Éxodo 12
12
Fasocoa Beseta
1Nitohanein jetaote, Egipto batane que neeuru jana Aaroon, Moisesa, naaonjoaihunri aina ereein jetao:
2“Caate caa Egipto batane caje mituhichene jaanu batene atene, jauriaanejein ajaanaa batene nunuhe ne. 3Satiin Isaraele cocoaichacuru rai: ‘Lechooncaa caa atene cojoanonaane bana leinjiin carenero, leinjiin cabara, naaojoaihunri sooruhine nenainetiin le lorerichuru asae nenacaauru. 4Nii jana, jataain coroatajaeca le loreri asae nenacaaurune jana, tabaain niha nii lenonene, roha nenacaauru laurijiracuru cotijiaain aina jiniiquiin quihuruhine. Jeeoca cachaurune coarajein chaluhin, que lenonecurumiin. 5Jiaonriha cunaitein jarejeeriin baasonejei carenero sooruhane. Caohatiin rauroin, coerenetiin nenaa que tacaain sooruhine, le jaanacai quicha que tacaain. 6Caohachauru janijiin rucujeein, inae lechoonca jeenaa caa atene cojoanonaane bana sonaina nenainetiin, nii janijiin, acaauruacha rucujuei carenero, cabara, naaonjoaihunri sooruhine Isaraele cocoaichacuru. 7Chaae nii carenero, cabara, naaonjoaihunri coichana rain que nii iniho quihuruha jaan loreri asaae nenacaauru acuujuauru jitariin rujuauruine nii carenero, cabara, naaonjoaihunri coichana que Isaraele cocoaichacuru. 8Nii janotiin que ajena elonai que jasiitein, usi que asichohin iniho que lenonecuche. Nijiaoriha chu, jorerera que jasiitein ichanohi faan que nanajaain, lenonequichene. 9Nijiaoriha aashijieinejei edanoi, jesinaeca que bacajaain lenonequichene. Jerichanejein chu, asichonoineein nii carenero, cabara, naaojoaihunri coturi, tijia, suri, naaojoaihunri que lenonecuche, usi que asichonohineei. 10Nijiaoria cojoanoo raineein cautijiaichene. Nii caute mocooche usiana. 11Letona neruujuein, necoreetein inara safato curujuaain, inara biji cuhanai inara biji achune basotoon siichaain, letona chujuhequiin nii lenone que lenonecuche. Egipto batane caje inara rocoa Cana Coaunerane cojoanonaa ne niha fasocoa beseta najaun. 12Nii cojoanotiin quena itolereneein Egipto batane tinunohin situhin onaa naja que Egipto cocoaichacuru cunaitahareuni. Lelaurichuru caje ooruha Egipto cocoaichacuru calaohichuru inanacurune coina. Chaae techu, oorureein jauriaanejein carenerocuru, bacaauru, naaonjoaihunri calaohichuru, nunuhecurune maanjein. Nitohaneina satiin cha que nelateniha nii acaauru coaunera niha Egipto cocoaichacuruhacha beein, ecaantooru coitucueratereuni. Esinaee rauijiriin Cana Coaunera nichaaun canune, coaracuruha Egipto cocoaichacurune coina. 13Nii ichanate nelaterein, nii neeinchene jaan loreri coujunaca teeichene jaanu que, inara rai. Nii jana onaa naja que Egipto cocoaichacuru cunaitacaunne caun ooruhane jana, leinjiinejei orieinchein inara, nii ichana caje coarajein, rauijiriin siturichaunine jaun. 14Caa janonaate, raotojoein jianacoon ne cojoanonaa que turuhane nainetiin, coroajeein Cana Coaunera bajain itataojiain bitohaichene coina Egipto batane caje inara rocoha Cana Coaunerane jaan cojoanonaa fasocoa beseta tabai ne. Ajaanaa nainetiin que coacuin, Cana Coaunera coroajeein bajain, itolereneein caohachanainejeein satiin caa beseta bitohauche. Chaae techu, inara calaohichuru netonai jerichanetojoein caa beseta bitohaururein. 15Chaaen techu, caaunsi janone que tiaain jorerera colane ichanohin faan que lenoneriquichein. Aina najaun, nii jauriaanejein cojoanonaa caje coaunein, caaunsi janoniane que tiaain, nijiaoria inara loreri asaae faan jorerera siriquichene. 16Nii inara rai jauriaanejein Cana Coaunera tenojoi cojoanonaa nunuhe bana netaojiaain, Cana Coaunera coroajeein bajaaichene rijijieein nii caaunsi janone satono bana netaojiaain Cana Coaunera coroajeein bajaauche. Nii cojoanonaa bana nijiaoria amianeeinchene. Inara lenoneechate naineriquiche enoalaichene. 