Hebreu 10

1'Re ihâimana u'âsi mono nhimiroti 'rata na Mozési te te ãma irob'ui'éré zarina, iwẽ hã oto wama 're ihâimana za'ra mono zém na wa te ãma 're waihu'u uptabi za'ra mono õ di. Wahub sidâpâsi ma tô danhimizama hã dasi'udâna da te tãma 're simroi u'âsi za'ra, 'Re ihâimana u'âsi mono ma hã, da te 're sahâri za'ra mono ãna. Tane nherẽ, danhimizama da te tãma 're isimroi mono zé hã sib'uware di, dawasédé hã tô sena te te dama 're i'apari mono da hã, ãma 're dawata za'ra mono da, 'râwi dapẽ'ẽ na 'Re ihâimana u'âsi mono ãma 're idanomro mono norĩ ma hã. Dapẽ'ẽ 're, rowẽ na 're idahâimana za'ra mono zéb da hã, sib'uware di tô, 'Re ihâimana u'âsi mono ma, danhimizama da te 're isimroi mono zé hã. 2'Re ihâimana u'âsi mono ãma 're idawata za'ra mono norĩ hã danhimizama hã dasi'udâna da te tãma 're isimroi mono zém na, õhõ haré dawasédé hã te te dama 're apari uptabi mono 'wa'âhã, taha zarina 'râwi 're dasiwẽ'õ u'âsi za'ra mono õ di aré, dawasété na hã. Taha zarina te aré oto danhimizama pãrĩ hã da te 're sahâri za'ra. 3-4Tane nherẽ, powawẽ iba'õmo wapru hã duré pone'ẽrebâi wapru hã dawasédé hã te te dama 're pari uptabi za'ra mono õ di. Taré te za danhimizama hã wahub sidâpâsi dasi'udâna 'Re ihâimana u'âsi mono ma, da te 're isimroi mono zéb zarina, ãma 're dasipo're pu'u u'âsi za'ra, dawasété na 're dahâimana za'ra mono wa.

5Tahawa, Cristu hã ti'ai u wei imorĩzéb u, ma tô Timama ma tinha, ãne:

“Danhimizama na duré dasazém na aima 're danhoprub za'ra mono da, a hã asina sô 're asimipari mono õ di.

Tane nherẽ, ĩhâiba hã ma tô ĩma isõ, da'upana ĩsina aima ĩnhoprubzéb da hã.

6Danhimizama hã dawasété parizéb da, wahuré da te aima 're izata za'ra mono zém na zama, 're atoi mono õ di. Duré dawasété parizéb da, danhoprubzé, da te aima 're isõmri za'ra mono na zama hã, asima 're rowẽ mono õ di.”

7Ãne te duré tãma tinha, Timama ma hã:

“'Re ihâimana u'âsi mono, wa hã wa wei ãwa mo ti'ai u, ĩma ipisutuzéb zarina, te oto ĩsina uwaimrami da aima, ibaihâ na ĩwasu'u na duréihã da te ĩ'ãma irob'ui'éré za'ra zéb zarina.”

8Ãne ma tô Cristu hã imorĩ'rata na Timama ma rowasu'u, tô: “Danhimizama dawasété parizéb da, da te aima 're izata za'ra mono zô, duré dasazém na aima 're idanhoprub za'ra mono zô, asina 're asimipari mono õ di a hã. Duré taha na a hã asima ãma 're rowẽ mono õ di.” Ãne na ma tô Cristu hã Timama ma rowasu'u, Mozési hã isimiroti 'rata na te te ãma irob'ui'éré zarina, ãne hã da te 're 'manharĩ za'ra mono nherẽ. 9Taha pari, ma tô duré Timama ma siwasu'u, ãne: “Ãhãta wa hã wa tô wei mo ti'ai u, ĩma ipisutuzéb zarina, te oto ĩsina aima ãma uwaimrami da.” Ãne ma tô Cristu hã Timama ma siwasu'u, duréihã dawasété parizéb da, danhimizama na duré dasazém na 'Re ihâimana u'âsi mono ma, 're idanhoprub za'ra mono zé hã te te oto dawi sina sizâri da, taha nhowa're're tihâiba na tãma sõprub da oto, taha na si dawasédé hã te te dama ãma 're apari mono da. 10Zezu Cristu hã 'Re ihâimana u'âsi mono te te tãma ipisutuzéb zarina, tihâiba na tãma isõprum na te te ãma tãma uwaimrami wa, ma tô te te 're wa'a'upsõ wawasété wa, tãma 're wanomro wẽ mono da oto. Misi haré ma tô tãma sisõ, dazada dâ'â da, tô õhõ na si dawasédé hã te te oto dama ãma 're apari mono da.

