Génesis 21

Nejanoaa Isacane

1Inae Abaraaun rai aitohalune jaun, nii naitoonjoan rijijieein ichaa Cana Coaunerane jaa que inae tihane jaun jetaote, 2ausirineein leinjiin calaojoi jetao Abaraaun aina Sara, inae jataain biinaaniha natiin.

Nii rai aitohalu Cana Coaunerane que tihane jana nejanoaa nii Sara aina niicha sirii calaohine jana jetaote, 3-4Isaca neein curuaateein, nii rai aitohalu Cana Coaunerane rijijieein jetao, fosa janoniha nejanoaane cuhane jetao, rai jaberoco cari macohi sae Abaraaun.

5Nii nejanoaa rai calaohi Isacane bana jetaote, lefasha jaanacanelu Abaraaun.

6Nii jana jetaote, rai aitohalu Cana Coaunerane jana, coenaalune coacuhin jetao: “Coenanaatoojoaain aitohalu Cana Coaunerane jaunne coenaaunlu. Nena laen ena rachoojoenaa caaun coenaaun. Nii rijijieeintechu rachoojoenaa caaun coenaa cuurureein satiin caa canaanai sirichaaunne coitucuurera cachaauru. 7Niheilu niqui nii chuni, ‘Naaonjoaainte, calaohicha curiquiicha’, naain Abaraaun rai erei. Nete, esinae rauhijiriin Cana Coaunera nihane jaun, coitucuhane jaun, niritiin bihalune jaunne, inae jataain biinaanihane sainejeein, aina leinjiin calaojoihunra”, naain jetao, suujuau ere Sara.

Abaraaun loreri caje sitanojoiniha rai calaohi Isamaeli aina Acarane

8Nii jana inae foheca nii Isacane jana jetaote, sisihane jianihane coina bitoae rai neba. Nii bitoaa rai nebane bananeein jetaote, coroaeca beseta ichae Abaraaun. 9Ne jetaote, nii Egipto bene Acara aina Abaraauncha sirii rai calaohi jetao, Isaca batiin rerohecaane coaraa Sarane jaun jetao, nii rautaenihane jaun Abaraaun rai jetao: 10“Rai calaohi amaain aina amuhine taa cana coseenrara. Caa cana coseenra calaohi, nainihei canu calaohi Isaca raineein nenaa leruhin raaneta”, naa Sarane jaun jetaote, 11jataain coinaderae Abaraaun, esinae rauhijiriin rai calaohi niha natiin que aitoha Sarane jaun.

12Nii coinaderaane coaraain jetaote: “Coa chaque tonajiha nii ii coseenra aina inara calaohi canaanai quera. Nii ichei aitoha Sarane rijijieeincha ichaaura. Nii ii calaohi Isacate, ii inamacooru foerateraneein nereeincha. 13Jerichanejeeinnechu, nii ii coseenra calaohi coroatajaniha cureeunni, arajiin le lauriin neenihuru cachaauru foerateraneein nihane coinara, ii calaohineein nihana jaunra”, nae jetao Abaraaun rai Cana Coaunera.

14Nii cojoanoo janone jetaote, jataain janohetiin nocohejeriin nimichuhin jetao, Acara aina Isamaeli rai, neniha ucuaae acaune jaun, cuujueein acaauruacha coheni que jacari caje ichanohineein nenaa cuhane esinaaeca curujuaain, faan aina te jetao acaauru rai Abaraaun. Nii faan aina acau teein jetaote, jitariin acaauruacha amaaeni ruhacaerate Acara que Abaraaun.

Nitohaneein nii aina niicha sirii calaohi Isamaeli teein rai necoiha Abaraaunne jaun jetaote, nii cunajaanu coitucuelanaala jetao, Beresebau nenaa cacha areroo amuhemujue Acara.

15-16Nii jana inae saa nii jacari cuhane nenaa esinaaecane jaun jetaote, nii neniha niicha coheninune jaun, nabana notaracae oha nii canaanaine coataa jetao, enuha laaojoiri coforacaa asae teein jetao, nita caje cutiin nelauriaa cue nii rai neba.

Nitohaneein caje amuha ratiriinne jana jetaote, chanae nii canaanai.

