Hebreu 13

'Re ihâimana u'âsi mono hã dama 're itoi mono zé wasu'u

1'Re i'asisawi pese za'ra wa'aba mono zém na, te za ãma 're i'uzusi u'âsi za'ra wa'aba mo, Cristuhu ãma 're asisãnawã za'ra wa'aba mono wa oto. 2Darob amoi hawi atẽme 're dasihutu za'ra wa'aba mono wamhã, asõrõwa u, te za duré 're ida'mazasi wẽ za'ra wa'aba mo. Ni'wam norĩ hã tinhorõwa u te te 're da'mazasi wẽ za'ra mono wamhã, hâiwa ãma 'Re ihâimana u'âsi mono ma romhuri'wa norĩ hã ma tô te te 're 'mazasi wẽ za'ra, ta norĩ ma, tãma sa'rese za'ra õ nherẽ, hâiwa ãma romhuri'wa norĩ hã. 3Duré wasiré isazei'wa norĩ ãma te za 're aipo're pu'u u'âsi za'ra wa'aba mo, dazazéb 're, 're isimasa mono norĩ ãma hã, ta norĩ hã asiwi 're pawaptob za'ra wa'aba mono da. Dazazéb 're, ta norĩ siré 're aimasa wa'aba mono ne, te za ãma 're aipo're pu'u u'âsi za'ra wa'aba mo. Duré marĩ na te te 're irobzépata za'ra mono norĩ ãma zama, te za duré 're aipo're pu'u u'âsi za'ra wa'aba mo, ta norĩ siré duré 're irobzépata za'ra wa'aba mono ne.

4Imro ré norĩ hâimanazé hã te za 're iwazé pese za'ra wa'aba mo, 'Re ihâimana u'âsi mono ma, ta hã pire uptabi wa. Aimro si te za asima 're i'madâ'â u'âsi za'ra wa'aba mo. E marĩ wa. Ni'wam norĩ hã tihâiba na tiwasédé te te 're 'manharĩ za'ra mono wamhã, 'Re ihâimana u'âsi mono hã te za ta norĩ te te 're hâ za'ra. Duré ni'wam norĩ hã mro ré nherẽ, imro'õ hâiba na 're sipsaihuri za'ra mono wamhã, te za ta norĩ hã duré te te 're ahâ za'ra, 'Re ihâimana u'âsi mono hã.

5Rob'uiprazéb zawizé, te te aima 're roti za'ra wa'aba mono tõ da, tãma asina 're rowairébé za'ra wa'aba mono õ di za. Asibro hã aima 're ihâimana za'ra wa'aba mono na si, te za asima 're irowẽ za'ra wa'aba mo. Duréihã 'Re ihâimana u'âsi mono hã ma tô ãne dama sina ropisutu: “Niwamhã te airẽme za'ra wa'aba õ di za. Duré asiwaprosi 're aihâimana za'ra wa'aba mono da, asiti za'ra wa'aba 're ĩhâimana waihu'u mono õ di za.” 6Tahawa, 'Re ihâimana u'âsi mono hã wa te wasina 're i'umnhasi za'ra mono zéb zarina, wa za ãne wa te wasima 're nharĩ za'ra, duréihã apito Dawi hã te te sima inharĩ ne, ãne:

“Õhõ si Danhib'apito uptabi te te 're ĩpawaptob u'âsi. Tahawa, marĩ ma, 're ĩpahi mono õ di.

E 'wa ãne wamhã, marĩ te te ĩ'ãma 'manharĩ da bâ.”

Ãne duréihã Dawi hã 'râwi te te sima inharĩ ne, wa za duré wa norĩ hã wa te wasima 're nharĩ za'ra, isine ãhã na mono hã.

7Ma'ãpé ãma asipo're pu'u za'ra wa'aba, 'Re ihâimana u'âsi mono zadawa wasu'u na isãna'rata hawi te te ãma aima 're irowasu'u za'ra wa'aba mono norĩ ãma hã, ai'madâ'â'wa za'ra wa'aba norĩ ãma hã. Ta norĩ 're ihâimana za'ra mono zém na, duré 're idâ'â za'ra mono zém na zama, te za ãma 're asipo're pu'u u'âsi za'ra wa'aba mo. Ta norĩ hã 'Re ihâimana u'âsi mono si te te sina 're i'umnhasi za'ra mono ne, te za duré a norĩ wa'wa hã isine asina 're i'umnhasi za'ra wa'aba mo, 'Re ihâimana u'âsi mono hã. 8Zezu Cristu hã tihâimanazém na te te ãma 're saprĩ waihu'u mono õ di. Ahâmhâ na duré ãhã na zama te tô õhõ u'âsi 're hâimana. 9Cristuhu wasu'uwẽ upana, danhimiroti aimawi na da'ãma 're sasõmri za'ra wa'aba mono õ di za, senai'õ na da te dasima 're irowasu'u za'ra mono na hã. 'Re ihâimana u'âsi mono hã tinhoprubzéb zarina, iwẽ uptabi hã te te wama 're i'apisutu mono na si, wa za wapẽ'ẽ 're ãma 're wanhiptete u'âsi za'ra. Taha si wa norĩ hã wama iwẽ uptabi za'ra hã. Dasa hã da te dasiwi 're isawi za'ra mono na roti hã da te 're i'madâ'â za'ra mono na, ãma 're danhiptete waihu'u za'ra mono õ di, dapẽ'ẽ 'remhã. E marĩ wa. Taré na dasa hã 're hâimana mono wa. Taha na ãma 're dasipawapto waihu'u za'ra mono õ di tô, dasa da te dasiwi 're isawi za'ra mono na roti na hã.

