Génesis 20

Abaraaun comasai raa Abimeleene

1Nii Mamere rai encina neeojoaaihu ichaohane caje amuhin jetaote, Cade, Shur, naaonjoaain cataaun nenaa, Negueve batane que nenaa Gerara nese ichaoha cue jetao Abaraaun.

2Nitohaneein ecu ichaohane bana jetaote, jelai cocoaichacuru rai bainiha comasai Sarane be jetao Abaraaun. Nii jaun jetaote, rai comasainu que jetao nii Sara raerate, Gerara curuaanaa Abimelee. 3Ne jetaote, nii raeratihane cojoanotiin cuhane sinihane jana jetao: “Oriquiin, sinijieraaonaneein nenaa ene raina jaunra”, nae jetao, Abimelee sinihu Cana Coaunera.

4Ne jetaote nii chatohaneein, nii ene tenihane jaun jetao, nii chaque tonajelanaala: “Canu Curuaanaa, inasiina baaso ichaelanaala nenaa sohine coina nenaa neeine coalanaala, nitohanai ichareita. 5Abaraaunte chuhisi raajenihane carai, ‘Rai baijie caa ene’, naane jana, caa ene netonai, ‘Rai conajae Abaraaun’, naane jaun nechuhisi, nii chatohaneein baaso ichacaaun ainane coina coacuelanaala, caohacha coacuhin raaunra. Aihane jaun, coatiha nii chatoanai baaso ichahaaunta”, naa Abimeleene jana jetaote:

6“Aai chuhisicha, raotojoeeinne caohacha nejesinaa chaque coacuhin raaine coitucuunra. Nii jaunna chujia, nii chatohaneein baaso ichaain dadaaine naihatejeneeun, nabana caque nejeratenaa tocohaneein neosateeine coataara. 7Aihane jaun, chajaain ena nii quicha rai nii sinijiera cainaaunra. Acate, canu ere bera profeta nihane jaun, ii coreniha, canu aina ereereca cureein ichaohine coinara. Esinae rauhijiriin cainaeneeinete, ii cachaauru, ii calaohichuru, naaonjoaihunri aina jiniiquiin ooriquicheeincha”, nae jetao Abimelee sinihu Cana Coaunera.

8Nii jana, inae janohane jana jetaote, janone nimichuhin, jitariin rai cachaauru cotijiaain, nii aitoha Cana Coaunera, rai sinihune rijitojoeein biha acaauru raine jaun jetao, aonaain jataain casihure.

9Niritiin acaauru rai bihane baiha jetaote, Abaraaun cotijiaain jetao:

“Chaanate catohaneein canacaanu terateeita. Chaquena ichoaijiaain nihacaanute, catohaneein osa tabai que casaruhin, canu cachaauru aina curuaecaain canacaanu cairichaaeratenaa jereeine coinata. Coatiha caohachaai nitohanai ichaain nihacaneta. 10Tonaain coacuhinte, caa catohaneein cacoritaaita”, naa Abaraaun rai Abimeleene jana jetaote:

11“Aihanu chuhisi. ‘Nihei jecha chuni caa jana Cana Coaunera que suujua acateein nei cacha’, naanune jaunne chuhisi, nabana casinejera coreniha casohin cajoaera coataa aitoonra. 12Esinaete chuhisi niqui rauhijiriin canu baineein ne, canu inaca cacununeein nihana jaun. Coatiha niqui canu neba caje najanonaa neein nihei. Nii jaunne, nitohaniha cana ichaone jaun, aina ita raain nihacaanulu.

13Inae canu inaca loreri caje mituhanune coina carai aitoha Cana Coaunerane jaun, inae jelai caje uhanune rai, ‘Chunijihun turuhacaanune jaauru, “Acate canu conanera” ’, naane coina rai aitoonlura”, naain jetao Abimelee tonorae Abaraaun.

14Niritohane jaun jetaote, jelaiha Abaraaun comasai Sara cainaa Abimelee. Nii comasai cainaane ichoae tacaain jetaotechu, carenerocuru, bacaauru, rai cachaauru, coseenraauru, naaonjoaihunri que belaain jetao:

15“Caa atanete canu que banijiaain nenaane. Aihane jaun iicha jerei jelai janijiin, iicha rautaihu ichaoora”, nae jetao Abaraaun rai Abimelee.

16Niritiin jetaote, Sara rai netonoai jetao:

“Caa ii cona rai quiicha teeurite, leoharaancain monedani coata jataain coretiin nenaa jeeoneei coreneein core. Acate, ene caohachaneein neeine coitucueratereein satiin caa ii aina nenacaauru que. Coatiha nerihaain chuni, nii coreniha ichei baasoneein ereita”, nae jetao Sara rai Abimelee.

17Nii jana jetaote, acaauru rai Cana Coaunera bajaa Abaraaunne jaun jetao, acaauru coroatajaniha Cana Coaunerane jaun, rai comasai aina jiniiquiin nerautae Abimelee. Jerichanejeein jetaotechu nerautaaure, satiin nii Abimelee coseenraauru, rai cachaauru comasaihuru, rai naraaichuru comasaihuru, naaonjoaihunri netonoai jetao nerautaaure. 18Nitohaneein jetaote, Sara coreniha bereeconaa inaaurenihane coina, acaauru benecuru cojiotaa Cana Coaunerane caje jetao nerautaaure.

Currently Selected:

Génesis 20: URA

Highlight

Copy