Génesis 24

Isaca comasainu arichatiha Abaraaunne

1Jataain itolere que coroatajaneein rausiaeca Cana Coaunerane jaun jetaote, jataain biinaanihane jaau tiaaojoaain jetao ichoaelu Abaraaun.

2Nii jaun jetaote, satiin rai niicha sirii erora rijijieein neein, satiin letonocuru coaaraneein acaauru bichauhenaneein nenaa que tacaain cotijiaain jetao:

“Canu anae asae ii biji metaain aihane, 3-4caa ena nihanune jaa Canaan batane bene que necoasaijiaa canu calaohi Isacane naihatejelanaala, naain catane nichae cuhin, caraaichuru bene que comasaijiaaine coina aihane, dede, chauratane, naaonjoaain Curuaanaa Cana Coaunera notaracae aitoone aonaera”, naa Abaraaunne jana jetaote:

5“Coatiha chujian naihatejerihaaunni niqui. Cha janajia ichareeun, ariha cuhanune jana casaauna jereniha ranunaneta. Nitohanihane chujia, nii ii calaohi amaanunete ne cajiniichaain, nii mituhilune jaa atane quera”, naa nii letono bichauhenane jana jetaote:

6“Jiaohine. Jiaonriha ucuae, nii canu calaohi amaainera. 7Cana Curuaanaa Cana Coaunerate, nii canu inaca aina caraaichuru atane caje canu rocohin, carai caa atane tihane coina aitelu, que inoaelu netiin ichaooruha canuhacha foerateeurine coinara. Acate, chajiniha rai letono anjera letohareein, caa canu calaohi comasai raa cuhi ucuhaji cajene coinara. 8Aihane jaun, cuhin, ariin, ruhine sainejeein ishaauna jereniha ranunane banaachate, cha ujuaihoneein nenereeini. Nete laen nainene nii charijieeiniji, ucuae canu calaohi amaainera”, nae jetao, nii letonocuru bichauhena rai Abaraaun.

9Nii jaun jetaote, nii fatoroon Abaraaun anae asae rai biji metaain jetao, nii calaohi comasai arihane coina Cana Coaunera notaracae Abaraaun rai aite nii rai letono. 10Nii baiha jetaote, lechooncaain camecho mucue nichoae cuhane coina. Nitohaneein jetaote, que belaihane coina nii rai fatorooncha sirii rucuhele caohacha janijiin amaain jetao cue, Mesopotamia batane que nenaa Nacor neseu, ichuuntoheri que airijiin, nii Abaraaun letono.

11Nitohaneein cuhin jetaote, inae nii neseu rohan turuha sona nalaacaain nii rai letonone jana jetao, nii rijiuuru acau raa cuuruha enecurune jaun jetao, nii niha leinjiin acau netaojianaja atane jachune jaau rai camechocuru suruaain, 12Cana Coaunera bajaain jetao: “Canu fatoroon Abaraaun Coaunera Cana Coaunera, esinae rauhijiriin canu fatoroon belaitohine coaarateein canu coroatajaneeu ena jerichaaunne rijijieein. 13Enene cau nesurucuaaun, caa leinjiin acau netaojianajaune jana, acau raa uuruha cau ichaonacaauru ranunaaurune jana 14jereeute, nii ranuna rai: ‘Atiin nii ii baichaje faaurihune caje acau coera’, naanune jana: ‘Saan ai. Nocoachujian, chajaautejia coe. Tana caa ii camechocuru rai netonai choroete acaauru netonai cooruhinera’, naaine ii letono Isaca comasainu que neeninu ranuna, que banihateein coaraain iicha rucujueicha. Aihane fatoroon Abaraaun belaitohine coitucuera”, naain jetao Cana Coaunera bajae nii Abaraaun letono.

15Jaiti niritiin, Cana Coaunera bajaae bajaaecane nainenihane jana jetaote, tajiha nojoaun ichoae baichaje baaibaaichaain uujiha leinjiin ranunane jana coaraje.

Nii ranuna jetaote, Betoheri cacunu Rebecane. Nii Betoheri jetaote, Abaraaun nejera Nacor calaohineein nenaane. Jana Betoheri neba jetaote Miricane.

