Hebreu 4

1Duréihã wahi'rata norĩ ma, te te ropisutu wamhã, e ta norĩ ma si ma tô rowẽ hã tãma pisutu za'ra, 'Re ihâimana u'âsi mono hã. Mare di. Wa norĩ ma zama ma tô wama pisutu za'ra oto, 're idawa'utu u'âsi za'ra mono ne, 're wahâimana za'ra mono da hã oto, rowẽ uptabi na. Tahawa, 'râwi te za 're asi'madâ'â pese za'ra wa'aba mo, 'Re ihâimana u'âsi mono te te wama iropisutu za'ra zé hã asiwi 're simini za'ra wa'aba mono tõ da, duréihã wahi'rata norĩ te te siwi isimini za'ra ne. 2Ta norĩ hã 'Re ihâimana u'âsi mono nhimiropisutu wẽ hã te te wapari za'ra nherẽ, te te sina uwaimrami za'ra õ di, te te ãma saze za'ra õ wa. Tane duré, wa norĩ zama wa tô 'Re ihâimana u'âsi mono wasu'uwẽ hã wa te 're wapari za'ra. Tane aiwa isimiropisutu wẽ na wa te 're saze za'ra mono õ wamhã, wa norĩ zama tô wa te wasina 're uwaimrami za'ra mono õ di za, te te wama iropisutu za'ra zé hã, 're idawa'utu u'âsi za'ra mono ne, 're wahâimana za'ra mono da hã oto, rowẽ uptabi na. 3'Re ihâimana u'âsi mono, wa te wasina 're i'umnhasi za'ra mono norĩ si, wa za tô wasina wa te 're uwaimrami za'ra, 're idawa'utu u'âsi za'ra mono ne, rowẽ uptabi na oto ãma 're iwahâimana u'âsi za'ra mono zéb da hã, te te wama iropisutu za'ra zém na. 'Re ihâimana u'âsi mono te te sina 're i'umnhasi za'ra mono õ norĩ si te te sina 're uwaimrami za'ra mono õ di za, rowẽ hã. Duréihã ni'wa hã ma tô ãne na ãma rob'ui'éré, 'Re ihâimana u'âsi mono mreme na, wahi'rata norĩ ãma hã:

“Te ĩsiwi iwẽ'õ za'ra zéb zarina, wa tô ĩmreme pire na ta norĩ ãma tinha, ãne: ‘Tô sena, niwamhã dame sisisi õ di za, ti'ai wẽ u hã, 're idawa'utu za'ra mono ne, iwa 're hâimana za'ra mono da, te aré tãma ipisutu za'ra zéb u hã.’ ”

E tawamhã, 'Re ihâimana u'âsi mono hã zahadu te te tãma pisutu za'ra õ wa, te te sina uwaimrami za'ra õ di, wahi'rata norĩ hã. Mare di. Taha wab õ di. Ropoto na'rata hawimhã ma tô uburé marĩ hã te te sima apisutu siromo, marĩ hã te te dama ãma 're i'ab'manharĩ mono zéb da hã. 4Duréihã 'Re ihâimana u'âsi mono zadawa wasu'u na ma tô ni'wa hã ãne na ãma rob'ui'éré, te te ro'apoto mono pari, ãma i'awẽzém na hã, ãne:

“'Re ihâimana u'âsi mono hã zahadu 6 na bâdâ hã ãma morĩ ré, ma tô te te ro'apoto. Taha pari, oto awẽ wam na hã te oto wa'udu, romhuri ãna.”

5Ta hã ãne iwasu'u hã, duréihã wahi'rata norĩ ãma ni'wa te te ãma irob'ui'érézé hã, 'Re ihâimana u'âsi mono mreme na:

“Tô sena niwamhã dame sisisi õ di za, ti'ai wẽ u hã, aré 're wa'utu za'ra mono da, iwa 're hâimana za'ra mono da, te aré tãma ipisutu za'ra zéb u hã.”

