Éxodo 13

Moisesa ainate ere Cana Coaunera.

1Nii jana jetaote:

2“Satiin inara bereecuru inanacuru teeuche canu rai te, jelai nejesinajeein neeuruhine; satiin isaraelitaneeichene bereecuru inanacuru, canu cachaneein neeuruhane jaun. Jerichanejeein techu, canu raineein neeure satiin nii inara irihuru calaohichuru, ichoaichaniha nejanoanacaauru”, naa Moisesa rene ecocohin Cana Coaunerane jaun jetaote, satiin isaraelitaauru rai jetao:

3“Caa cairicheineein, letononeein neeiche Egipto ne jana, jelai caje inara rocoha, itolere ichana nainihane coaarateein Cana Coaunerane cojoanonaa coacuhin neeuche. Aihane jaun, nii cojoanonaa bana, jorerera aina ichanohin faan quinaa nainiheiche. 4Abib cojoanonaa bana te, caa Egipto caje mituhiche. 5Aihane jaun, inae nii jataain lanaeniha lenonene jaun, nii neeuruha cananeeocuru, ititiacuru, amoreeocuru, Ebeocuru, Jeboseeocuru, naojoainurine jaan atane que, inara turuaa Cana Coaunerane, nii cuu turuhichene batene cojoanonaa bitohauche beseta ichaain. Nii atane tiha cana raine coina te, cana foerateracuru rai aitelu Cana Coaunera. 6Inae nii atane que turuhichene te, caainsi janoneein jorerera colane ichanohin faan quiriquicheein; chaaen techu, nii caainsi janone cuhane, Cana Coaunera rai beseta ichariquicheein. 7Nitohaneein te, caainsi janoneein jorerera colane ichanohin faan quiriquicheein. Aihane jaun, satiin nii neriquicheeine jaan atane sacutaain nenaa nainihei faan jorerera; niheichu nenaa nainihei faan, jorerera que jasiiteein ichanohi. 8Nii cojoanonaa bana, inara bereecuru rai: ‘Egipto caje mituhacachene bana, cana rai caohacha ichaain, cana coroatajaniha Cana coaunerane coujunacaneque te, caa catohanei ichacaache. 9Aihane jaun, caa canaacha ichai te, inara jabereco que, rai coujunaca siricha rijijieein, nii cojoanonaa que turuhane naineein coacuhin, Cana Coaunera rai rauhi que, ereerejeein neeichene coina nenaane. Cana Coaunera te, Egipto caje cana rocohin nelu, itolere ichana nainihane coaarateein. 10Aihane jaun, ajaanaa naineein, caa cana rai benojoinihane rijijieein, nii cojoanonaa bana que turuhane naineein, bitohauche beseta ichaain’.

11Inae nii amoreeocuru atane, inara rai tihane coina, inara rai aitiin, inara foerateracuru raine maajeein aitohalune rijijieein, inae tihane coina, cuu inara turuaa Cana Coaunerane bana te, 12satiin inara calaohi inanacuru, satiin inara irihuru calaohichuru, ichoaichaniha quichaneein nejanoanacaauru te, satiin nitohaneein neeurureein, satiin acaauru, Cana Coaunera raineein neeuruhane jaun. 13Aihane jaun, inara iri cabario tocohaneein nenaa asno, inae calaohichane, nii jauriaanejeein nenaa rai calaohi coreniha, leinjiin carenero narejeen teeuche; ainihane leinjiin chibo narejeen teeuche. Jana nii carenero narejeen teneeichene, nii asno corenihane, nii asonohacha sooche. Jerichanejeein techu, jauriaanejeein quichaneein calaohiquichene, nii inara calaohichuru, inanacuru coreniha chaelainiji teriquicheein. 14Nii jana: ‘Chanuna caa catohanei ichaquiche’, naain inara caje bajaauruha inara bereecurune: ‘Caa canacaanu ichanohinte, Egipto cairicheineein, letononeein nenaa caje, itolere ichana nainihane coaarateein, jelai caje cana rocohalu Cana Coaunerane jaan coujunacane. 15Egipto caje mituhacachene caohateein neechu aansainiha faraaone jana te, satiin nii Egipto cocoaichacuru calaohichuru- inanacuru cunaitaacoaain, atinanajaain Cana Coaunera; acaauru irihuru calaohichuru- ichoaichaniha nejanoanacaaurune maajeein. Nii corenihane, Cana Coaunera rai caa satiin canacaanu irihuru, calaohichuru- quichaneein nejanoanacaauru tihacaanu. Chaaen nechu canacaanu calaohiniquichene inanacuru ichotiha Cana Coaunerane coreniha, rai chaelainiji tihacaanu. 16Aihane jaun, caa canacaanuhacha ichaite, inara jaberoco que coujunaca siricha rijijieein, Egipto caje, itolere ichana nainihane coaarateein, cana mitaa Cana Coaunerane jaan coacuhin neeichene jaanuneein ne’ ”, naain jetao be Moisesa, que beratiha Cana Coaunerane jaun.

Egipto caje mituuruha Isaraelitaaurune

17Inae Egipto caje mituuruha Isaraelitaaurune coina, jianenaaca Faraaone jaun, inae jelai caje mituhin cuuru jana jetaote, filisteeocuru atane jeloon, rauhijiriin cunaa bero cuhane amanajaene Cana Coaunera; nabana acaauru sonaa jerecuruhane, neurinanaa jerelanaala, jelaiha Egipto caunaa jerecuruhane coataa. 18Nii jaun jetaote, nii filisteeocuru atane jeloon rauhijiriin cunaa cuhane amanajaelanaala, cucuana Lanajai jeloon, ichatane tabai ichoae situhin cunaa bero cuhane tinononajae Cana Coaunera.

Nitohaneein Egipto caje mituuruneein jetaote, aihuruha soondaroorune tocohaneein netaojiaain jetao cuure isaraelitaauru. Nitohaneein cuhin jetaote, inae osihane ajiniha: “Esinae te inara coroatajanereein Cana Coaunera, caa Egipto caje mituhichene coina. 19Aihane jaun, inae caalai caje mituhichene bana, canu bucuuru amaauchera”, naain aitohalu saain isaraele foeratenecuruhane rai Josene jaun jetao, acaauru jiniichaain Jose bucuuru amae jetao Moisesa.

20Nitohaneein jetaote, Socoto neeuru caje mituhin cuhin jetao, inae nunuheca ichatane jaun nenaa Etamau turuhin, ecu neloanaritecure isaraelitaauru. 21Jiichoo amuuruhane jetaote, acaauru aina cuujue Cana Coaunera, dede sacari tocohaneein, nii cuuruhane jaan bero beraneein. Inae nocohecane jetaote, cononeein nerotoe jetao, acaauru conaeranu que, nii dede sacari tocohaneei acaauru cunajaanu bero beraneein cunaa; nii jaun jetaote, janotiinetojoeein jichoque ainaa rijijieein cuujeeure. 22Nii dede sacari tocohaneein acaauru rai bero beraneei cunaa jetaote, jichoonejesinaacha acaauru ajiniha cuujue. Jana, janotiin nii cononeein acaauru conaeraneein cunaa jetaote, janotiin nejesina, acaauru amaeraneein ne.

Currently Selected:

Éxodo 13: URA

Highlight

Copy