Éxodo 14
14
Cucuana Lanajai jera jaaoruha Isaraelitaaurune
1Nitohaneein cuujueeuruhane jana jetaote, Moisesa rai ecocohin jetao:
2“Isaraelitaauru rai aitoote, jelaiha cuhin Pi-hahirot jeraniha neloanaritiha cuuruhine cucuana aina Migdool cataaun Baal-zefon jereniha. Inae ecu turuuruhane ecu cucuana auhaniha neloanaritecurumiin. 3Nii banate: ‘Nii cuuruhane jaa jelai coitucuuruhi Isaraelitaauru. Nii jaunte, cacha areroo amuhemuhecure nitajenaa rijijieein’, naa cureein faraaon. 4Nena inae inara que nejerateein inara sacuheratiha soondarooru que faraaone jana, canu itolere que nelateein itolere ichana nainichaaunne coaaratereeuni, canu Inara Coaunera nichaaunne coitucuuruha Egipto cocoaichacurune coina”, nae jetao Moisesa rai Cana Coaunera. Niritoha acaauru rai Cana Coaunerane jaun jetaote, nii naitoonjoa rijijieein ichacure isaraelitaauru.
5Nii jana jetaote, inae nii Egipto caje amuuruha Isaraelitaaurune beeuruhane jaun coitucue faraaon. Nitohaneein cuitucuhin jetaote: “Nete nainene cana rai amihaneeuruhane jianeein amuuruhane”, naain jetao rai sondarooru aina jiniiquiin leeochaneein coacue faraaon. 6Nii rijieeoritiin jetaote, sonaacuru naja caro cuhane jetao rai sondarooru letoae faraaon. 7Nitohaneein jetaote, saota fashane nii sonaacurunaja caro caohacha janijiin letoanajae. Chaaen jetaote, satiin nii Egipto caje cunaa caro nainetiin cuure acaauru curuaanacuru. 8Nii jana jetaote, Isaraelitaauru que nejerateein sacunajaa faraaone coina jetao ichae Cana Coaunera. Nitohaneein jetaote, ichae itolere que laraajiin niha Cana Coaunerane coitucuuruhane coina.
9Nitohaneein jetaote, satiin sonaana que cabario ichoae cunacaauru caro cuhane cunacaauru, naaonjoainuri aina cuhin Isaraelitaauru eruha cuure, cucuana auhaniha Pi-hahirot rohan Baal-zefon jeraniha neloanariteein neeuruhane jana Egipto cocoaichacuru. 10Nii jana jetaote, acaauru rohan nichuuntaauruha faraaon aina Egipto cocoaichacurune que nainaain jetao, jataain nesooneeuruhane jaun Cana Coaunera bajaaure Isaraelitaauru acaauru coroatajanihane coina. 11Nii jaun jetaote:
“Chanuna caa neniha cachane jaa udaa canacaanu uhaain canacaanu ateinaratiha uhi, Egiptoo lanaa atane banane que airijiin. Chanuna catohaneein canacaanu terateei. Chanuna Egipto caje canacaanu uhaai. 12Coitucuera rijitojoeeine ichei aitocoaanulu Egiptoo. ‘Egipto cocoaichacuru rai amihanihacaanu coina canacaanu jianeeun’, naacanulu ii rai. Canacaanu raite caohachae cacha udaa ohacaanune coataa acaauru letononeein amihanihacaanu”, naaure jetao Moisesa rai. 13Acaauru rai:
“Jiaonriha casiichene, raotojoeeincha neechacuche. Inara ichoteraterichaain Cana Coaunera neecha que jaaecooche, inae chariji bana nihei caa ena aihuruhane rijijieein nacoaauneein Egipto cocoaichacuru coaraquichene. 14Jiaonriha chaque tonajeeichene, Cana Coaunera te inara coreniha niicha coitucuhi ichaa cureein acaauru aina”, nae jetao acaauru rai Moisesa.
15Niritoha Moisesane jaun jetaote:
“Chanuna ii coroatajanichaaunne jereei, isaraelitaauru rai aitoote chajaaincha cuujeeurumiin. 16Nii jana nii ii biji nohi basotoon aina ii biji sijitaau, aihate ita caje cucuana leruhinete jacorohane jana jera jaaorumiin Isaraelitaauru. 17Nii janane inara que nejerateein inara sacuuruha Egipto cocoaichacurune coina ichareeuni. Nitohanihane janane laen itolere ichana nainichaaune coaaratereeuni faraaon aina nii rai sonaana que caro cuhane cunacaauru, cabario choae cunacaauru, naaonjoainuri que. 18Inae nitohaneein nii caro cuhane cunacaauru, cabario choae cunacaauru, naaonjoainuri aina faraaon que quiicha ichana naine coaaratihanune banate, canu Cana Coaunera nichaaune coitucuha cuurureein Egipto cocoaichacuru.
