Éxodo 8

1“Chajaain coaiteen, Egipto curuaanaa Faraaon coaraain, ‘Caa canu cachaauru Isaraele cocoaichacuru jianeeunte, Cana Coaunera coroajeein, bajaae bajaaeca cuuruinera. 2Acaauru jianena jereneeinena, dari mululune que itolereneein, ii nese jelai casetecareeuni. 3Nii banate, acauhana barunaa amuneein acau caje nemitujuaain, ii loreri cuhane enohin, ii eruhari, ii rai cachaauru letoaaurera loreri cuhane, ii cachaauru loreri cuhane, faan enoalaainajaa ii orono cuhanai, naaojoaihunri cuhanaihunru enohinchuru ii reroecaa cureein nii dari mululunera. 4Ii choae, ii cachaauru letoaaurera choae, ii cachaauru choae, naaonjoaain, inara choae jeluha cureein nii dari mululunera’, nanihun Egipto curuaana Faraaon raicha”, naain jetao:

5“Aaroon rai aitoote, nii Canu basotoon mucuhin, nucuhe, nemuri, naaojoaihunri choae tochataain, sijii sijiichaainete, nii acau caje nemitujuaain, nii Egipto batane lomohinne nii daricha”, nae jetao Moisesa rai Cana Coaunera.

6Nii jana jetaote, nii Cana Coaunera basotoon mucuhin nii Egipto nucuhe choae sijii sijiichaa Aaroonne jana jetao, nii acau caje nemitujuaain jetao, Egipto batane lomohin memoe nii dari mululune. 7Nii jana jetaotechu, jerichanejeein Egipto cocoaichacuru atane ichoaae jetao nii dari mululune nalutiaaure, nii Mago neein curuajaain nenacaauru benanecuru.

8Nitohaneein jetaote, Moisesa, Aaroon, naaojoaihunri cotiharateein, acaauru rai jetao:

“Canu cachaauru, chaaen canu, naaojoain rai Cana Coaunera bajaauche. Nii banane, ii cachaauru Isaraele cocoaichacuru jianereeunni carene tabai cacha areroo cuhin carenero sohin mocohin que Cana Coaunera belaihuruhane coinara”, naa Faraaonne jana jetao:

9“Chabana caa jerereini ii caje, ii cachaauru letoaaurera caje, ii cachaauru naaojoaihunri caje amuhin, jelaiha acauhana cuha caa dari mululunene coina, Cana Coaunera bajaanune coinata”, naain bajaa Moisesa ne jana jetao:

10“Eresiniha natiin carai bajaaura”, naa Faraaonne jaun jetao:

“Nitohaneeinte, ichareein Cana Coaunera, nii caje nainaain coitucuhichene coina. Nihein chunei Cana Coaunera rijijieein nenaa nainihein. Leinjiin Cana Coauneraachate Cana Coaunera neein ne. 11Inaae ii loreri caje coriae amurichaain dari mululunera. Leinjiin acauhanaachate nedaa cureeincha. Inaae ii, ii cachaauru letoaurera, ii cachauru, naaojoaihunri reroecarinaainta”, nae jetao, Faraaon rai Moisesa.

12Niritiin jetaote, Faraaon loreri caje inaae amuure Aaroon aina Moisesacuru. Amuhin jetaote Cana Coaunera bajae Moisesa coriae cuha nii Faraaon choae Cana Coauneraacha letoai dari mululunene coina. 13Nitohaneein jetaote, Cana Coaunera bajaa Moisesane jana jetao, loreri airinihacuru ocoana janaauru cuhin ohacoaaure nii loreri asae nenacaauru darihuru. 14Nii jaun jetaote, itolereneein sainaa nii dari setune jana jetao taojiaain codoriaaure Egipto cocoaichacuru. 15Ne jetaotechu nitohaneein coaraane saijieein jetao, inaae caje amuha nii dari mululunene jana jetao, nechu ansaineein jetao mijiainetiin Moisesa, Aaroon, naaojoaihunri ere tonoraain esenetana jerene, inaae aitosihalu Cana Coaunerane rijijiein jetao, nitohane nii Egipto curuaanaa Faraaon.

Unoo mululune neein, atane bujuinaa rotoha Cana Coaunera basotoonne

16Nii jana jetaote, Moisesa rai jetao:

“Aitoo Aaroon raite, nii Canu basotoon mucuhin tochataain que atane bujuinaa faofaohinete, itolereneein nii Egipto batane lomohin unoo neein nerotomiincha”, naa Cana coaunerane jaun jetao, 17nii Egipto batane bujuinaa choae Cana Coaunera basotoon tochataain faofaoha Aaroonne jana jetao, itolereneein nii Egipto batane lomohin jetao unoo neein nerotoe Egipto batane bujuinaa. Nii unoo neein nerotohin jetaote Egipto cocoaichacuru cachaauru, acaauru irihuru, naaojoaihunri cotaojoe jetao nii unoo. 18Nii jana jetaote, nii Mago neein curuajaain nenacaauru benanecuru netonai jetaote nii unoo coaunaane jerecure niqui nii acaauru biji achune aina. Nejetaote ichasihurene. Nii tonohana jetaote, nii cachaauru, acaauru irihuru, naaojoaihunri cotaojoe jetao nii unoocuru. 19Nitotohanihane jaun jetaote, Faraaon rai jetao:

“Caate ichei Cana Coaunera letono caseteco nera”, naaure jetao benanecuru Egipto curuaanaa Faraaon rai. Nejetaote, saijieein acaauru esenetaelanaala acaauru ere tonorana jerene, inaae aitosihalu Cana Coaunerane rijijieein Faraaon.

