Hebreu 11
11
'Re ihâimana u'âsi mono, da te dasina 're i'umnhasi za'ra mono zé wasu'u
1E niha, 'Re ihâimana u'âsi mono, wa te wasina 're i'umnhasi za'ra mono zé hã. Ta hã te te wama 're i'apisutu mono zéb zarina, iwẽ uptabi zô si 're iwanhimipari u'âsi za'ra mono na, tô sena za te te wama ãma i'uwaimrami za'ra na, wa za wa te wasina 're waihu'u za'ra. Duré uburé marĩ hã watõmo na wa te 're i'madâ'â waihu'u za'ra mono õ zama, wa za duré wa te 're waihu'u za'ra, sena na 're ihâimana za'ra mono na hã. Ãne 'Re ihâimana u'âsi mono, wa te wasina 're i'umnhasi za'ra mono zé hã, te za wama 're hâimana za'ra. 2Duréihã wahi'rata norĩ hã, 'Re ihâimana u'âsi mono te te sina 're i'umnhasi za'ra mono zéb zarina si, ma tô te te 're awẽsãmri, ta norĩ hã.
3'Re ihâimana u'âsi mono, wa te wasina 're i'umnhasi za'ra mono zéb zarina, wa tô, sena na wa te 're waihu'u za'ra, 'Re ihâimana u'âsi mono te te inharĩzéb zarina, marĩ õ uptabi ré, te te i'aropoto mono na hã. Datõmo na da te 're i'madâ'â waihu'u za'ra mono õ na si, ma tô te te ro'apoto, watõmo na wa te oto 're i'madâ'â za'ra mono da hã. Ãne na wa tô duré sena na wa te 're waihu'u za'ra, 'Re ihâimana u'âsi mono si, wa te wasina 're i'umnhasi za'ra mono zéb zarina hã.
4Abéu hã, 'Re ihâimana u'âsi mono si te te sina 're i'umnhasi mono zéb zarina, ma tô iwẽ uptabi na tãma tinhopru, 'Re ihâimana u'âsi mono ma. Caĩhĩ nhibzari si, te te wẽsãmri õ di, 'Re ihâimana u'âsi mono hã. Tahawa, Abéu hã 'Re ihâimana u'âsi mono si te te sina 're i'umnhasi mono zéb zarina, ma tô 'Re ihâimana u'âsi mono hã wẽsã, 're imorĩ wẽ na zama. Tahawa, ma tô Abéu nhoprubzép si wẽsã. Ãne na Abéu hã 'Re ihâimana u'âsi mono te te sina 're umnhasi mono wa, duréihã dâ'â nherẽ, zahadu hâiba ré wama 're ihâimana za'ra mono ne, te wama 're hâimana za'ra, taha ãma duré 're wasipo're pu'u u'âsi za'ra mono wa.
5Duré Enoqui hã 'Re ihâimana u'âsi mono te te sina 're i'umnhasi mono zéb zarina, ma tô hâiba ré mo, hâiwa u. 'Re ihâimana u'âsi mono hã ma tô hâiba ré sitẽme ti'â. Tahawa, ni'wa te te waihu'u õ di ta hã, idâ'âzém na hã. Duréihã 'Re ihâimana u'âsi mono zadawa 'mahârâ'wa hã ma tô ãne na rowasu'u ibaihâ na, Enoquihi wasu'u na hã: “'Re ihâimana u'âsi mono hã hâiwa u sitẽme te te âri õ ré, ma tô Enoquihi ma 're to, 're imorĩ wẽ zéb zarina.” 6Ni'wam norĩ hã 'Re ihâimana u'âsi mono te te sina 're umnhasi za'ra mono õ nherẽ, ta norĩ ma hã, 're toi mono õ di za, 'Re ihâimana u'âsi mono hã. Duré ni'wam norĩ hã 'Re ihâimana u'âsi mono ãma 're wata za'ra mono da, tipẽ'ẽ na 'râwi itẽme 're sihutu mono da, te te sima 're wẽ za'ra mono wamhã, tô sena 're ihâimana mono na, te za te te 're saze za'ra a'â. Duré 'Re ihâimana u'âsi mono zô si 're isõpré mono norĩ ma, iwẽ na za te te ta norĩ ma iwa'âbâ za'ra na, te za ta norĩ hã te te sina 're umnhasi u'âsi za'ra.