11Sasedoti norĩ hã awẽ sidâpâsi te te da'ãma 're romhuri za'ra, 'Re ihâimana u'âsi mono nhorõwa ãma. Danhimizama na 're idanhoprub za'ra mono zé hã te ahâ uptabi na te te tãma 're sõmri za'ra, 'Re ihâimana u'âsi mono ma, tô õhõ si. Tane nherẽ, ã norĩ hã danhimizama na 're idanhoprub za'ra mono zém na hã, dawasédé hã te te dama ãma 're pari waihu'u za'ra mono õ di. 12Cristuhu si, ma tô misi haré tihâiba hã tãma tisõ, dazada dâ'â da, õhõ na si dawasédé hã te te dama ãma 're apari mono da. Taha pari, te 'Re ihâimana u'âsi mono nhimire niwĩ 're sãmra, pire uptabi na isiré te te 're da'ab'madâ'â mono da oto, õne u'âsi. 13Tame te oto Cristu hã sô 're simipari u'âsi, 'Re ihâimana u'âsi mono hã tinhitob'ru norĩ nhiptetezé hã te te tiwi i'uprosi za'ra zéb zô hã, tãma sib'uwa uptabire na 're hâimana za'ra mono da oto, ta norĩ hã. 14Misi haré 'Re ihâimana u'âsi mono ma, dazada sisõmri wa, ma tô dawasété hawi te te 're da'awaibu, 'Re ihâimana u'âsi mono nhib'a'uwẽ si oto ãma 're danomro mono da.

15'Re ihâimana u'âsi mono pẽ'ẽzani hã ma tô ãne na wama waihu'u za'ra, sena na wa te wasina 're waihu'u za'ra mono da. Ãne te te wama ãma iwaihu'u na'rata za'ra zé hã:

16“Nimahã bâtâ na wa za, te dama iropisutuzép té hã dama pisutu, duréihã te dama iropisutuzém nhowa're're. Ãne, wa wa hã Danhib'apito uptabi hã aima wasu'u za'ra wa'wa, ĩnhimiroti tém na te oto dama iropisutuzém na hã.

Tawapsi wa za ĩnhimiroti hã dapẽ'ẽ 're te dama 're anhomri, iré 're danomro u'âsi mono wa, da te 're 'madâ'â pese za'ra mono da, ĩmreme hã.”

17Ãne ma tô duré iwasu'u nhana'remhã wama waihu'u za'ra:

“Dawasété na 're ĩsipo're pu'u mono õ di za oto, marĩ, da te 're i'manharĩ wasété za'ra mono zém na hã.”

18Ãhã wamhã, dawasédé hã 'Re ihâimana u'âsi mono te te oto dama 're i'apari mono zéb da hã, marĩ dai õ di oto, danhimizama na tãma 're idanhoprub za'ra mono zé hã, dawasété parizéb da. Ta hã tâibâ oto, marĩ dai õ wa.

'Re ihâimana u'âsi mono u, 'râwi dapẽ'ẽ na 're idasihutu mono zé wasu'u

19Ĩsisãnawã norĩ, Zezusihi wapru hã tiwi ipu'uzém na wazada idâ'âzéb zarina, wa za oto wasina wapahi ãna 'Re ihâimana u'âsi mono u hã 're wasihutu 'râwi wapẽ'ẽ na, robzei u'âsi tãma 're wamreme zusi mono da. Duréihã sasedoti norĩ hã, 'Re ihâimana u'âsi mono 're isãmra mono zéb u, 'ri 're wa'wa u 're isisisi mono ne, wa za oto wa norĩ hã 'râwi itẽme 're wasihutu, wasina 're wapahi za'ra mono ãna, tãma hã.

