Hebreu 12

'Re ihâimana u'âsi mono hã ti'ai ãma damama ne te te 're ida'ahâ za'ra mono zé wasu'u

1Duréihã ni'wam norĩ hã 'Re ihâimana u'âsi mono te te sina 're i'umnhasi za'ra mono zéb zarina, danho'a 're inomro wẽ mono norĩ hã ahâ uptabi na 'râwi wamana wawi 're isimasab u'âsi mono ne, wa za ta norĩ ãma 're wasipo're pu'u u'âsi za'ra. Tahawa, wa za uburé marĩ iwasédé hã wa te wasiwi 're wẽ'õ pese za'ra, 're iwanomro wẽ mono zé wi, te te 're wanhowada za'ra mono tõ da, te te 're iwawasutu u'âsi za'ra mono hã, wawasédé hã. Dawara na 're dasipibu za'ra mono wa, dahâiba wapu na 're dasisa'rei mono da, marĩ ipire hã dahâiba na dama 're ihâimana za'ra mono hã da te dasisa 're isani za'ra mono ne, wa za wawasédé hã wa te wasiwi 're wẽ'õ pese za'ra. Tawamhã wanhiptete na wa za tô ãma 're wahâimana za'ra Cristuhu ãma si, tiwi 're wasipizari za'ra mono ãna. Dawara na 're dasipibu za'ra mono wamhã, dawara tete haré dasiwi 're idasisa'rei mono ne, wa za tô wanhiptete na ãma 're wahâimana u'âsi za'ra, Cristuhu ãma si. 2Dawara na 're dasipibu za'ra mono wa, dawara, da te 're i'rãsutu za'ra mono zéb u si, da te 're i'madâ'â za'ra mono ne, wa za Zezusihi ãma si wa te wasina 're rosa'rata u'âsi za'ra. Ta hã Zezusi hã ma tô isãna'rata hawimhã te te 're wa'apawapto, 'Re ihâimana u'âsi mono si wa te wasina 're umnhasi u'âsi za'ra mono da. Tane te za duré te te 're wa'apawaptob u'âsi, 're iwadâ'â za'ra mono zéb u, õhõ si wa te wasina 're umnhasi u'âsi za'ra mono da, tiwi 're wasipizari za'ra mono ãna. Ta hã Cristu hã sihâiba zawi õ di, wedepo'o nhonhi'rãmi na dazada dâ'â tõ da hã, wedepo'o nhonhi'rãmi hã dazada 're ihâimana wasété za'ra mono norĩ pãrĩzép si nherẽ. Taha wa'rãmi, hâiwa ãma to sina 're ihâimana u'âsi mono zé hã za tãma 're ihâimana mono na, te te sina waihu'u siromo wa, tahawa, sihâiba zawi õ di tô, wedepo'o nhonhi'rãmi na dazada dâ'â tõ da hã. Ãhã na hã 'Re ihâimana u'âsi mono nhimire niwĩ, te oto pire uptabi na 're sãmra, isiré 'râwi te te 're da'ab'madâ'â u'âsi mono da oto.

3Ma'ãpé ãma rosa'rata pese za'ra wa'aba, Zezusi hã ti'ab ré te te 're irobzépata mono na hã. Tiwasété si te te 're i'manharĩ za'ra mono norĩ hã te te 're 'ruiwapari za'ra mono wa, te te tãma 're irob'manharĩ wasété za'ra mono zém na, ma tô te te 're robzépata za'ẽtẽ, Zezusi hã. Tane nherẽ, siptete u'âsi ma tô 're hâimana. Tane duré a norĩ wa'wa hã te za marĩ iwasété wi 're asi'madâ'â pese za'ra wa'aba mo, asiptete sina 're aihâimana za'ra wa'aba mono da, aiwi 're robzei'õ za'ra wa'aba mono tõ da. Taha zarina, 'Re ihâimana u'âsi mono hã asina 're i'umnhasi za'ra wa'aba mono zé hã aiwi 're si'utõrĩ za'ra wa'aba mono tõ da, te za tô asiptete sina 're aihâimana za'ra wa'aba mo. 4Dawasété nhiptete da, asiptete sina 're aihâimana za'ra wa'aba mono nherẽ, zahadu ai'matâ'â aba õ di, da te aima i'mairob'manharĩ za'ẽtẽ aba na hã, Zezusi, ãma idâ'â ne hã. 5E ma tô bété ãma aipo're si'âri za'ra wa'wa, 'Re ihâimana u'âsi mono te te aima iroti za'ra wa'aba zém na hã, duré ti'ra na te te aima inharĩ za'ra wa'aba zém na hã. Ãne ma tô ãhã wasu'u na ni'wa hã ãma rob'ui'éré, duréihã:

