Hebreu 2

Danho'reptuzé iwẽ uptabi wasu'u

1Tahawa, Cristuhu wasu'uwẽ hã wa te 're iwapari za'ra mono zép si, wa za wa te 're 'madâ'â pese za'ra, tiwi wasina 're wapahâ za'ra mono tõ da. 2Duréihã 'Re ihâimana u'âsi mono nhimiroti hã, hâiwa ãma tãma iromhuri'wa norĩ hã wahi'rata norĩ ma, te te iwaihu'u za'ra zé hã tô sena na 're ihâimana mono na ma tô da te 're waihu'u za'ra. Duré ni'wam norĩ hã õhõ si te te 're 'madâ'â za'ra mono õ wa, duré isarina si 're nomro wẽ mono õ wa, ma tô 'Re ihâimana u'âsi mono hã isimi'manharĩ za'ra zéb zarina si te te 're hâ za'ra. 3Ãne wa, te te 're iwa'anho'reptui mono zéb zô, iwẽ uptabi zô, wa te sô 're rob'ruiwapari za'ra mono õ nherẽ, e isimihâzé wi, wa za wasi'uihâ na tiwi 're wasisõ'reptu za'ra. Mare di. 'Re ihâimana u'âsi mono te te 're iwa'anho'reptui mono zé wasu'u na ma tô Wanhib'apito hã dama rowasu'u 'rata, si'uihâ na. Imreme wapari'wa norĩ hã ma tô duré ãne na wama ãma rowasu'u za'ra, tô sena danho'reptuzém na wa te ãma 're isaze za'ra mono zéb da hã. 4'Re ihâimana u'âsi mono zama, ma tô te te 're wa'apawapto, te te 're ida'anho'reptui mono zé wasu'u hã, tô sena na 're ihâimana mono na wa te wasina ãma 're waihu'u pese za'ra mono da oto. Tiwaihu'u pese na marĩ iwẽ hã dama i'manharĩ waihu'u'õ hã ma tô, tô te te dama 're ab'manharĩ wẽ, taha zarina tô sena, wa te ãma 're iwaihu'u pese za'ra mono zéb da hã, te te 're ida'anho'reptui mono zé wasu'u hã. Ma tô duré Tipẽ'ẽzani ma pisutu, romhuri hã isazei'wai mono bâ te te sima 're i'awẽ mono zéb zarina, te te tãma 're apisutu mono da, ãma 're idasipawaptob za'ra mono zéb da hã. Taha zarina, wasi'uihâ na tô sena, wa te ãma 're waihu'u pese za'ra mono da, ma tô duré te te 're wa'apawapto, 'Re ihâimana u'âsi mono hã.

Zezu Cristu hã Danho'reptui'wai wasu'u

5Za 're idahâimana téb za'ra mono na, wa tô aima ãma rowasu'u pari za'ra wa'wa. E tahawa, te za hâiwa ãma tãma iromhuri'wa norĩ hã pisutu za'ra 'Re ihâimana u'âsi mono hã, ta norĩ hã pire na te te 're da'madâ'â za'ra mono da, za 're idahâimana téb za'ra mono ãma hã. Mare di. Ta norĩ hã danhib'apito da, te te pisutu za'ra õ di. 6Tazahã duréihã ni'wa hã ma tô ãne na ibaihâ na ãma rob'ui'éré, 'Re ihâimana u'âsi mono ma, te te inharĩzém na hã:

“'Re ihâimana u'âsi mono, e dahâimana pire na aima 're dahâimana za'ra mono bâ, te da'ãma 're aipo're pu'u u'âsi mo. E niha da, te bété da'ãma 're aiwamri u'âsi mo, a'uwẽ na si 're dahâimana za'ra mono nherẽ.

7Ma tô aré dama ipisu, hâiwa ãma aima romhuri'wa norĩ zapari, dawapu na 're dahâimana za'ra mono da a'â. Tazahã, ma tô oto dama ipisu, dapire na oto 're dahâimana za'ra mono da, iwẽ na si.

8Ma tô duré dama ipisu oto, uburé marĩ hã niwapsi da te 're 'madâ'â za'ra mono da, dapire na.”

'Re ihâimana u'âsi mono hã ma tô oto dama pisutu, niwapsi uburé marĩ hã da te 're i'madâ'â za'ra mono zéb da hã, dapire na. Marĩ hã taré 're 'maihâimana mono õ di za, da te 're i'madâ'â za'ra mono õ na hã. Tane nherẽ, zahadu uburé marĩ hã da te 're 'madâ'â za'ra mono õ di, ti'a 're dahâimana za'ra mono ré hã. 9Zezusi 're imorĩzép si wa tô wa te 're waihu'u pese za'ra. Ta hã ma tô 'Re ihâimana u'âsi mono hã pisutu, ti'ai ãma 're hâimana mono ré hã, hâiwa ãma tãma iromhuri'wa norĩ ma, wapu na a'â 're hâimana mono da, dasine. Zezusi hã dazada dâ'â da si, ma tô pisutu 'Re ihâimana u'âsi mono hã, da'ãma 're pẽ'ẽzé mono wa, da'ãma 're isiwãrĩ mono zéb da hã oto. Ma tô duré pisutu ti'ra hã, pire na dama 're hâimana u'âsi mono da oto, dazada idâ'âzéb zarina, te te irobzépata na te te sina tãma ãma uwaimrami wa, Timama ma hã. 10'Re ihâimana u'âsi mono hã ma tô uburé te te ro'apoto. Taha ma si te uburé marĩ hã tãma 're hâimana. Ta hã tô ibâ, ma ti'ra hã pisutu Zezusi hã, dazada dâ'â wa, te te robzépata da a'â, taha zarina te te 're da'anho'reptui mono da, te te sina uwaimrami da, 'Re ihâimana u'âsi mono te te tãma ipisutuzéb zarina. Da'ahâ na hâiwa ãma rowẽ uptabi na i'rata 're danomro u'âsi mono da, ma tô ãne da hã tãma pisutu, 'Re ihâimana u'âsi mono hã.

