Zenezi 37

Zuzéhé nhimirosawẽrẽzé wasu'u

1Tawamhã Zaco, Cana'ã ti'ai 're, imama 're ihâimana mono zéb ãma te oto 're hâimana. 2Ã hã Zacoho 'ra norĩ wasu'u.

Tawamhã Zuzé 17 na ãma iwahub ãma ma tô timama mro norĩ zé're hawi ipoto za'ra norĩ siré tisisãnawã Biraha 'ra norĩ me, Ziupaha 'ra norĩ me, pone'ẽrebâ norĩ hã, duré pone'ẽrebâ zéré uzé norĩ hã te te 're a'madâ'â. Tawamhã isisãnawã norĩ, marĩ i'upa te te 're i'manharĩ za'ra mono zé hã, ma tô timama ma hã te te 're awasu'u.

3Zaco hã hâiba prédum nherẽ, ma tô Zuzé hã podo. Tahawa uburé ti'ra norĩ nhipai u ma tô te te 're sawi pese. Te te 're sawi pese mono wa, ma tô i'uzazé ihâpa ipano pa na hã sada 'ma'manha. 4Tawamhã Zuzéhé si, imama isipai u za'ra te te 're isawi pese mono na, ma tô isisãnawã norĩ hã ãma siwi waihu'u. Tahawa te tino hã te te siwi 're 'ru 'manharĩ. Te duré timreme tete na si te te tãma 're nharĩ za'ra.

5Tawamhã nimahã bâtâ na ma tô Zuzé hã rosawẽ. Ta hã ma tô tisisãnawã norĩ ma tãma wasu'u za'ra. Ãhã wa, ma tô oto sima 'ruiwazere pese za'ra, 6ãne te te tãma nharĩ za'ra wa, ino uptabi za'ra nherẽ, tidub'rata norĩ ma:

— Ma'ãpé ĩwapari za'ra wa'aba, te irosawẽrẽzé, za te aima iwasu'u za'ra wa'aba zém na hã. 7Ĩnhotõ 'rowimhã wa tô roptehutu na daburu ãma trigu teihi hã wasisi za'ra ni wasiré. Tawamhã te iwasi, ma tô uihâ na wahudu, sab da hâiwi. Tawamhã te iwasisi mana wawi te asimiwasisi za'ra wa'wa hã aimasa. Ãhã wa, te iwasisi ma, ma tô asimiwasisi za'ra wa'wa hã tãma aiwẽ'ẽ za'ra, tãma ipire za'ra zarina.

8Tawamhã isisãnawã norĩ ma te ãma sada'âbâ za'ra ãne:

— E a hã wanhib'apito na wama 're aihâimana za'ra mono da bâ. E duré 're wa'awada'uri mono da bâ.

Tawamhã ma tô oto tame sima 'rui poto pese za'ra, tinhimirosawẽrẽ te te tãma iwasu'u za'ra zéb ãma, ãne na hã.

9Tawamhã ma tô duré rosawẽ, Zuzé hã. Tahawa, ma tô duré taha zama tãma wasu'u za'ra, tisisãnawã norĩ ma. Ãne te tãma wasu'u za'ra:

— Wa duré rosawẽ ãne. Bâtâ norĩ hã a'amoi me, duré wasi 11 na ihâiba za'ra norĩ me, ma tô ĩma aiwẽ'ẽ za'ra, tãma ĩpire za'ra zarina.

10Tawamhã ã hã Zuzé te te irosawẽrẽzé, timama ma, duré tisisãnawã norĩ ma, te te tãma wasu'u za'ra wamhã, ma tô imama te te ãma mreme wẽ'õ wa, ãne mreme tete na tãma tinha:

— E marĩ te wasu'u, irosawẽrẽzé hã. E niha wa za wa hã ana me, asisãnawã norĩ siré asõ'remhã wahi'rãtitõ aima aimasisi ni, wa'ubu na ti'ai u wa te roptop sina wama aipire zarina.

11Tawamhã isisãnawã norĩ te duré siwi 'ruiwapa, tino hã. Tane nherẽ, te imama si taré ãma rosa'rata u'âsi, ti'ra nhimirosawẽrẽ na hã.

