Éxodo 6

1Niritiin bajaa Moisesane jaun jetaote, “Raotojoeein inara jianena jerenihane rijijieein ena laen coaramin Faraaon. Leinjiin jataain mijiaainetiin rai baaso ichacaaunne ainate laen caa natane caje raajenihane inara jianereein Egipto curuaanaa Faraaonra”, nae jetao Cana Coaunera Moisesa rai.

Nacoauneei coaiteen Moisesa aina iriha Cana Coaunerane

2Niritiin jetaote, Moisesa rai aitiin jetao:

“Canune Itolere curuaanaa amurijiriin Acaneein Neeun. 3Canune Itolere Curuaanaa neein nihanune coitucuerateeunlu Abaraaun, Isaca, Jacobo, naaonjoaihunri que. Nena esinae rauhijiriin acaneein Neeun canu curuaa coitucuerateneeun acaauru que. 4Chaenachu inae jauriaanejeein acaauru aina ereeunlu, acaauru rai Canaan batane tihanune coina. Nitohaneeinte nii atane que ichaaorelu carajaaojoaain, estranjeroneein coriaae nejelau atane caje uuruhane jaaun.

5Nii jauna laen, ena jataain mainajeein amihanenaa que Isaraele cocoaichacuru cairichaauruha Egipto cocoaichacurune coaracaaune jaun, noaaelu acaauru inoaesi Abaraaun rai aitiin irihanune coacuun. 6Nii jaun caritiin beeu Isaraele cocoaichacuru rai.

Canune Cana Coauneraneein, Itolere Curuaanaaneein netiin, nii Egiptoo mainajeein cairichei coaracuruha jeelai amuritoheriin amihanenaa quene maajeeine caje itolere canuhacha ichana nainei ichaain, baaso icharaauru casetecaraneein, caohacha icharaauru belaichaneein nihanune coaarateein roconajaain jianacoon tenajareeuni. 7Nitohaneein canu cachaneein inara raaine, Canu inara Coaunera nichaaunne coaaratereeuni inara que. Nitohaneein nii tabai amihanenaa que amianeeinchene caje inara rocohanu Egipto cocoaichacuru cajene aina cuaainte, inara Curuaanaaneein inara Coauneranichaaune coitucuriquicheein. 8Nitohaneeine inara amareeunni, nii inoaelu inara inoaesihuru Abaraaun, Isaca, Jacobo, naaonjoainuri rai canuhacha bei atane inara que banijiaain nenaa atane que ichaohichene coina. Canune inara Curuaanaaneein aitoon”, naain Moisesa que berate Cana Coaunera.

9Nii jana jetaote, nacoauneein coaiteen nii aitoha Cana Coaunerana jaan be niqui Isaraele cocoaichacuru rai Moisesa. Nii jana jetaote, inae esenetana jerelanaala jetao, jataain inae nii Moisesa ere tonorana jerecurene caohacha nainejeein. Jataain mainajeein cairichanajaain, amihanenaa caaintati que amiharatenajaain cairichana jaaunruha Egipto cocoaichacurune jaun. 10Nii jaun jetaote, nacoaauneein Moisesa rai:

11“Chajaain caritiin benihu Egipto curuaanaa Faraaon raicha. Aihute Egipto caje mituuruha Isaraele cocoaichacurune coina acaauru jianemiin Egipto curuaanaa Faraaonra”, naain jetao, Moisesa que berate Cana Coaunera.

12Nii jana jetaote, “Nihei, Isaraele cocoaichacuru nihanatiin canu ere tonoraauruhane coalanaala. Inasiinte canu ere tonorare Egipto curuaanaa Faraaon, raotiin irihanune coaalanaalata”, nae jetao, Moisesa Cana Coaunera rai.

13Niritiin jetaote, Aaroon aina Moisesa letoae jetao Egipto curuaanaa Faraaon rene Cana Coaunera. “Chajaainjete caa Isaraele cocoaichacuru jianereei caa Egipto caje, naainte ii rai bihacaanune coina canacaanu letoae Cana Coaunerara”, naain jetao, Aaroon aina Moisesa letoae Cana Coaunera.

Aaroon aina Moisesa foerateeurera curuaacuru.

