Génesis 19

Gomorra, Sodoma, naaonjoaain itajiha Cana Coaunerane

1Inae sohane jaun enanejeein nocohejihane que jiniichaain jetaote, tajiha turuha uure Sodoma nii corotajai Cana Coaunera letono anjeraauru. Nii jana jetaote, nii neseu coenorau netaojiaauruha cachaaurune jaan lauheque jetao Loto. Nitohaneein jetaote, tajiha uujueeuruha nii Cana Coaunera letonocurune jana, acaauru coaariin nimichuhin acaauru que tacaain comalenajaain jetao, atane que nauri turuanacanejeein nenoracaain ranajaain jetao:

2“Curuaanaacuru, Chajaauchete inaraacha jerei icharanichaaunne loreri asae enohin, ecu janoichera. Ecute nainequiche, inara tijia culeequichenera. Inae janohane janate nainequiche amunaa jeriquichene amuhichenera”, naa acaauru raine jana jetaote:

“Inae nainejerichaain niriimiicha. Cajihane bero cuhane chunijihun janorichaanuhicha”, naaure jetao rai.

3Ne jetaote, aina jataain cuuruhane jereein, acaauru conujiha Lotone jaun jetao, inae tabiicha nere tonoraain jiniichaain loreri asae cuure. Nitohaneein cuhin jetaote, inae loreri asae turuhin, jataain caohati lenone, jorerera colane ichanohi faan naaonjoaihunri jaain que acaauru coroaatiha Lotone jaun jetaote, que lenonecure nii rene turunacaauru.

4Nii jana jaiti netoocurenihane jana jetaote, satiin nii Sodoma nese cocoaichacuru cachaauru jetao, biinaacuru, enamanaacuru, naaonjoaihunri que jasisiin, loreri curuacaain netaojiaain jetao:

5“Chute neeure caa ena janotiin ii loreri asae turunacaauru cachaauruta. Chajaain acaauru mitaaura. Acaauru aihane nesuruna jerichaanura”, naain jetao Loto rai nujuae soaaichuruhane jaun jetao, 6jianacoon acaauru rai mituhin jetao, caohatiin acuujua fuera fuhin, acuujua que najaaoriteriin jetao:

7“Atiin canu coreniha jiaonriha jataain baaso ichana coaauquichenera, quiicha belaihuri. 8Caute neeure coroatajaain canu cacunucuru, jaiti chariji bana chuni quicha aina ichaohin nelanaalara. Tane acaauru mitaete, acaauru aina inaraacha jerei ichaquichera. Coa chatohaneein baasoneein, caa canuhacha cotihacuri turunacaauru cachaauru tenaa coaaucachera”, naa acaauru rai Lotone jana jetaote nere tonoraelanaala:

9“Aihanete ne, naain caalai caje amuhachaaura. Nainihei ii nejelau atane caje unaaneein, canacaanu letoaainera. Enane, nii jataain acaauru ichana jerichaanune amurijiriin, chatohaneein cheterichaanuhin”, naain jetao, nii rijieeoritiin nii Loto mucuhin jiununuhin jetao, acuujua rohan nichuuntaaure acuujua saruhitocuruhane coina. 10Ne jetaote nii jana, biji tochataain taraacotaain enoaain, acuujua fuera fuhitucure nii Loto rene turunacaauru anjeraauru.

11Nitohaneein jetaote, maosaneein nii airiniha nenacaauru cachaauru tihacoaauruhane jaun jetao, biinaacuru aina jiniiquiin, maosaneeuruha enamanacaaurune jaun jetao, cajihaneein amuhemujueein acuujua arihuruhane jana, erusichureniane jaun, inae arihuruhane coiinteeure.

12Nii jana jetaote, Loto rai:

“Niha charaaichuru caa janane, chajaain ii cacunucuru, ii calaohichuru, chacanacuru, naaonjoaihunri aina satiin caa nese que iicha sirichuri amaain ena caa nese caje coriaae amuura. 13Caa nese itajerichaaunine jaunne aitoonra. Inae jataain, caa nese que ichaonacaauru cachaauru que nererojoecaane jaunte, caa nese itajihacaanune coina canacaanu letoaain ne Cana Coaunerara”, naauruha nii rene turunacaauru anjeraaurune jaun jetaote, 14rai nacananeein neenihuru coaraa cue Loto. Nitohaneein cuhin jetaote, acaauru rene turuhin jetao:

“Chajaain nimichucuchete, caalai caje neruujueein amuhacachera. Caa nese itajerichaain Cana Coaunera jaunne aitoha uunra”, naa acaauru rai Lotone jana jetaote, esenetaaurene niqui nii nacananeein neenihuru. 15Nii jana, inae nemataracaa janonaane jana jetaote:

“Chajaain caa nese cairichaain itajihacaanune onaa caje nichotenaa jereeine, erojoeein nimichuhin caalai caje caa ii sinijiera, caa coroatajai ii cacunucuru, naaonjoaihunri amaain amuura”, naauruha nii Loto rai anjeraaurune jana, 16caeneenejiha Lotone jaun jetaote, cairichaaojoaain aca coaraa Cana Coaunera jaun jetao, rai sinijiera, cacunucuru, naaonjoaain aina curuaecaain biji que mucunajaain jetao, nii nese caje mitanajaaure anjeraauru, onaa caje nichoteeuruhane coina.