7Nowé hã, 'Re ihâimana u'âsi mono si te te sina 're i'umnhasi mono zéb zarina, ma tô duré ãma saze, ropipa hã za dazô iwatobrozém na 'Re ihâimana u'âsi mono hã romhâ ré te te ãma ipo're pu'uzém na, zahadu marĩ hã titõmo na te te 'madâ'â õ nherẽ, Nowé hã. Tahawa, isimiroti zarina ma tô uba're za'ẽne hã 'manha, ti'ra norĩ hã te te ãma sõ'reptu za'ra da, duré timro zama hã, duré tisani'aba norĩ zama hã te te ãma sõ'reptu za'ra da. Taha zarina, ma tô 'Re ihâimana u'âsi mono hã siwi da'awẽ'õ pese, dawasété na si 're dahâimana za'ra mono wa, Nowéhé si isimiroti hã te te 're 'madâ'â pese mono wa. Tawamhã Nowé hã, 'Re ihâimana u'âsi mono si te te sina 're umnhasi mono wa, ma tô 'Re ihâimana u'âsi mono hã ãma tiwata, ãne: “Ãhã si te 're timorĩ wẽ.” Ãne 'Re ihâimana u'âsi mono hã, Nowéhé ãma iwatazé wasu'u hã.
8Abra'ã hã, 'Re ihâimana u'âsi mono si te te sina 're i'umnhasi mono zéb zarina, ma tô duré isimiroti na saze, tirom nhiti watobro da, ti'a te te tãma ipisutuzéb u morĩ da, ãma isa'ru da hã. Tawamhã tirom hawi ma tô watobro tô, ti'ai amoi u morĩ da, tamomomhã bâdâdi hã te te waihu'u õ nherẽ, za ãma imorĩzéb da hã itẽme. 9'Re ihâimana u'âsi mono si te te sina 're i'umnhasi mono zéb zarina, ma tô darob amoi ãma 're sãmra Abra'ã hã, dasiré õ nherẽ, 'Re ihâimana u'âsi mono, za ãma isa'ru da hã te te tãma ipisutuzéb ãma. Ãhã wamhã, romhâ 'manharĩ na 'ri wa, te oto 're sãmra, 'ri uptabi õ wa. Izaqui norĩ hã ma tô duré romhâ 'manharĩ na 'ri wa, 're simasisi zahuré, Zacoho me. Ta norĩ ma, ma tô duré ropisutu zahuré, Abra'ãhã ma te te iropisutu ne, 'Re ihâimana u'âsi mono hã. 10Abra'ã hã 'ri nho'u isi'utõrĩ'õ zô si ma tô 're simipari u'âsi, 'Re ihâimana u'âsi mono hã te te sima iwẽzéb zarina, te te dazô i'ri zô si hâiwa ãma. Tahawa, te te siwi wẽ'õ õ di Abra'ã hã, romhâ 'manharĩ na 'ri hã wasété wa, a'â i're 're sãmra tõ mono da hã.
11Abra'ã hã 'Re ihâimana u'âsi mono si te te sina 're i'umnhasi mono zéb zarina, ma tô duré i'ra hã tãma podo, si'ihi pese nherẽ, duré imro hã Sara hã préduptéb ré, 'ra waihu'u õ nherẽ. 'Re ihâimana u'âsi mono te te tãma iropisutuzém na te te ãma sazei pese wa, ma tô i'ra hã tãma podo tô. 12Abra'ã hã si'ihi uptabi wa, idâ'âzéb u romhutu nherẽ, ma tô ihâiba hawi da'ahâ uptabi na hã dasina dahâ'â u'âsi, isihudu sidâpâsi. Wasi norĩ hã hâiwa na ahâ uptabi na 're isimasa mono ne, ma tô da'ahâ uptabi na hã atébré ni. Â zaihâ na supara, ahâ uptabi na 're isimi'wara mono ne, ma tô atébré ni.