11Zezusi hã ma tô dawasédé hã te te dama 're apari. Taha zarina te iwasédé te te tãma 're i'apari mono norĩ ma, isiré misire Imama za'ra na hã tô õhõ si tãma 're hâimana za'ra. Tahawa, Zezusi hã ãma 're sisé mono õ di, ta norĩ hã tisisãnawã na za te te 're anhisi mono na dâ'âsina, 'Re ihâimana u'âsi mono hã misire Imama za'ra wa, simisutu. Te za tô tisisãnawã na te te 're anhisi, Zezusi hã. 12Duréihã 'Re ihâimana u'âsi mono zadawa 'mahârâ'wa hã ma tô ãne na ãma rob'ui'éré, Zezusi hã Timama ma, za te te tãma irowasu'uzém na hã:

“Ĩsisãnawã norĩ ma, wa za tãma te 're aiwasu'u wẽ za'ra.

Siré 're si'rã'õtõ mono ré hã, wa za ai'ãma 're ĩwata u'âsi, isõ'a za'ra.”

13Ma tô duré ni'wa hã ãne na ãma rob'ui'éré, Zezusihi mreme wasu'u na hã:

“Ĩzama wa za te ĩsina 're umnhasi pese u'âsi, 'Re ihâimana u'âsi mono hã.”

Duréihã ãne, Zezusihi mreme wasu'u amo na da te ãma irob'ui'érézé hã, isazei'wa norĩ ãma hã:

“Ãhãta wa hã wa oto 're ĩhâimana, 'Re ihâimana u'âsi mono 'ra na tãma 're ihâimana za'ra mono norĩ siré, te te õ hã duré ĩma 're i'apisutu mono norĩ siré.”

14'Re ihâimana u'âsi mono 'ra ne, tãma 're ihâimana za'ra mono norĩ hã te a'uwẽ hâiba na 're hâimana za'ra, nhi ré na, duré iwaprui ré hã. Tahawa, ma tô Zezusi hã dasiré si'a'uwẽ, a'uwẽ hâiba na a'â 're morĩ da. Tidâ'âzém na Wa'uburé nhiptede hã te te tiwi prub da, ma tô a'uwẽ hâiba na podo, Wa'uburé nhimi'manharĩzéb zarina, dadâ'âzé ma, dasipibuma marĩ zô 're danhopré tõ mono da oto. 15Ni'wam norĩ hã te tô Wa'uburé nhimiromhurizéb zarina, pahi u'âsi 're hâimana za'ra, tidâ'âzé ma hã, iwada'uri zarina si pawa'âbâ ãna te te dama 're iromhuri za'ra mono hã tinhib'apito nhimiwada'uri na si sina hâtâ'â u'âsi 're ihâimana za'ra mono ne. Ta norĩ hã tidâ'âzé ma, pahi ãna oto 're hâimana za'ra mono da, ma tô sada tidâ'â za'ra, Zezusi hã. 16E hâiwa ãma romhuri'wa norĩ hã te te 're pawaptob za'ra mono da, ma tô we ti'ai u mo Zezusi hã, dawazari si'a'uwẽ da. Mare di. Abra'ãhã nhihudu mono bâ te te 're ipawaptob za'ra mono da si, ma tô wei mo. Ãne hã wama waihu'u pese za'ra di oto, wa norĩ ma hã. 17Tahawa, tisisãnawã norĩ me, aiwa uptabi a'â 're hâimana mono da, ma tô si'a'uwẽ Zezusi hã, sasedoti 'Re ihâimana u'âsi mono ma, da'ãma romhuri'wa tisiré norĩ nhipai u ipire uptabi ne 're hâimana mono da, tãma umnhasi na te te tãma 're romhuri mono da, da'ãma pẽ'ẽzé uptabi sina. Taha da, ma tô si'a'uwẽ tô, taha zarina dawasédé hã te te oto dama 're apari mono da. Ta hã dasiré si'a'uwẽ õ 'wa'âhã, ãne hã te te aré sina uwaimrami waihu'u õ di, 'Re ihâimana u'âsi mono ma hã. 18Zezusi hã ma tô robzépata za'ẽtẽ tô, ti'ab ré. Duré Wa'uburé hã ma tô aré pibu, tiwasédé hã te te 'manharĩ da. Tane nherẽ, te te iwapari õ zarina, tiwasédé hã te te 'manharĩ õ di. Tahawa, Wa'uburé hã te te 're wapibu za'ra mono wamhã, te za õ hã tô te te 're wa'apawapto, isine wawasédé hã wa te 're 'manharĩ za'ra mono ãna, wanhiptete sina õhõ ãma si oto 're wanomro mono da, Zezusihi ãma si.

Currently Selected:

Hebreu 2: xavBP

Highlight

Copy