Hebreu 9

Romhâ 'manharĩ na 'ri wasu'u

1'Re ihâimana u'âsi mono hã duréihã tinhimiropisutu 'rada hã te te dama sõmri wamhã, ma tô dama pisutu za'ra, ãma 're idawata za'ra mono zéb da hã. 'Re dazâmorĩ mono ré, danhimizahâri sidâpâsi, romhâ 'manharĩ na 'ri hã da te dasiwi isimizusi mono zéb da hã, ma tô duré dama pisutu, ãma 're idawata za'ra mono zéb da hã, duré iwa 're isãmra mono zéb da zama. 2Duréihã romhâ 'manharĩ na 'ri hã danhimizahâri sidâpâsi, 'Re ihâimana u'âsi mono ma, da te dasiwi 're isimizusi mono hã maparane te 'ri 're wa'wa hã 're hâimana zahuré. 'Ri 're wa'wa imorĩ'rata ãma, te rob'uiwẽzé sima'warazé hã 're sa. Wedeza hã te duré iwa 're sa, i'u'ẽtẽ wapu 'Re ihâimana u'âsi mono ma, iwa da te 're isa'ra mono zéb da hã. 'Re ihâimana u'âsi mono te, 'ri 're wa'wa hã iwẽ uptabi na isisi hã. 3Duré zazahâ ihâpa na 'ri 're wa'wa nhitobzé babarã niwĩ, 're ihâimana mono hã maparane ãma 'ri 're wa'wa hâiba amo nhisi hã, 'Re ihâimana u'âsi mono te, danhipai u iwẽ uptabi hã, iwa 're isãmra mono zém na taha nhisi hã. 4Tame te ẽtẽ waipo pré oru 'manharĩ na wedeza ne hã 're sa, 'Re ihâimana u'âsi mono ma, wedewa'u zadaze zatazéb da hã. Wedehâ're hã te duré 'ri para 're sa. Wedehâ're mana wawimhã, oru 'manharĩ. Duréihã rob'ui'éré na 'Re ihâimana u'âsi mono te te dama iropisutuzém na, wedehâ're nhisi hã. Wedehâ're 're, te oru 'manharĩ hã simhi ne hã 're sa, mana na dasa nhisi hã i're 're isa'wari mono hã. Arãhã nhiwedehu zama te duré wedehâ're wa 're sa'wari, duréihã 'Re ihâimana u'âsi mono nhimipawaptobzéb zarina, wedehu na isuire 're iwairébé mono hã. Rob'ui'éré hã te duré iwa 're sa'wari zahuré, 'Re ihâimana u'âsi mono hã te te tinhib'a'uwẽ norĩ ma iropisutuzém na rob'ui'éré hã, ẽtẽ tõmo baihâ na. 5Wedehâ're nhisiwi te duré ropodo hã 're sima'wara zahuré, rob'manharĩ hã ropoto hâiba hã isaripi ré hã. 'Re ihâimana u'âsi mono, tame 're isãmra mono zé, te ta norĩ hã wasu'u zahuré. Wedehâ're nhisiwi, te ta norĩ hã duré 're papo zahuré. Wedehâ're nhitobzé nhisi hã 'Re ihâimana u'âsi mono, dawasédé te te dama 're i'apari mono zém na isisi hã. Ãne duréihã romhâ 'manharĩ na 'ri wasu'u hã. Tane nherẽ, ãhã na hã te ãma aima rowasu'u uptabi za'ra wa'aba õ di za. Suru na wa tô ãma aima rowasu'u za'ra wa'wa.