“A norĩ wa'wa hã ĩ'ra na ĩma 're aihâimana za'ra wa'aba mono nherẽ, aiwasédé hã 're i'manharĩ za'ra wa'aba mono zém na 're asisãmri za'ra wa'aba mono da, wa hã Danhib'apito uptabi hã te 're aihâ za'ra wa'aba mono wamhã, ĩ'ãma 're rosa'rata upa za'ra wa'aba mono õ di za, taré newa.

Duré apâ 're anomro wẽ wa'aba mono da, niha te aima 're rob'manharĩ za'ra wa'aba mono wamhã, aiwi 're robzei'õ za'ra wa'aba mono õ di za. Te za ĩ'ãma asima 're irosa'rata wẽ u'âsi za'ra wa'aba mo.

6E marĩ wa, aiwi 're robzei'õ za'ra wa'aba mono õ di za. Wa hã Danhib'apito uptabi hã uburé te 're i'azawi pese mono norĩ hã te 're ahâ za'ra mono wa. Duré tiwasété na 'râwi 're sisãmri za'ra mono da, uburé ĩ'ra na te 're isisi za'ra mono norĩ hã apâ 're nomro wẽ mono da, wa wa hã te tãma 're arob'manharĩ, ta norĩ ma.”

Ãne wa, aiwi 're robzei'õ za'ra wa'aba mono õ di za, 'Re ihâimana u'âsi mono te te 're aihâ za'ra wa'aba mono wamhã.