6Duréihã ti'ai wẽ wa, 're idanomro wẽ mono zé wasu'u wapari 'rata 'wa norĩ hã, ta norĩ 're idawa'utu u'âsi za'ra mono ne, iwa 're hâimana za'ra mono da, 'Re ihâimana u'âsi mono te te tãma ipisutu za'ra zé hã te te sina uwaimrami za'ra õ di, isimiroti hã te te 're 'madâ'â za'ra mono õ wa, ta norĩ hã. E tawamhã õhõ haré ma tô dawi sizâ 'Re ihâimana u'âsi mono hã, 're idawa'utu u'âsi za'ra mono ne, rowẽ uptabi na 're idanomro u'âsi mono zé hã. Mare di. Si'utõrĩ waihu'u õ di, ta hã. Ni'wam norĩ hã te za tô rowẽ uptabi na 're idahâimana za'ra mono zéb u 're sisisi, 'Re ihâimana u'âsi mono te te tãma ipisutu za'ra zéb zarina. 7E niha wa za tawamhã ãne na sena na wa te ãma 're waihu'u za'ra. 'Re ihâimana u'âsi mono hã ma tô bâdâ hã tô sena na pisutu, 're idawa'utu u'âsi za'ra mono ne, rowẽ uptabi na 're idanomro mono zéb u 're idanhisisi mono zéb da hã. Tawamhã ãne te te pisutu wamhã, “ã bâtâ na” ma tô sisi, 'Re ihâimana u'âsi mono hã. Ãne na ma tô apito Dawi hã dama sadawa wasu'u, duréihã wahi'rata norĩ hã a'ubuni wi 're inomro mono zém hawi, ãma wahub ahâ za'ra parip si. Ãne apito Dawi te te ãma irob'ui'érézém na te ãma aima irob'ui'éré za'ra wa'aba zé hã:

“Ã bâtâ na, 'Re ihâimana u'âsi mono mreme hã wapari za'ra wa'aba wamhã, aipẽ'ẽ tete na aihâimana za'ra wa'aba tõ.”

8Duréihã Zozué ti'ai wẽ u te te idanhimroi mono zé hã, e taha si, 'Re ihâimana u'âsi mono, 're idawa'utu za'ra mono zéb da, te te dama ipisutuzé hã, te wasu'u. Mare di. Taha si õ di. Taha si 'wa'âhã, 'Re ihâimana u'âsi mono hã niwamhã te te aré wasu'u zahu õ di ãne hã, 're idawa'utu u'âsi za'ra mono ne, rowẽ uptabi na 're idanomro mono zé wasu'u hã. 9'Re idawa'utu u'âsi za'ra mono ne, rowẽ uptabi na 're idanomro mono zé hã, te tô 'Re ihâimana u'âsi mono nhib'a'uwẽ norĩ ma 're hâimana u'âsi za'ra, õne u'âsi, duréihã ropoto na'rata hawi bâdâ hã 6 na ãma si'utõrĩ pari, bâdâ misi na romhuri ãna iwa'utu ne, 'Re ihâimana u'âsi mono hã. 10Ni'wam norĩ hã 're idawa'utu u'âsi za'ra mono ne, rowẽ uptabi na 're idanomro mono zéb da hã, 'Re ihâimana u'âsi mono te te dama ipisutuzém na te te sina 're i'uwaimrami za'ra mono norĩ hã, 're siwasutu za'ra mono õ di za oto, taha na 'Re ihâimana u'âsi mono hã te te 're awẽsãmri mono da. 'Re ihâimana u'âsi mono hã duréihã te te ro'apoto mono pari, romhuri te te isazâri ne, 're siwasutu zahu za'ra mono õ di za oto, ta norĩ hã apâ. 11Tahawa, rowẽ uptabi na 're iwanomro mono zéb zô si, wa za wasima 're wanhopré u'âsi, ãma 're wahâimana u'âsi za'ra mono da. Duréihã Izaraéu nhihudu norĩ hã a'ubuni wi 're nomro mono ré, 'Re ihâimana u'âsi mono nhimiroti te te siwi wẽ'õ pese za'ra wa, ta norĩ hã te te sina uwaimrami za'ra õ di, 're idawa'utu u'âsi za'ra mono zé hã. Ta norĩ ne, wa te wasiwi 're simini tõ za'ra mono da, wa za tô taha zô si wasima 're wanhopré u'âsi, iwẽ uptabi zô si. 12'Re ihâimana u'âsi mono zadawa wasu'u hã ihâiba ré ne, te tô wama 're hâimana u'âsi za'ra. Siptete uptabi di duré imreme hã, uburé marĩ hã i'uwaibaba si te te dama ãma 're i'ab'manharĩ mono zéb da hã, 'Re ihâimana u'âsi mono hã. Sib'ézé 'wa pa si'uiwa i'wa pese ne, te wama 're hâimana za'ra, isadawa wasu'u hã. Sib'ézé i'wa pese na te za romnhi hã da te 're nhizazari za'ra, ihi si da te 're urĩrĩ za'ra mono da hã. Tane duré, 'Re ihâimana u'âsi mono zadawa wasu'u hã wa te 're wapari za'ra mono wamhã, 'râwi wapẽ'ẽ na wanhimirosa'rada iwẽ hã duré iwasédé hã wa za wa te ãma 're waihu'u za'ra. 13Marĩ hã 'Re ihâimana u'âsi mono wi isima'uri pese na hã 'maihâimana õ di, te te 're i'ab'madâ'â mono õ na hã. Ai'uréiwi te uburé marĩ hã tãma 're hâimana, sõ'awi. Taha ma si, wa za nimahã na hã wahâimanazém na tãma wasiwasu'u za'ra ni, wahâiba mono bâ. Tahawa, wahi'rata norĩ ne, 're wahâimana za'ra mono õ di za, wa norĩ hã.