6Ãne ma tô danhimizahâri mono sidâpâsi 'ri paramhã marĩ hã sipu'u pese na iwa da te 're sa'ra. Tawamhã sasedoti norĩ hã 'Re ihâimana u'âsi mono ma da'ãma romhuri'wa norĩ hã awẽ sidâpâsi ma tô 're sisisi, 'ri 're wa'wa imorĩ'rata u hã, tame iwa tinhimiromhuri mono bâ marĩ na te te 're romhuri za'ra mono da. 7Tane nherẽ, sasedoti norĩ nhib'apito, tisiré norĩ nhipai u ipire uptabi si ma tô maparane ãma 'ri 're wa'wa u 're zasi, 'Re ihâimana u'âsi mono te hã, danhipai u iwẽ uptabi hã iwa 're isãmra mono zéb u hã. Wahub sidâpâsi ma tô misi haré 're zasi. Tamomo 're zasi mono wamhã, danhimizama waprui ré, te 're zasi, dawasédé za te te ãma dama 're ipari mono zéb ré, ta hã 'Re ihâimana u'âsi mono ma, te te tãma 're sõmri mono da, si'udâna, duré da'udâna zama, da te dasina 're waihu'u za'ra mono õ nherẽ, dawasédé da te 're i'manharĩ za'ra mono zé, za te te dama ãma 're ipari mono zéb da hã. 8E marĩ te tawamhã wama wasu'u za'ra ãne hã, duréihã sasedoti norĩ hã 'Re ihâimana u'âsi mono ma, te te da'ãma 're iromhuri za'ra mono zé hã. 'Re ihâimana u'âsi mono pẽ'ẽzani hã ma tô ãne hã wama waihu'u za'ra. Duréihã romhâ 'manharĩ na 'ri ãma hã, 'ri 're wa'wa imorĩ'rata u danhimizama hã dawasété parizéb da, 'Re ihâimana u'âsi mono ma, da te 're isimroi mono zé hã, zahadu 're hâimana mono ré, te 'ri 're wa'wa hâiba amoi u da hã 'ridawa sitom haré zahadu dawi 're sa. Tahawa, 'Re ihâimana u'âsi mono, iwa 're isãmra mono zéb u hã, zahadu itẽme 're danhisisi waihu'u mono õ di. Ãhã wasu'u, te ã hã wama wasu'u za'ra. 9E marĩ te duré wama wasu'u za'ra, 'ri 're wa'wa imorĩ'rata ãma danhimizama iwa da te 're izata za'ra mono zé hã. Danhimizama hã dawasété parizéb da, da te tãma 're isõmri za'ra mono zém na, dapẽ'ẽ 're dadâ'â u'âsi ne 're idanomro mono zéb zarina, dawasété si da te 're 'manharĩ za'ra mono wa, 'râwi 're idasiwẽ'õ u'âsi za'ra mono zé hã da te dasima ãma 're pari waihu'u za'ra mono õ di, dasi'uihâ na hã.

Duré, 'Re ihâimana u'âsi mono ma danhoprubzé hã, ãma 're dawata za'ra mono da, da te tãma 're isõmri za'ra mono zém na hã da te dasima 're pari waihu'u za'ra mono õ di, dapẽ'ẽ 're dadâ'â u'âsi ne 're idanomro mono zéb zarina, dawasété si da te 're 'manharĩ za'ra mono wa, 're idasiwẽ'õ u'âsi za'ra mono zé hã. Ãne, wa te oto ãma 're iwaihu'u za'ra mono zé hã, ã hã ipire wasu'u na hã. 10'Re ihâimana u'âsi mono ma, danhoprubzé, da te 're isõmri za'ra mono zé hã dapẽ'ẽ 're, da te dasima 're irosa'rata za'ra mono zém na te te wama rowasu'u õ di. Taré dasa hã marĩ, da te 're ihuri mono zém na roti te wasu'u. Duré marĩ wa'u, da te 're i'âhuri mono zém na rowasu'u zama hã te wasu'u. Duré 're dasihâiba wasété za'ra mono tõ da, 're idasi'upsõi pese za'ra mono zém na zama roti hã te wasu'u. Ã norĩ na roti hã taré sõ'awi dahâiba na roti, ma tô dama 're hâimana za'ra. Tane nherẽ, 'Re ihâimana u'âsi mono hã 're idanomro mono zép té hã, te te dama ipisutuzép téb ãma, ma tô oto dawi ai'utõ, ã norĩ na roti 'rada hã.