7Damama norĩ hã bété. E ti'ra norĩ hã te te 're hâ za'ra mono õ di za, po're ãna 're hâimana za'ra mono wamhã. Te za tô te te 're hâ za'ra. Tane te duré Aimama 'wa 'Re ihâimana u'âsi mono hã te te 're aihâ za'ra wa'wa. E marĩ wa. I'ra si tãma 're aihâimana za'ra wa'aba mono wa oto. Tahawa, marĩ na 're robzépata za'ra wa'aba mono nherẽ, te za sada 're asiptete za'ra wa'aba mo, aiwi 're robzei'õ za'ra wa'aba mono ãna. 'Re ihâimana u'âsi mono 'ra si, oto tãma 're aihâimana za'ra wa'aba mono wa, te te 're i'aihâ za'ra wa'aba mono zém na asina 're waihu'u pese za'ra wa'aba mono wa, te za tô sada 're asiptete za'ra wa'aba mo za. 8Uburé te tô ti'ra norĩ hã te te 're ahâ za'ra 'Re ihâimana u'âsi mono hã, tiwasédé te te 're i'manharĩ za'ra mono zém na ãma 're siwaihu'u za'ra mono da oto, ta norĩ hã. Tahawa, te te 're ai'mai'ahâri aba mono õ wamhã, i'ra'õ na te za 'râwi 're ai'masiwaihu'u aba mo. Ãne wamhã, ni'wa hã mama õ wa, da te 're i'ahâri mono õ ne, 're ai'maihâimana aba mono na te za 'râwi 're ai'masiwaihu'u aba mo, sena na i'ra na tãma 're ai'maihâimana aba mono õ na hã. 9Ti'ai ãma wamama uptabi norĩ hã wawasété na 'râwi 're wasiwaihu'u za'ra mono da, wanhimiza'rese wi te te 're wahâ za'ra mono wamhã, wa tô ta norĩ hã wa te 're hâimana wazéb za'ra, wama pire na 're hâimana za'ra mono wa. Taha nhipai u, wa za duré hâiwa ãma Wamama uptabi hã wa te 're wapari pese za'ra, te te 're wa'ahâ za'ra mono nherẽ, rowẽ na õhõ ãma si 're wanomro u'âsi mono da oto. 10Ti'ai ãma wamama uptabi norĩ hã ma tô wanhimiza'rese wi te te 're wa'ahâ za'ra tô, 're waprédub za'ra mono õ ré hã. Wawasété na 'râwi 're wasiwaihu'u za'ra mono da, ma tô te te 're wa'ahâ za'ra, niwamhã i'uwaibaba uptabi õ nherẽ, damama norĩ nhimi'ahârizé hã. Tazahã, 'Re ihâimana u'âsi mono si, te i'uwaibaba si te te 're wa'ahâ za'ra. Te te 're iwa'apawapto mono da si, te za tô ti'ai ãma 're wanomro mono ré, te te 're wa'ahâ za'ra, wawasété ãna isine 're wahâimana za'ra mono da oto, wa norĩ hã. 11Wawasédé hã wa te 're i'manharĩ za'ra mono zém na 'râwi 're wasiwaihu'u za'ra mono da, 'Re ihâimana u'âsi mono te te 're wahâ za'ra mono wamhã, awa'awi 're watoi waihu'u za'ra mono õ di, taha na hã. Robzei'õ na si wa za a'â 're wahâimana za'ra. Tane nherẽ, 'Re ihâimana u'âsi mono te te 're iwahâ za'ra mono zém na oto 'râwi 're wasiwaihu'u za'ra mono wamhã, duré wa'ãma 're ronomro pese za'ra mono wapsi, te za wapẽ hã i're wama 're simi'wara wẽ oto, õhõ ãma si 're iwanomro wẽ mono zéb zarina wa.

'Re ihâimana u'âsi mono mreme, da te 're iwapari pese za'ra mono zé wasu'u

12Tahawa, marĩ na 're robzépata za'ra wa'aba mono wamhã, aipẽ'ẽ wẽ zarina te za asiptete sina ãma 're aihâimana za'ra wa'aba mo, 'Re ihâimana u'âsi mono ãma si, aiwi 're robzei'õ pese za'ra wa'aba mono wa, tiwi asina 're aipahâ za'ra wa'aba mono tõ da. 13Bâdâdi na awa'awi u'âsi 're idanomro mono ne, te za Cristuhu nhirã zarina si awa'awi 're anomro u'âsi aba mo, iwẽ na si. Ãne wamhã, i'rãtẽire hã morĩ wasété na 're imorĩ ne, ni'wam norĩ hã Cristuhu ãma sib'uware na 're ihâimana za'ra mono norĩ hã asine wa'aba, awa'awi u'âsi 're nomro wẽ mono wamhã, ta norĩ hã tiwasété na 're si'marõpãrĩ zahu za'ra mono õ di za oto. Apâ te za ai'ãma 're siptete za'ra wa'wa, isazei uptabi 'wa na 're i'aihâimana za'ra wa'aba mono zém na.