Zuzé, isisãnawã norĩ te te siwi wede wa, Ezitu u da te isaprõnizé wasu'u

12Tawamhã nimahã bâtâ na Zuzéhé sisãnawã norĩ, romhâ u te timama nhimizama pone'ẽrebâ norĩ hã, duré pone'ẽrebâ zéré uzé norĩ hã te te ubumro, du 'ri nho'u Siquẽ na isisi 'rata 're ihâimana mono u. 13Tawamhã Zaco, te ti'ra Zuzéhé ma tinha ãne:

— Aima waihu'u pese di, asisãnawã norĩ, Siquẽ 'rata pone'ẽrebâ te te 're i'madâ'â za'ra mono na hã. Tahawa, wa hã wa ĩsima wẽ, itẽmeb za'ra aimorĩ da.

— Wa ĩsina mare tô, ĩzatõrĩzéb zô. — Ãne ma te Zuzé asa timama sada'â.

14Tawamhã Zaco te duré tãma tinha ãne:

— Te za aimo, asisãnawã norĩ rowẽ zô, duré pone'ẽrebâ norĩ rowẽ na simasab zô sabu za'ra da, iwasu'u za'ra we ĩma âri da.

Tawamhã ta hawi Hebrõ na romharé nhisi hawi ma tô Zaco ti'ra Zuzé hã satõ, Siquẽ u morĩ da. Tahawa Zuzé ma tô oto mo. Tawamhã tamomo oto wisi wamhã, 15ma tô taha rom na hã sô 're rĩtĩ za'ra, tidub'rata norĩ zô hã. Tahawa ãne ré aibâ ma tô 'madâ. Te te 'madâ'â wamhã, ma tô sadanha ãne:

— E marĩ zô, te 're airĩtĩ mo.

16— Ĩdub'rata norĩ zô wa 're ĩrĩtĩ. Ãhã rob 're, te pone'ẽrebâ isai 'rata te te 're 'madâ'â za'ra. E aima waihu'u pese di, nimomo isi'aba'rézé hã.

17Tawamhã aibâ ma te sada'â ãne:

— Ta norĩ hã ã hawi ma tô ai'aba'ré. Dotã na 'ri nho'õmo nhisi u si'aba'ré da, wa tô imreme hã wapari za'ra.

Tawamhã Zuzé ma tô mo, tidub'rata norĩ zô 're rĩtĩ mono da hã. Ãhã wa, ma tô oto sõpẽtẽ za'ra, Dotã ãma. 18Tawamhã Zuzé ma tô romhâ ré siwi tisã. Tahawa, 'râwi itẽme wisi za'ra õ ré, ma tô te te sima ãma irowairébé za'ra da hã rosa'rada siwi 'manha, te te siwi wĩrĩ da. 19Tahawa te ãne sima 'mahârâ za'ra:

— Õhõta te wei mo, rosawẽrẽ pese 'wa hã. 20Oto wa te wasiwi wĩrĩ aba. Taha parimhã ihâiba, â zô ab're i'ré 're, wa za wasiwi me ni. Duré abaze zahi te te i'rẽne na wa za wamama ma hã wasiwi wasu'u ni. E ãne wamhã, tinhimirosawẽrẽ na te te ãma wama uwaimrami za'ra da bâ.

21Tawamhã Rubẽ, ãne na te te mreme wapari za'ra wa, tino tisisãnawã norĩ wi te te sõ'reptu da, te ãne tãma nharĩ za'ra:

— Tô'ã! Wano hã wa te wasiwi wĩrĩ aba tõ. 22Asiwi wapru pu'u aba tõ. Taré te za ãme rop si 're irosa'wari mono ãma â zô ab're 're, asiwi imei wa'wa, asiwi u'a aba ãna.

