Génesis 22

Jataain esenetaa Abaraaunne coujuha Cana Coaunerane

1Nii baiha neenejeein jetaote, jataain esenetaa Abaraaunne coujuhin coaraane coina jetao, Abaraaun bajae Cana Coaunera. Nitohaneein bajaane jana jetaote:

“Caune neeunra”, naain tonoraa Abaraaunne jana jetao:

2“Nii acaihaniji jataain belaain iicha sirii ii calaohi Isaca amaain, Moriha batane cunihura. Chaaen inae nii ichei quiicha beeni ichatane ecuuno turuhine, nii ii calaohi sohin carai mocoora”, nae jetao Abaraaun rai Cana Coaunera.

3Niritoha rai Cana Coaunerane jaun jetaote, nii cojoanoo janohetiin nimichuhin, nii cabario rijijieein nenaa asno ichoae nelauriaain cuhane jaanu teein, niicha mocoheni mocohane jaanu que enuhacuru raain jetao, nii rai Cana Coauneraacha beeni ichatane ecuuno coinetiha cue, rai calaohi Isaca, chaaen coroatajai letonocuru, naaonjoaain aina Abaraaun.

4Inae nii cuuruhane nichata janone cuhane jetaote, coriaae caje coaauneein, nii niicha coinetei jelai coaraain jetao:

5“Cau nedaauche caa asno aina. Caa canaanaaicha que jerajejeeinne naain curichaanuhin. Inae Cana Coaunera coroajeein bajaacaanune nainacaanunene, jelaiha cauha urichaanuhincha”, nae jetao, nii aina cunacaauru coroatajai letonocuru rai Abaraaun.

6Niritiin jetaote, niicha mocoheni mocohane jaanu que, nii Isaca que enuha ruhacaerateein jetao, anojooa aina usi amaain cue nii rai calaohicha que jerajejeein Abaraaun. 7Nirijieein cuujueeuruhane jaun jetaote, rai inaca Abaraaun rai jetao: “Baba”, naa Isacane jana jetaote: “Cha naate canaanai”, naa Abaraaunne jana jetao: “Inae niha jatoroaain enuha, usi, naaonjoaain. Chu jana ne canaacha mocoheni carenero”, naa Isacane jana jetaote:

8“Cana Coaunerate canaacha mocoheni que leinjiin carenero tereein canaraicha canaanai”, naain jetao tonorae Abaraaun.

Niritiin jiniiquiin cuujueein jetaote, 9inae nii rai aitoha Cana Coaunerane jaau turuhin jetao, ajerichuru caje leinjiin rori jaain, nichoae enuha codoriaain jetao, rai calaohi Isaca ichojoaain, nii rori ichoae nenaa enuha ichoae jetao, loroae Abaraaun. 10Inae Cana Coaunera rai nii calaohi sohin mocohane coina anojooa mucuhane jana jetaote, 11dede caje coaauneein jetao:

“Abaraaun, Abaraaun”, naain bajaa Cana Coaunera letono anjerane jana jetaote:

“Caune neeunra”, naain tonoraa Abaraaunne jana jetaote:

12“Coa ichaajenihane chatohaneein nii ichalabi cunaitaara. Inae laen esinae rauhijiriin, caitoonjoan coasilanaala tonoraain ichaain neeine coaracaaunra; ichaaje nii acaihaniji ichalabi bajaanu ii cajene jana tenaa jereeine jaunra”, naain beratiha anjera que Cana Coaunerane jana jetaote, 13leinjiin nuna laaojoiri uune que jetao, jicho que nemucuhin tijijiae leinjiin carenero. Nii coaariin jetaote, raain, nii rai calaohi coreeraniha teein, Cana Coaunera rai nii carenero sohin mocoe Abaraaun. 14Nitohanihane jaun jetaote: “Cana Coaunerate, canaacha latei terane”, naain jelai curuaate Abaraaun. Nitohanihane jaunte: “Ichatane ecuunoteeinte cana rai canaacha latei te Cana Coaunera”, nanajaaoncure enanetojoeein jataain chaelai latecuruhane cachaauru.

15Nii jana jetaote, dede caje coaauneein Abaraaun bajaane coroata sate, nacoaauneein Cana Coaunera letono anjera. 16Nitohaneein bajaain jetaote: “Cana Coaunerate aite: ‘Caa catohaneein quere tonoraain, acaihaniji ichalabi tenaa jereeine jaunne, esinae rauhijiriin caraajenihane ichei aitoon, 17jataain ii coroatajanichaaunne, arajiin nefaauruha dede que nenaa arasijie aina cucuana auhaniha nenaa carene catuniji jeeoneein ii nefoerateeurune coinara. Nii choae tacaaintechu, acaauru que nejeratenacaauru amuritoha cuurureeincha.

18Jerichanejeeintechu ii nefoerateeuru aina cuaain rausiaenojoineein neeurureein satiin lauri lauri nenacaauru cachaauru, quere tonoraain neeine jaun’ ”, nae jetao Abaraaun rai anjera, niritiin aitohane coina letoaa Cana Coaunerane jaun.

19Rai niritoha anjerane baiha jetaote, nii nedaauruha coroatajai rai letonocurune jaau jetao, jelaiha cauha cue Abaraaun. Nii caje coaauneein jetaote, jiniiquiin, jelaiha nii ichaohalu Abaraaunne jaau Bereseba cauha cuure.

Nacor calaohichuru

20Nii baiha neenejeein jetaote, Mirica aina inae calaohicha nii rai nocoala Nacorone coitucue Abaraaun. 21Nii jauriaanejeein nejanoanaa rai calaohi curuaa jetaote Uzne. Que jauhequiin jetaote, nejanoaelu rai nocoala Buz. Nii baiha jetaote, nejanoaelu Aram inacaneein neeninu Quemoeri. 22Nii baiha nejanoanacaaurulu jetao Queseri, Haso, Piridasi, Jiridafa, Betoheri, naaonjoaihunri. 23Nii Betoheri jetaote, Rebeca inacanelu. Caa fosaneeuri jetaote, nii Abaraaun ocoala Nacoro aina Mirica calaohichurunelu.

24Chaaen jetaotechu, comasai rijijieein niicha sirii Reeuma aina calaojoilu nii Nacoro. Acaauru jetaote, Teba, Gaham, Tahas, Maaca, naaonjoaihunrinelu.

Currently Selected:

Génesis 22: URA

Highlight

Copy