14Rowẽ zô te za 're asõpré wa'aba mo, dasiré 're aihâimana za'ra wa'aba mono da. Duré 'Re ihâimana u'âsi mono ma si 're asisõmri u'âsi za'ra wa'aba mono da, te za 're asi'madâ'â pese za'ra wa'aba mo. Ãne hã ni'wam norĩ hã 're hâimana wẽ za'ra mono õ nherẽ, niwamhã Wanhib'apito hã titõmo na te te dame 'madâ'â za'ra õ di za, ta norĩ hã. 15'Re aihâimana za'ra wa'aba mono zém na, 'Re ihâimana u'âsi mono ma, asina tãma ãma 're uwaimrami za'ra wa'aba mono õ wa, tinhoprubzéb zarina, iwẽ uptabi hã te te aima 're ipisutu za'ra wa'aba mono hã 're simini za'ra wa'aba mono tõ da, te za 're asi'madâ'â pese za'ra wa'aba mo. Wede pa hã, ti'ai 'rowi 're simi'wara mono ré hã, taha wa'u isé hã dama simimnhasi õ di. Tane nherẽ, ipa hã da te oto 're sa'o'o za'ra mono wa, da te oto 're huri mono wamhã, te za te te 're da'rãiwamnarĩ za'ra, taha pa wa'u hã sé wa. Tane duré, a norĩ wa'wa hã te za ni'wam norĩ wi 're asi'madâ'â pese za'ra wa'aba mo, ta norĩ hã te te aiwi 're rowasété za'ra wa'aba mono tõ da, duré taha zarina a norĩ wa'wa hã 'râwi aiwasété na 're asi'uptob za'ra wa'aba mono tõ da, ta norĩ zu. 16Duréihã Ezau hã tãma mrab uptabi wa, ma tô tino nhipi hã tiwi waptẽ, Zacoho wi. Tawamhã imama ma ipoto'rata zarina, uburé marĩ hã imama te te tãma ipisudu hã, duré 'Re ihâimana u'âsi mono, iwazéb zahi te te tãma ipisudu hã i'upana inoi ma 're hâimana mono da, ma tô tinoi ma ti'ru, isipi wa'rãmi Ezau hã, taha na sai õ ré. Ãne hã Ezau hã 're ihâimana wasété mono ne, te duré ni'wam norĩ hã asiré 're hâimana wasété za'ra wa'wa. Ta norĩ wi, te za 're asi'madâ'â pese za'ra wa'aba mo, sina 're isipsaihuri za'ra mono norĩ wi, 'Re ihâimana u'âsi mono hâimanazé te te 're iwazéb za'ra mono õ norĩ wi hã. 17Tawamhã taha na ãma ronomro parip si, ma tô Ezau hã timama ma tinha, 'Re ihâimana u'âsi mono ma, ãma mreme da, iwẽ hã te te tãma 're anhomri mono da, inoi upana. Tane nherẽ, ma tô imama hã siwi wẽ'õ, ãma mreme tõ da. Tahawa, tiwasédé te te 'manharĩ pari nherẽ, apâ te te sima pari waihu'u õ di, timama ma te te nharĩ sina, wawa 'rãihâ na wawa nherẽ. Ãhã wasu'u hã aima waihu'u pese za'ra wa'aba di, ãne na hã.

