Éxodo 7
7
1-2Nii jaun jetaote:
“Aonaauna ichei aite. Canu rai Egipto curuaanaa Faraaon rai erenihun. Jana inana Aaroon, ichei ereeine. Chaaen, caa ichei aitocohaunne rijitojoeein, beeu inana Aaroon rai. Aihute, ichei aitocohaunne rijitojoeein ereeine Faraaon rai. Aihute nii rai nese caje Isaraelitaauru jianemiin Faraaonra. 3Nena inara ere tonoraeniha Faraaonne coina ichareeuni. Chaaen, nechu jataain cojoaelanaacojoai caseteco tabai nalutihareeunni Egipto cocoaichacuru ichoaae. 4Nii jana, inara ere tonorarihaain Egipto curuaanaa Faraaon. Nii jana, canune Isaraele cocoaichacuru jianiha Faraaon nereentiaain Egipto cocoaichacuru choae cunai tabai nalutiaain casetecanajaa cureeuni jataain mijiaainetiincha. 5Niitohaneein Egipto cocoaichacuru que caseteco tabai coaarateeine, Egipto jelai caje canu cachaauru Isaraele cocoaichacuru rocoreeunni. Nii banate, Itolere Curuaanaa Cana Coaunera neein nihanu Canune coitucuurureein Egipto cocoaichacuru”, naain jetao, Moisesa letoae Cana Coaunera.
6Nii jana jetaote, nii jitariin itolere que letoanajaa Cana Coaunerane rijijieein ichacure ninana Aaroon aina Moisesa curu. 7Nii Egipto curuaanaa Faraaon aina, ereeuruhane bana jetaote, inaae fosachoonca jaanacanelu nii Moisesa. Nii jana, nihana Aaroon jetaote, fosachoonca nichata jaanacaelu.
Aaroon rai basotoon tiha Cana Coaunerane
8Nii jana jetaote, Moisesa, Aaroon, naaojoaihunri rai jetao aite Cana Coaunera:
9“Inara rai, cojoaelanacai ichaquichene coina inara caje bajaa Egipto curuaanaane jana, Aaroon rai aitoote, Faraaon acatiha teein basotoon raaoriin atanichoaae jaotomiinte, acanoneein nerotomiincha”, nae jetao Cana Coaunera Moisesa rai.
10Nii jana jetaote, Aaroon aina cuhin Egipto curuaanaa Faraaon chaaen, nii rai letono neein cachaauru letoaaurera, naaojoaihunri acatiha teein jetao, letoanajaa Cana Coaunerane rijijieein atane choae nii basotoon jaotoha Aaroonne jana jetao, acanoneein nerotoe nii basotoon. 11Nii jana jetaote, acaaentonai caa rai atane que netiin itolere coitucuhin nenacaauru benanecuru cotiharate jetao nii Egipto curuaanaa Faraaon. 12Nii jana, jerichanejeein atane choae nii acaauru rai basotoon jaotocuruha nii benanecuru jana jetao, jerichanejeein acanoneein nerotoe nii benanecuru rai basotoon. Nii jana jetaote, nii benanecuru rai basotoon, amuritiin corohin itaje nii Aaroon rai Cana Coaunera tenojohin basotoon. 13Niitohaneein beein coaaratiha Moisesa, Aaroon naaojoaihunri que Cana Coaunera natiin jetaote, nechu ansaineein acaauru esenetana jerelanaala Isaraele cocoaichacuru jianena jerene Egipto curuaanaa Faraaon.
Ichananeein acau rotoha Cana Coaunera basotoonne
14Nii jaun jetaote: “Jataainte mijiainetiin Isaraele cocoaichacuru jianena jerenereein Egipto curuaanaa Faraaonra”. 15Janohetiin eresi cuhin coaanihun. Nii jana inaae nucuhe cuhane fauhane nucuhe auhaniha coacu. Nii acanoneein nerotona basotoon amaain, cuu nii nucuhe auhaniha cojoaain, cuu:
16Ebereeocuru Coaunera Cana Coaunerate, ichei aitocoaaunne coina caletoae: “Canu cachaauru jianeeine, carene tabai cacha areroo cuhin, Canu coroajeein bajaae bajaaeca cuuruhane coina, naanune jana, enanetojoeein, canu ere tonoraelanaala, canu cachaauru, Isaraele cocoaichacuru jianena jereneeine jaaunte; 17Enate laaen tabiicha Cana Coaunera neein nihanu Canune coitucureeincha, naain caletoaa Cana Coaunerana jauna, inaae caa cacoii achune que Cana Coaunera tenojohin basotoon que acau faofaohanune jana, ichananeein nerotoha cureein nii acaura. 18Nii janate, satiin oha cureein, ateeuru. Nii banate, sainaa cureein nii acau. Niite conaa buneliha cuurureein, Egipto cocoaichacuru, naain jetao:
19Aaroon rai aitoote, nii rai Canu tenojohin basotoon mucuhin, nii Egipto nenacaauru, nucuhesorooru jitariin nii acau netaojianajaauru choae biji sijii sijiichaainete, ichananeein nerotomiincha. Nii banate roriha, baichaje, darohe, naaojoaiuri cuhane reentiaain nihacureein ichanara”, naain jetao Moisesacuru letoae Cana Coaunera. 20Nii jana jetaote, acaauru letoaa Cana Coaunerane rijijieein jetao, ichacure Moisesa aina Aarooncuru. Niitohaneein jetaote, Egipto curuaanaa Faraaon, rai cachaauru letoaurera, naaojoaihunri acatiha teein acaauru notaracaae jetao rai basotoon mucuhin que nii acau faofaoha Aaroonne jana jetao, ichananeein nerotoe nii acau. 21Nii jana jetaote, ate setu caaun sainaa nii acaune jana jetao, caje acau raain conaa nainecurene Egipto cocoaichacuru. Chaaen jetaotechu, itolereneein ichana nejesina ne Egipto baca. 22Nii jana jetaotechu, jerichanejeein ichacure nii Egipto cocoaichacuru benanecuru. Nii jaun jetaote, jataain mijiaainetiin nechu aasaineein Moisesa, Aaroon, naaojoaihunri ere tonorana jerene nii Egipto curuaanaa Faraaon, aitosihalu Cana Coaunerane rijijieein. 23Nii tohaneein jetaote, nii ichacuruha Moisesa aina Aaroonne esenetaain, coaana jerelanaala cauhacue rai loreri asaae nii Faraaon. 24Nii jana jetaote, satiin atane bajeeure nii Egipto cocoaichacuru, nucuhe auhaniha teein caje acau caohacha rocohin cooruhane coina. Nii nucuhe caje acau raain conaa nainecurenihane jaun.
Egipto choae dari mululune nalutiaa Cana Coaunerane
25Nitohaneein nii basotoon que acau faofaohin ichananeein acau rotoeratiha Cana Coaunerane baiha caaunsi janonejeein, neeoriin jetaote:
Currently Selected:
Éxodo 7: URA
Highlight
Share
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