17Jorerera colane ichanohin faan beseta cojoanonaa bana nainetiin ita taojiaain Cana Coaunera bajain coroajeein bitohauche. Nii beseta cojoanonaa bana jitariin inara rocohanu Egipto batane caje najaun itolereneein satiin ita taojiaain nii beseta bitohauche. Jerichanejein techu, cojoanonaa bana, satiin ita taojiaain Cana Coaunera bajain coroajeein bitohaururein inara calaohichuru netonai. 18Chaae techu, jorerera colane ichanohi faan que lenoneriquichein lechoonca jenaa caa atene cojoananaane bana, sonaina caje coaunein coroatachooncai leinjia caa jeelai atene cojoanonaa bana sonaina que tiaain. 19Nijiaoria inara loreri asaae faan jorerera siriquiche caaunsi janone que tiaaine. Chunei, jorerera aina faan quichate Isaraele cocoaichacuru lauri caje jaoleneein nihacureein. Jerichanejein techu, nii nejelau atane caje unacauru estranjerooru calaohichuru, nii Isaraele batane que nejanoanacaauru niha natiin, Isaraele cocoaichacuru lauri caje jaoleneein nihacuureein jorerera aina ichanohin faan que lenonecuruhane. 20Aihana jaun nijiaoriha aashijieinejei jorerera que jasiitein ichanohi faan que lenonequichene. Chunijiun coriaae amuhin ichaohichene jaaun nihanatiin, inoaelu netojoeein jerichanejein caa fasocoa beseta cojoanonaa bana nainetiin jorerera colane ichanohin faan que lenonecuche’ ”, nae jetao Moisesa rai Cana Coaunera.
21Nii jana jetaote, Isaraele cocoaichacuru bichauhenaauru jitariin cotiharatenajain jetao, “Chajaain leinjiin carenero, leinjiin cabara naaonjoaihunri mucuuruhane, soohin que fasocoa beseta cojoanonaa bitohauruhane coina, le lorerichuru asaae nenacaauru Isaraele cocoaichacuru. 22Chaaen darohe cuhane nii carenero, cabara, naaonjoaihunri coichana raain, rucujueein, nii baina isofo neein curuajaain nenaa enuha une baco bacoriin rain, nii ichana que setejiaain nii neinchenejaan loreri asaae nenacaauru acuujuauru jitariin rujuauche nii ichana que. Nii cojoanotiin que nijiaoriha inara loreri asajai caje mituha jaiti janoeniane ajinia chuneine. 23Nii jana onaa naja que Egipto cocoaichacuru cunaitaain ateinaane coina dede cataaun janotiin Egipto batane que situha uuhane jana satiin ichana que rujuhanojoiniha nii neeinchene jaan loreri asaae nenacaauru acuujuaurune coaraanete, rauijiriin situreein Cana Coaunera. Nitohanein ichana que acuujuauru rujuhaichene coaraane, inara loreri cuhanai enoha nii cacha cunaitaain atinaera cunaine jereriain Cana Coaunera. 24Caa inara letohanune jaante, inoaelu netojoeein itolere bana inara inamacoorune maajeein inara suujua acatequichene jaan ne nerein. Caa caitoonjoate, inoaelu netojoeein chabana nitajenaa charaneein nihacurein. 25Inae nii inara rai Cana Coauneraacha bei atane que turuin neeinchene bana, jerichanejein inoaelu netojoeein cojoanonaa nunuhe bana rijijiein nii cosinacaichene coina inara rai Cana Coaunera aitoonjoa cosinacaain ajaanaa nainetiin bitohauche, Cana Coaunera coroajeein bajain. 26-27Nii jana Chatoanai coitucuhacane jaan catohaneein cosinacaain bitohauche, naain inara caje bajaauruha inara calaohichurune jana Carenero, cabara, naaonjoaihunri sohin, mocohin que Cana Coaunera belaihacaanune jaante, onaa naja que Egipto cocoaichacuru calaohichuru inaanacuru cunaitaain ateinaane coina, Egipto batane que situha uuha Cana Coaunerane jana, satiin nichoteuruhalu Egipto batane que ichaooruhane bana Isaraele cocoaichacurune jaa fasocoa beseta ne, naain beuche, inara calaohichuru, rai”. Nitohaneinte nichoteeurelu cana araaichuru acaauru loreri coarajein, rauijiriin situha Cana Coaunera najaun, naururuin jana jetao satiin nenorocohain Cana Coaunera coroajeein bajaaure Isaraele cocoaichacuru.