Zezusi hã sasedoti ipire uptabi na te te da'ãma 're iromhuri mono zé wasu'u

14Sasedoti ipire uptabi na te tô ni'wa hã te te wa'ãma 're romhuri u'âsi. Ta hã Zezusi, 'Re ihâimana u'âsi mono 'ra. Timama u ma tô mo hâiwa u, 'râwi te te tiwi 're rowaptẽrẽ u'âsi mono da, wama za'ra. Tahawa, Zezusi, wa te 're isaze za'ra mono zém na tô sena dama 're iwasiwasu'u za'ra mono zéb zarina, wa za tô ta hawim haré wanhiptete sina ãma 're wahâimana u'âsi za'ra. 15Tawamhã tô õ hã sasedoti ipire uptabi na, te te wa'ãma 're iromhuri mono hã, e wahâimana nhib'uware na 're wahâimana za'ra mono nherẽ, wa'ãma 're siwamri mono õ di za bété, ta hã. Te za tô wa'ãma 're siwamri u'âsi. E marĩ wa. Ta hã ma tô Wa'uburé hã te te 're pibu aré, tiwasédé hã te te 'manharĩ da, wawasédé hã wa te 're 'manharĩ za'ra mono da, te te 're iwa'apibui u'âsi mono ne. Tane nherẽ, tiwasédé hã te te 'manharĩ õ uptabi di, Zezusi hã. 16Tahawa, wasina 're wahâtâ'â za'ra mono ãna, wa za tô 'râwi wapẽ'ẽ 're, 'Re ihâimana u'âsi mono u 're wasihutu, da'ãma 're siwãrĩ mono da, te te 're ida'ab'madâ'â u'âsi mono u hã. Wa'uburé te te 're wa'wapé za'ra mono ré, wa'ãma 're siwamri mono da, duré wa'ãma 're siwãrĩ mono da, wa za ãhã ré wapẽ'ẽ 're, itẽme 're wasihutu u'âsi, 'Re ihâimana u'âsi mono u hã.

Currently Selected:

Hebreu 4: xavBP

Highlight

Copy