13Ã norĩ hã 'Re ihâimana u'âsi mono te te sina 're umnhasi za'ra mono ré, 're dâ'â za'ra mono nherẽ, 'Re ihâimana u'âsi mono te te tãma iropisutu za'ra zé hã te te sima 're waibui mono õ di ta norĩ hã, ti'ai ãma hâiba ré 're hâimana za'ra mono ré hã. Tane nherẽ, 'Re ihâimana u'âsi mono te te tãma iropisutu za'ra zé hã romhâ na uptabi na za te te tãma ãma i'uwaimrami za'ra na, sena na te te 're waihu'u za'ra mono wa, ma tô ãma 're to za'ra ta norĩ hã, ti'ai ãma 're nomro mono ré. Ma tô duré sõ'awi dama 're siwasu'u za'ra, ti'ai ãma dasiré 're ihâimana uptabi za'ra mono õ na hã. 14Ãne na ta norĩ hã dama 're siwasu'u za'ra mono wamhã, daro hã aimawi itéb zô 're isõpré u'âsi mono zé, te wama wasu'u za'ra, taha na si za oto 're irob uptabi za'ra mono na hã. 15Tirob 'rata hawi 're iwairébé mono na te te 're rosa'rata za'ra mono õ di, ta norĩ hã. Mare di. Ãne 'wa'âhã, ãté te aré ta norĩ hã apâ tirob 'rata u 're nomro. 16Tane nherẽ, daro iwẽ uptabi zô si ma tô ta norĩ hã sima 're sõpré, hâiwa ãma sô 're ihâimana za'ra mono zô si, iwa 're isi'ubumroi u'âsi mono zéb da hã. Tahawa, 'Re ihâimana u'âsi mono te te siwi wẽ'õ za'ra õ di, tinhib'apito na te te 're sisi za'ra mono tõ da hã. Taha zarina, ma tô oto tô 'ri nho'u hã iwẽ uptabi hã tãma 'manharĩ za'ra, iwa 're isi'ubumroi u'âsi mono zéb da hã, tirop téb ãma.
17-18Abra'ã hã 'Re ihâimana u'âsi mono si te te sina 're i'umnhasi mono zéb zarina, ma tô aré ti'ra hã tãma tiwĩ Izaqui hã, tãma ãma isõprubzéb da, 'Re ihâimana u'âsi mono hã te te pibui wamhã. Taha õ ré, ma tô 'Re ihâimana u'âsi mono hã tãma ropisutu siro, Abra'ãhã ma hã, ãne:
“Ai'ra Izaquihi hawip si, te za asihudu norĩ hã ahâ uptabi na 're hâimana za'ra, asihudu sidâpâsi te aima iropisutuzéb zarina.”
Ãne na 'Re ihâimana u'âsi mono te te tãma ropisutu nherẽ, ma tô aré Abra'ã hã ti'ra hã tiwĩ Izaqui hã, i'ra si'aibâ hã misi tãma poto nherẽ. Duré ta hawip si za isihudu norĩ hã sitébré da nherẽ, ma tô aré tãma tiwĩ, 'Re ihâimana u'âsi mono ma hã. 19Abra'ã hã ãne ma tô sima rosa'rata: “'Re ihâimana u'âsi mono ma si, waihu'u pese di, 're dadâ'â za'ra mono nherẽ, apâ te te 're ida'ahâiwa'utu mono da hã. Tahawa, ĩ'ra hã te aré tãma iwĩrĩ hã, te te duré waihu'u pese di, apâ te te ĩma ihâiwa'utu da hã, te te ĩma iropisutuzém na te te ĩma ãma uwaimrami da hã.” Ãne ma tô sima rosa'rata, Abra'ã hã. Tawamhã i'ra Izaqui hã dâ'â uptabi õ nherẽ, aré dâ'â wa, apâ te te tãma ihâiwa'utu ne, ma tô dâ'â ãna tãma tisõ apâ, 'Re ihâimana u'âsi mono hã.
20Duré Izaqui hã 'Re ihâimana u'âsi mono si te te sina 're i'umnhasi mono zéb zarina, ma tô ti'ra norĩ ãma rowaptẽ tiwi, iwẽ na si te te 're pawaptob u'âsi zahuré mono da, duré iwẽ si te te tãma 're pisutu zahuré mono da, Zaco norĩ ma hã Ezauhu me.
21Duré Zaco hã 'Re ihâimana u'âsi mono si te te sina 're i'umnhasi mono zéb zarina, ma tô Zuzéhé 'ra norĩ ma rowaptẽ 'Re ihâimana u'âsi mono wi, iwẽ na si te te 're pawaptob u'âsi zahuré mono da, duré iwẽ si te te tãma 're pisutu zahuré mono da. Taha zarina, ma tô duré tisiwazusizém na si'upari sina ãma tiwata, 'Re ihâimana u'âsi mono ãma, Zaco hã.
