Zenezi 39

Zuzé hã, Potifaha nhorõwa ãma ihâimanazé wasu'u

1Tawamhã Zuzé, Ezitu u ma tô dasiwi saprõni ni. Tame ezipsiu Potifa na isisi, Ezitu ãma apito 'madâ'â'wa norĩ nhib'ihâ'a hã ma tô Zuzé uipra, Ismaeu nhihudu norĩ wi. 2Tame Uburé Danhib'apito, Zuzéhé siré 're hâimana u'âsi mono wa, te uburé marĩ hã te te 're ab'manharĩ wẽ u'âsi. Tawamhã te oto tinhib'ihâ'a nhorõwa ãma 're sãmra, ezipsiu nhorõwa ãma. 3Ãne wa, Zuzéhé nhib'ihâ'a ma tô ãma waihu'u, 'Re ihâimana u'âsi mono isiré 're hâimana mono wa, uburé marĩ te te 're i'ab'manharĩ wẽ mono na te te 're ipawapto mono na hã. 4Ãne zarina ma tô Zuzé, isib'ihâ'a hã wẽsã. Tahawa, ma tô pisutu, õhõ ma si ipawapto'wa na 're hâimana mono da. Isõrõwa te te 're 'madâ'â mono da, duré uburé isimarĩ hã te te tãma 're ab'madâ'â mono da ma tô tãma tisõ, isib'rata. 5Tawamhã ta hawimhã haré ma tô Zuzéhé hâiba u'âbâ, Uburé Danhib'apito ezipsiu nhorõwa 're, isimarĩ tãma 're hâimana wẽ za'ra mono da hã, duré isimizama zama rom na tãma 're simasa wẽ mono da hã, iwẽ na te te 're pawapto. 6Tahawa Potifa, Zuzéhé nhib'rata ma tô uburé tinhimarĩ te te tãma 're ab'madâ'â mono da hã tãma sa'ré za'ra. Ãhã wa, te hâtâ'â ãna sima iwẽ na 're hâimana. Duré ãhã wa, ma tô tisazéb zô si sima te te oto 're rosa'rata.

Zuzé aibâ iwẽ na ihâiba, duré i'madâ'â ze na ihâiba. 7Tahawa, nimahã na isib'ihâ'a Potifa mro, ma tô sima 'madâ'â zei upta, te te 'ruiwapari wa. Tahawa, te Zuzéhé ma tinha ãne:

— Oto we aimorĩ, waptâ wa, waza'wari da.

8Tawamhã tiwi sisawi wa, te ãne tãma tinha:

— Ma, ĩwapari! Ĩnhib'ihâ'a aimro, uburé 'ri 're tinhimarĩ na 're hâtâ'â mono õ di oto, ãme wa hã 're ĩhâimana mono wa. Uburé marĩ te tãma 're a'madâ'â mono da hã ma tô ĩpisutu. 9Ni'wa ã hã 'ri 'remhã ĩnhipai u hã hâimana õ di. Duré marĩ hã te te ĩwi pi'uri õ di. Aiwétési te ĩwi aihâiba zawi, a hã imro na wa. Ãne nherẽ, e niha wa za bété ĩwasédé hã 'Re ihâimana u'âsi mono wi 'manha.

10Tawamhã sadahutu ãna te bâtâ sidâpâsi nasi waptẽ, waptâ wa iré nomro da hã. Tane nherẽ, te Zuzé nasi tiwi sisawi, iré nomro tõ da. Duré 'râwi i'rata hâimana tõ da ma tô tiwi si'madâ'â pese. 11Tawamhã Zuzé nimahã bâtâ na ma tô 'ri para u ãzé, tinhimiromhuri te te 'manharĩ da, 're izasi u'âsi mono zéb zarina. Romhuri'wa 'ri paramhã 'manhamra õ di. 12Tahawa, Potifaha mro, ma tô Zuzéhé si'ubuzé ihâ pa na hã ti'â. Taha sina te ãne tãma tinha:

— Oto waza'wari, waptâ wa.

Tane nherẽ, pi'õ te te sima âri pese õ ré, ma tô tiwi siwaze. Tiwi siwazere wamhã, ma tô rob u tiwi wara. Tahawa, ma tô tisi'ubuzé ihâ pa ma hã isib'rata tãma marẽ. 13Tawamhã tiwi isiwazere zarina tisi'ubuzé ihâ pa ma isib'ratam haré tãma isimirẽme na te te waihu'u wa, 14ma tô 'ri 're tãma zahuré romhuri'wa norĩ zô tihârâ za'ra. Tahawa, te ãne tãma siwasu'u za'ra:

— Ãhãta ma'ãpé asiwi 'madâ'â aba! Ã hã hebreu, ĩmro, wanhorõwa 'madâ'â'wa da, we te te i'ãwi hã ma tô rowazé wama waze. Ĩnhib'ri 're wa'wa u, ma tô we ĩtẽme ãzé, ĩ'ãma hâimana da. Tane nherẽ, wa tô tiwi 're ĩzadari, ĩzadari 'rãihâ na hã. 15Ĩzadari 'rãihâ na tiwi 're ĩzadari mono wi, ma tô rob u hã watobro, wara sina. Tahawa ãhãta ti'ubuzé ihâ pa ĩzababa sisa'u te te irẽme.

16Tawamhã Zuzéhé nhib'ihâ'a, imro iwisizéb u ma tô isi'ubuzé ihâ pa hã sô tihi. 17Tawamhã tite romhuri'wa norĩ ma, te te iwasu'u za'ra ne, ma tô duré timro ma hã wasu'u ãne:

— Wama romhuri'wa hebreu, wanhorõwa u we i'ãwi hã, ma tô ĩnhib'ri 're wa'wa u ãzé, tiha te te ĩ'ãma 'manharĩ wasété da hã. 18Tane nherẽ, sa'ẽtẽ tiwi 're ĩzadari mono wa, ma tô rob u wara sina watobro. Tahawa tisi'ubuzé ihâ pa ĩzababa sisa'u ma te tirẽ.

19Tawamhã ãne na timro siwasu'uzé te te wapari wamhã, ma tô Zuzéhé da isib'ihâ'a hã sada tinhiti'rui pese. 20Tahawa, Potifa ma tô dama ti'ru, dazazéb 're, Zuzé da te sẽrẽ da, Ezitu ãma apito nhimiwada'uri zarina da te 're idanheme mono zéb 're, sab da. Tawamhã tame te oto za Zuzé hã. 21Tane nherẽ, tame 'Re ihâimana u'âsi mono, isiré 're hâimana mono wa, ma tô iwẽ hã te te tãma 're apisutu. Taha zarina, ma tô oto dazazé 'madâ'â'wa Zuzé hã wẽsã. 22Tahawa, Zuzéhé ma, ma tô oto pisutu, dazazéb 're, 're idasimasa mono norĩ te te 're a'madâ'â mono da hã, duré te te oto 're rob'madâ'â mono da, uburé marĩ 'manharĩ na hã dazazéb 're. 23Tawamhã dazazé 'madâ'â'wa hâtâ'â waihu'u õ di, Zuzéhé ma, si'upana da'madâ'âzé hã te te sõmri wa. E marĩ wa. Uburé Danhib'apito isiré 're hâimana mono wa, duré iwẽ na te te 're ipawapto mono zarina, uburé marĩ hã te te dama 're ab'manharĩ wẽ mono wa, dazazéb 'remhã.

Currently Selected:

Zenezi 39: xavBP

Highlight

Copy