Faraaon choae alaaintiri mululune nalutiaa Cana Coaunerane

20Nii jana jetaote, Moisesa rai aite Cana Coaunera:

“Eresi janohetiinte, nucuhe cuhane cureein Faraaonra. Chajaain janonaa aonaain nimichuhin cuhin coaraain: ‘Canu cachaauru jianeeute, carene tabai cacha areroo cuhin coroajeein Canu bajaae bajaaeca cuuruinera. 21Jana nii canu cachaauru Isaraele cocoaichacuru jianena jereneeinena, caseteconeein ii choae, ii cachaauru letoaaurera, ii cachaauru, naaojoaihunri choae alaaintiri mululune letoareeunni. Nii banate ii loreri cuhane, Egipto cocoaichacuru loreri cuhane, naaojoaihurite, memoa cureein atane ichoaene maejeein alaaintiri que. 22Nitohaneein, nii Egipto cocoaichacuru choae nii caseteco nalutiaanune jana, nihein nii caseteco coaracururinaain nejelau Goseen batane que nenacaauru canu cachaauru Isaraele cocoaichacuru. Nihein leinjiinejei nerinaain nii Goseen batane que alaaintiri. Nii banate, Canu Cana Coaunera neein nii Goseen batane que nenacaauru canu cachaauru Isaraelitaauru beraain coroatajanichaaunne coaraain coitucuha curiquiincha. 23Nii janane laaen, nejelau canu cachaauru Isaraele cocoaichacuru tereeunni canura. Jana caa ii cachaauru ainate jelai neriquiincha. Jana nii inara casetecaanune jaante, eresi nunuhereeincha’ ”, nae jetao Egipto curuaanaa Faraaon rai Moisesa, letoa Cana Coaunerane jaun.

24Nitohaneein jetaote, Faraaon loreri cuhane, chaaen rai cachaauru letoaaurera, naaojoaihunri loreri cuhane jetao, dede sacari tocohaneein jetao alaaintiri mululune letoae jetao cana Coaunera. Nitohaneein jetaote, itolereneein Egipto batane que nenacaauru Egipto cocoaichacuru cairichae jetao banejelanaala nii caseteconeein acaauru choae Cana Coauneraacha letoai alaaintiri mululune.

25Nii jaun jetaote, Moisesa, Aaroon naaojoaihunri cotiharateein jetao:

“Chajaain caa Egipto batane caje coriaae cuelanaala inara irihuru sohin mocohin que Cana Coaunera belainihuchera”, naa faraaonne jana jetao:

26“Jeriaane caohacharihei nitohaneein cau ichacaanune, Egipto cocoaichacuru rai jataain colalajinacaineein niha nii bacaauru sohin mocohin que Cana Coaunera belaihacaanune jaan najaun. Nii coaunera niha acaauruacha bei acaauruacha coroajei mocohacaanu Cana Coaunera raine coaracuruhane coreniha ajeri que canacaanu sooruriha natiinta. 27Canacaanu rai te caohachare canacaanu letoaa Cana Coaunerane rijijieein caalai caje nichata janoin coamueraneein cuhin carene tabai cacha areroo canacaanu iri sohin mocohin que Cana Coaunera coroajeein, bajaain belaihacaanunera”, naain Faraaon tonoraa Moisesane jana jetaote:

28“Inaae chujia inara jianerichaaunni carene tabai cacha areroo cuhin inara irihuru sohin mocohin que Cana Coaunera belaain coroajeein bajaaiche amuritiin caaelai caje coriaae cuelanaala coinara, chaaen carai netonai Cana Coaunera bajaauche”, naa Faraaonne jana jetaote:

29“Inae caalai caje mituhacaanune rijijieeina, eresi Cana Coaunera bajareeunni ii rai, chaaen ii cachaauru letoaaurera, chaaen ii cachauru naaojoaihunri caje coriae amuha nii alaaintiri mululune coinara. Coajian caalai caje mituhacaanune caohateein canacaanu coritajeein sacuhin carene tabai cacha areroo cuhin, nirihuru sohin mocohin que Cana Coaunera belaain coroajeein bajaauruha Isaraele cocoaichacurune caohatihara”, naain jetao tonorae Moisesa.

30Niritiin jetaote, nii Faraaon loreri caje amuhin jetao Cana Coaunera bajae Moisesa. 31Inae Cana Coaunera bajaa Moisesane jaun jetaote, inaae nii Faraaon caje, chaaen rai cachaauru letoaaurera, chaaen rai cachaauru, naaojoaihunri caje coriaae inae amuhe nii alaaintiri mululune. 32Nejetaote, jelaiha cocoaain, nechu aansaineein jetao, mijiaainetiin Isaraele cocoaichacuru jianena jerene jetao Egipto curuaanaa Faraaon.

Currently Selected:

Éxodo 8: URA

Highlight

Copy