Zenezi 40

Zuzé hã danhimirosawẽrẽ na te te ãma dama isaprĩ zahuré zé wasu'u

1Tawamhã we romhâimana mono pari, Ezitu te, apito ma, ma tô tãma romhuri'wa norĩ, marĩ te te tãma i'manharĩ zahuré zéb zarina sima 'ruzani zahuré, apito ma, uwa 'rãi wa'u isé za'wari'wa norĩ nhib'ihâ'a hã, duré, i'u'ẽtẽ wapu 'manharĩ'wa norĩ nhib'ihâ'a me. 2Tahawa sada siti'ru zahuré wa, 3ma tô dazazéb 're simi'wara da dama 'ru zahuré, uburé apito 'madâ'â'wa norĩ nhib'ihâ'a nhorõwa 're, tô Zuzé hã 're isa mono zé dazazéb 're. 4Tawamhã tame ma tô ta norĩ hã 're hâimana hâ zahuré. Tawamhã danhib'ihâ'a ma tô Zuzé hã pisutu, te te duré 're 'madâ'â zahuré mono da.

5Tawamhã nimahã mara na ma tô uwa 'rãi wa'u isé za'wari'wa norĩ, i'u'ẽtẽ wapu 'manharĩ'wai me hã si'uiwa na te te saho zahuré. Isimirosawẽrẽ zahuré si'uiwa na marĩ te te iwasu'u hã. 6Tawamhã Zuzé awẽm na te te sabu zahuré da, itẽmeb zahuré morĩ wamhã, ma tô hâtâ'â na ihâimana zahuré na ubu waihu'u zahuré. 7Tahawa, te ãne sadanharĩ zahuré:

— E marĩ wa, te ãhã na hã ai'ubu zei ãna aihâimana 'wa.

8Tawamhã ma te ãne ãma tãma wa'rãmi zahuré:

— Wahâiba si'uiwa na wa tô rosawẽrẽ ni. Tane nherẽ, ni'wa hâimana õ di, te te ãma wama isaprĩ da hã, wa te isahoi mono zé, marĩ te te iwasu'uzé, wa te iwaihu'u da hã. Tahawa ma tô wawi tirobzei'õ pese.

Tawamhã Zuzé te asa ãne tãma nharĩ zahuré:

— 'Re ihâimana u'âsi mono si te za rosawẽrẽ na isaprĩ waihu'uzé hã te te dama 're anhomri. Tahawa, ma'ãpé, irosawẽrẽ aba zé hã ĩma wasu'u aba, te waihu'u da.

9Tawamhã uwa 'rãi wa'u isé za'wari'wa norĩ nhib'ihâ'a hã ma tô tinhimirosawẽrẽ tãma wasu'u, ãne:

— Ĩnhotõ 'rowimhã uwa 'ru ĩnho're 10si'ubdatõ i'ru sisa'ridi hã wa tô 'madâ'â za'ra. Tawamhã isu norĩ hã wairébé wi, ma tô duré isirãrã norĩ hã wairébé. Wairébé mono wamhã, ma tô uwa 'ru 'rã pré wa isipo na hã si'manharĩ za'ra, õne haré. 11Tawamhã wa hã wa tô apito nhimihâsizé ĩnhib'ratamhã 're ti'â. Tahawa, wa tô iwa'u zô hã i'remhã 'rãiwati za'ra. Taha pari apito ma hã, wa tô duré tãma tisõ, te te hâ'rẽne da.

