Éxodo 11

Ooruha Egipto cocoaichacuru bereecurune biha Cana Coaunera.

1Nii jana jetaote:

“Jaitina Faraaon choae, rai cachaauru letoaaurera, satiin Egipto cocoaichacuru naaonjoaihunri choae cunai nalutihareeunicha. Nii banate laen, inara jianiha cureein Faraaon. Niheichu raujiaain amuhincheneecha coina inara jianeriaain. Chaaen techu, nii ichoae tacaain, caalai caje inara sitareein Faraaon. 2Nii jana laen, Isaraele cocoaichacuru rai aitoote, quichaauru, enecuru, naaonjoaihuri, acaauru laurijiracuru caje, oro, coata caohacha caje ichanohin acaauru rucuheleeuru bajaauruhine Egipto cocoaichacuru caje, enecuru, quichaauru, naaonjoaihunricha”, nae jetao, Cana Coaunera, Moisesa rai.

3Nitohaneein jetaote, Isaraele cocoaichacuru aina ita belaihuruha Egipto cocoaichacurune coina acaauru suujuaa rucujueein coriha Cana Coaunerane jaun jetao, Isaraele cocoaichacuru belaihure Egipto cocoaichacuru. Chaaen jetaotechu caohati cachaneein Moisesa coaracure Faraaon cachaauru letohaurera netonaai, jerichanetojoeein techu Moisesacuru coaracure Egipto cocoaichacuru.

4Nii jaun jetaote, “ ‘dede cataaunne, itolereneein Egipto batane tinunohin, situha ureeunicha Nii janate, ohacoaaurureein lelaurichuru nainetiin, 5Egipto cocoaichacuru calaohichuru nihanacuru, chaaen rai inaca nelaurianaja rori caohatiin oro que conaanojoineein nenaa raotono nichajai que nelauriaanaa Faraaon calaohi inana netonaite oreein. Chaaen nii cairicheineein, omane tutuera que amianenacaauru bereecuru inanacuru, chaaen acaauru irihuru carenerocuru, bacaauru, naaonjoaihuri, jauriaa nejeein calaohichuru nunuheneein nenacaaurune maajeeinte ohorureeincha. 6Nitohaneeinte, itolereneein Egipto batane que, cojioriin chanaa cuurureein Egipto cocoaichacuru. Coatiha chabana inoaenlu caje coaauneein, nitohanai coaraain neeuruhilu niqui, nihein chu nii baiha nerinaain nitohanai’, naain jetao Moisesa que berate cana coaunera Faraaon rai. 7Nitohaneeinte, nejelau rai cachaauru Isaraele cocoaichacuru teein, nejelau Egipto cocoaichaneeichene teein, inara choae cunai nalutiareein, esinae rauijiriin Cana Coaunera neein niha Cana Coaunerane coitucuhichene coina Cana Coaunera. Nihein coatiha chunei cacha chujuraa jaojaoorihaain Isaraele cocoaichacuru remaae. Nerihaain cha cunai, Isaraele cocoaichacuru rai. 8Nii janate, canu rene turuhin, caatiha coroarojoe que neseeonraa uurureein ii cachaauru letohaurera. Nitohaneein coroarojoe que neseeonriaain, ‘Chajaain amuuche satiin, ii sacuuruhine cachaauru, naauruha ii cachaauru letoaaurerane’, ajiniha nihei coatiha caalai caje amuriaauni”, naain obajeein jetao Faraaon caje amuhe Moisesa. 9Nii baiha jetao, “Nihein coatiha inara ere tonorarihaain Faraaon. Nitohanihate cureein. Nii janane Egipto batane choae cojoaelanaacojoai tabai caseteco nalutiaain coaaratereeuni Egipto cocoaichacuru que”, nae jetao Cana Coaunera Moisesa rai.

10Nii jana jetaote, coarajiha Faraaonne notaracaae teein jetao, itolere cojoaelanaacojoai casteco coaarateeure jetao Egipto cocoaichacuru que, Aaroon aina Moisesacuru. Nii natiin jetaote, inae nitohaneein tiha Cana Coaunerane jaun, nechu aansaineein neein jetao, Isaraele cocoaichacuru jianena jerene Faraaon.

Currently Selected:

Éxodo 11: URA

Highlight

Copy