16Nii jana jataain caohati eneneein chariji bana nii chuni quicha aina ichoaelanaala nenaa jetao nii Rebeca. Aca jetaote, nii acau nenaja atane jachu cuhane fauhin, rai baichaje nemoaain jelaiha cauha cuhane jana, 17racatihaain eruhin jetao:

“Atiin caa ii baichaje cuhane nenaa iicha amai esinaaeca que canu cocoaaura”, naa rai Abaraaun letonone jana jetaote:

18“Ai. Chajaautejian coera curuaanaa”, naain jetao, nii rijieeoritiin rai baichaje fauhin jetao, tebeecaain cocoae nii ranuna. 19Inae nainaain nii esinaaeca coha nii Abaraauncha letoaine jana jetaote:

“Tane, caa ii camechocuru rai netonai acau raain tete, jerecuruhane jaau tiaaojoaain cooruhinera”, naain jetao, 20nii esinaaeca cooruha camechocurune jaa cuhane nii baichaje nohi beroteein jetao, araai saain jelaiha soroneein cuhin, nii acau nenaja cuhane fauhin jetao, satiin camechocuru rai esinaaeca te nii ranuna. 21Nii tonohanau jetaote, rai erelanaala inauheneecha coaraje nii letononeein cunaa, esinae rauhijiriin nii bajaane rijijieein coroatajaniha Cana Coaunerane coaraane coina.

22Inae nitohaneein nainaain nii esinaaeca cooruha camechocurune jana jetaote, jataain coretiin oro caje nenaa anicho tijichae Rebeca asi que nii Abaraaun letono. Nii choae tacaain jetaote, coroatajaain oro caje nenaa biji lera jaraantohanai rocohin jetao, jerane nii ene biji que balurucae nii letono, nitohaniha acaauru ichaone jaun.

23Nitohaneein teein jetaote:

“Chaa cacununeein nenaa neeita. Atiin carai beune coitucuera. Nerihanacha nii ii inaca loreri asae enene caa canu corihacuru cachaauru aina nesurucuaaunne jaanu”, naa nii letonone jana jetaote:

24“Eeje. Canune Mirica aina Nacor calaohi Betoheri cacununeeu. 25Niha nesuruhichene jaanu, canacaanu loreri asae. Chaentechu ne jataain banejelanaala lenonecuruha nii camechocurune jaanu. Chaaen lanaai ajaena jacoro neloracurua camechocurune jaanu”, naain amuha nii ranunane jana jetaote, 26-27neseorihaain jetao:

“Jataainte itolere bana caohacha ichaaicha, canu fatoroon Abaraaun Coaunera cana coaunera. Jataain esinae rauhijiriin aitohane rijijieein, canu fatoroon belaaine jaunte, esinae rauhijiriin naraaichuru nenaja coero cuhane canu uhaaicha”, naain jetao, Cana Coaunera coroaje nii letono.

28Nii jaun jetaote, soroneein acaauru loreri asaae cuhin rai aitohane rijitojoeein jetao rai neba rai, “Naaonjoaara”, naain biha cue Rebeca. 29Nii jana nii ene cona Laban jetaote, soroneein cuhin, nii niha acau netaojianajaau nii cacha ariha cue, 30belaihane jaa biji lera aina anicho amaain turuhin, nii rai aitoha cachane jaa biha nii rai baine aonajihane jaun. Nitohaneein cuhin jetaote, nii niha acau netaojianaja atane jachune jaau rai camecho aina ecu niha nii Abaraaun letonone jana eruhin jetaote:

31“Caohachate ichae ichei Cana Coaunera turuhine coinara. Chajaaute loreri asae nesurunicha. Inasiinte cau airiniha sinicheeita, inae camechocuru nenajaanune maajeein rucuhecaaun natiinta”, nae jetao nii Laban.

32Niritoha raine jaun loreri asae cuha Abaraaun letonone jana jetaote, nii camechocuru caje rucuhele fauhin jetao, nii camechocuru coroatihane nainaain jetao, acau raa cue, que tijia culeeca rai corihacuru aina nii Abaraaun letonone coina Laban.