14Caaurute lauri lauri Isaraele cocoaichacuru curuaanaaneein neeurelu acaauru inacaauru caje nunuheteein. Jauriaanejeein Isaraele calaohi inananeein nenaa Robeen calaohichuru jetao Hanoco, Falu, Hesoron, chaaen Carmi, naaonjoainuri. Niichurute Robeen nefoerateneein neeurelu.

15Jana Robeen ocoala Simeeon calohichuru jetao, Jemoeri, Jamin, Ohad, Jaquiin, Sohar, chaaen Saoro, naaonjoainurine. Nii Saoro jetaote, canaau bene aina Simeeon calaohine. Niichurute Simeeon nefoerateneein neeurelu.

16Nii jana nii Simeeon ocoala Lebi jetaote, lefasha nichata choonca caaunsi jaanacaneein jetao ichoaelu. Caaurute rai calaohichuru curuaane, acaauru inana caje nunuheteein acaauru ocoala que tiaain, 17Nii Gereso calaohichuru curuaacurute, nii acaauru nefoerate Libnin, Simii, naaonjoainuri ne. 18Nii jana Coati jetaote, lefasha nichata choonca nichata jaanacaain ichoaelu. Nii Coati calaohichuru jetaote Amaram, Izhar Hebron, Osiele, naaonjoainuri ne. 19Nii Coati ocoala Merarin calaohichuru curuaa jetaote, Mahili, Mosi, naaonjoainuri ne. Acaauru jetaote, Lebi laurineein nenacaauru ne, acaauru inana caje coaauneein acaauru ocoala que tiaain.

20Jana Amaram jetaote, rai inaca bai rai cacunu Jocabede que necoasajiae. Nitohaneein jetaote, Aaroon, Moisesa, naaonjoainuri que bereecoorelu nii Jocabede aina Amaram. Nii Amaram jetaote, lefasha nichatachooca caaunsi jaanacaneein ichoaelu.

21Nii Amaram ocoala Izhar calaohichuru jetaote, Core, Nefeg, Zicri, naaonjoainuri ne.

22Nii Izhar ocoala Osiele calaohichuru jetaote, Misaeli, Elsafan, Sitri, naaonjoainuri ne.

23Nii jana Aaroon jetaote, Aminadaba cacunu Elisabete Naason bai que necoasajiae. Nitohaneein jetaote, Aaroon aina beree que nii Elisabete, Nadab, Abio, Eleasar, Itamar, naaonjoainuri que.

24Nii Izhar calaohi Core calaohichuru jetaote, Asir, Elcana, Abiasa, naaonjoainuri ne. Niichuru jetaote coreitaauru nefoerateneein neeurelu.

25Nii Aaroon calaohi Nadab ocoala Eleasar jetaote, Fotile cacunu que necoasajiae. Aca jetaote, beree que Finesi que nii Eleasar aina. Acaauru jetaote, Lebi inamacooru laurichuru rai curuaanaa neein nenacaauru ne.

26Acaauru inamaconeeinte neeurelu nii Moisesa aina Aarooncuru. Acaaurute nii letoaelu Cana Coaunera Egipto caje Isaraelitaauru rocooruha aihuruha soondaroorune rijijieeine coina. 27Nii jeelai Moisesa aina Aaroon jetaotechu, nii Egipto curuaanaa Faraaon aina ereein nii Egipto batane caje nii Isaraelitaauru rocoorelu.

Aaroon aina Moisesa cotihaca Cana Coaunerane

28Nitohaneein nii Egiptoo Moisesa aina irihane bana jetaote:

29“Canune ii Coauneraneeun. Caa ii rai aitorichaaunine rijitojoeein Egipto curuaanaa Faraaon rai benihu”, naa Moisesa rai Cana Coaunerane jana jetaote:

30“Ainaa naininaaun bajiaata curuaanaa. Chatonaaine erereeun Faraaon rai, raotiin erenaa inaanune coaalanaala. Chasiina canu ere tonorare Faraaonta Curuaanaa”, naain jetao Cana Coaunera tonorae Moisesa.

Currently Selected:

Éxodo 6: URA

Highlight

Copy