Éxodo 29

Cana Coaunera que banijiaain neeuruha, saseredotecurune

(Lv 8.1-36)

1Canu que banijiaain saseredoteneein neeuruhane coina, nii chaeloon baasonejelanaala nenaa, leinjiin baca narejeen, coroatajaain carenero, 2ataohari faera tirico faan caje ichanohi, chaaen jorerera colane ereneecha que jasiiteein ichanohin faan jihurohanohin, chaaen jorerera colane, jataain jatatajeriin, nichoae erene riariaain ichanohin, naaonjoainuri ichaain acaauru rai, 3leinjiin omari laaojoiri cuhane teein, nii baca narejeen, coroatajaain carenero, naaonjoainuri jiniichaain nii loanari santoario asae amanajaaun. 4Nii baiha, rai calaohichuru aina curuaecaain, nii loanari asae Aaroon amaain, acaauru rai aitoote nacaaojoaauruhine. 5Inaen nacaaonjoaauruhane baiha, saseredoteneeuruhane cajione buri que, nii Aaroon cajione coreein, nii cajione ichoae, nii nelarijia bujuaniha nenaa tiririchaain, nii rai cajione liliriin ichoacu, nichora que. 6Jerichanejeein, nii couturi conaara que, couturi conajaain, nii saseredote nihane coujunacaneein tojoerianohineein nenaa tiririchaau, couturi conaara ichoae. 7Chaaen nitohanai ichananajaque banijiaain nenaa erene choroo, saseredoteneein nihane coujunacaneque, Aaroon couturi ichoae. 8Jerichanejeein, nii calaohichuru cotijiaain, nii acaauruque banijiaain nenaa cajione que, acauru cajione coreeu. 9Nii Aaroon cajione liliriin ichoaquine rijijieein, jerichanejeein nii acaauru ichora, liliriin ichojoaain, acaauru couturi conaarane maajeein caohachajeein ecu teeu. Nitohaneeinte, saseredoteneein cocoainanohineein neeuruhane coujunacateriquiin, chariji bana satonoelanaala, nirijieein neeuruhane coina.

10Nii baiha, nii loanari inara acatiha turuhanune jaanu asae, nii baca narejeen amaaunte, couturi ichoae biji meracaaine calaohichuru aina Aaroon. 11Nii inara acatiha tururichaaunine jaau, loanari bacuujuaniha turuaain, canu acatiha teein, nii baca soo. 12Nitohaneein sohin, ii biji couturi que coichana soriin, nii lenonecuru mocoine jaa rori jichooru que riataau, chaaen nii rori asae, nii coichana caute choroo. 13Nii rai surihuru, najarichuru, rinuhencuru, naaonjoainuri que nenaa coerene raain, mocoo nii rori ichoae teein. 14Nete laen naineei, nii baca iniho, nujue, cari, naaonjoai mocohin, nii loanari nedacai que teein, inara osa corenihane caohachae.

15Jerichanejeein, nii coroatajai carenerocuru caje, chunocoha couturi ichoae, calaohichuru aina biji meracaaine Aaroon. 16Inaen nichoae biji meracaauruhane baiha, sohin coichana riaacu, nii rori tinonoritiin, nichoaene maajeein cuaain. 17Chaaen nii baiha faruhin, nii suri aina tijiaauru culejeein, nii iicha faruhi teeu couturi aina. 18Nitohaneein ichaai, nii rori ichoae teein, canu rai, nii carenero mocoo, casuujua tocohaneein juujijiaain mocoha, nii canu belaaine jaane coina.

19Nii baiha, nii leeocha carenero mucuhin Aaroon rai teeute, calaohichuru aina, couturi ichoae biji meracaauruhine. 20Inaen nichoae biji meracaauruhane jana, nii carenero sohin, coichana soriin raain, acaauru uricho lucu rujuaau, calaohichuru aina Aaroon raotono nichaji, biji coturi cotabaai raotono nichaji que nenaa, raotono nichaji que nenaa tijia couturi, naaonjoaain. Nii baiha, nii carenero coichana cautena riaacu, nii rori tinonoritiin, nichoaene maajeein cuaain. 21Nii rori ichoae nenaa ichana raain, nitohanai ichananaja que banijiaain nenaa erene que jasiiteein, calaohichuru aina curuaecaain Aaroon ichoae cuaain riaacu, acaauru cajione ichoaene maajeein. Nitohaneeinte, rai calaohichuru aina jiniiquiin, acaauru cajionecurune maajeein, canu que banijiaaineein neeuruhane coina, coluunojoiniha cureein Aaroon.

22Nii baiha, nii nuseei que nenaa coerene, chaaen suri que nenaa, najari que nenaa, nii coroatajai rinoecuru que nenaa coerene aina curuaecaain, raotono nichaji que nenaa nanae, naaonjoainuri raau, saseredotecuru cocoainaain jaa neein banijiaain niha, nii carenerone jaun. 23Nii canu acatiha nenaa omari laaojoiri cuhane jorerera colane ichanohichuru faan jabenereein nenaa, ereneecha que jasiiteein ichanohi, jataain jatatajeriin ichanohi, 24naaojoainuri jitariin teeu, Aaroon aina calaohichuru bijihu, inara relaanune rijijieein, leeochaauru aina jiniiquiin neein, canu acatiha ecuun sijiracaain ecotequichene coina. 25Nii baiha, nii acaauru bijihu iicha teei raain, nii rori ichoae teein, caque banijiaain jujuaain nenaa que jasiiteein mocoo. Acate canu belaiha, inaraacha mocohinereein.

