Zenezi 38
38
Zuda norĩ wasu'u, Tamahã me
1Tawamhã ãne na Zuzéhé ma romhâimana ré, ma tô Zuda tisisãnawã norĩ hã rẽme za'ra. Ma tô mo, aibâ Hira na isisi nhorõwa ãma 're hâimana mono da hã, 'ri nho'u Adurã na isisi ãmamhã. 2Tawamhã tame Zuda ma tô cananeu norĩ nhipi'õ hã 'maiwaihu'u, Su'a na isisi hã. Tawamhã taha na Zuda mro wamhã, 3ma tô i'ra hã tãma podo. Tawamhã Zuda ma tô sisi, Er na. 4Taha pari duré wasã wamhã, ma tô i'ra hã tãma podo. Tawamhã ta hã ma tô oto ina hã sisi, Ona na. 5Tawamhã ma tô duré i'ra hã tãma podo, Sela na ina te te isisi hã. Zuda hã Quezibe ãma hâimana ré, ma tô i'ra si'watébrémi isa're'ra hã podo.
6Tawamhã Zuda, ti'ra poto'rada Er na isisi hã ma tô Tama na pi'õ nhisi na hã mro. 7Tane nherẽ, Uburé Danhib'apito, Er hâimana wasété zé hã te te tãma rowẽ õ di. Tahawa ma tô tiwĩ. 8Tawamhã Zuda, te Onahã ma tinha ãne:
— Asisãnawã asédé'aba mro, mro ãna ihâimana ãma te za aimro, dasidaimama damro uirĩ na ãma 're imro za'ra mono zém na dahâimanazéb zarina, ãma tãma uwaimrami wa, asisãnawã nhihudu hã aihawimhã 're hâimana za'ra mono da.#38.8 Pi'õ imrotõ ma, isidaimama hawimhã i'ra poto'rada hã imro tiwi idâ'â 'ra ne te za tãma 're hâimana, tô imro tiwi idâ'â ma hã.
9Tane nherẽ, Onahã ma tãma waihu'u pese di, ihawi za i'ra tãma i'maipodo itei õ na hã. Tahawa tisisãnawãi mrotõ na nasi hâimana mono sidâpâsi, ma tô nasi ti'ai u tihâiba wa'u hã sa'wa, ihawimhã isisãnawã nhihudu hã tãma 'maihâimana tõ da. 10Tawamhã Uburé Danhib'apito, Ona nasi te te i'manharĩzé hã ma tô wẽ'õ pese. Tahawa taha zama ma tô tiwĩ. 11Tawamhã Zuda, tisani'wa Tamahã ma, ma tô tãma tinha ãne:
— Aimama nhorõwa u te za apâ aimo, aimro ãna a'â tame 're aihâimana mono da, ĩ'ra Sela hã isi'aibâzéb u.
Ãne ma tô tãma tinha, Selaha zama dâ'â õ'umnhasite, isisãnawã norĩ ma tãma iromhâimana zahuré ne hã. Tahawa, Tama hã ma tô apâ mo, timama nhorõwa u, tame 're hâimana mono da.
12Tawamhã ãne na romhâimana mono pari, ma tô Zudaha mro hã dârâ. Tawamhã we 're siwa'õi mono pari, ma tô Zuda, Timnate na 'ri wa'õtõ nhisi u mo, isimizama da te tãma 're séré nhihâri za'ra mono ré, te te 're a'madâ'â mono da hã. Tahawa, te isiwaihu Hira na isisi, Adurã hawimhã isiré mo. 13Tawamhã Tamahã ma, imaprewa Timnate u tinhimizama te te azéré nhihâri da imorĩ na hã, ma tô tãma 'mairowasu'u ni. 14Tahawa Tama, imrotõ ãma 're isi'uza za'ra mono zé hã ma tô oto waze, aimawi na te te ãma saprĩ da. Ma tô duré zazahâ ihâi baihâire na si'ubu ubu, da te waihu'u tõ da. Taha pari te oto mo, Ena'ĩ na 'ri nho'õmo u 're idanhisisi mono zéb ãma sãmra da, Timnate u bâdâdi inomro uiwada. Ãne hã ma te tawamhã 'manha, Sela hã iprédub na te te 'madâ'â nherẽ, zahadu duré imama ãma imro da hã te te tãma sa'réi õ wa.
15Tawamhã Zuda, tisani'wa te te 'madâ'â wamhã, ma tô pi'õ, iwa'âbâ zô 're isisõmri mono ãma rosa'rata, ubu ubu ré sãmra wa. 16Tawamhã tisani'aba na hã te te waihu'u õ wa, ma tô bâdâdi zada'ré u hã itẽme mo, te te sima sadawa pibu da. Tawamhã te ãne tãma tinha:
— We! We aimorĩ! Wa ĩsima wẽ, airé ĩnomro da.
Tawamhã ma te isani'wa hã ãma tãma wa'rã ãne:
— E niha te za tawamhã ĩma iwa'â.
17Tawamhã imaprewa ma te asa ãma sada'â ãne:
— Wa za dama 'mai'ru aima da, ĩnhimizama pone'ẽrebâ zéré uzé 'ra hã da te we aima 'mazaprõni da.
— Wẽ di tô. Tane nherẽ, te za tiha hã ĩma ihi, pone'ẽrebâ zéré uzé we ĩma da, dama i'mai'ru we da te isaprõnizéb u te te a'â roptété da. — Ãne te asa isani'wa hã tãma tinha.