17Inae nii nese caje mitanajaain jetaote:

“Soroneein cunihute nichoteeicha. Jiaonriha inacuhin najaorocoaain ichaaijie nichajai coaraainera. Niheichu atane macararo que inaauna nainiheeita. Rauhijiriicha ichatane janaacha cuhin soroo ichaonaa jereeinera”, naa rai leinjiin anjerane jana jetaote:

18-19“Jiaohine atiin nohanera Curuaanaacuru. Inarate inae jataain banejelanaala caohachaain caniha neeichene jaun, onaa caje canu ichoteratequichera. Nena ichatane jana cuhin soronaa naineneeun, nabana bero cuhane cuujihanune jana, canu eruha nii inaraacha ichaaine ohanune coataara. 20Caa cajete, ichuunejeein ne leinjiin nese laaojoiri; ucuaaene nainereeun cuhin sorohanunera. Jerecuchene ucuaae cuhin onaa caje nichotenicha. Nii nesete laen, esinae rauhijiriin aansijiera”, naa Lotone jana jetaote:

21“Nii carai aitohine aonajihanura. Nii cacaje bajaaine rijijieeine ichareeunnicha. Coatiha nii aitohine jaan nese laaojoiri itajerihaaunnita. 22Chajaaincha aihane ucuaecha cuhachanihura. Coatiha jaiti nii cuhine jaun turueneeine jana, nii chatoanai icharihaaunnita”, nae jetao nii leinjiin acaauru caje nenaa.

Nii jaun jetaote, Zoar neein nii nese curuaateeure, Ebereeo ere cuhane “Zoar”, naane, “aansijieein”, naane jaun.

23-24Inae janohane jana, Zoar turuha Lotone jana jetaote, asojoere, usi, naaonjoaain nalaa eloniji amuneein, Sodoma, Gomorra, naaonjoaain ichoae Cana Coaunerane jaun jetao, 25satiin ecu ichaonacaauru cachaauru, nii atane macararo que nenacaauru ajenacuru, naaonjoaihunru jetao, satiin mocohacoaain nitajihacoaaure.

26Nii jana Loto comasai jetaote, rai lana caaijie cuujueein rai janori nichajai coaraa najaoracaaine jaun jetao, tebe jaberoconeein ecu nerotohin nedaachae.

27Nitohanihane cojoanoo, Cana Coaunera aina irihalune jaau, janohetiin cuhin, 28Sodoma, Gomorra, naaonjoaain nichajaihuri atane macararooru coaraa Abaraaunne jana jetaote, ocoana mocooruhane aihane tocohaneein sichoohaque jetao, satiin ucuajai batane sacuritaain suruaa.

29Nitohaneein jetaote, nii atane macararo nenacaauru Gomorra neseu, ichaoha Lotone jaa Sodoma nese naaonjoaihunri itaje Cana Coaunera. Ne jetaote, Abaraaun coacuhin, nii rai calaohi riji Loto ichoterate, nii niicha itajeeni nese caje rocohin.

Amonita, Mohabita, naaonjoaihunri foerateracuru

30Nitohanihane jaun jetaote, nii Zoarau ichaohane coasihane jaun jetao, ichatane neeojoaihun cuhin, atane jioararo cuhane ichaoha cuelu, rai coroatajai cacunucuru que nichatajajeein Loto.

31Nii cacunucuru que nichatajajeein nihane jaun jetaote, rai nocoasai rai jetao:

“Inae jataain biinaaniha caa cana inacara. Jana nihei chunijihun quicha satiin caa atane sacuritaain, nitohaniha cana ichaone jaun cana raeranuta. 32Aihane jaun, coanete caa cana inaca ajelaacate, aina siniin que inacateein leinjiin canaanai sirichaara”, naaure jetao ita rai.

33Niritiin bino que nii rai inaca ajelaain, aina siniha nii cacunune jana jetaote, coitucuene rai inaca. Nihei jetao, nii nimichuhane coitucuhi. 34Nii cojoanoo jetaote, nocoasai rai:

“Aonaaun. Enene cojoanotiin cuhanene, cana inaca aina enohin sinihunnicha. Aihane jaun, coanete nacoaauneein ajelaacate, carerojoariha iitonai aina enohin siniicha. Nii banate, que inacateein jiniiquiin canaanai siririchaanicha”, naain jetao, 35nacoaauneein bino que rai inaca ajelaain jetao, aina enohin sini rai nocoasai. Nii jana jetao, nii aina enohin siniha nii cacunune coitucuhi nii Loto. Nihei jetao nimichuha nii cacunune coitucuhi.

36Nitohaneein jetaote, rai inaca aina inae ausirinecure nii coroatajai Loto cacunucuru. 37Nii inaca aina niicha sirii calaohi janoaain jetaote, curuaate Mohabaneein, nii rai cacunu inanai. Aca jetaote, Mohabitacuru foerateraneein nelu. 38Jerichanejeein jetaotechu, calaohi janoaain, Ben-amineein curuaate nii rai nocoasai. Aca jetaote, Amonitaauru foerateraneein nelu.

Currently Selected:

Génesis 19: URA

Highlight

Copy