28Nii baiha jetao letohanajaa Cana Coaunerane rijijiein jetao ichacure Aaroon aina Moisesacuru.
Egipto batane que ooruha Egipto cocoaichacuru calaohichuru inanacurune
29Nii jana jetaote, janotiin dede cataun onaa naja que le lorerichuru nainetiin Egipto cocoaichacuru calaohichuru inanacuru jetao ateinarate Cana Coaunera. Jerichanejein jetaotechu, nii inaca nelaurihanaja rori ichoae oro que caohatiin conajaain ichanohin rori inaca roa nelaurihanaa Faraaon calaohi netonai ohe. Chaae nii caresero cuhane caseteconein nenacaauru calaohichuru inanacuru, chaenchu jaurihanejein bacaauru, carenerocuru, naaonjoaihunri calaohichurune maajeein cunaitaain atinae jetao Cana Coaunera.
30Nii jaun jetaote, rai cachauru letohaurera aina chaae satiin Egipto cocoaichacuru, naaonjoaihunri aina jiniiquiin jetao janotiin nimichujuhacoain auha auhaquiin jetao chanaaure itolereneein nii Egipto batane que nenacaauru. Nii jana jetao, nihei chunei onaa colane nenaa loreri. Satiin jetaote loreri nainetiin nihacoae onacaauru.
31-32Nii jaun jetaote, cojoanotiin que Aaroon aina Moisesacuru cotiharateein jetao:
“Chajaain caa canu cachauru caje naururuin amuuche Isaraele cocoaichacuru. Caalai caje amuhin Cana Coaunera coroajeein belainiuche nii aitonajaonquichene rijijiein inara Isaraele cocoaichacuru. Chaenchu, inara rai bacaauru, carenerocuru, naaonjoaihunri amaauche, jerenajaonquiche ne rijijiein amuhin, chaae cacoreniha carai Cana Coaunera bajauche”, naain jetao Isaraele cocoaichacuru letohae Faraaon. 33Nii jana jetaote, chajaain eroeejeriin acaauru atane caje amuuruhane coina jetao Isaraele cocoaichacuru, luhecaure Egipto cocoaichacuru, inaejecha nitohanein satiin ohorurichain naauruha najaun.
34Nii jaun jetaote, tirico caje tutuhin ichanohin arina colinaa rain roriha cuhane teein jetao amaaure satiin cajione que conajaain, nojoaun caroco choae baunejein amaaure Isaraele cocoaichacuru. 35Chaae jetaotechu, letohanajaa Moisesane rijijiein jetao Egipto cocoaichacuru rucuheele caohachauru oro caje ichanohin, chaae coata caohacha caje ichanohichuru rucuheele caohachauru cajionecurune maajeein, bajaaure Egipto cocoaichacuru caje Isaraele cocoaichacuru. 36Nii jana jetaote, Isaraele cocoaichacuru coroatajaneein Egipto cocoaichacuru suujua rucuheca Cana Coaunerane jaun jetao, raotojoeein bajaauruhane rijijiein Isaraele cocoaichacuru rai jetao rucuhele caohachaauru teeure Egipto cocoaichacuru. Nitohanein jetaote, arajiin leruhin Egipto cocoaichacuru rucuheeleuru amaaure Isaraele cocoaichacuru.