11Cristu hã ma tô oto sisasedoti tô, sasedoti ipire uptabi na dama 're hâimana mono da, 're idanomro mono zép té hã iwẽ uptabi hã te te dama 're ab'madâ'â mono da oto. Tawamhã hâiwa ãma 'ri hã, 'Re ihâimana u'âsi mono hã iwa 're isãmra mono zéb u, ma tô oto ãzé Cristu hã, danhib'rata na da te dasiwi i'ri õ u, ropoto wazari ti'ai ãma 're isa mono õ u. Ti'ai ãma romhâ 'manharĩ na 'ri nhipai u, wẽ uptabi di 'ri, hâiwa ãma hã. Pire uptabi na te ta hã 're sab u'âsi. 12Tawamhã Cristu hã hâiwa ãma 'ri 're wa'wa u sébré wamhã, misi haré ma tô wanhowab za'ra hã ãzé, 'ri 're wa'wa iwẽ uptabi u, 'Re ihâimana u'âsi mono, iwa 're isãmra mono zéb u hã. Tamomo itẽme sébré wamhã, e pone'ẽrebâi waprui ré ma tô ãzé. Duré e powawẽ 'ra waprui ré zama, ma tô ãzé, te te tãma isõmri da ré, duréihã sasedoti norĩ te te tãma 're isõmri za'ra mono ne ré. Mare di. Tiwaprui ré si ma tô itẽme ãzé Timama u hã, te te tãma sõmri da, taha na si wawasété hawi te te 're wa'anho'reptui mono da, misi haré. 13Sasedoti norĩ hã 'Re ihâimana u'âsi mono nhimiroti 'rata na Mozési te te ãma irob'ui'éré zarina, te za pone'ẽrebâi wapru hã suru na dahâiba nhisiwi te te 're sa'wari za'ra, niha wamhã, powawẽ iba'õmo wapru hã, marĩ na dahâiba mana wawip si 're dasihâiba wasété za'ra mono wa, apâ te te ãma 're dahâiba wẽ za'ra mono da hã, taha zarina pibu pese na 'Re ihâimana u'âsi mono ãma 're dawata za'ra mono da. Niha wamhã, powawẽ 'ra sipi'õ hã da te 're 'wa'a pese za'ra mono wa, taha pro hã 're isi'ru'a za'ra mono hã te za duré ta norĩ hã te te dahâiba nhisiwi 're sa'wari za'ra, te te ãma 're dahâiba wẽ za'ra mono da, duré taha na hã. 14Ãne hã duréihã danhimizama wapru na dahâiba mana wawi marĩ na 're idasihâiba wasété za'ra mono parizéb da hã, wẽ nherẽ, taha nhipai u, Cristuhu wapru si siptete uptabi di, dawasété parizéb da hã oto. E marĩ wa. Taha si wasété ãna 're hâimana u'âsi mono wa. Tahawa, 'Re ihâimana u'âsi mono pẽ'ẽzani waihu'u pese zarina ma tô wazada sisõmri za'ra 'Re ihâimana u'âsi mono ma, wazada za'ra dâ'â da, tiwapru na te te 're wa'a'upsõi mono da, wapẽ'ẽ 're wadâ'â u'âsi ne 're iwanomro mono zéb zarina, wawasété si wa te 're 'manharĩ za'ra mono wa, 'râwi 're iwasiwẽ'õ u'âsi za'ra mono zé hã te te oto wama 're apari mono da. Taha zarina, wa za oto 'Re ihâimana u'âsi mono ma si, wa te 're romhuri za'ra, wawẽ na wahâimanazém na wa te oto 're upa za'ra mono ãna.

'Re ihâimana u'âsi mono te te dama iropisutuzép té wasu'u

15Tahawa, te oto Cristuhu si te te da'ãma 're ab'madâ'â, 'Re ihâimana u'âsi mono te te dama iropisutuzép té hã. Tidâ'âzém na ma tô da'awa'â Cristu hã, dawasété na 're idanomro mono zém hawi te te oto 're da'anho'reptui mono da, zahadu 'Re ihâimana u'âsi mono te te dama iropisutuzéb 'rada hã dama 're hâimana mono ré. Taha zarina te za oto 'Re ihâimana u'âsi mono hã tinhib'a'uwẽ da, te te 're i'apisutu mono norĩ hã te te sima 're awaibu, iwẽ uptabi na te te tãma 're i'aropisutu mono zéb ré si, 're hâimana u'âsi za'ra mono da iré, ta norĩ hã.