17Nii chanaa nii canaanaine aonaa Cana Coaunerane jaun jetaote, dede caje coaauneein rai anjera que nii Acara bajaerateein jetao: “Chate ichaaita Acara. Coa casiin tonajihara. Cana Coaunerate, nii nihane jaau neein chanaa nii canaanaine aonajera. 18Chajaain nii canaanai ariin rai biji que ranihura. Jiaonriha jianeeinera. Canune coroatajaniha cureeunni arajiin le lauriin neenihuru cachaauru foerateraneein nihane coinara”, naain jetao rai dede caje coaauneein berate rai letono anjera que Cana Coaunera.

19Niritiin jetaote, nii niha esinaaecane jaa jelai coaarate Acara que Cana Coaunera. Nii jaun jetaote, coaraain, nii jacari caje nenaa acau curu nemoaain jetao, que Isamaeli cocoae rai neba.

20-21Nitohaneein coroatajaniha Cana Coaunerane aina fohejeein jetaote, nii neniha cachane jaau Paran ichaohin tenuna que sonaana inaeraneein nelu nii canaanai. Nirijieein neenejeein, inae ichauhenanihane jana jetaote, Egipto bene que jetao, comasaijiaelu rai neba.

Ita aina raotojoeein ichaooruhane coina Abaraaun rai aitoha Abimeleene

22Nii bana jetaote, nii rai natane beraihurera soondarooru curuaanaa Ficol que corianeraain jetao, Abaraaun coaraa cue aina irihane coina Abimelee. Nitohaneein cuhin Abaraaun rene turuhin jetaote:

“Jataain ii coroatajaniha itolere que Cana Coaunerane coaracaanura. 23Aihana jaun, esinae rauhijiriin Cana Coaunera notaracae, ii belaain ii coaracaaunlune rijijieein, canu belaain canu coaraain nii chatohaneein canu tenereeini, canu bereecuru, quiicha foerateeuri, canu cachaauru, naaonjoaain nichaanune aihane ajiniha, ena caa neeine jaau netiin Cana Coaunera notaracae aitoote aonacaara”, naa Abimeleene jana jetaote:

24“Esinae rauhijirin Cana Coaunera notaracae, cacoelaaine rijijieeine, canuhetonai ichoelaicheeunni niquicha”, naain jetaote:

25“Nete caraajenihane quiicha bajeineein niha caa atane jachu acau netaojianaja natiin, cacaje ruluhin neeurelu ii cachaaurura”, naa Abimelee rai Abaraaunne jana jetaote:

26“Coatiha enanetojoeein nii niritiin carai ereeine jaa coitucuhin nihaaun. Chanuna chajaain rijijieein beneeilu niritiin. Chachaainti nitohanai ichaeluta”, nae jetao rai Abimelee.

27Nii jaun jetaote, carenero, baca, naaonjoaain mucuhin, Abimelee rai teein jetao, nii bananeein jiniiquiin caohachaain ita belaain neeuruhane coina jetao, ita rai rucuhecure Abaraaun aina Abimelee. 28Nitohaneein itarai aitocuruhane baiha jetaote, coaiteen caainsi couturineein rai carenerocuru rocohin jelai tiha Abaraaunne jaun jetaote:

29“Chanuna nii caainsi couturineein, carenero elonaai”, naain caje bajaa Abimeleene jana jetaote:

30“Caa caainsi couturineein, ichei quiicha tei carenerote, caraajenihane taa atane bajeein, caa acau mitunajaanu ichacaaunne jaa coujunacanera”, nae jetao rai Abaraaun.

31Nitohanihane jaun jetaote, Bereseba neein nii acau netaojianaja jelai curuaateeure, ecu jiniiquiin ita belaihuruha Cana Coaunera notaracae netiin coina aitocuruha Abimelee aina Abaraaunne jaun.

32Inae nitohaneein Abaraaun aina ereeuruha nainaain jetaote, Filisteeoneeuruhane nenajau cauha cue Ficol aina Abimelee.

33Nii Beresebau jetaote, leinjiin tamarisconeein curuajaain nenaa enuha temuhin jetao, chariji bana nitajenaa charaneein nenaa Cana Curuaanaa Cana Coaunera bajaae bajaje Abaraaun.

34Nitohaneein jetaote, jataain carajaain, Filisteeocuru atane ichoaelu Abaraaun.

Currently Selected:

Génesis 21: URA

Highlight

Copy