Hebreu 3

Mozésihi norĩ wasu'u, Zezu Cristuhu wasu'u me

1Ĩsisãnawã norĩ, a norĩ wa'aba zama ma tô 'Re ihâimana u'âsi mono hã aipisutu za'ra wa'wa, isib'a'uwẽ si oto 're anomro aba mono da, hâiwa ãma i'rata 're aihâimana u'âsi za'ra wa'aba mono da. Tahawa, te za Zezusihi ãma si 're irosa'rata u'âsi za'ra wa'aba mo, 'Re ihâimana u'âsi mono hã ti'ai u, we te te isatõrĩ na, duré dama isadawa wasu'u'wa na. Ta hã sasedoti ipire uptabi na te wa'ãma te te 're romhuri u'âsi, iwasu'uwẽ na wa te 're isaze za'ra mono zém na te te 're wa'apawapto mono da. 2Ta hã ma tô 'Re ihâimana u'âsi mono ma, umnhasi sina te te tãma 're romhuri wẽ u'âsi, te te tãma 're i'apisutu mono zéb zarina si. Tane aiwa, duréihã Mozési hã ma tô 'Re ihâimana u'âsi mono nhib'a'uwẽ norĩ ma, umnhasi sina te te tãma 're romhuri wẽ u'âsi za'ra. 3Ni'wa hã simiromhuri wẽ na te te sima 'ri wamhã, te za ãma tatob'uzu za'ra ni, isimiromhuri wẽ na hã. E tawamhã 'ri na si te za ãma tatob'uzu za'ra ni. Mare di. Taha nhipai u, te za 'ri 'manharĩ'wai ãma zama tatob'uzu za'ra ni. Tane duré, Mozési hã dama pire na 're hâimana mono nherẽ, taha hâimanazém nhipai u hã, Zezusihi si dama pire uptabi di. 4Ti'ai ãma uburé 'ri hã danhib'rata na rob'manharĩ hã si'uihâ na 're si'manharĩ za'ra mono õ di. Tahawa, te 'ri'wa norĩ hã 'ri nhipai u, pire na 're hâimana za'ra. Tane nherẽ, 'Re ihâimana u'âsi mono si ma tô uburé marĩ hã te te 're ab'manharĩ. Tahawa, te uburé marĩ nhipai u, pire uptabi na 're hâimana u'âsi ta hã siwaprosi. 5Mozési hã ma tô 'Re ihâimana u'âsi mono ma, umnhasi sina te te tãma 're romhuri wẽ u'âsi, isib'a'uwẽ te te tãma 're ipawaptob za'ra mono zém na hã. Marĩ na 'Re ihâimana u'âsi mono hã za ti'ab ré te te dama 're i'arowaihu'u mono zém na, ma tô isib'a'uwẽ ma te te 're rowaihu'u siromo za'ra, Mozési hã. 'Re ihâimana u'âsi mono ma, romhuri'wa na si, te ta hã 're hâimana. 6Tane nherẽ, te Cristuhu si tãma umnhasi na uburé isib'a'uwẽ norĩ hã te te tãma 're 'madâ'â pese za'ra, pire uptabi na, 'Re ihâimana u'âsi mono 'ra hã. Wa norĩ hã Cristuhu ãma si 're wanomro mono wa, da te wama 're rob'manharĩ wasété za'ra mono nherẽ, wapahi ãna wanhiptete sina ãma 're wanomro mono wamhã, wa za tô isib'a'uwẽ na tãma 're wahâimana u'âsi za'ra. 'Re ihâimana u'âsi mono hã iwẽ si, za te te wama ipisutu za'ra zéb zô, wama umnhasi sina sô 're iwanhimipari u'âsi za'ra mono zéb zarina, tiwi 're wasipizari za'ra mono õ wamhã, tawapsi wa za tô isib'a'uwẽ na tãma 're wahâimana u'âsi za'ra.

'Re ihâimana u'âsi mono nhib'a'uwẽ norĩ 're iwa'utu za'ra mono zé wasu'u

7-8Duréihã ni'wa hã ma tô 'Re ihâimana u'âsi mono pẽ'ẽzani zadawa para, ãne na ãma rob'ui'éré:

“Ã bâtâ na, 'Re ihâimana u'âsi mono mreme hã wapari za'ra wa'aba wamhã, aipo're si'âri 're aihâimana za'ra wa'aba mono õ di za, ai'rã tete aba na. Duréihã aihi'rata norĩ wa'wa hã ma tô ãne na hã po're ãna sada tihâimana za'ra, 'Re ihâimana u'âsi mono da. Ta norĩ hã a'ubuni wi 're nomro mono ré, nimahã bâtâ na ma tô tiwasédé hã 'manharĩ za'ra, 'Re ihâimana u'âsi mono hã niha zô te te sina pibu za'ra da, niha te te pé tãma rob'manharĩ za'ra õ zô, ãma iwa'a su'u za'ra õ na hã.”

9Ãne duré, 'Re ihâimana u'âsi mono mreme na rob'ui'éré hã:

“Aihi'rata norĩ hã ma tô siwi ĩpibu, ãma ĩwa'a su'u za'ra õ zarina, niha te tãma rob'manharĩ za'ra õ zô pé, 40 na ãma wahub za'ra ré, marĩ iwẽ na si te 're pawaptob u'âsi za'ra mono nherẽ.

10Tahawa, wa tô ta norĩ hã oto ĩsiwi wẽ'õ pese za'ra. Tahawa, wa tô ãne ĩsima tinha: ‘Ta norĩ hã ĩzô si 're sõpré mono õ di oto. Ĩnhimiroti zarina si 're ihâimana za'ra mono da hã, te te sima 're wẽ za'ra mono õ di duré.’ Ãne ta norĩ ãma te ĩsima irotizé hã.