18Duréihã Izaraéu nhihudu norĩ hã ma tô Sina'i na ẽtẽ 'rãihâ nhisi u sina rotété za'ra, tame a'â i'rata si'ubumro da, 'Re ihâimana u'âsi mono 'rata. Ta hã ẽtẽ 'rãihâ hã danhib'rata na da te upi waihu'u pese di. Tane nherẽ, a norĩ wa'wa hã tane 're aihâimana za'ra wa'aba mono õ di oto, ãhã na hã. 'Re ihâimana u'âsi mono u, aipẽ'ẽ na 'râwi itẽme 're aihutu aba mono wamhã, marĩ hã asib'rata na 're upi waihu'u za'ra wa'aba mono õ di za. Izaraéu nhihudu norĩ si ma tô 'râwi unhama ro'o za'ẽne hã 'madâ'â za'ra, ẽtẽ 'rãihâ nhisiwimhã. Tamemhã ma duré hâiwa nhirõtõ 'rãdâ hã watobro, i'rãdâ'âra uptabi hã. Rowa'u'u za'ẽtẽ zama ma tô duré watobro, ẽtẽ 'rãihâ nhisi ãma hã. Ãne ma tô ta norĩ hã 'madâ'â za'ra titõmo na, Izaraéu nhihudu norĩ hã. 19Danhimnhihârâzé hã ihârâ 'rãihâ hã ma tô duré wapari za'ra. 'Re ihâimana u'âsi mono mreme zama ãhã wamhã, ma tô duré wapari za'ra, Izaraéu nhihudu norĩ hã. Ta hã te te wapari za'ra wamhã, 'Re ihâimana u'âsi mono hã niha te tãma rob'manharĩ za'ra õ'umnhasite, ma tô sima wẽ za'ra, Mozésihi ma si te te rowaihu'u mono da, 'Re ihâimana u'âsi mono hã, hâiba pisutu. 20E marĩ wa, ma tô ta norĩ hã 'Re ihâimana u'âsi mono ma tipahi za'ra, Izaraéu nhihudu norĩ hã. 'Re ihâimana u'âsi mono hã ma tô ẽtẽ 'rãihâ hâiba na tãma roti za'ra, ãne: “Ni'wa hã ã ẽtẽ 'rãihâ te te upi wamhã, te za asiwi iwĩrĩ 'wa, ẽtẽ na. Duré asimizama za'ra wa'aba zama, te te sina 'mai'upi wamhã, te za iwĩrĩ 'wa, ẽtẽ na.” Ãne ma tô ẽtẽ 'rãihâ hâiba na ta norĩ ma mreme pire na tãma roti za'ra aré, 'Re ihâimana u'âsi mono hã. Taha pipa te, ma tô Izaraéu nhihudu norĩ hã sima wẽ za'ra, Mozésihi ma si, hâiba pisutu te te rowaihu'u mono da, 'Re ihâimana u'âsi mono hã. 21Ã hã te te i'madâ'â za'ra hã pipa uptabi wa, te Mozési hã 'râwi sima tinha, ãne: “Ĩpahi wa, wa tãma rẽrẽ.” Ãne te sima tinha, Mozési hã. Ãne ma tô ropipa uptabi hã ẽtẽ 'rãihâ ãma isõ'a iwatobro za'ra hã 'madâ'â za'ra duréihã, Izaraéu nhihudu norĩ hã, 'Re ihâimana u'âsi mono u te te sina rotété za'ra wamhã.

22Tazahã, a norĩ wa'wa hã tane 're aihâimana za'ra wa'aba mono õ di oto, ãhã na hã. 'Re ihâimana u'âsi mono u aipẽ'ẽ na 'râwi asina 're rob'umhutu za'ra wa'aba mono wamhã, hâiwa ãma Siã na ẽtẽ 'rãihâ nhisi u ne, ma tô 're irob'umhutu za'ra wa'aba mo. Duré hâiwa ãma Zeruzalẽ hã 'ri nho'õmo u ne, ma tô 're irob'umhutu za'ra wa'aba mo, 'Re ihâimana u'âsi mono 're isãmra u'âsi mono zéb u hã, hâiwa ãma tãma iromhuri'wa norĩ hã ahâ uptabi na, i'rata 're isi'ubumroi mono zéb u zama. 23Tame te oto 'Re ihâimana u'âsi mono nhib'a'uwẽ norĩ hã to sina 're si'rã'õtõ, aibâ hã dama 're poto 'rata za'ra mono wa, dama isawi pese ne, 'Re ihâimana u'âsi mono te te 're i'azawi pese mono norĩ hã, hâiwa ãma sisi ui'éré ré 're ihâimana za'ra mono norĩ hã. Tamomo ma tô itẽme 're irob'umhutu za'ra wa'aba mo, dahâimanazém na i'uwaibaba si te te 're ida'awaihu'u mono zéb zarina, da'ãma rowairébé'wai u hã. Duré ti'ai ãma ré iwẽ si te te 're i'manharĩ za'ra mono norĩ hã 're ihâimana za'ra mono zéb u, ma tô duré 're irob'umhutu za'ra wa'aba mo, 'Re ihâimana u'âsi mono te te tãma 're iwẽ za'ra mono zéb zarina si, rowẽ uptabi na oto 're ihâimana za'ra mono norĩ u hã. 24Zezusihi u ma tô duré asina 're irob'umhutu za'ra wa'aba mo. Ta hã te oto 'Re ihâimana u'âsi mono te te dama iropisutuzép té hã te te wa'ãma 're ab'madâ'â u'âsi. Duréihã Caĩ hã tino te te wĩrĩ wa, iwapru hã tiwi pu'u wamhã, 'Re ihâimana u'âsi mono te te i'ruiwa'âbâzé, te wasu'u, Abéu wapru hã. Tanei õ di, Zezusihi wapru hã. Dazada dâ'â wa, iwapru hã tiwi pu'u wamhã, 'Re ihâimana u'âsi mono hã dawasédé te te dama 're i'apari mono zé, te wasu'u.

