Génesis 23

Oha Sarane jana, conautecuruane.

1Lefasha coroata choonca caainsi jaanacaneein ichaohane baiha jetaote, 2Canaan batane que nenaa Hebron nese Quiriatarba neein acaauruacha curuaatei netiin jetao ohelu Sara. Nii oha Sarane jana jetaote, jataain coisiin coinaederae jetao Abaraaun. 3Nii baiha jetaote, nii niha Sara jaberocone jaa jelai caje mituhin jetao, nii ecu ichaonacaauru Ititiacuru rai jetao:

4“Cau nejelau cachaneein inara aina nihanune saijieein atiin canu rai atane banane que aansijieein inara atane que necoreteeuche, ecu canu sinijiera rucuheratihanune coinara”, naain atane bajaa Abaraaunne jana jetaote:

5-6“Canacaanu aonaaujiane, ichei aitocoaanune coitucuhicha curuaanaa. Iite, cau canacaanu jana, Cana Coauneraacha tenojoineein neeicha. Aihane jaun, caa canacaanu rai atane bana caohacha que teein, nii ii sinijiera rucuherateeura. Coatiha nerihaain caa canacaanu jana ii caje nii chuni atane bana chunaain neita”, naaure jetao Ititiacuru, Abaraaun rai.

7Nii jaun jetaote, nichaauraain acaauru que suujua acatihane coaarateein jetao:

8“Esinae rauhijiriin, cau canu sinijiera rucuheratihanune jeriquichene, atiin carai Zoar calaohi Eforoon rai aitocuchete, 9nii natane lucu Macpelau nenaa ajeri jioararo que necoreteeine canu raicha. Canune, core bajaane jeeoneein nii ajeri jioararo coretereeunnicha. Nii banate, esinae rauhijiriin caraineein niha cureein, cau nenaa atane que carai atane banara”, nae jetao Ititiacuru rai Abaraaun.

10Nii jana, ecu acaauru aina neein aonajiha Ititianeeuruhane araai nii Eforoonne jaun jetaote, aonajeeuruha naraaichuru coina, chaaen satiin aonajeeuruha nii nese coenorau situnacaaurune coina jetao Abaraaun rai:

11“Aihei jerihane curuaanaa. Canune atiin ii belaicheeunni nii atane que, nii ecu nenaa ajeri jioararo aina curuataaincha. Satiin caa canu araaichurute, nii atane que ii belaichaaunne coaaraneein neeurureein; chajaaincha ecu ii sinijiera rucuheratenihura”, naa Abaraaun rai nii Eforoonne jana jetaote, 12nacoaauneein, nii jelai cocoaichacuru que suujua acatihane coaarateein jetao:

13“Atiin canu coreniha caa ii coretena jerichaaunne jaa coriqui raaune, nii baiha caa atane que teein canu sinijiera rucuhenicha”, naa satiin aonajera urichoo Eforoon rai Abaraaunne jana jetaote:

14-15“Aiha chuhisi niquicha curuaanaa. Nete jena fasha monedanei core jeeoneein core caa atanera. Coatiha nii jeeoneei coreniha, nainihei ita rerohecaacaneta. Chajaaincha nii ii sinijiera rucuhechanihura”, naa Abaraaun rai Eforoonne jana jetaote, 16nii aonajeeruha satiin Ititiacurune jana, core bajaa Eforoonne jeeoneein jetao, coriqui janijiin nii atane corete Abaraaun.

17-18Nitohanihane jaun jetaote, Eforoon raineein niha nii Mamere uuriniha nenaa ajeri jioararo Macpelau nenaane baiha jetao, satiin Abaraaun raineein nedae nii atane que nenacaauru, nunacuru aina curaaequiin. Nitohanihane jaunte, nii coretiha Abaraaunne coaaraneein neeure nii jelai cocoaichacuru Ititiacuru, saain nii nese coenorau situnacaauru, naaonjoaihunri.

19Nii coretihane baiha jetaote, nii Canaan batane nenaa Mamere uuriniha Macpelau nenaa ajeri jioararo cuhane jetao, rai sinijiera Sara rai atane rucujue Abaraaun. Nii Mamerete Hebronneein curuaateeure enanetojoeein.

20Nitohaneein jetaote, inae que banijiaain atane siriin, que nenaa ajeri jioararo eroraneein ne Abaraaun, ecu rai sinijiera rucuhecane coina rai necoreteeuruha Ititiacurune jaun.

Currently Selected:

Génesis 23: URA

Highlight

Copy