20Duréihã 'Re ihâimana u'âsi mono 're isãmra mono zéb 're, 'ri 're wa'wa nhitobzé hã zazahâ ihâpa hã te dawi 're hâsipra u'âsi, itẽme 're danhisisi tõ mono da. Tane nherẽ, Cristu hã ma tô oto wama 'ridawa za'ra tidâ'âzém na, zazahâ ihâpa na 'ri 're wa'wa nhitobzé wa'wai baba, itẽme 're idanhisisi mono ne, wapẽ'ẽ na itẽme 're wasihutu mono da, 'Re ihâimana u'âsi mono u, robzei uptabi na ime 're wanomro u'âsi mono da oto. 21Sasedoti ipire uptabi na hã te oto duré wama 're hâimana za'ra. Taha si te oto tãma hã duré umnhasi na uburé 'Re ihâimana u'âsi mono nhib'a'uwẽ norĩ hã te te 're ab'madâ'â, pire uptabi na. 22Wawasété na 're wanomro mono wa, wapẽ'ẽ na 'râwi 're iwasisãmri za'ra mono na, 're iwasiwẽ'õ za'ra mono zé hã ma tô Cristu tiwapru na hã te te wama 're apari, duréihã sasedoti norĩ hã te te ãma 're dahâiba wẽ za'ra mono da, danhimizama wapru na suru na te te ãma 're idahâiba di'i za'ra mono ne. Sasedoti norĩ hã 're sihâiba wasété za'ra mono ãna, 'Re ihâimana u'âsi mono u 're sisisi mono da, 're isihâiba upsõi pese za'ra mono ne, wa oto wa norĩ hã wahâiba upsõi pese ne tãma 're wahâimana za'ra, 'Re ihâimana u'âsi mono ma si. Tahawa, wa za oto wapẽ'ẽ na 'râwi itẽme 're wasihutu, wahâimanazé sena ré si, 'Re ihâimana u'âsi mono u hã, õhõ si wa te oto wasina 're i'umnhasi za'ra mono zéb zarina. 23'Re ihâimana u'âsi mono hã wama umnhasi za'ra di, te te wama 're i'aropisutu mono zéb uwaibaba, te te wama ãma 're i'a'uwaimrami mono da hã. Tahawa, wanhiptete sina wa za iwẽ uptabi zô 're wanhimipari u'âsi za'ra, 'Re ihâimana u'âsi mono hã te te wama iropisutu za'ra zém na wa te 're wawã za'ra mono ãna, sena na za wama 're ihâimana za'ra mono na wa te dama 're iwasu'u za'ra mono zéb zarina. 24Wa za duré wasi'ãma hã 're wapo're pu'u u'âsi za'ra, marĩ na 're iwasipawaptob za'ra mono zéb da na, duré taha zarina 're iwasisawi pese za'ra mono zém na wa te wasima ãma 're i'uwaimrami za'ra mono zéb da na, duré marĩ wẽ na wa te wasima ãma 're iwa'rãmi wẽ za'ra mono zém na da zama. 25Ni'wam norĩ hã Cristuhu zazei'wa dasiré 're hâimana za'ra mono wa, rowahutu u dasiré 're si'rã'õtõ mono nherẽ, ma tô ta norĩ hã oto rosahâri pese za'ra. Tane nherẽ, wa norĩ hã wasiré 're iwasi'rã'õtõ mono zé hã wa te wasiwi sazâri õ di za. Wa za tô wasiré 're wasi'rã'õtõ u'âsi, ãma 're wasipawapto pese za'ra mono da, 'Re ihâimana u'âsi mono hã wa te wasina 're i'umnhasi za'ra mono zém na si 're wanhiptete za'ra mono da. E marĩ wa. Wanhib'apito apâ we imorĩzéb u hã bâdâ hã romhutu na aima waihu'u pese za'ra wa'aba wa.