Egipto batane caje mituuruha Isaraele cocoaichacuru
37Nitohanein jetaote, Ramases batane caje mituhin jetao Socoto batane que tiaain cuure Isaraele cocoaichacuru, enecuru, canaanaiuru, chaaen jataain biinaacuru, naaonjoaihunri janijilanaana sonaanaque nerinanaa naineraauru jetaote, saotafasha oaraanca neeurelu. 38Nii jana jetaote, acaauru aina arajiin cuure nejelau atane caje uunacauru cachauru. Chaae jetaotechu, baca, carenero, naaonjoaihunri amaaure arajiin. 39Nii jaun jetaote, inae luhecaain natane caje sitanajaauruha Egipto cocoaichacurune jaun jetao, inasiin lenone ichana nainecurenihane jaun jetao nii Egipto caje niicharauri tirico caje arina coliha caje faan rijijiein jorerera colane lenone ichacure, que lenonecuruhane coina Isaraele cocoaichacuru. Aca jetaote nirijiein coaraelanaala ne.
40Nii jana jetaote jenafasha nichatachoonca ajaanacaneein jetao Egipto batane que ichaoorelu Isaraele cocoaichacuru. 41Nii jaun jetao caoachaain rauijiriin nii jenafasha nichatachooca ajaanaca nainaauruhane cojoanonaa bana Egipto batane caje satiin mituure jetao Cana Coaunera cachauru Isaraele cocoaichacuru. 42Nitohanein jetaote, nii janotiin que Egipto batane caje jitarin Isaraele cocoaichacuru rocohin jetao, Caate inoaelu netojoeein, ajaanaa bana nainetiin cojoanonaa janotiin bana ita taojiaain Cana Coaunera coroajeein bajain bitohaururein Isaraele cocoaichacuru inamacooru, nae jetao Moisesa rai Cana Coaunera.
Nichuuntaa Cana Coaunera aitoonjoa fasocoa besetane
43Niritiin jetaote, Aaroon, Moisesa, naaonjoaihunri rai jetao: “Caa inara rai canu aitoonjoate jerichanejein cojoanonaa nunuhe bana rijijiein nenaa fasocoa besetane. Chunei nejelau atane caje unaa cacha nainihei, Canu belaaichene jaannu que inaraacha sohi carenero que lenonihane. 44Jana inara cachauru coriqui que coretenohichurute jabereco cari jiununuhin molohin coujunaca tenohineein neuruhane nainecurure que lenonecuruhane. 45Nii jaun, nainihei chunei cacha coriajai atane caje unaa, inara cachaneein nihane niha natiin, jabereco cari jiunu nuhin, molohin, coujunaca tenohineein nenihane lenone nainecuruin nii sohin Canu belaaichene jaan carenero que. 46Nii carenero quete nainecure lenonecuruha leinjiin loreri asaaene. Nijiaoriha aanshijienijein nii sohin mocohin Canu belaaichene jaan carenero iniho amaaichene. Nijiaorihachu bucuuru bacoichene. 47-48Caate itolereneein satiin sacuururein Isaraele cocoaichacuru. Nete laen, nejelau atane caje uuhin inara aina ichaonacauru cachauru netonai, fasocoa beseta cojoanonaa bana Cana Coaunera coroajeein, belaina jeriaane, jauriaanejein satiin le lorerichuru asaaecuru nenacaauru quicha cojoaijiuru cojunacaane coina jaberoco cari jiununuhin moloerateuruhane caohachare. Nii baina te laen nainecurureein cuu nii atane que nejanoanaa ne nenaa rijijiein cojoanonaa bana Cana Coaunera coroajeein bajain fasocoa beseta bitohauruhane. Jana jabereco cari jiununuhin, molohin, coujunaca tenoinenihane nii carenero sohin Canu belaaichene jaan que lenone nainihei chunei. 49Jerichanejein techu, caa caitoonjoan sacuururein nii atane que najanoanacauru, nii nejelau atane caje uuhin inara aina nenacaauru cachauru nihanatiin techu jerichanejein caa, caitoonjoan sacuururein”. 50Nitohanein jetaote Aaroon, Moisesa, naaonjoaihunri letoaa Cana Coaunerane rijijiein ichacure Isaraele cocoaichacuru. 51Nii cojoanonaa bana jetaote rai cachauru Isaraele cocoaichacuru rocohelu Egipto batane caje Cana Coaunera.
Currently Selected:
Éxodo 12: URA
Highlight
Share
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