22Duré Zuzé hã 'Re ihâimana u'âsi mono si te te sina 're i'umnhasi mono zéb zarina, ma tô tidâ'âzéb u tidub'rata norĩ ma rowaihu'u siromo za'ra, Izaraéu nhihudu norĩ, za Ezitu hawi iwairébézém na hã. Ãne na, 'Re ihâimana u'âsi mono si te te sina 're umnhasi mono wa, te duré tãma sina roti za'ra, i'uirĩ na si, ihi hã te te siwi âri da apâ, tiza'ru 'rata u, tamep si te te siwi sẽrẽ da.
23Duré Mozésihi mama norĩ hã, 'Re ihâimana u'âsi mono si te te sina 're i'umnhasi zahuré mono zéb zarina, ma tô dawi simi'uri zahuré Mozési hã, 'watébrémi na tãma poto zahuré wa. Duré tãma 'madâ'â ze zahuré wa, tãma sawi uptabi zahuré di. Tahawa, ma tô dawi simi'uri zahuré. A'amo hã si'ubdatõ ma tô ãma ai'utõ, te te dawi isimi'uri zahuré zém na hã. Apito ma, ta norĩ hã pahi zahuré õ di, 'watébrémi na 're ipoto za'ra mono norĩ hã, te te dama 're a'rui mono nherẽ. Ãne ma tô 'manharĩ zahuré Mozésihi mama norĩ hã, 'Re ihâimana u'âsi mono si te te sina 're i'umnhasi zahuré mono zéb zarina.
24Mozési hã prédu wamhã, 'Re ihâimana u'âsi mono si te te sina 're i'umnhasi mono zéb zarina, ma tô dawi sisawi, Ezitu ãma apito Fara'oho 'ra sipi'õi 'ra na da te dasima 're wasu'u za'ra mono tõ da, pi'õ te te iprédum na hã. 25Apito Fara'oho nhorõwa ãma, uburé marĩ iwasédé hã te te a'â dame 're i'ab'manharĩ mono da hã, te te sima wẽ õ di Mozési hã, taha na si wẽ uptabi newa ãma 're itoi mono da hã. 'Re ihâimana u'âsi mono nhib'a'uwẽ norĩ siré, te te 're irobzépata mono da si, ma tô sima wẽ. 26Apito Fara'oho nhorõwa ãma 're sãmra u'âsi mono 'wa'âhã, te aré marĩ iwa'âbâ za'ẽtẽ na tinhibro pese, Ezitu ãma uburé marĩ hã iwa'âbâ za'ẽne hã 're isimi'wara mono na. Ta hã marĩ wa'âbâ za'ẽtẽ mono hã wẽ nherẽ, taha upana marĩ iwẽ uptabi si ma tô sima wẽ, Mozési hã. Danho'reptui'wa da, 'Re ihâimana u'âsi mono te te ipisutu ma si, te te 're robzépata mono da si, ma tô sima wẽ pese. Iwẽ hã 'Re ihâimana u'âsi mono, niwa za te te tãma isõmri na si, ma tô te te ãma 're rosa'rata u'âsi, Mozési hã.
27'Re ihâimana u'âsi mono si te te sina 're i'umnhasi mono zéb zarina, ma tô duré Mozési hã watobro Ezitu hawi, apito Fara'o hã te te sima simimnhasi ãna. 'Re ihâimana u'âsi mono hã datõmo na da te 're 'madâ'â waihu'u za'ra mono õ nherẽ, Mozési hã titõmo na te te 're i'madâ'â mono na ne, te te sina 're umnhasi mono wa, apâ sipi'rai õ di, Ezitu u hã. Õne haré ma tô ta hawi watobro, siptete sina. 28Mozési hã 'Re ihâimana u'âsi mono si te te sina 're i'umnhasi mono zéb zarina, ma tô duré Pascowa na dato hã te te 're i'manharĩ za'ra mono zéb da na tãma roti za'ra Izaraéu nhihudu norĩ ma hã, ta norĩ hã tisai 'manharĩ na te te ãma sãna'rata za'ra da, 'Re ihâimana u'âsi mono hã Mozésihi ma te te ipisutuzéb zarina. 'Re ihâimana u'âsi mono si te te sina 're i'umnhasi mono zéb zarina, ma tô duré Mozési hã tãma roti za'ra Izaraéu nhihudu norĩ ma hã, tinhimizama wapru na 'ridawa zada'ré hã te te ãma sapré za'ra mono da, hâiwa ãma romhuri'wa hã Dapãrĩ'wa na iwaptẽrẽ hã, aibâ tãma 're ipoto'rata za'ra mono hã te te tiwi simroi mono tõ da, Izaraéu nhihudu norĩ wi hã.