26Ni'wam norĩ hã Cristuhu wasu'uwẽ, sena na 'râwi te te sina 're waihu'u pese za'ra mono nherẽ, duré te te sima 're iwẽ za'ra mono zéb zarina, 're ihâimana wasété 'rata za'ra mono zém na si 're hâimana u'âsi za'ra mono wamhã, marĩ hã 're 'maihâimana mono õ di, ta norĩ da hã, iwasédé te te tãma 're ipari za'ra mono zéb da hã, ta norĩ ma. 27Ta norĩ hã 'Re ihâimana u'âsi mono zada, 're hâimana za'ra mono wa, te za 'Re ihâimana u'âsi mono hã uprosi unhama ro'o za'ẽtẽ na, te te siwi 're iwẽ'õ pese za'ra mono norĩ hã. Tahawa, te za ta norĩ hã sina pahi na sina 're simipari za'ra oto. 28Duréihã 'Re ihâimana u'âsi mono nhimiroti 'rata na, Mozési te te ãma irob'ui'éré hã ni'wam norĩ hã te te siwi 're wẽ'õ pese za'ra mono wamhã, ta norĩ hã ma tô da te dasiwi 're simro, ãma 're dapẽ'ẽzé waihu'u za'ra mono ãna. Marĩ iwasédé hã ta norĩ hã te te 're 'manharĩ za'ra mono ré, siwaptom na titõmo na i'madâ'â za'ra 'wa norĩ hã, iwasété na te te dama 're iwasu'u za'ra mono zéb zarina, ma tô da te dasiwi 're simro, ta norĩ hã. 29Ãne, duréihã 'Re ihâimana u'âsi mono nhimiroti 'rata wẽ'õ'wa norĩ ma hã, 're ropipa za'ra mono di. E niha tawamhã za, 'Re ihâimana u'âsi mono 'ra, te te siwi 're i'ruiwapari za'ra mono norĩ ma, 're iromhâimana za'ra mono zé hã za. Tãma 're ropipa uptabi za'ra mono di za tô. 'Re ihâimana u'âsi mono hã te za tô ta norĩ hã hâ za'ra za'ẽtẽ, rob'rãsutuzéb ãma hã. Duré 'Re ihâimana u'âsi mono te te dama iropisutuzép tém na, Cristu hã dazada idâ'âzé hã taré newa, te ta norĩ hã te te ãma 're rosa'rata upa za'ra. Ta norĩ hã te duré 'Re ihâimana u'âsi mono pẽ'ẽzani ãma te te 're wasété u'âsi za'ra, isimizawi uptabi ãma hã. 30Tahawa, te za tô ta norĩ hã nimahã na hã hâ za'ra, 'Re ihâimana u'âsi mono hã. Duréihã ma tô ãne na ni'wa hã ãma rob'ui'éré siro, 'Re ihâimana u'âsi mono mreme na hã. Ãne na hã 'Re ihâimana u'âsi mono mreme hã wama waihu'u pese za'ra di oto:

“Wa hã ĩsiwaprosi wa za te 're da'a'ruiwa'âbâ. Ĩwétési wa za te dama ãma 're awa'rãmi, marĩ, da te 're i'manharĩ wasété za'ra mono norĩ ma hã.”

Ãne duré 'Re ihâimana u'âsi mono mreme na rob'ui'éré amo hã:

“Wa hã uburé Danhib'apito uptabi hã wa za i'uwaibaba uptabi na si te 're da'ahâ za'ra, dawasété na ĩsiwaprosi te 're ida'awaihu'u mono zéb zarina.”

31Ni'wam norĩ hã 'Re ihâimana u'âsi mono nhib'rata, 're irere'e mono ne, te te 're hâ za'ra mono wamhã, tãma 're ropipa uptabi za'ra mono di za, ta norĩ ma hã.