10Duréihã 'Re ihâimana u'âsi mono ma, da'ãma romhuri'wa norĩ hã, sasedoti norĩ hã dawasété parizéb da, danhimizama te te tãma 're simroi mono wamhã, ta norĩ hã inhi na hã 're saihuri waihu'u mono õ di. Tane duré, ni'wam norĩ hã danhimizama wapru na 'Re ihâimana u'âsi mono, dawasédé hã zahadu te te dama ãma 're apari mono newa, te za Cristu hã sada idâ'â za'ra zé, ta norĩ hã te te 're simini za'ra. Wa norĩ si Cristuhu zazei'wa norĩ si, wa za wa te wasina ãma 're uwaimrami za'ra, wazada idâ'â za'ra zém na hã. 11Sasedoti norĩ nhib'apito, tisiré norĩ nhipai u ipire uptabi si wahub sidâpâsi ma tô danhimizama waprui ré itẽme 're sisisi, 'ri 're wa'wa u, 'Re ihâimana u'âsi mono, iwa 're isãmra mono zéb u hã. Dawasété parizéb da, ma tô ta norĩ hã tãma ãma 're sõprub za'ra, 'Re ihâimana u'âsi mono ma. Tane nherẽ, ma tô romhâ na danhimizama hâiba hã da te 're zata pese za'ra, danhimizahâri sidâpâsi 'ri hã da te dasima 're isõré za'ra mono zém nhiti. 12Ãne wa, ma tô duré Zezusi hã 'ri 'wawi wa'razém nhiti dârâ, te te irobzépata za'ẽtẽ zarina, tiwapru na taha si te te oto 're da'a'upsõi mono da, dawasété hawi. 13Tahawa, wa za oto wa norĩ hã Zezusihi u si dawi 're wawairébé, taha si tô sena te te 're wa'anho'reptui mono da. Tahawa, wa za tô, 're idanomro 'rata mono zé hã, wa te 're rẽme pese za'ra. Zezusi hã wazada dâ'â wa, da te dasiwi i'ruiwapari ne, da te 're wa'ruiwapari za'ra mono da nherẽ, wa za tô itẽme 're wawairébé, 're iwanomro 'rata mono zém hawimhã, Zezusihi u hã. 14Ãme ti'ai ãma 'ri nho'u hã 're i'maihâimana u'âsi mono hã wama 're 'maihâimana mono õ di, ãma 're iwahâimana u'âsi za'ra mono zéb da hã. Ta hã baba uptabi di. Hâiwa ãma 'ri nho'õmo zô si, wa za wasima 're wanhopré u'âsi, za tame wama 're ihâimana u'âsi za'ra mono zô si. 15Tahawa, Zezusi hã wazada idâ'âzéb zarina, wa za 'Re ihâimana u'âsi mono ãma 're wawata u'âsi za'ra, taha si wama 're toi u'âsi za'ra mono da. Duréihã danhimizama na duré dasa na 'Re ihâimana u'âsi mono ma, 're danhoprub za'ra mono wa, dama 're itoi mono ne, wa za ãma 're wawata u'âsi za'ra, wama 're toi u'âsi za'ra mono da. 'Re ihâimana u'âsi mono hã wa te wasina 're i'umnhasi za'ra mono zém na sõ'awi dama 're iwasiwasu'u za'ra mono na zama, wa za tãma ãma 're wanhoprub za'ra, 'Re ihâimana u'âsi mono ma hã. 16Marĩ iwẽ hã 're 'manharĩ za'ra wa'aba mono da dama, duré 're idapawaptob za'ra wa'aba mono zém na hã, ãma 're aipo're simrami za'ra wa'aba mono õ di za. Taha na zama te duré tãma 're asõprub za'ra wa'aba mo, taha na aima 're toi u'âsi za'ra wa'aba mono wa, 'Re ihâimana u'âsi mono hã.