29Duré Izaraéu nhihudu norĩ hã, 'Re ihâimana u'âsi mono si te te sina 're i'umnhasi za'ra mono zéb zarina, ma tô â poré na hã saprĩ za'ra, zara u, Â ipré na â poré nhisi na. Â 'ré na da te 're isaprĩ za'ra mono ne, ma tô rob'ré na saprĩ za'ra, â zada'ré amoi u hã, i'uiwada u. Tane nherẽ, ezipsiu norĩ hã rob'ré na dazarina te te aré saprĩ za'ra da, si'aba'réi wamhã, ma tô â hã apâ iré atob za'ra. Tahawa, ezipsiu norĩ hã â poré na ma tô uburé ai'utõ.
30Duré Izaraéu nhihudu norĩ hã, Zerico na 'ri nho'õmo nhisi ãma 'ri 'wawi wa'ra 'rãihâ hã ma tô nasi te te uirĩ za'ra, sime da, 'Re ihâimana u'âsi mono te te tãma ipisutu za'ra zéb zarina. Bâdâ hã 7 na ma tô ãma ai'utõrĩ za'ra, te te nasi siwi uirĩ za'ra mono ré hã. Tawamhã 'ri 'wawi wa'ra 'rãihâ hã ma tô aime. Ta norĩ hã 'Re ihâimana u'âsi mono si te te sina 're i'umnhasi za'ra mono zéb zarina, ma tô aime. 31Duré Ra'abi hã pi'õ aré iwa'âbâ zô 're isisõmri mono hã, 'Re ihâimana u'âsi mono si te te sina 're i'umnhasi mono zéb zarina, ma tô wapsãi'a'wa norĩ hã tinhorõwa u 'mazasi wẽ zahuré, ti'ai wẽ zô pi'uriwi dama robzabui'wa norĩ hã. Tahawa, 'Re ihâimana u'âsi mono hã te te dazu wĩrĩ õ di Ra'abi hã, 'ri nho'õmo ãma uburé 'Re ihâimana u'âsi mono nhimiroti 'madâ'â'õ'wa norĩ zu hã.
32Ãne na 'Re ihâimana u'âsi mono si, da te dasina 're i'umnhasi za'ra mono zém na, ahâ uptabi na te ãma aima rob'rãzarõtõ za'ra wa'aba neza. Ãhã wamhã, ĩnhimirob'rãzarõno hã te aré sina tipahâ. E marĩ wa. Ahâ uptabi wa. Ahâ uptabi di tô, 'Re ihâimana u'âsi mono te te sina 're i'umnhasi za'ra mono norĩ hã, zahadu te ãma aima irowasu'u za'ra wa'aba õ hã: Gidiã hã, duré Baraqui, duré Sãsã, duré Zepté, duré Dawi, duré Samuéu, duré aimawi norĩ hã uburé 'Re ihâimana u'âsi mono zadawa 'mahârâ 'rata 'wa 're ihâimana za'ra mono norĩ hã. 33Ta norĩ hã 'Re ihâimana u'âsi mono si te te sina 're i'umnhasi za'ra mono zéb zarina, ma tô te te da'ãma 're ai'uté za'ra, 'Re ihâimana u'âsi mono zadawa para, daro hã te te dawi 're waibui mono da. Ta norĩ hã iwẽ si te te 're 'manharĩ u'âsi za'ra mono wa, ma tô iwẽ uptabi hã te te sima 're waibu, 'Re ihâimana u'âsi mono te te tãma iropisutu za'ra zéb zarina. Duré hu'u zérépa hã ma tô te te 're sadai'ré nhitob za'ra tinhib'rata na, te te 're simro tõ mono da. 34Ta norĩ hã ma tô duré unhama ro'o za'ẽne hã te te 're simro, siwi. Ma tô duré dawi 're sisõ'reptu za'ra, sib'ézé 'wapa na da te 're simroi mono da nherẽ. Sib'uware na 're hâimana za'ra mono nherẽ, 'Re ihâimana u'âsi mono nhimipawaptobzém na ma tô siptete na dazada 're hâimana za'ra. Siptete