Ãne ma tô Rubẽ tãma 'ru za'ra. E marĩ wa. Tino tisisãnawã norĩ wi, te te sõ'reptui wa, apâ timama u te te satõrĩ da, te ãne na sima rosa'rata. 23Tawamhã tisisãnawã norĩ u, oto Zuzé wisi wamhã, ma tô i'uza ihâpa ipano pa na ãma isi'uzazé te te tiwi hâiwazu za'ra sina tiwi wazere za'ra. 24Taha pari te te oto siwi âri wamhã, ma tô â zô ab're i'ré 're siwi time, taha 're sab da. 25Taha pari ma tô saihuri da hã asimro. Taha ré, saihuri sina ma tô romhâ ré sãmri za'ra, Ismaeu nhihudu norĩ, Ziliadi hawi we isi'aba'ré hã awaru ba'õmore na dasisadazezém na 're idasi'ma'wamarĩ za'ra mono zé, duré dasai warĩrĩzé Ezitu u te te i'wasari hã. 26Tawamhã Zuda te tisisãnawã norĩ ma nharĩ za'ra ãne:

— E niha marĩ iwẽ wama watobro za'ra da bâ, wano wa te wasiwi wĩrĩ wamhã, duré taha pari wa te wasiwi iwapru pu'u zé wa te wasiwi simi'uri wamhã dawi. 27Wasisãnawã nherẽ, wa te wasiwi wĩrĩ tõ da, taré wa te oto wasiwi wede aba, Ismaeu nhihudu norĩ ma. E marĩ wa. Õ hã tô wasisãnawã, duré wasiwapru 'râwibre hã.

Tawamhã ãne te te tãma waihu'u za'ra wa, ma tô isisãnawã norĩ hã ãma siwi saze. 28Tawamhã Midiã hawi Ismaeu nhihudu norĩ rowede'wa iwa'waibaba za'ra te te ro'rahâri za'ra wamhã, ma tô Zuzé isisãnawã norĩ hã â zô ab're hawimhã oto siwi waze. Te te siwi wazere wi, ma tô Ismaeu nhihudu norĩ ma siwi wede, ẽtẽ waipo prã prata 20 na isapotore na. Tawamhã Ezitu u, te oto Zuzé hã siwi saprõ.

29Tawamhã Rubẽ, â zô ab're u apâ wisi wamhã, ma tô ab're baba na Zuzéhé zô hã sabu. Tahawa ma tô ti'uza hâiwazu, robzei'õ zé te. 30Tawamhã tisisãnawã norĩ u apâ te te sina siri wamhã, ma tô tãma nharĩ za'ra ãne:

— Ab're hã baba di, wano 'ritéi'wa zabzé hã. E marĩ, wa za 'manha.

31Tawamhã isisãnawã norĩ, pone'ẽrebâ zéré uzé si'aibâ ma tô siwi 'maiwĩ. Te te siwi 'maiwĩrĩ wamhã, taha wapru na ma tô Zuzéhé uzazé ihâ pa hã ãma siwi hâzapré. 32Taha pari timama u i'uza ihâ pa te te siwi âri wamhã, ma tô ãne tãma wasu'u za'ra:

— Wa tô wasiwi sãmri ni, ã hã. Ma'ãpé 'madâ'â, ai'ra uza na hã pé hâi waihu'u da.

33Tawamhã Zaco ti'ra uzazém na te te tô hâi waihu'u wa, te ãne tãma nharĩ za'ra:

— Ĩhe, tahata tô ĩ'ra uzazé ihâ pa na hã wa tô hâi waihu'u. Abaze zahi ma te tô sima te te nhinhinarĩ, te te 'rẽne da.

34Tawamhã robzei'õ zé te, ma tô Zaco ti'uza hã hâiwazu. Taha pari ma tô da'uza ihâiro na si'uza. Tahawa, ma tô bâtâ ahâ na ti'ra zô hã aiwa'õ. 35Tawamhã uburé i'ra si'aibâ norĩ i'ra sipi'õ norĩ me, ma tô aré itẽme aihutu, te te sina pẽ'ẽtété za'ra da. Tane nherẽ, tisiwa'õ na te te ãma rosazâri da, te te sima wẽ õ wa, te ãne tãma nharĩ za'ra:

— Ĩ'ra zô 're ĩsiwa'õi mono ré, te za ĩpẽ'ẽzé ré ĩ'ãma hã ti'a ni.

Tawamhã ti'ra Zuzéhé zô 're isiwa'õ mono na hã ma tô, te te ãma uzusi u'âsi. 36Taha ré ma tô midiãnita norĩ hã, Zuzé, Ezitu ãma apito 'madâ'â'wa norĩ nhib'ihâ'a Potifaha ma hã siwi wede.

Currently Selected:

Zenezi 37: xavBP

Highlight

Copy