Éxodo 15

Nenatiha Isaraelitaauru aina Moisesane

1Nitohaneein Egipto cocoaichacuru caje nichoteein jetaote:

“Cabario aina nii nichoae unacaaurune maajeein amuritiin, cojoelanaacojoaain cucuana cuhane nalaain itajiha Cana Coaunerane”, jaunna, rai nenateeun.

2Nitohaneeina, Cana Coaunera nii canu lararajiaain, canu ichoteratera rai caa nenateeun. Acate Cana Coaunerane, nii jauna coroajeein. Aca techu, canu fojiaraauru Coaunerane; nihei chuni amurijiriin nei.

3Cana Coaunerate, que nejeratenacaauru amuritonaa coitucue; Cana Coaunera, rai curuaa.

4-5Nii Cana Coaunerate, faraaon rai soondarooru, acaauru rai carocuru, satiin rai sondarooru curuanaacuru, leeochaauru amuritoheriin coitucuhin nenacaaurune maajeein, cucuana Lanajai cuhane nalanajaain atinanaacane jaun, ajeri nalu rijijieein, jataain ucuacaain naluhin ooru jana, acaauru ichoae nedae cucuana ucuacaain nenaa.

6Aiha laesinaera Cana Coaunera; jataain mijiaainetoha ii raotono nichajaine jaunte, ii que nejeratenacaauru chaluneein itajeeicha.

7Jataain itolere amurijiriin nelateine jaunte, ii que nejeratenacaauru amuritiin itajenajaai, mocohin nitajiha ajaenane rijijieein.

8Jataain corajeein ii nerai que jiririine jaunte, ita aina necoodoriaain aiha rijihane tocohaneein nedae ficha fichanaa.

9Inacojoeeinte niqui: “Acaauru eruhanune reeintiaaine racatianajaain, jitariin acaauruacha sirii rulureeunni, jerichaaunne jaun tiaaojoaain, ita rai leruhacaanune coina. Nitohaneein tenajaaine, canu sabere rocohin, que saaujuinajaain acaauru itajereeunni”, naain coacuhin uure, ii que nejeratenacaauru.

10Nete cucuana cuhane jiririin, que coroeratenajaaine jaun, cujuana tabaineein nenaa acauhanau naluhin, aiha coatane rijijieein naluure ficha fichanaa cuhane.

11Nitohanihara Cana Coaunera; nihei chuni chosichuru ii rijijieein neita. Nihei esinae rauhijiriin, Cana Coauneraneeine amurijiriin itocohaneein nei. Nii jaunte, jataain coasinacaain cojoaelanaacojoai ichaai. Iite, jataain coasitanacaineein neei.

12Nitohaneeinte, ii que nejeratenacaauru ichoae iicha ichana nainei nalutiaain, atane jana itajenajaai.

13Nii iicha ichoteratecuri cachaauru belaitohine aina cuaainte acaauru suujua rucujueein sirinaariquiin. Nitohaneeinte iicha chana nainei ichaain ii que banijiaain nenaa loreri asaae amanajariquiin. 14Nii janate, coitucuuruhane nesoone caaun rijijijianiha cuurureein cachaauru. Nii jana filisteeocurute, rijijijianiha cuurureein coasina caaun. 15Nii jana Edom nenacaauru cafitaaucurute, nii niicha ichana naine coitucuelanaala neeuruhane jana, nesoone caaun rijijijianiha cuurureein Mohab nenacaauru curuaanaacuru coasina caaun. Nii jana Cananeeo cocoaichacurute, inae satiin esenetaauruhane jianecurureein. 16Aihara Cana Coaunera, nesoonetiinte casihurureein, jataain laraajiin iicha ichai ichaai ii biji ainane jaunte, aiha ajeri jaberocone rijijieein neeurureein. Turuuruha nii ii cachaneein ii que banihateein iicha raaurilu nereein tiaain. 17Aihara Cana Coaunera, canacaanu amaaun, ii aina jiniiquiin nihacaanune coina, janijiin ii que banihateein iicha rucujei atane que. Nitohaneein ecu jiniiquiin nenaa coinate, ii biji que jelai cojoeluhin inae besiilu. 18Nitohanihane jaunte, nii chariji bana satonoelanaala itolere bana cana Curuaanaaneein nereein Cana Coaunera.

Nenatiha Marihane

19Nitohaneein, inae nii cucuana cuhane faauruha nii caro cuhane cunacaauru, cabario ichoae cunacaauru, naaonjoainurine jana jetaote, acaauru choae acau nalutiae Cana Coaunera. Nejetaote, Isaraelitaauru atane jacoro choae cunaa rijijieein cucuana jera jaaore. 20Nii jaun jetaote, nii Aaroon bai profetaneein nenaa Mariha leinjiin pandereta mucuhin nelatihane jana, satiin caaijie cuhin raansaaure enecuru pandereta mucuhin nenateein. 21Nii jana jetaote:

“Jataain cojoelanaacojoaain cucuana cuhane cabario ichoae sonaana que cunacaauru amuritiin nalanajaain atinanaana Cana Coaunerane coroajeein nenatecuche”, naain jetao nenate acaauru rai nii ene.

Elonaa acaune

22Nitohaneein jetaote, Cucuana Lanajain caje amuhin nicharaauruha Isaraelitaaurune coina aite Moisesa. Nii jaun jetaote, jelai caje amuhin nichata janohin cuujeeure, nii acau eruelanaala, nii neniha cachane jaa nenaa Shur turuuruhanecoina. 23Inae Mara turuhin jetaote, ecu nenaa acau conaa nainecurene, jataain elonaa nii ecu nenaa acaune jaun. Nii jaun jetaote, nii jelai curuaateeure Maraneein.

24Nii jaun jetaote, inae baasoneein Moisesa que ereeuruhane nunuheteeure cachaauru. Nii jaun jetaote: “Chaa caje eruhin acau corichaache”, naain jetao caje bajaaure. 25Nii jaun jetaote, coroatajaniha Cana Coaunerane coina caje bajae Moisesa. Nii jaun jetaote, leinjiin arbostoneein nenaa enuha laaojoiri coaaratiha que Cana Coaunerane jaun jetao, coaraain acauhanau nii enuha laaojoiri arbosto jaoha Moisesane jana, inae ichonaineein nerotoe nii acau elonai.

Ecu jetaote, acaauru coujuhin acaauru coaraain esinae rauhijiriin tonoraain ichaaoruhane coina, acaauru rai leinjiin rauhi te Cana Coaunera. 26Nitohaneein jetaote: “Esinae rauhijiriin caa caitoonjoan aonaain tonoraau, Canu inara Coaunera nichaaune aitoonjoan rauhi tonoraaichene, coatiha Egipto cocoaichacuru cairichaanu jaaque inara cairicharinaauni. Canune inara Coauneraneein inara cunai caje inara rautareeuni”, nae jetao acaauru rai Cana coaunera.

27Nii baiha jetaote, nii lechoonca coroatajaain niha acau nalunajane jaa Elim turuhin, ecu neloanariteeure acau roha teein, nii niha caunsichoonca nujuaneein elele tocohaneein nenaa ajaenane jaun.

Currently Selected:

Éxodo 15: URA

Highlight

Copy