18Tawamhã Zuda te ãne sadanha:
— E marĩ te tawamhã asima iwẽ, te aima ihiri da hã.
Tawamhã ma te ãne ãma tãma wa'rã:
— Ta asõ'rebzu na isa'o isihâtâ ré hã, duré asib'rata asiwã 're i'âri me hã te za ĩma ino.
Tawamhã Zuda, tinhimarĩ hã ma tô oto tãma sõmri zahuré. Ãhã wa, duré oto ãma hâimana wa, ma tô tiwasã oto, pi'õ hã. 19Taha pari Tama 'ri u oto apâ morĩ wamhã, ma tô ti'rã ubuzé hã waze. Taha pari ma tô duré imrotõ ãma 're isi'uza za'ra mono zém na hã apâ ãma si'uza.
20Tawamhã nimahã na Zuda, tisiwaihu Hiraha ma, ma tô tãma ti'ru, pone'ẽrebâ zéré uzé 'ra hã te te tãma saprõni da, pi'õi ma, duré apâ marĩ te te i'rata inomri hã te te tãma ãwisi zahuré da. Tane nherẽ, Hira hã te te sõpẽtẽ waihu'u õ di, pi'õ hã. 21Tahawa te aibâ norĩ, Ena'ĩ ãma 're ihâimana za'ra mono hã sadanharĩ za'ra, pi'õ, iwa'âbâ zô 're isisõmri mono, bâdâdi zada'ré ãma 're isimasisi mono hã nimame sãmra zô.
— Ãmemhã pi'õ iwa'âbâ zô 're isisõmri mono hã 're 'maihâimana mono õ di. — Ãne ma te asa sada'âbâ za'ra.
22Tawamhã Hira apâ te te sina siri wamhã, ma tô ãne Zudaha ma hã tãma rowasu'u:
— Pi'õ hã te sõpẽtẽ õ di. Aibâ norĩ õme 're ihâimana za'ra mono hã te ĩma rowasu'u za'ra, niwamhã u, õmemhã pi'õ iwa'âbâ zô 're isisõmri mono hã 're 'maihâimana mono õ di, u.
23Tawamhã Zuda te ãne tãma tinha:
— Tane wamhã, ĩnhimarĩ te tãma inomri zahuré hã tãma hâimanare. Ãne wamhã, ni'wa wa'ãma iwa'ẽ da hã mare di za. Wa tô aré pone'ẽrebâ zéré uzé 'ra hã tãma 'mai'ru. Tane nherẽ, a hã tô sõpẽtẽ waihu'u õ di.
24Tawamhã a'amo si'ubdatõ ãma si'utõrĩ wamhã, ma tô Zudaha ma tãma 'maiwasu'u ni ãne:
— Asani'wa, te siwa'ru dahâimanazém na hã 're hâimana. Tahawa, ma tô tiwasã.
Tawamhã Zuda te ãne asa tãma tinha:
— Hâiba ré, pré asiwi 'rãmi aba da, te za 'ri nho'õmo 'wawi wa'ra nhiti rob u we asiwi iwazere 'wa, pi'õ hã.
25Tawamhã 'ri hawi da te oto dasiwi wazere ré, ma tô isani'wa timaprebaba ma timreme hã tãma tisõ ãne: “Ã tiha te te ĩma isõmri zahuré tede'wa hã ma tô ĩdupu. Ma'ãpé 'madâ'â zahuré na, danho'rebzu na isa'o isihâtâ ré hã, duré danhiwã hã ni'wa hã tô itede'wa zô pé.” 26Tawamhã Zuda, tinhimarĩ te te waihu'u zahuré wamhã, te ãne tinha:
— Ĩnhipai u te i'uwaibaba na õ hã tihâiba. E marĩ wa. Wa hã wa tô tãma ropisutu aré, ĩ'ra Sela na mro da hã. Tane nherẽ, te tãma iropisutuzém na hã te ãma tãma uwaimrami õ di.
Tawamhã Zuda, niwamhã te te oto upi wasété na hã sahu õ di.
27Tawamhã duré oto Tamahã ma, i'ra tãma poto da wamhã, ma tô isi'ubza na idi'i 'remhã waihu'u za'ra ni. 28Oto iwasã ãma sépu'u wamhã, ma tô isi'ubza hâiba amo hã rob u si'uihâ na tinhib'rada hã waze. Tahawa isapari'wa ma tô abazi isidi pré na hã ãma simizu wasisi. Tahawa te ãne tinha:
— Ã hã ma tô imorĩ'rata na tiwatobro 'rata.
29Tane nherẽ, aré imorĩ'rata na iwatobro da hã ma tô apâ sib'rata dahudu. Tahawa, isi'ubza hâiba amo ma tô aré isãna're ipoto da hã oto iwana podo. Tahawa te isapari'wa hã tãma tinha ãne:
— E niha ma tô aiwatobro da hã, asémere hã asina i'rida.
Tahawa, ma tô sisi Peresi#38.29 Peresi hã hebreu norĩ mreme na “ropire hawi dasiwazerezé” te wasu'u. na.
30Taha pari ma tô duré ihâiba amo abazi isidi pré na isimizu wasi ipodo hã sisi, Zera#38.30 Zera hã hebreu norĩ mreme na “ipré pe” te wasu'u. na.
Currently Selected:
Zenezi 38: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.
