Éxodo 27

Bronce caje rori

(Ex 38.1-7)

1Chaaen lenonecuru mocohine jaanu rorine que, acasia caje leinjiin rori jaau, jaratono aina ita caanejiane coina, coroata metoro le coarataananaaine le jeracuru. Jana rai nucuuno le metoro le coarataemiin. 2Chaaen jenaa nii lucuurune nainecojoain, jenaain jichotijiacoaau, nii roriicha que mucueraain nihane coina, chaaen coataneein nenaa bronce que, nii rori carihacu. 3Nii lenonecuru mucuhine jaanu rori corujeleeuru, ajane curu, fara, eraurucuru, cosharacuru, usi nenajanu, naaonjoainuri, satiin bronce caje ichanohinemiin. 4Chaaen bronce caje, iniho asichonanajan ichaain, nii jenai nuurihuru nainetiin, jenai bronce que mucuerateeu. 5Nii baiha, nii rori auha fautaeriin, nii iniho asichonanajan teeu cuhane, nii rori cuhane, cataaun uujeein nihane coina. 6Chaaen inatajajeeinijin, nii lenonecuru mocoine jaa rori mucueranuque, acasia caje, rai cobairichane ichaain bronce que carihacu. 7Nii rori auha mucueracuru jachunojoin cuhane jerane, nii cobairichane enoaain, que mucuhin amanaa naineeine coina. 8Nii ichatane ucuuno ichei coaratihanulune rijijieein enuha caje jachuin ichanohinemiin nii rori altar.

Loreri santoario airichai

(Ex 38.9-20)

9Chaaen le turijieein, nii loanari santoario airichaine ichaau. Enoto mitu nichaji coarajeein, cana raotono nichaji que, nii airichai bujuanu, lino inuhin ichanohin teroracaau, jenachoonca saoqui metoro careneein. 10Coroata chooncaain rai nujuanu jerichanejeein coroata chooncaain rai temura nenajanu, naaonjoaain ichaau, bronce caje nejesina. Nii rai mucuera aina, nii jachunojoineein nenaa, coata jataain coretiin nenaa nejesina caje ichaau. 11Jerichanejeein jena choonca saoqui metoro careneein, coroata chooncaain nujuanu, coroata chooncaain nii nujuan nenajanu bronce caje ichanohi, rai mucueranu aina, jataain coretiin nenaa coata caje ichanohin naaonjoainuri teein, nii bujuanu teroracaau, enoto mitu nichajai coarajeein cana ajaabiji nichaji que. 12Nii airichai jaratono caaneein, coroata choonca coroata metoro nichata coarataain, nii bujuanu teroracaau enoto mitu nichaji que, lechooncaain nujuanu, le chooncaain nujua nenajanu, naaonjoainuri teein. 13Jerichanejeein coroata choonca coroata metoro nichata coarataain, nii airichai jaratono caaneein, nii bujuanu teroracaau, enoto soo nichaji que. 14Nii le jerajeein nenaa nichaji quete nereein caaunsi metoroneein bujuanu, nichatajaain nujua aina, nichatajaain temura nenajaanu, naaonjoainuri, enonaanaja bacuujua jeloon. 15Jerichanejeein, nichatajaananaain, nii nujua aina temura nenajanu ichaain, caaunsi metoroneein nii jera bujuateeu. 16Nii enonaanaja airichai bacuujua jeloon neeine jenaain nujuanu, jenaain nii nujuan temura nenajaanu, iscoon metoroneein rai bacuujua bujuanu cajione beraurosiojoai, cajione lanaajiojoai, cajione lanajain, lino inuhin ichanohi, naaonjoainuri teroracain, ii raajenihane caoachaain inanacaane coina ereriaau. 17Satiin nii airichai bujuanu, nujuate, jataain coretiin nenaa coata caje jachuujianaain nenaa aina mucuera siriha cureein, nii nujuanu temura te, bronce caje ichanohinereein. 18Jena choonca saoqui metorohate cureein, nii airichai care, rai jaratonote jana, coroata choonca coroata metoro nichata coaratareein jerane, rai nucuunote coroata metoro le coaratareein. Lino inuhin caje ichanohiniha, nii bujuane jana, bronce caje ichanohinemiin nii nujua temura. 19Nii loanari santoario asae netaojiaaichene, satiin inara rai nelatenenite, bronce caje ichanoinihane ne. Jerichanejeein bronce caje ichanohinemiin, nii rai nujuaauru aina, airichai bujuanu nujuaauru netonai.

Raafariichuru noinu que erene

(Lv 24.1-4)

20Isaraelitaauru rai aitoote, ichei oliba nejesina caje ichanohi erene uhaauruhine, que raafariinchuru nohiteeine lanaequiin nejesinanecuruhane coina. 21Rai calaohichuru aina Aaroon te, nii raafariichuru nohiteein, nii cajione bujuau, inara aina quiicha ichanenu caitoonjoan tonoraain neeichene jaa coujunacaneein niha camelane jaun teeurureein, ecu inara aina neein ererichaaunine jaa jelai loanari asae, canu notaracae janohajeein lanaequiin nihane coina. Caa caitoonjoante, itolere bana satonohelanaala, rai nefoerateeuru aina jiniiquiin, tonoraain neeuruha isaraelitaaurune coina caitoonjoan rauhine.

Currently Selected:

Éxodo 27: URA

Highlight

Copy