25Tahawa, te za 're asi'madâ'â pese za'ra wa'aba mo, 'Re ihâimana u'âsi mono hã te te aima 're rowasu'u za'ra wa'aba mono wamhã, tiwi 're asipo're nhitob za'ra wa'aba mono tõ da. Duréihã Sina'i na ẽtẽ 'rãihâ nhisi ãma, 'Re ihâimana u'âsi mono ti'ai u te te we dama rowasu'u wamhã, isimiroti wapari'õ'wa norĩ hã wairébé õ di, te te idahâ za'ra zé wi hã. Wa norĩ hã bété. E 'Re ihâimana u'âsi mono hã hâiwa hawi te te wei wama 're aroti wẽ mono nherẽ, tiwi 're wasipizari za'ra mono wamhã, e isimihâzé wi wasi'uihâ na 're wawairébé mono da bâ, wa za bété wanhimipari ãna hã 're wanomro u'âsi. 26Duréihã 'Re ihâimana u'âsi mono hã Sina'i na ẽtẽ 'rãihâ nhisi ãma te te dama roti wamhã, ma tô ti'a hã sãsã'ã. Tane nherẽ, taha za'u hã ma tô oto dama ropisutu, ãne: “Ti'a hã niwapsi wa za duré sãsã'ã, irẽme ma. Tahawa, ti'a si hã niwamhã te sãsã'ã õ di za oto. Hâiwa nhirõtõ zama hã, wa za oto isu sãsã'ã za, nimahã na hã.” Ãne 'Re ihâimana u'âsi mono te te dama iropisutuzép tém na rob'ui'éré hã. 27E marĩ te tawamhã wama wasu'u za'ra imreme hã, “irẽme ma” na hã. Uburé za marĩ hã ti'ai ãma, 'Re ihâimana u'âsi mono nhimipodo nimahã na te te sãsã'ã za'ra wa, za isi'utõrĩ mono zé, te wama wasu'u za'ra. Tawamhã taha nhowa're're, te za iwẽ uptabi hã da te oto isãsã'ã waihu'u'õ hã 're hâimana u'âsi za'ra hâiwa ãma, isi'utõrĩ waihu'u'õ hã.

28'Re ihâimana u'âsi mono hã 'râwi te te 're wa'ab'madâ'â mono da, i'rata 're iwahâimana u'âsi za'ra mono zéb da hã, ma tô te te wama 're apisutu, da te wawi ãma i'ai'uté waihu'u za'ra õ hã. Tahawa, wa za 'Re ihâimana u'âsi mono ãma 're wawata u'âsi za'ra, sõpru wa. Te te sima 're iwa'awẽ mono zéb zarina, wa za ãma 're wawata u'âsi za'ra, wa te wasiwi 're wazéb za'ra mono sina, wama 're toi u'âsi mono da. 29Wate 'Re ihâimana u'âsi mono hã ipo're'õ norĩ te te uprosi waihu'u pese di, unhama ro'o za'ẽtẽ na marĩ hã 're isi'unhama pese mono ne hã. Tahawa, wa za tô wa norĩ hã imreme hã wa te 're wapari u'âsi za'ra, Wanhib'apito nhimiroti hã.

Currently Selected:

Hebreu 12: xavBP

Highlight

Copy