Éxodo 28

Saseredotecuru cajione buri

(Ex 39.1-31)

1Nii ii nejera Aaroon, chaaen rai calaohichuru Nadab, Abio, Eleasar, Itamar, naaonjoainuri isaraelitaauru nihane ii rohan jelai tenajaaun, canu rai saseredote neein neeuruhane coina. 2Chaaen nitohanai que banijiaain nenaa cajione ichau, nii ii nejera Aaroon cajione nuque, jataain caohatiin inanacaane coina. 3Nii nitohanai ichana inaaureraneein, satiin quiicha teeuri rai ereeute, canu que banijiaain saseredoteneein, inanacaa Aaroonne coina, ereriaain rai cajione ichacurumiin. 4Nii niicha ichanenucurite, cajione buri, nii cajione buri ichoae neeninu, coaiteen nichoae neeninu, nii ichoae tacaain nelarijia bujuanu, naaonjoainuri ichaain, nii cajione auha ereriaain, lino caje ichanohin que couturi conaara ichaa cuurureein, rai nichora aina. Aihana jaun, nitohanai que banijiaain nenaa cajioneneein teein, nii rai calaohichuru aina curuaecaain, ii nejera Aaroon cajione ichacurumiin canu rai saseredote neein, saseredoteneeuruhane amihaneeo ichacuruhane ruacaine coina. 5Nii cajione icharaauru, oro cajene maajeein ichacurumiin, cajione beraurosiojoai, cajione lanaajiojoai, cajione lanajain, chaaen lino inuhin caje ichanohi, naaonjoainuri caje ichacurumiin.

6-7Nii cajione burineein neeninu, ureriaain oro caje ichanohineein jerane coroatajaain nichora siriin, cajione beraurosiojoai, cajione lanaajiojoai, cajione lanajain, lino inuhin caje ichanohin, naaonjoainuri caje ichacurumiin. 8Nii cajione buri ichoraneein neeninu, nichoranu queecha temuraain nereein, chaaen techu oro caje, nii cajione beraurosiojoai, cajione lanaajiojoain, cajione lanajain, lino inuhin caje nenaa, naaonjoainuri ereriaain ichanohinereein.

9Nii baiha, lanajaique coroatajaain colanojoin ajeri que teein, nii Isarael calaohichuru curuaacuru laenaaun, 10acaauru inana que nunuheteein, satononiha nejanoanaa curuaa que tiaain, leinjiin ajerique saotaneein, neeine acaauru curuaacuru, leeocha ajerique jerichanejeein saotaneein neeine. 11Nii nitohanai ichara inaerate naine, aiha sechone tocohaneein, nii ajeri que teein acaauru curuaacuru laenaane. Nii baiha, nii niha orone jaa jeloon, nii coroatajai ajeri teeu, 12nii cajione buri ichora ichoae, nii ajeri coaracaaunne naineei, Isaraeli calaohichuru coaaucaaune coina. Nitohaneein canu acatiha, rai nojoau ichoae, acaauru curuaacuru siriin turuha Aaroonne, coacaanu coina. 13Chaaen oro caje, nii acaauru curuaacuru siricha ajeri nenajaanu ichaain, 14nii baiha, oro caje nejesina, cadena caje coroatajaain rai cojoinu ichaain, nauhacuru que, nii acaauru curuaacuru siricha ajeri teeu.

15Jerichanejeein, nii cajione buri ureriaain ichaaine rijijieein, nii nelarijia bujuateein Cana Coaunera bajaauruhane jaa ichaau. Oro, cajione beraurosiojoai, cajione lanaajiojoain, cajione lanajain, lino caje inuhin ichanohi, 16naaonjoainuri caje muluutiin ichaain, coroata choonca coroata jemejeein jaratono aina, ita caanejeein care ichaau. 17Jataain caohachaain nenaa ajeri caohacha que carihacu, jena tocharaain cuaain. Nii jauriaanejeein le tochara, robi, crisolito, esmeralda, naaojoaainuri teein ichaau. 18Nii coroata tochara, cranate, safiro, jade, naaonjoain ichaau. 19Jana nichata tochara, jasinto, agata, Amatista, naaonjoain ichaau. 20Nii nejena tochara, topasio, cornalino, jaspe, naaonjoainuri que ichaau. Nii niha orone jaau neeine, nii ajerichuru, 21lechoonca coroatajaain neeuruha Isaraeli calaohichurune jeeoneein, lechoonca coroatajaain acaauru curuaacuru siriin nihanete ne, nii ajerichuru. Aiha sechone rijijieein, nii ajerichuru nainetiin teein, lechoonca coroatajaauruhalu Isaraeli foerateurera curuaacuru laenaaun.