16-17Ni'wa hã dâ'â õ ré, te za tinhibrom na sisa'u dama roti, i'uirĩ na si niha da te dasima ipo'o mono da na hã. Sisõ'a ré, te za ãne na hã ãma rob'ui'éré ibaihâ na hã, pibu pese na isibro hã i'uirĩ na da te dasima ipo'o mono zéb da hã. Tawamhã e zahadu dâ'â õ ré, te za te te sima po'o, isimi'ui'éré zarina, te te tãma iroti za'ra zéb zarina. Mare di. I'uirĩ na si te za tô ta norĩ hã isibro hã te te sima po'o, idâ'âzém na te te waihu'u za'ra wapsi. Tane duré, 'Re ihâimana u'âsi mono te te dama iropisutuzé hã. 18Duréihã sasedoti norĩ hã danhimizama te te 're isimroi mono wapru na te te da'ãma 're romhuri za'ra mono õ 'wa'âhã, 'Re ihâimana u'âsi mono te te dama iropisutuzéb 'rada hã pire na aré dama 're hâimana mono õ di. Taré te aré dama 're hâimana. 19Duréihã Mozési hã imorĩ'rata na ma tô uburé 'Re ihâimana u'âsi mono nhimiroti na dama rowasu'u. Taha pari, ma tô powawẽ wapru hã â na waza. Pone'ẽrebâi wapru zama hã ma tô duré waza. Tawamhã wesuirã suiro panhipti hã ma tô sada si'ẽ za'ra. Taha pari, simisutu ma tô pone'ẽrebâ zéré na te te awasisi, da te iséré pré na. Tawamhã danhimizama wapru na ma tô ãma di'i, â wazari powawẽ wapru na hã. Tawamhã ibaihâ nhisiwi ma tô wesuirã suiro panhipti wasi hã sãsã'ã, danhimizama wapru na te te ãma di'i da, 'Re ihâimana u'âsi mono nhimiroti na rob'ui'éré ré nhisiwi. Dahâiba nhisiwi zama ma tô duré te te sãsã'ã, te te ãma da'ahâiba di'i mono da, danhimizama wapru na hã. 20Tawamhã Mozési hã ãne na te duré dama roti:

“Ã danhimizama wapru hã 'Re ihâimana u'âsi mono te te aima iropisutu za'ra wa'aba zé hã, pire na oto aima 're ihâimana za'ra wa'aba mono da hã, te aima wasu'u za'ra wa'wa. Tahawa, te te aima ãma iroti za'ra wa'aba zéb zarina, te za oto 're i'madâ'â pese za'ra wa'aba mo, tãma ãma 're uwaimrami za'ra wa'aba mono da.”

21Tawamhã romhâ 'manharĩ na 'ri nhisiwib zama, ma tô duré wesuirã suiro panhipti wasi hã sãsã'ã, danhimizama wapru na te te ãma di'i da. Uburé marĩ hã 'Re ihâimana u'âsi mono ãma 're idawata za'ra mono zéb da, 'ri para 're isimasa mono nhisiwib zama ma tô duré sãsã'ã, te te ãma adi'i mono da. 22Tane tô. 'Re ihâimana u'âsi mono nhimiroti 'rata na Mozési te te ãma irob'ui'éré zarina, ma tô danhimizama wapru na marĩ hã da te ãma 're di'i za'ra, 'ri para 're isimasa mono hã, wasété ãna 're simasa mono da, 'Re ihâimana u'âsi mono ma hã. Dahâiba wib zama, ma tô duré ãma 're dasihâiba di'i za'ra, 'Re ihâimana u'âsi mono ma, dahâiba wasété ãna oto 're dahâimana za'ra mono da. Danhimizama hã da te 're simroi mono wa, iwapru hã tiwi 're isisa'wari za'ra mono na si, te za ãma 're dasihâiba wẽ za'ra dahâiba mana wawip si, marĩ na 're dasihâiba wasété za'ra mono wamhã.