19Nii rijieeoritiinte Isralitaauru ichoaichaniha cuujiha dede sacari aina Cana Coaunera rai anjerane baiha, acaauru janori nichaji que nedaaurureein. 20Nitohaneeite Isaraelitaauru janori nichajai que nerotohin Egipto cocoaichacuru sonaana que cunacaauru bujuatereein nii dede sacari. Nii janate, Egipto cocoaichacuru rai nocohena nereein nii dede sacari. Nete laen, Isaraelitaauru conareein nii dede sacari. Nitohaneein acaauru rai nocohena nihane jaunte, Isaraelitaauru runaa nainecurene Egipto cocoaichacuru, janotiinetojoeein acaauru sacunaa nainecurenihane jaun.
21Nii janate, cucuana choae biji sijirichaa Moisesane jana, janoaajeein mijiaaineein cujuana letoaa Cana Coaunerane jana coroata neleruhin nelerureein cucuana. Nitohaneeinte atane neein cucuana cuhanai jacorareein Cana Coaunera. 22Nii janate laen nii cucuana neleruhin cana raotono nichaji, cana jaabiji nichaji, naaojoain jacorana jeloon cuhin jera jaoha cuurureein Isaraelitaauru. 23Nii janate, cucuana cataaun tiaajeein acaauru sacuurureein nii Faraaon rai caro cuhane cunacaauru, cabario choae cunacaauru, naaojoainuri. 24Nete janonaa rai, nii sonaana que cunacaauru Egipto cocoaichacuru nichaji coaraa Cana Coaunera jana, ne usi dede sacari aina. Nii jaunte, ecu nejesinajeein niicha ichana jerei coitucuelanaala ecu ita auhacaaure nejesinajeein. 25Chaae techu, naasaaeca nii cuurunaja acaauru rai caro tijiane jaun, nejeeonosinihane jaun jeraae cuujeeurureein”, nae jetao Moisesa rai Cana Coaunera. Nitohaneeuruhane jaun jetaote:
“Chajaauchete sorohacache Isaraelitaauru caje, acaauru corenihate cana aina niicha coitucuhi ichae Cana Coaunera”, naaure jetao Egipto cocoaichacuru, nii sonaana que cunacaauru.
26Ne jetaote Moisesa rai:
“Nii cucuana choae ii basotoon aina ii biji sijitaau. Aihate jelaiha nii Egipto cocoaichacuru choae naluhine nii cucuana baca, caro cuhane cunacaauru, cabario choae cunacaauru, naaonjoainuri choae”, nae jetao Cana Coaunera.
27Nii jaun jetaote, cucuana ichoae basotoon aina biji sijitaa Moisesane jana jetao, janohane jana jelaiha jerichanejeein nedae nii cucuana baca. Nii jana soronaa jerecuruha Egipto cocoaichacurune jana jetaote, cucuana baca que tacaaure. Nitohaneein jetaote, cucuana cuhane nalanajae Cana Coaunera. 28Nitohaneein jerichanejeein acau neein nedaa cucuana cuhanaine jaun jetaote, satiin nii sonaana que cunacaauru, caro, cabario, naaonjoainuri jetao, Isaraelitaauru sacuuruha cucuana cuhane cuhine jaun, asaaun acauhanau oore. Nitohaneein jetaote, nii leinjiinijin cautelanaala satiin oore Faraaon rai soondarooru. 29Ne jetaote laen, cana raotono nichaji, cana jaabiji nichaji, naaonjoaain bujuatenoiniha cucuana cuhanaine jaun, atane nejesinaneein jacorohane jana jera jaaore Isaraelitaauru.
30Nii bana jetaote, Isaraelitaauru amurijiriin laraajiin nenaa jerecuruha Egipto cocoaichacurune jana, acaauru caje acaauru ichoteratelu Cana Coaunera. Nii jana jetaote, cucuana auhaniha Egipto cocoaichacuru cohichuru coaracure Isaraelitaauru. 31Nitohaneein itolere ichana nainihane coaaratiha Egipto cocoaichacuru que Cana Coaunerane coaraainte, Cana Coaunera, nii rai letono Moisesa, naaonjoainuri queecha jaaecooruhane coaarateeure Isaraelitaauru.
Currently Selected:
Éxodo 14: URA
Highlight
Share
Copy
Want to have your highlights saved across all your devices? Sign up or sign in
© 2005, 2024, Wycliffe Bible Translators, Inc.
