, rai coitucueracuru aina niha cue Isamaeli.
18Nii Isamaeli foeratenojoihuri jetaote, Havila aina Shur batane cataaun nenaa Egipto caje coarajeein nenaa Asiria coero cuhane jetao neeurelu, acaauru que nererojoecaeriin ecu neeuruhane jerecureniha acaauru araaichuru natiin.
Esao, Jacobo, naaonjoaihunri nejanoha
19Caate, “Naaonjoaainte ichoaelu Abaraaun calaohi Isaca”, naain que erenaane. 20Padan-aram cocoaicha Arameeocuru laurineein nenaa Betoheri cacunu Laban bai Rebeca raane bana jetaote, jena choonca jaanacanelu Isaca. 21Ne jetaote, canaanai sirisiniha Rebecane jaun jetao, coreniha Cana Coaunera bajae Isaca, canaanai sirihane coina. Nitohaneein Cana Coaunera bajaa Isacane jaun jetaote, coroatajaniha Cana Coaunerane jaun, nii baiha neeoriin, inae ausirine Rebeca.
22Ne jetaote, fafioneneeuruha nii canaanaihurune jaun, suri cuhane neein ita sooruhane jetao, jataain banetojoelanaala cunaane jaun: “Caritocojoai nejesinaneein sacuha cajabereeone, nenacae abaantaain ichaonaa nainihaaunta”, naa rai suujuane jaun, Cana Coaunera bajae Rebeca. 23Nitohaneein Cana Coaunera bajaane jana jetaote: “Ii suri cuhane niha coroata laurii cacha foerateranune jaunte, nejanoha ajiniha caje coaauneein ita soore. Nii rai nocoalate, jataain nii nihana amurijiriin nelateineein niha cureein”, nae jetao Rebeca rai Cana Coaunera.
24Nitohaneein jetaote, inae nejanoaane que tiha nii canaanaihurune jana jetao, fafioneneein janoanajae Rebeca. 25Nii jauriaanejeein nejanoanaa jetaote, couturi ujuhi lanajaain ujuitohane jaun jetao curuaateeure Esao neein. 26Que jauriineein nejanoanaa rai nocoala jetaote, le jera biji que Esao maicho siichaain nejanoaane jaun jetao, curuaateeure Jacobo neein.
Nitohaneein nii bereecuru janoaa Rebecane bana jetaote, caainsi choonca jaanacanelu Isaca.
Rai nocoala rai, aca nihana neein nihane rai neenihu tiha Esaone
27Nitohaneein inae fojoeein, enamanaaneein neeuruhane jaun jetaote, amuhin nesarina inaera cachaneein ne nii Esao. Jana Jacobo jetaote laen, nenaanajauhacha ichaonaa rautae. 28Nitohanihane jaun jetaote, jataain nii Esao belaain coarae rai inaca Isaca, nesarihane que lenoneein nihane jaun. Jana Rebeca jetaote, Jacobo rautaain belaain coarae.
29Nitohanihane jaun jetaote, jataain mijiintiin namu caje cauha uha Esaone jana, najiniha lenone jaa niha Jacobone jaun jetao:
30“Atiin nii lenone lanajaain ichanaa que caisihura, jataain mijiintohanune jaunne aitoonra”, nae jetao Esao, Jacobo rai.
Niritohane jaun jetaote, Edom neein, nii Esao curuaateeure. Acaauru ere cuhane “Edom”, naane jetaote, “lanajai”, nae.
31Niritohane jana jetaote:
“Jauriaanejeein nii cainananeein neeine rai neenihu teeu caraicha”, naa rai Jacobone jaun jetaote:
32“Tana mijitenacaaun ohajihanune coaraaineta. Inasiina inananeein nihanune rai nelateein nere nii caraineein neenihu, inae mijitenacaaun ohajihanu natiinta”, naa Esaone jaun jetaote:
33“Chajaain aihane, nii icheineein neenihu, caraineein nihane coina Cana Coaunera notaracae aitoone aonaera”, naain conujiha Jacobone jaun jetaote, nii nihananeein nihane rai neenihu tiha Jacobo raine coina jetao, Cana Coaunera notaracae aite Esao. 34Niritoha raine jaun jetaote, nii foroto niicha enoalai aina faan que Esao coroaate Jacobo. Inae nainaain lenoneein acau cohin jetaote, nii rai nocoala raineein neenihu tihane que chaque tonajelanaala jelai caje nimichuhin amue Esao.
Currently Selected:
Génesis 25: URA
Highlight
Share
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