22Chaaen oro nejesina caje, cadena jaau, nii nelarijia bujuane que neeninu cojoi ichoranuque. 23Oro caje coroatajaain jachuujianaain, nii nelarijia bujuanu cojoinu enonajaanu ichaau. 24Nii baiha, nii nelarijia bujua que, ita jeraniha coroatajaain jachuujianaain nenaa cuhane, nii oro caje coroatajaain nenaa cadena enoaain, 25nii cajione buri ichora, nelarijia nichaji que nenaa ichoae, nii jerane nojoauque coroatajaain nenaa que, nii coroatajai cadena macohi ruluu. 26Jerichanejeeichu oro caje coroatajaain jachuujianaain nii nelarijia bujuanu, ocoai nenaa nichaji que, cajione buri nichajique, ita jeraniha nihane coina ichaau. 27Jerichanejeein oro caje coroatajaain jachuujianaain ichaai, nii nacatichei nichaji cajione buri ichoraque teeu, asaeriin cajione buri ichora macoajeeri, tocoora jeloon bujuaihu. 28Nitohaneein ichaaine, nii cajione buri ichora jichoajiojoai aina, ita mucuha nii nelarijia bujuane, nii cajione buri ichora macoajeeri, caoachaain nitiririchaain niha, nii nelarijia bujuane coina. 29Nitohaneein, canu caje chaelai bajaane coina, nelarijia bujuanu teein, nii loanari santoario asae enoha Aaroon, Isaraeli calaohichuru curuaane maajeein nelarijia que, siriin canu acatiha turuhane, itolere janonaa bana coaaunajareeuni. 30Nii nelarijia bujuateein, canu caje chaelai bajaane jaa ichoae, Oriin, Tomiin, naaojoainuri teeu, nelarijia ichoae amaain, canu acatiha turuha Aaroone coina. Nitohaneeinte, itolere janonaa bana, nelarijia ichoae canu caje, chaelai bajaane jaanu coujunaca uhaain, caatiha ecooreein Aaroon.

31-32Chaaen enoha coturine jaa jelainu ichaain, cajione beraurosiojoai nejesina caje, nii cajionenu ichaain, nesoaihane coataa, obiri jacari caje nenaa rijijieein, muluutiin nuluno jelai auhateein ichaau. 33Aiha tijiemelene rijijieein, cajione beraurosiojoai, cajione lanaajiojoain, cajione lanajain, naaonjoainuri jabebiaain, nauha tinonoritiin, oro caje nenaa campana laaohinaa que requiteein, nii cajione auha ichaau. 34Nii tijiemele rijijieein jabebiaain ichanohin que, jaujauheriin, nii campana laaohinaa teeu, nii cajione auha tinonoritiin. 35Saseredote nihane amihaneeon ichaane coina curujuaain, canu acatiha, nii loanari santoario asae enohane caje, mituha cuha Aaroonne, toniha nii campana aonacaaunne, ohenihane coina.

36Chaaen secho rijijieein, oro nejesina caje tojoeriaain que teein: ‘Cana Coaunera que banijiaain’, naain erenaa laenaaun. 37Chaaen jelai caje nerurujuaelanaala nihane coina lanaajiojoai que, nii tojoeriaain ichanaa ichora ichaai, nii couturi conaara que tirichaain, naurique teein ichoacu. 38Nitohaneein itolere bana, nauri que siriha Aaroonne, canu rai, lenonecuru mocohin, chatoanai ichacuruha isaraelitaaurune nihanatiin Aaroon te, nii ruhacaa cureein, nena atiin, nii naurique niicha sirii coreniha, canu rai nii mocoori lenonecuru rareeuni.

39Lino caje nenaa cajione caje urerianohineein nii cajione ichaau, jerichanejeein, lino caje nii couturi conaarane maajeein ichaau. Chaaen ii raajenihane, nii rai nichora ereriaain ichaau. 40Jataain caohachaain inanacaane coina, nitohanai que banijiaain nenaa cajione caje, nii Aaroon calaohichuru cajione, acaauru ichoranu, acaauru couturi conaara, naaonjoainuri ichaau.

41Nitohaneein, rai calaaohichuru aina curuaecaain, nii ii nejera Aaroon cajione nainaaine baiha, acaauru couturi ichoae erene chorohin, canu rai saseredoteneein neeuruhane coina, cocoainanajaain jelai tenajaaun. 42Chaaen lino caje acaauru jaberoco nainejeein, acaauru coroarojoe caje coaauneein, acaauru jaleri que tiaajeein, 43calaohichuru aina Aaroon lebaari jaau, canu acatiha nii loanari asae enohin, lenonecuru mocooruhane jaa rori ichoae saseredoteneeuruhane amihaneeo ichacuruha, nii loanari santoario asae enohine, chatoanai ichaelanaala aihuruhane oorenihane coina. Caate, rai nefoerateeuru aina jiniiquiin, chariji bana satonoelanaala, tonoraain neeuruhane coina, quiicha teei rauhine.

Currently Selected:

Éxodo 28: URA

Highlight

Copy