uptabi na te te 're da'wapé za'ra mono wa, ma tô ta norĩ hã tizahui'wa norĩ hã te te 're wano'õ apâ, darob amoi hawi te te 're idazahu za'ra mono norĩ hã. 35Duré pi'õ norĩ wi, aré tiwi 're idâ'â za'ra mono norĩ hã, ma tô apâ tãma 're hâiwa'utu za'ra, pi'õ norĩ ma. Duré ta norĩ hã 'Re ihâimana u'âsi mono si te te sina 're i'umnhasi za'ra mono norĩ hã dazazéb 're, 're hâimana za'ra mono ré, 'Re ihâimana u'âsi mono te te dawi 're udâ za'ra mono 'wa'âhã, taha zarina te aré dazazém hawi da te tãma 're rob'ru za'ra, ta hawi 're wairébé mono da. Tane nherẽ, ta norĩ hã 'Re ihâimana u'âsi mono te te dawi 're udâ waihu'u za'ra mono õ di. Tahawa, ma tô danhimirob'manharĩ wasété na 're si'utõrĩ. Rowẽ uptabi na 're idanomro u'âsi mono zéb u hã, 'Re ihâimana u'âsi mono si te te 're hâiwa'utu za'ra mono da, ma tô ãne zô si 're si'madâ'â za'ra, ta norĩ hã. 36Ni'wam norĩ ãma, ma tô duré 're dawa'ẽ za'ra. Powawẽ hâiwaré 'manharĩ na ma tô da te dasiwi 're hâ za'ra. Duré ni'wam norĩ hã ma tô da te 're pawasisi za'ra, isi'uwazi nhorõ rutu na, dazazéb 're, da te 're séme mono da hã. 37Ni'wam norĩ hã ma tô duré ẽtẽ tõmo wawẽ na da te 're simro. Ni'wam norĩ hã ma tô duré iwãiwa ãma 're dasiwã za'ra, wede'ézém na ne. Sib'ézé 'wapa na ma tô duré da te 're simro. Pone'ẽrebâi hâ na si ma tô duré ni'wam norĩ hã 're si'uza za'ra. Sibrob ãna ma tô duré ta norĩ hã 're hâimana za'ra. Danhimirob'manharĩ wasété na ma tô duré ni'wam norĩ hã te te 're robzépata za'ra, da te 're 'ruiwapari za'ra mono wa. Ãne 'Re ihâimana u'âsi mono si te te sina 're i'umnhasi za'ra mono norĩ wasu'u 'rãzarõno hã. 38Ta norĩ hã hâiwi si ma tô 're nomro a'ubuni wi, ẽtẽ 'rãihâ u zama. Duré ẽtẽ 'rãihâ zahâpâ ẽtẽ're wa, ma tô duré dawi 're si'ubumro, ab're wab zama. Ta norĩ si ma tô 'Re ihâimana u'âsi mono ma 're hâimana wẽ za'ra.
39Ta norĩ ãma si ma tô 'Re ihâimana u'âsi mono hã 're wata za'ra uburé, õhõ si te te sina 're umnhasi za'ra mono wa. 'Re ihâimana u'âsi mono te te tãma iropisutu za'ra zéb zarina, iwẽ uptabi hã ti'ab ré te te sima 're waibui mono õ nherẽ, ma tô te te sina 're umnhasi u'âsi za'ra, 're isi'utõrĩ za'ra mono zéb u. 40'Re ihâimana u'âsi mono hã iwẽ uptabi hã niwamhã za te te wama isõmri za'ra na, te te sima wa'ãma roti siromo za'ra wa, ti'ab ré ta norĩ hã te te sima 're waibui mono õ di tô, 'Re ihâimana u'âsi mono te te tãma iropisutu za'ra zé hã. Uburé wasiré si te za rowẽ uptabi na i'rata 're ihâimana u'âsi za'ra mono zé hã sima waibu za'ra, ta norĩ hã.
Currently Selected:
Hebreu 11: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.