33Nitohaneein jetaote, inae lenonecuruhane coina nelauriaauruhane jana jetao:

“Coatiha jaiti lenonena nainihaaun canu, jaiti ichei canuhacha ichaneni benihanune jaunra”, naa nii Abaraaun letonone jana jetaote:

“Saan. Iicha benaa jerei beeuna coitucuera”, naa rai Labanne jaun jetaote:

34“Canune ii nejera Abaraaun letono neeunra. 35Jataain caohachaain nihane coina coroatajaniha Cana Coaunerane jaunte, coriqui nebaneein, carenero, baca, oro coata jataain coretiin nenaa, rai cachaauru, coseenraauru, camecho, asno, naaonjoihunri siri nii canu fatoroon Abaraaunra. 36Nii choae tacaaintechu, taolu rai sinijiera Sara aina leinjiin calaojoi, inae jataain biinaa niha natiincha. Nii jaunte, nii calaohi raineein satiin niicha sirii te nii canu fatoroon. 37Chaentechu canu rai, Cana Coaunera notaracae netiin: ‘Jiaonriha caa ena nihanune jaa Canaan batane bene que necoasaijiaa canu calaohine naihatejeeinera. 38Aihane jaun, nii ajiniha canu inaca araaichuru jana ranuna ariin, caraaichuru bene ranihu rai comasainu quera’, nae carai canu fatoroon. 39Nii janane rai: ‘Aiha niquicha Curuaanaa. Chajana canu aina unaa jereniha ranuna, eruhin uhanaa jerichaaunne janane’, naanu raine janate: 40‘Inoaelu caje coaauneein canu coroatajaneein niha Cana Coaunerane jaunne, nii rijijieein ii coroatajanerichaainne coitucuun. Nii jaunte aca, ii ajiniha rai anjera letohareein, caohachaain cuha chamunecoina, canu inaca aina caraaichuruneein nenacaauru bene eruhi canu calaohi comasainu quene coinara. 41Nii ichei ranuna tenaa jerecureniha canu araaichurune nihanatiinte, nii Cana Coaunera notaracaae carai aitohine jaa caje, caohachaain jianacoon neriquiincha’ ”, naain caletoaelu canu fatoroon Abaraaun.

42“Niritiin caletohalune rijieeine chuhisi, caa acau raauruhane jaau enene turuhin, canu fatoroon Abaraaun Coaunera Cana Coaunera rai: ‘Esinae rauhijiriin jeriha iicha belai Abaraaunne rijijieein ichaaine, caohachaain cuha camunecoinane, 43ichei aitoon, inae caa acau raauruhane jaau nihanune jaau, caa ii caje bajarichaaaunnine rijijieein canu coroatajaneeun. Aihate jauriaanejeein acau raa unaa ranuna rai: “Atiin nii ichei baichaje faaune caje acau coera”, naanu raine: 44“Ai. Chajaautejia coera. Inae nainaain cohine baihane, nii ichei camechocuru rai tereeunni cooruha acaauru netonaine coinara”, naaine nii ranuna canu fatoroon calaohi que banihateein rai comasainu que iicha rucujueeicha’, naain Cana Coaunera bajaaun.

45Niritiin Cana Coaunera bajaae bajaaecaaunne janate, jaiti nainaenihanune jana, nojoaun ichoae baichaje baaibaaichaain uha Rebecane jana coaarihun. Nitohaneein uhin, inae ecu turuhin, nii acau nenaja atane jachu caje acau raane janane rai: ‘Atiin caisihu nii esinaaeca quera’, naanu raine janate, 46nii rijieeoritiin rai baichaje fauhin: ‘Saan ai. Nocoa chujian. Jauriaanejeein coo iina, nii baiha ichei camechocuru raine maajeein tete cooruhinera’, nae caraicha. Niritiin, carai acau teein, carai camechocurune maajeein cocoaera.

47Nitohanihane jaunne rai: ‘Chaa cacunu neeina’, naain caje bajaanune janate: ‘Canune Mirica aina Nacor calaohi Betoheri cacunu neeunra’, nae caraicha. Niritoha caraine jaunne, rai nasi que leinjiin anicho tijichaain, jerane rai biji lera tihacoaain, 48neseeorihaain Cana Coaunera bajaain, Cana Coaunera coroajeein rachoojoeeun, rauhijiriin jeriha canu fatoroon Coaunera Cana Coaunerane rijijieein uhin, caa canu fatoroon araainequichene caje rai calaohi comasainu eruhanune jaun. 49Aihane jaun, esinae rauhijiriin canu fatoroon ere tonoraain, nii ii cacunu letohariquicheeinne, nii cacoritaelanaala rauhijiriin carai aitoone coitucuera. Jerichanetoherichaain nii letoaeneeichene nihanatiin carai beeuchene, coitucuhin quiicha ichanenu coitucuhanune coinara”, naa Abaraaun letonone jaun jetaote:

50“Saan, aiha chuhisicha. Satiin caa naitoonjoante Cana Coaunera aitoroatenojoine. Nii jaunna canacaanu nii lacohin, ‘Nainihei nitohanihaneta’, naain erenaa nainenihacaanura. 51Chajaaincha, caa Rebeca amaain, chajaain caunihu jelaihara. Aihate, nii ii fatoroon calaohi comasaineein neeine, nii jeriha Cana Coaunerane rijijieeincha”, naaure jetao Laban aina Betoherichuru. 52Niritocuruha raine jaun jetaote, Cana Coaunera notaracae netiin jetao, atane que nauri turuanacanejeein neseeonrihae nii Abaraaun letono. 53Nii baiha jetaote, arajiin coata coreti caje ichanohineein nenaa, chaaen cajione, naaonjoaihunri que Rebeca belaain, nii choae tacaain, rai neba, rai cona, naaonjoaihunri belaihacoae. 54Nii baiha jetaote, nii corihacuru aina jiniiquiin acau cohin, lenoneein, naaonjoaain jetao ecu sinihure.

Nii cojoanoo jetaote, janone nimichucuruhane jana jetao:

“Inae laen fatoroon loreri asae cauha curichaaunra”, naa nii Abaraaun letonone jana jetaote:

55“Saan. Jauriaa cau lechoonca janoneein canacaanu aina neeorihute, caa ranuna netonoai jauriaa canacaanu aina neeorimiincha. Nii baihate laen amanaa naineriquiincha”, naauruha rai cona aina nebane jaun jetaote:

56“Aiha chuhisi niquicha. Nena camu que caohachajeein ichaa Cana Coaunerane jaun, naineneeun nenacaaen carajaanunera. Nii jaunne, inae jelaiha fatoroon loreri asae cauha cureeunra”, naa Abaraaun letonone jaun jetaote:

57“Saan. Aihujia aihanera. Coanete jauriaa taa ranuna cotijiaain caje bajaacache. Toharihanicha aca”, naain jetao, Rebeca cotijiaain:

58“Chatohanereeita. Cureeinachuhisi esinae caa cacha aina”, naauruhane jana jetao:

“Ejeen. Curichaaun chujian ainara”, naa Rebecane jaun jetao, 59cuhane coina Rebeca jianecure, itolere bana beraichaneein nenaa ene aina curuaecaain, rai corihacuru aina jiniiquiin jelaiha cauha cuha Abaraaun letonone coina.

60Nitohaneein Abaraaun letono aina cuha Rebecane coina jianeein jetaote:

“Araai oharaancani cachaauru foerateraneein neeuchera cacoai.

Ii nefoerateeurute, leeocha lauri cachaauru aina nejerateeuruhane, acaauru amuritiin acaauru nese raain niha cuurureeinchera”, naain Rebeca cojiotaain jianecuruha rai cona aina acaauru nebane jaun jetaote, 61camecho ichoae nelauriaain jetao, Abaraaun letononeein nenaa caaijie cuure jetao Rebeca aina rai coseenraauru.

Nitohaneein jetaote, fojiaraauru jelai caje Rebeca amaain cauha cue ichuuntoheri que airijiin nii Abaraaun letononeein nenaa cacha.

62Nii jana jetaote, inae tururai neeuru jana, Isaca netonoai, “Ichaohin Cana Coaaraneein nenaa rai”, naain niicha curuaateeuri acau mitunaja caje Negueve batane cauha cue, ecu ichaohane jaun. 63Nitohaneein, nii Negueve batane que ichaohane jaun jetaote, inae sona nalaacanelalajeein rai loanari caje mituhin amuhemuheca cuna jaau jetaote, uuruha Abaraaun letono aina Rebecacurune jaa camecho coaari jetao nii Isaca. 64Nii nainiha jetaote, Rebeca netonai Isaca coaariin jetao, nii cunaja camecho caje fauhin jetao:

65“Chariji cachana taa cana que tacaain bero cuhane uujue”, naain Abaraaun letono caje bajaa Rebecane jana jetaote:

“Canu fatoroonte aicha”, naane jaun jetao rai buha que rai nomeri shotae Rebeca.

66Nitohaneein cuhin inae acaauru rene turuha Isacane jana jetaote, rai namu que jetao jitariin nereretae rai nii Abaraaun letono. 67Nii baiha jetaote, rai neba amure Sara loanari jacari caje nenaa asae Rebeca amaain jetao, ecu comasainu que rae Isaca. Nitohaneein Rebeca raain jetaote, jataain belaain siriin, suujua nunuaelu Isaca, neba amure coinaderaane caje.

Currently Selected:

Génesis 24: URA

Highlight

Copy