26Saseredoteneein cocoainanohineein niha Aaroone coujunacaneein, nii carenero maori raain, inara relaanune rijijieein leeochaauru aina jiniiquiin neein, canu acatiha ecuun sijiracaain ecotecuche. Acate ii raineein ne. 27Nii inara relaanune rijijieein leeochaauru aina jiniiquiin neein, caatiha maori aina nanae ecotequichene baiha, Aaroon, rai calaohichuru naaonjoainuri cocoainaain jaa coujunacaneein, nii carenero iniho jelai teein rucuhequine caohachae, 28calaohichuru aina Aaroon rainu que. Nii canu rai inaraacha teeite, isaraelitane quichene que, casuujua acatichaaunne jaa coujunacaneein, carai inaraacha teinereein. Caa caitoonjoate, itolere bana satonoelanaala tonoraain neeuruha isaraelitaaurune coina, caitoonjoan rauhine.

29Nii Aaroon que banijiaain couluunojoineein nenaa cajionete, rai nefoerateeuru raineein nedaa cureein, inaen saseredoteneein cocoainaain couluunojoineein neeuruhane bana. 30Nii Aaroon nefoerate saseredote neein nenaate, coreeraniha nii loanari santoario asae enohin, inara acatiha tururichaaunine jaan loanari asae namihaneeo ichaa cuhane, caaunsi janoniha nereentiaain, nii cajione ruhacaane caohachae.

31Nii baiha, nii saseredotecuru cocoainaain jaanu que banijiaain nenaa, carenero iniho jelai teein, nitohanai enohalaaine jaan que banijiaain, nenaa que teein enohalaaute, 32rai inaca Aaroon aina, nii carenero iniho quihuruhine calaohichuru, nii omari cuhane nenaa faan, naaonjoainurine maajeein, nii inara acatiha turuhichene jaa loanari bacuujuaniha neein. 33Nitohaneein quihuruhine, acaauru osa que casuujua acatichaaunne coujunacaneein, couluunojoineein saseredoteneein neeuruhane coina, cocoainanohineein neeuruhane coujunacaneein nenaanihane jaun. Nete laen, nainene acaauru que banijiaain nenaanihane jaun, nii niicha quihuri caje, quiha saseredotene lanaala nenaa cachane. 34Cautiha, nii acaauru que banijiaain nenaa iniho, faan, naaojoainuri, cojoanoo rainu que ne mocoo, nainihei nii cauteniha natiin, quiha chunine, acaauru, que banijiaain nenaanihane jaun.

35Caa inara rai aitiin, inara relaanune rijijieein, tonoraain neeuche, Aaroon, rai calaohichuru, naaonjoainuri aina. Canu rai saseredote neein neeuruhane coina, cocoainana jaain caaunsi janonihane reentiaain, 36acaauru osa que, canu suujua acatena nainichaaune coina, cojoanoo netojoeein baca narejeen sohin canu rai teeuche. Inara osa que, canu suujua acatichaune coreniha, nii rori ichoae carenero teein coluucu, jelai teein canu raineein nihane coujunaca neein, nichoae erene chorohin. 37Nitohaneein caaunsi janonihane reetiaain, inara osa coreniha lenonecuru mocooche, nii rori ichoae teein. Nitohaneinte, jelai teein, inara Coaunera nichaaune rai nihane coina, jelai teein nii rori coluuriquiin. Aihana jaun, chunocoha nii rori dadaerate, inae couluunojoineein nereein.

Cojoanoonetojoeein lenonecuru sooruhane

(Nm 28.1-8)

38Nii le janojoeeiniji, jianelanaala cojoanoonetojoeein, coroatajai carenero narejeencuru sohin, nii rori ichoae teeu. 39Nii coroatajaihuri caje, leinjiin teeu janone, jana nii leeochate, teeriquiin sonaina. 40Nii jauriaanejeein sohin iicha mocoheni, carenero aina coroata quilohin arina teeu, le litorohin oliba coerene que jasiiteein, chaaen canu raineein banihateein ichaaine jaun, nichoae le litorohin bino choroo. 41Jerichanejeein, nii canu que banijiaain nenaa arina, bino, naaonjoain aina, nii leeocha carenero teeu sonaina, canu que banijiaain jujuaain nenaa que jasiiteein mocohin. 42Caa canu rai mocohichene rijijieeinte, ichaa cuurureein inara calaohichuru, calaohichuru, nichoalacuru, naaonjoainuri, nii chariji bana satonohelanaala, itolere bana, canu acatiha teein, nii iniha ererichaaunine jaa loanari bacuujuaniha. 43Ecu neeine isaraelitaauru aina erereeunni, nii jaaunte, canu que banijiaaineein niha cureein jelai. 44Canu que banijiaaineein, inara acatiha tururichaaunine jaaneeinte nereein, nii loanari asajai aina, nii rori. Chaaen nechu, canu rai saseredoteneein, canuque banijiaain niha rai calaohichuru aina Aaroone coina ichareeuni. 45Itolere banane, Isaraelitaauru Coaunera nichaaune jaun, acaauru aina nereeuni. 46Nii banate, canu acaauru Coaunera nichaaune, Egipto caje roconajaain, acaauru aina nihanune coitucuha cuurureein.

Currently Selected:

Éxodo 29: URA

Highlight

Copy