32Ma'ãpé, ãma asipo're pu'u za'ra wa'aba, duréihã Cristu hã Danho'reptui'wa na asina 're iwaihu'u na'rata za'ra wa'aba mono zém na hã, 'Re ihâimana u'âsi mono nhimipawaptobzéb zarina. Ta hawim haré, Cristuhu zazei'wa oto 're anomro aba mono wa, marĩ na 're robzépata za'ẽtẽ za'ra wa'aba mono nherẽ, ma tô asiptete sina ãma 're aihâimana u'âsi za'ra wa'aba mo, tiwi 're aipizari za'ra wa'aba mono ãna. 33Nimahã na hã ma tô ni'wam norĩ hã danho'a te te ai'ãma 're wasété za'ra wa'wa. Ma tô duré da te aima 're rob'manharĩ wasété za'ra wa'wa, danho'a. Duré nimahã na asiré norĩ ma, da te 're rob'manharĩ wasété za'ra mono wamhã, ma tô 're ipawaptob za'ra wa'aba mo, ta norĩ zu, da te aima 're rob'manharĩ wasété za'ra wa'aba mono da nherẽ. 34Dazazéb 're, 're ihâimana za'ra mono norĩ ãma 're aipẽ'ẽzé za'ra wa'aba mono zéb zarina, ma tô ta norĩ me aipẽ'ẽ na 're irobzépata za'ra wa'aba mo, ihâiba zu. Duré asibro hã da te aiwi 're waibui wa'aba mono nherẽ, ma tô ato sina 're aihâimana za'ra wa'aba mo. Aiwi 're robzei'õ za'ra wa'aba mono õ di, taha na hã. E marĩ wa. Ti'ai ãma asibrom nhipai u, hâiwa ãma iwẽ uptabi hã isi'utõrĩ'õ hã za aima 're ihâimana za'ra wa'aba mono na hã aima waihu'u pese za'ra wa'aba wa. 35Tahawa, Cristu hã aipahi ãna asina 're i'umnhasi za'ra wa'aba mono zé hã asiwi 're iwẽ'õ za'ra wa'aba mono zéb zarina, 're rẽme za'ra wa'aba mono õ di za. Asiptete sina te za tô ãma 're anomro u'âsi aba mo. Ãne 're aihâimana za'ra wa'aba mono wamhã, taha zarina te za 'Re ihâimana u'âsi mono hã iwẽ uptabi na aima wa'âbâ za'ra wa'wa, nimahã na hã. 36Marĩ na 're robzépata za'ra wa'aba mono nherẽ, duré Cristuhu zazei'wa 're anomro aba mono wa, da te aima 're rob'manharĩ wasété za'ra wa'aba mono nherẽ, te za tô asiptete sina, asina 're i'umnhasi u'âsi za'ra wa'aba mo, tiwi 're aipizari za'ra wa'aba mono tõ da. Ãne zarina, asina tãma ãma 're uwaimrami za'ra wa'aba mono wamhã, 'Re ihâimana u'âsi mono te te aima 're iwẽ za'ra wa'aba mono zéb zarina, te za tô tãma 're anomro wẽ wa'aba mo. Tawapsi, te za 'Re ihâimana u'âsi mono hã te te aima iropisutu za'ra wa'aba zém na iwẽ uptabi hã oto asina i'uwaimrami za'ra wa'wa. 37Duréihã 'Re ihâimana u'âsi mono zadawa 'mahârâ'wa hã ma tô ãne imreme na rob'ui'éré, Cristuhu wasu'u na hã:

“Ta hã za we imorĩ hã niwamhã oto wei morĩ wamhã, sô rowaptâ'â õ di za. Romhutu na te za tô wei mo.

38Ni'wam norĩ hã te tãma 're iwẽ za'ra mono zéb zarina si 're inomro wẽ mono norĩ hã, ta norĩ hã Danho'reptui'wa na te te sina 're ĩzaze za'ra mono zéb zarina si, wa za te 're awẽsãmri, iwasédé hã te ãma 're ab'madâ'â mono õ wa za oto, ta norĩ ãma hã. Ãne wa, te za rowẽ uptabi na ĩ'rata 're hâimana u'âsi za'ra, ta norĩ hã.

Tane nherẽ, ni'wam norĩ hã ĩwi 're sipizari za'ra mono wamhã, ãma 're ĩtoi waihu'u za'ra mono õ di za oto, ta norĩ ãma hã.”

39Tane nherẽ, ta norĩ ne, wa norĩ hã 're wahâimana za'ra mono õ di oto. Nimahã na 'Re ihâimana u'âsi mono wi 're wasipizari za'ra mono õ di, ta norĩ ne. Tahawa, 'Re ihâimana u'âsi mono hã niwamhã ta norĩ zu te te wa'uprosi õ di za. Taha si wa tô wa te wasina 're umnhasi u'âsi za'ra, te te 're iwa'anho'reptui mono da hã. Taha zarina te za tô wa norĩ hã wa'anho'reptu, i'rata oto 're iwahâimana u'âsi za'ra mono da hã, 'râwi.

Currently Selected:

Hebreu 10: xavBP

Highlight

Copy