17Asiré isazei'wa 'madâ'â'wa norĩ nhimiroti hã te za 're iwapari pese za'ra wa'aba mo. Te te aima 're iroti za'ra wa'aba mono zéb zarina, te za marĩ hã 're i'manharĩ za'ra wa'aba mo. Ta norĩ hã niwapsi te za 'Re ihâimana u'âsi mono ma siwasu'u za'ra, te te ai'ãma 're iromhuri za'ra wa'aba mono zém na hã. Tahawa, te ta norĩ hã ai'ãma 're hâtâ'â u'âsi za'ra wa'wa, te te 're i'ai'madâ'â za'ra wa'aba mono zém na hã, Cristuhu zazei'wa 're ihâimana za'ra mono zém na si 're anomro aba mono da. Ta norĩ nhimiroti hã 're wapari pese za'ra wa'aba mono wamhã, to sina te za tô ta norĩ hã te te ai'ãma 're romhuri za'ra wa'wa. Tane nherẽ, 're wapari za'ra wa'aba mono õ wamhã, robzei ãna te za te te 're romhuri za'ra. Ãne wamhã, te te 're aipawapto waihu'u za'ra wa'aba mono õ di za, ta norĩ hã.

18Ma'ãpé, wa'ãma 're aimreme zusi u'âsi aba mono za, 'Re ihâimana u'âsi mono ma. 'Re iwanomro wẽ mono da si, wa tô wa norĩ hã wa te wasima 're wẽ u'âsi za'ra. Tahawa, marĩ na 're iwahâimana wasété za'ra mono zém na hã 'râwi wapẽ'ẽ na 're wasisãmri za'ra mono õ di oto, wama 're hâimana za'ra mono õ wa. 19Tahawa, wa duré wa hã ĩsima aiwẽ uptabi za'ra wa'wa, ĩ'ãma zama 're aimreme zusi aba mono da, 'Re ihâimana u'âsi mono hã te te ãma ĩzatõrĩ su'u da, atẽme za'ra wa'aba, te asabu za'ra wa'aba hâ.

20-21Wanhib'apito Zezusi hã wazada idâ'âzéb zarina, te oto pone'ẽrebâ 'madâ'â'wa ne, wama 're hâimana za'ra, wa'madâ'â'wa iwẽ uptabi na hã. Wazada idâ'âzéb zarina, ma tô 'Re ihâimana u'âsi mono hã taha na dama ropisutu té, ãma 're dahâimana u'âsi za'ra mono da oto, taha ãma si. Zezusi hã dâ'â nherẽ, ma tô Imama hã apâ hâiwa'utu.

'Re ihâimana u'âsi mono hã dama rowẽ pisutu'wa hã, iwẽ si te te aima 're sõmri za'ra wa'aba mono da, wa taha na si te ai'ãma 're umnhasi za'ra wa'wa, taha zarina uburé marĩ hã te te aima 're iwẽ za'ra wa'aba mono zéb zarina si, tãma ãma asina 're uwaimrami za'ra wa'aba mono da. Duré Zezu Cristuhu waihu'u pese na te te 're wa'apawapto mono da, wa duré taha na si te ai'ãma 're umnhasi za'ra wa'wa, iwẽ si wa te oto tãma 're 'manharĩ za'ra mono wa, wa'ãma 're toi u'âsi mono da, 'Re ihâimana u'âsi mono hã.

Tahawa, Zezu Cristuhu ãma si ãma 're wawata u'âsi za'ra wa'aba mono za. Tane tô.

Rowasu'u 'rãsutuzé wasu'u

22Ĩsisãnawã norĩ, ã te aima ãma iroti za'ra wa'aba zém na, ma'ãpé aiwaimri ãma rosa'rata pese za'ra wa'aba za. Taha da, wa tô ĩmreme 'rutu na ãma aima rowasu'u za'ra wa'wa, ã ĩnhimi'ui'éré na hã. 23Wasisãnawã Timotiu hã ma tô dazazém hawi watobro, da te tãma irob'ruzéb zarina. Ãne hã waihu'u za'ra wa'aba da, wa tô ĩsima aiwẽ za'ra wa'wa. Tawamhã ta hã we ĩtẽme wisi su'u wamhã, ãme ĩnhamra ré, te te duré ĩnhiza wamhã, te za ãma ĩsiré mo, atẽme za'ra wa'aba, taha zama te te duré asabu za'ra wa'aba da, ĩsiré.

24Ma'ãpé uburé ai'madâ'â za'ra wa'aba 'wa norĩ hã wama sawi za'ra wa'aba za. Uburé 'Re ihâimana u'âsi mono nhib'a'uwẽ, tame 're ihâimana za'ra mono norĩ zama, wama sawi za'ra wa'aba za duré.

Italia na danhipti'a nho'õmo nhisi hawi 're iwairébé mono norĩ zama te ãma asawi za'ra wa'wa duré, isazei'wa norĩ, siré 're isi'ubumroi mono norĩ hã.

25'Re ihâimana u'âsi mono ma, wa ai'ãma 're ĩmreme u'âsi za'ra wa'wa, isimizawizé hã aima 're hâimana u'âsi za'ra wa'aba mono da, tô aipẽ'ẽ aba mono bâ hã.

Currently Selected:

Hebreu 13: xavBP

Highlight

Copy