Cristu hã Timama ma dazada isisõmrizé wasu'u

23Ã norĩ hã ti'ai ãma romhâ 'manharĩ na 'ri hã, duré uburé marĩ hã iwa 're isimasa mono hã, hâiwa ãma 're ihâimana za'ra mono ne, te 're hâimana za'ra. Tane nherẽ, aiwab uptabi õ di, marĩ ipire da, 're hâimana za'ra mono õ nherẽ, 'ri hã ti'ai ãma hã, duré uburé iwa 're iropsimasa mono hã. Ta hã ma tô sasedoti norĩ hã danhimizama wapru na te te 're di'i za'ra, taha zarina si 'Re ihâimana u'âsi mono ma, wasété ãna 're hâimana za'ra mono da. Tane nherẽ, hâiwa ãma marĩ hã sena 're ihâimana za'ra mono hã iwẽ na si, 'Re ihâimana u'âsi mono ma, 're hâimana za'ra mono da, ma tô iwẽ uptabi hã sada dârâ. 24Ãhã wa, Cristu hã dâ'â pari oto duré hâiwa'utu wamhã, ti'ai ãma danhib'rata na da te 're i'ri za'ra mono 'remhã, sébré õ di, 'Re ihâimana u'âsi mono iwa 're isãmra mono zéb u hã. E marĩ wa. Ta hã ti'ai ãma 'ri hã, hâiwa ãma 'ri i'uptabi ne si 're hâimana mono wa, duré i'uptabi õ wa. Hâiwa ãma 'Re ihâimana u'âsi mono hã iwa 're isãmra mono zéb u si ma tô ãzé Cristu hã, tame te te oto wa'ãma 're romhuri u'âsi mono da, Timama nho'a. 25'Re ihâimana u'âsi mono ma, da'ãma romhuri'wa tisiré norĩ nhipai u ipire uptabi hã ma tô duréihã siwaprosi itẽme 're zasi, 'Re ihâimana u'âsi mono te, 'ri 're wa'wa iwẽ uptabi u hã, sasedoti ipire uptabi hã. Duré wahub sidâpâsi ma tô misi haré itẽmemhã 're zasi, danhimizama wapru hã te te tãma 're sõmri mono da, da'udâna. Tane nherẽ, Cristu hã wahub sidâpâsi hâiwa ãma 'Re ihâimana u'âsi mono hã iwa 're isãmra mono zéb u hã, itẽme 're zasi u'âsi mono õ di. Misi haré ma tô itẽmemhã ãzé, Timama u hã, õhõ haré dazada sisõmri wa, Timama ma hã. 26Cristu hã wahub sidâpâsi 'Re ihâimana u'âsi mono ma, dazada 're sisõmri u'âsi mono 'wa'âhã, te aré ropoto na'rata hawim haré dazada 're dâ'â u'âsi. Tawamhã robzépata za'ẽtẽ na te aré tô te te 're robzépata u'âsi. Tane nherẽ, za rob'rãsutu u irob'umhutuzéb u si ma tô misi haré tãma sisõ, 'Re ihâimana u'âsi mono ma hã, dazada dâ'â da, taha zarina dawasédé hã te te dama 're apari mono da oto, 'Re ihâimana u'âsi mono hã. 27Misi haré te za aihĩni 're dadâ'â za'ra. Taha parip si te za 'Re ihâimana u'âsi mono hã niwapsi da'awaihu'u, dawẽ na duré dawasété na zama, taha zarina te te oto dama 're arowairébé mono da hã. 28Tane ma tô duré Cristu hã misi haré dazada dârâ, dawasédé hã da'ahâ na te te oto dama ãma 're i'apari mono zéb da hã. Tawamhã niwa ti'ai u apâ wei morĩ zahu wamhã, ta hã oto dazada dâ'â da hã, wei morĩ õ di za, taha zarina dawasédé hã te te duré dama 're apari mono da hã. Ãne hã mare di za. Sô 're isimipari za'ra mono norĩ si, te te oto isõ'reptui pese za'ra da si, te za wei mo apâ Cristu hã, ta norĩ zô si.

Currently Selected:

Hebreu 9: xavBP

Highlight

Copy