12Tawamhã Zuzé te tãma tinha ãne:

— Irosawẽrẽzé, ãne hã te wasu'u: Si'ubdatõ uwa 'ru panhipti sisa'ridi hã si'ubdatõ bâdâ te wasu'u. 13Bâdâ si'ubdatõ ai'ãma ne pari, te za apito Fara'o hã dama ai'ru, da te aiwazere da, dazazém hawi. Tawamhã te za apâ hã asã za, 're iromhuri 'rata mono zéb u, apito ma, uwa 'rãi wa'u isé za'wari na 're romhuri mono da, iwana wam ne. 14Tawamhã õme apâ rowẽ na aima 're romhâimana mono wamhã, ĩ'ãma hã aipo're pu'u za, iwẽ na hã ĩpawaptob da. Apito ma, ĩhâiba na hã tãma nharĩ za, dazazém hawimhã te te apâ ĩwazere da. 15Sena ĩzada iropsisapẽtẽ hawimhã ma tô hebreu norĩ nhipti'ai hawimhã dasiwi ĩwazere ni, Ezitu u we da te dasiwi ĩzaprõni da hã. Duré ãme Ezitu 'remhã marĩ te 'manharĩ õ nherẽ, ma tô dazazéb u hã we ĩnherẽ ni, ĩzab da.

16Tawamhã ihâiba amo i'u'ẽtẽ wapu 'manharĩ'wa norĩ nhib'ihâ'a, rosawẽrẽ na ãma isaprĩzé te te wapari wẽ wa, ma tô duré ãne tãma wasu'u:

— Ĩzama wa tô duré rosawẽ. Te irosawẽrẽ 'remhã wa tô si'ubdatõ si'õno i'u'ẽtẽ wapu ré ĩ'rã na hã timra. 17Tawamhã si'õno danhisiwi inomro 'remhã te siwazari dasa sipu'u pese na daba'wara, i'u'ẽtẽ wapu 'manharĩ'wa norĩ, apito ma, te te isebre za'ra hã. Taha zô, si norĩ we isisa'rei mono dasa norĩ te te siwi ihâto'o na ma tô siwi uprosi.

18Tawamhã Zuzé, isimirosawẽrẽ na ma tõ ãma tãma saprĩ ãne:

— Irosawẽrẽzé, ãne hã te wasu'u. Si'ubdatõ si'õno hã te si'ubdatõ bâdâ wasu'u. 19Si'ubdatõ bâdâ hã ai'ãma ne pari, te za apito hã dama ai'ru, da te aiwazere da, dazazém hawi. Tawamhã te za dama ai'ru, da te dasiwi ai'rã nhizâri da. Taha parimhã te za aihâiba wede na hã dasiwi sasõmri ni, hâiwi sa'o da. Tawamhã si norĩ hã te za aihâiba nhi ihâto'o na si siwi uprosi.

20Tawamhã si'ubdatõ bâdâ ãma ne pari, apito Fara'o tiwaptã'ãzém na dasa te te 'manharĩ wamhã, ma tô uburé tite romhuri'wa norĩ ma, dasa hã tãma 'manharĩ za'ra. Tawamhã uwa 'rãi wa'u isé za'wari'wa norĩ nhib'ihâ'a, i'u'ẽtẽ wapu 'manharĩ'wa norĩ nhib'ihâ'a me apâ da te sani zahuré da hã ma tô dama 'ru zahuré. Tahawa, ma tô duré dama 'ru zahuré, dasa te te i'manharĩ u, da te dasiwi saprõni zahuré da. 21-22Tawamhã ãne na Zuzé te te tãma iwaihu'u zahuré zéb zarina si, ma tô tãma tiromhâimana zahuré: Tahawa, apito, uwa 'rãi wa'u isé za'wari'wa norĩ nhib'ihâ'a hã ma tô apâ tisã, uwa 'rãi wa'u isé za'wari'wa na te te tãma 're romhuri mono da. Ma tô duré i'u'ẽtẽ wapu 'manharĩ'wa norĩ nhib'ihâ'a, hâiwi isa'o na da te wĩrĩ da hã dama ti'ru. 23Tane nherẽ, uwa 'rãi wa'u isé za'wari'wa hã, ma tô Zuzéhé na hã po're ha'âri pese. Ãhã wa, tinhimirosa'rata na hã niwamhã ãma po're pu'u õ di tô.

Currently Selected:

Zenezi 40: xavBP

Highlight

Copy