Popular Bible Verses from Hebreu 2

Share

Zezusi hã ma tô robzépata za'ẽtẽ tô, ti'ab ré. Duré Wa'uburé hã ma tô aré pibu, tiwasédé hã te te 'manharĩ da. Tane nherẽ, te te iwapari õ zarina, tiwasédé hã te te 'manharĩ õ di. Tahawa, Wa'uburé hã te te 're wapibu za'ra mono wamhã, te za õ hã tô te te 're wa'apawapto, isine wawasédé hã wa te 're 'manharĩ za'ra mono ãna, wanhiptete sina õhõ ãma si oto 're wanomro mono da, Zezusihi ãma si.

'Re ihâimana u'âsi mono 'ra ne, tãma 're ihâimana za'ra mono norĩ hã te a'uwẽ hâiba na 're hâimana za'ra, nhi ré na, duré iwaprui ré hã. Tahawa, ma tô Zezusi hã dasiré si'a'uwẽ, a'uwẽ hâiba na a'â 're morĩ da. Tidâ'âzém na Wa'uburé nhiptede hã te te tiwi prub da, ma tô a'uwẽ hâiba na podo, Wa'uburé nhimi'manharĩzéb zarina, dadâ'âzé ma, dasipibuma marĩ zô 're danhopré tõ mono da oto.

Tahawa, Cristuhu wasu'uwẽ hã wa te 're iwapari za'ra mono zép si, wa za wa te 're 'madâ'â pese za'ra, tiwi wasina 're wapahâ za'ra mono tõ da.

Tahawa, tisisãnawã norĩ me, aiwa uptabi a'â 're hâimana mono da, ma tô si'a'uwẽ Zezusi hã, sasedoti 'Re ihâimana u'âsi mono ma, da'ãma romhuri'wa tisiré norĩ nhipai u ipire uptabi ne 're hâimana mono da, tãma umnhasi na te te tãma 're romhuri mono da, da'ãma pẽ'ẽzé uptabi sina. Taha da, ma tô si'a'uwẽ tô, taha zarina dawasédé hã te te oto dama 're apari mono da. Ta hã dasiré si'a'uwẽ õ 'wa'âhã, ãne hã te te aré sina uwaimrami waihu'u õ di, 'Re ihâimana u'âsi mono ma hã.

Zezusi 're imorĩzép si wa tô wa te 're waihu'u pese za'ra. Ta hã ma tô 'Re ihâimana u'âsi mono hã pisutu, ti'ai ãma 're hâimana mono ré hã, hâiwa ãma tãma iromhuri'wa norĩ ma, wapu na a'â 're hâimana mono da, dasine. Zezusi hã dazada dâ'â da si, ma tô pisutu 'Re ihâimana u'âsi mono hã, da'ãma 're pẽ'ẽzé mono wa, da'ãma 're isiwãrĩ mono zéb da hã oto. Ma tô duré pisutu ti'ra hã, pire na dama 're hâimana u'âsi mono da oto, dazada idâ'âzéb zarina, te te irobzépata na te te sina tãma ãma uwaimrami wa, Timama ma hã.