11Tahawa, te oto ĩsiwi iwẽ'õ za'ra zéb zarina, wa tô ĩmreme pire na ta norĩ ãma hã tinha, ãne: ‘Tô sena, ã norĩ hã nimahã na hã dame sisisi õ di za, ti'ai wẽ u hã, iwa 're iwa'utu za'ra mono zéb da, te aré tãma ipisutu za'ra zéb u hã.’ ”

12Ĩsisãnawã norĩ, 'râwi te za 're asi'madâ'â pese za'ra wa'aba mo, 'Re ihâimana u'âsi mono nhimiroti hã asimirosa'rata wasété aba zarina, asiwi 're wẽ'õ za'ra wa'aba mono wa, tiwi 're aipizari za'ra wa'aba mono tõ da, aré i'rata 're dasi'ubumroi u'âsi mono da, dapisutu'wai wi hã. 13Awẽ sidâpâsi te za duré asimiroti na 're asipawaptob u'âsi za'ra wa'aba mo, aipẽ'ẽ toi u'âsi Cristuhu ãma si 're anomro wẽ wa'aba mono da, asiptete sina. Satanasihi nhimiroti wasédé hã wẽ newa, aiwasédé hã 're 'manharĩ za'ra wa'aba mono tõ da, duré 'Re ihâimana u'âsi mono nhimiroti hã asiwi 're wẽ'õ za'ra wa'aba mono wa, ai'rã tete na tiwi 're aihâimana za'ra wa'aba mono tõ da, te za tô 're asipawaptob u'âsi za'ra wa'aba mo, rowẽ na wasiré 're wahâimana za'ra mono ré, ti'ai ãma hã. 14Wa norĩ hã Zezusi, wa te 're isaze na'rata za'ra mono zém hawi, wa tô wa te 're umnhasi za'ẽtẽ za'ra. Ta hawim haré, 're iwadâ'â za'ra mono zéb u, wa te wasina 're umnhasi u'âsi za'ra mono wamhã, tawapsi wa za Zezusihi siré 're wahâimana u'âsi za'ra, isine dama wapire na wa te 're da'madâ'â u'âsi za'ra mono da.

15Duréihã ni'wa hã 'Re ihâimana u'âsi mono pẽ'ẽzani zadawa para, te te ãma irob'ui'éré na wa za ãma aima sahu za'ra wa'wa, ãma aipo're si'âri za'ra wa'aba tõ da:

“Ã bâtâ na, 'Re ihâimana u'âsi mono mreme hã wapari za'ra wa'aba wamhã, aipo're si'âri 're aihâimana za'ra wa'aba mono õ di za, ai'rã tete aba na. Duréihã aihi'rata norĩ hã ma tô ãne na hã po're ãna sada tihâimana za'ra, 'Re ihâimana u'âsi mono da hã.”

16E 'wam norĩ hã ma tô bété 'Re ihâimana u'âsi mono mreme hã te te wapari za'ra nherẽ, siwi wẽ'õ pese za'ra. E 'wam norĩ hã te bété wasu'u, ãne na ãma irob'ui'éré hã. Mozési hã 'Re ihâimana u'âsi mono waihu'u pese na, Ezitu hawi te te isimroi mono norĩ, te wasu'u za'ra. Ma'ãpé ãma asipo're pu'u za'ra wa'aba a'â, asi'uihâ na. 17Duré, e 'wam norĩ hã ma tô bété 'Re ihâimana u'âsi mono hã siwi wẽ'õ pese za'ra, Mozési hã Ezitu hawi te te dazani za'ra pari, 40 na da'ãma wahub ré, a'ubuni wi 're danomro mono ré hã. Tô õ norĩ hã tiwasédé te te 're i'manharĩ za'ra mono norĩ hã ma tô siwi wẽ'õ pese za'ra. Tiwasédé hã te te 're i'manharĩ za'ra mono zéb zarina, ma tô a'ubuni wi ai'utõ, ta norĩ hã. Ma'ãpé ta norĩ wasu'u na 're asipo're pu'u za'ra wa'aba mono duré, waihu'u za'ra wa'aba da. 18'Re ihâimana u'âsi mono hã ma tô ta norĩ ãma timreme pire na rowaihu'u siromo za'ra, ãne: “Ta norĩ hã nimahã na hã sisisi õ di za, ti'ai wẽ u hã, iwa 're iwa'utu za'ra mono zéb da, te aré tãma ipisutu za'ra zéb u hã.” Ãne ma tô ta norĩ ãma waihu'u siro, 'Re ihâimana u'âsi mono hã, duréihã a'ubuni wi 're nomro mono ré, 'Re ihâimana u'âsi mono nhimiroti te te siwi 're iwẽ'õ za'ra mono zéb zarina, po're'õ u'âsi tiwi 're ihâimana za'ra mono norĩ ãma hã. 19Tawamhã e marĩ, wa za wa norĩ hã ãma waihu'u za'ra ni, ta norĩ wasu'u na hã. Ta norĩ hã 'Re ihâimana u'âsi mono si te te 're saze za'ra mono õ wa, sisisi õ di, ti'ai wẽ u hã, iwa 're iwa'utu za'ra mono zéb da, te te aré tãma ipisutu za'ra zéb u hã. Tahawa, a norĩ wa'wa hã ta norĩ ne aiwasédé hã 're 'manharĩ za'ra wa'aba mono õ di za, 'Re ihâimana u'âsi mono nhimiroti si 're i'madâ'â za'ra wa'aba mono õ zarina.

Currently Selected:

Hebreu 3: xavBP

Highlight

Copy