Zenezi 33

Zaco norĩ, Ezauhu me isisõpẽtẽzé wasu'u

1Tawamhã Zaco, tidub'rada Ezau, 400 na aibâ norĩ ré we imorĩ hã te te 'madâ'â wamhã, ma tô ti'ra norĩ hã ina mono bâ tina siré hâimana za'ra da hã ãma sipo'o, Léiaha siré, Raqueu siré, duré maparane imro prã norĩ siré. 2Tawamhã imro prã norĩ, ti'ra norĩ ré danhowamhã ma tô iré za'ra tihâimana zahuré. Taha parimhã isãna'reb zahuré hã Léia ma tô duré ti'ra norĩ ré hã tihâiba. Tawamhã da'rãsutu'wai ãma ma tô duré Raqueu ti'ra Zuzéhé ré hã te te da'ubumro. 3Taha parimhã Zaco ma tô oto sina sõ're za'ra, isõwab za'ra hâimana da. Tawamhã Ezauhu tẽme te te sina rotété mono sidâpâsi ma tô 7 na ãma isahu na hi'rãtitõ tãma simasisi, ti'ai u ti'ubu na te te tãma ropto mono sina. 4Tane nherẽ, Ezau, Zaco te te sõpẽtẽ da ma tô wara sina, sina uzusi. Te te sina uzusi wamhã, ma tô ibutu na hã sitẽme 'wani, te te sawi da, tino hã. Ma tô duré tob'rata hârâ na sawi. Tawamhã ma tô duré sina aiwa'õ zahuré, sipẽ'ẽ rĩ wa. 5Tawamhã Ezau 'rãi wahutu wi, ma tô pi'õ norĩ, ai'uté norĩ me 'madâ'â za'ra. Tahawa, te ãma sadanha ãne:

— E 'wam norĩ bété õ hã we asiré isi'aba'ré hã.

Tawamhã Zaco ma te ãma sada'â ãne hã:

— Ã norĩ hã ĩ'ra, 'Re ihâimana u'âsi mono, ĩ'ãma siwamri wa, aima romhuri'wai ma, te te ĩma isõmri za'ra.

6Tawamhã imro prã norĩ, ma tô ti'ra norĩ ré Ezau tẽmemhã oto 'râwimhã sina rotété zahuré. Tahawa ma tô duré isõ'remhã tãma aiwẽ'ẽ za'ra. 7Taha pari, ma tô duré Léia ti'ra norĩ ré isãna'remhã itẽme sina rotété. Ta norĩ zama ma tô tãma aiwẽ'ẽ za'ra. Tawamhã da'rãsutu ãma ma tô duré Zuzé norĩ, Raqueu me itẽme sina rotété zahuré, tãma siwẽ'ẽ zahuré da.

8Tawamhã taha pari te duré Ezau ãne sadanha:

— E niha da hã bété, asimizama upsãtã pese na bâdâdi wamhã te isõpẽtẽ za'ra hã.

Tawamhã Zaco ma te ãne asa tidub'rada hã ãma sada'â:

— Taha u'âbâ ĩwẽsãmri da hã, wa tô we ĩsiwana hã satõrĩ za'ra.

9Tawamhã te Ezau ãne tãma tinha asa:

— Ĩno, mare di. Ĩnhimizama hã ahâ uptabi di. Tahawa tô aima hâimana za'ra, ate bâ.

10Tane nherẽ, te Zaco te te tãma i'ruzém na ãma tãma sahu ãne:

— Wẽ'õ tõ! Sena ĩwẽsãmrizé aima hâimana wamhã, ma'ãpé tô aima ĩnhoprubzé hã waibui wẽ na. Wa hã we aimorĩ ré, te ai'ubu 'madâ'â wamhã, 'Re ihâimana u'âsi mono ubu te i'madâ'âzém ne ai'ubu hã, a hã ĩ'âri wẽ zarina. 11Tahawa ma'ãpé ĩzawi na hã aima ĩnhoprubzé te we isimroi mono hã asima wẽ za'ra na. 'Re ihâimana u'âsi mono ma tô iwẽ na si ĩma 're hâimana. Tahawa uburé marĩ ĩwi sô 're irobaba mono hã ma tô te te ĩma 're anhomri.

Tawamhã Zaco, Ezauhu ma hã te te nasi tãma 'ruzadawa za'rei'õ wa, ma tô oto sima wẽ.

12Tawamhã Ezau te te ãma sazei wa, te ãne tãma tinha oto:

— Tane wamhã, oto wane na pé. Wa hã wa za asiré mo.

13Tawamhã Zaco ma te ãne ãma sada'â asa:

— Ĩnhib'apito, aima waihu'u pese di, ai'uté norĩ isib'uwa na hã. Duré ĩnhimi'madâ pone'ẽrebâ norĩ hã, duré powawẽ norĩ hã i'ra ré hã te i'madâ'â wẽ za'ra da si, ĩma hã ĩbâre. Tahawa, sa'ẽtẽ si'aba'ré da, wa te susi za'ra mono wamhã, te aré misi bâtâ na nherẽ, uburé ĩwi ai'utõ. 14Ĩnhib'apito, tahawa tô iwẽ hã ĩnhowa i'aimorĩ da si. Tawamhã wa hã wa za atãma asa'u ãma mo, ĩnhimizama norĩ, duré ĩ'ra norĩ atãma na ãma isi'aba'ré zarina, ĩwisizéb u atẽme, Edõ ãma 're i'aihâimana mono zéb u.

15Tawamhã Ezau te ãne duré tãma tinha:

— Tane wamhã, a'â ĩma romhuri'wa norĩ ai'rata 'masi'ubumro, te te ãma siwi i'aipibu za'ra mono da hã.

Tawamhã Zaco ma te duré ãne ãma tãma wa'rã:

— E marĩ da bâ. Tô ĩwẽsãmri nherẽ, taha nhipai u marĩ zô hã te oto rob'madâ'â õ di.

16Tawamhã tô taha bâtâ na ma tô Ezau oto apâ hã sina siri, Edõ u. 17Tane nherẽ, Zaco ma tô rob amoi u hã apa, Sucoti#33.17 Sucoti hã hebreu norĩ mreme na “'ri awãzé” aiwa prã na ne iwapari na hã. na 'ri nho'õmo nhisi u. Tawamhã tame ma tô oto sima 'ri. Duré tinhimizama powawẽ norĩ ma zama ma tô 'ri awãzé hã tãma 'manharĩ za'ra. Tahawa ma tô ã hã ro hã sisi, Sucoti na.

18Ãne ma tô Zaco hã Mezopotãmia hawimhã wi. Tahawa, rowẽ na ma tô wi, Siquẽ na 'ri nho'õmo nhisi u, Cana'ã na romnhisi ãmamhã. Tamomo wisi wamhã, ma tô 'ri nho'õmo 'rata sima te te 'ri nhoré. 19Tawamhã duré ẽtẽ waipo prã prata 100 na isapotore na ma tô Siquẽhẽ mama Hamo na isisi taha nhihudu norĩ wi hã, ti'ai wa'õno 'mai'uipra, te te sima iwa i'ri nhoré za'ra zéb da hã. 20Tawamhã tame ma tô 'Re ihâimana u'âsi mono ma, danhimizama zatazéb da ẽne hã tisã, hâiwi. Ta hã ma tô sisi El na, Izaraéu nhihudu norĩ te, 'Re ihâimana u'âsi mono nhisi na.

Currently Selected:

Zenezi 33: xavBP

Highlight

Copy