Zenezi 32

Zaco, Ezau te te sõpẽtẽ da, te te sima irowairébézé wasu'u

1Tawamhã Zaco timorĩ na te te oto uzusi wamhã, ma tô hâiwa ãma romhuri'wa norĩ te te siwi sõpẽtẽ da hã ĩtẽme aihutu. 2Tawamhã Zaco te te 'madâ'â za'ra wamhã, te ãne tinha:

— Ã hã 'Re ihâimana u'âsi mono te, 'ri nhoré mono hã dasi'wapéi 'manharĩ'wa norĩ ubumrozé.

Tahawa ma tô duré romnhisi, Ma'ana'ĩ#32.2 Ma'ana'ĩ hã hebreu norĩ mreme na “'ri nhoré mono hã dasi'wapéi 'manharĩ'wa norĩ ubumrozé” aiwa prã na ne iwapari na hã. na.

3Tawamhã Zaco, tite romreme 'wapéi'wa norĩ, ma tô satõrĩ za'ra Se'i na rowamri u, Edõ na rowamri amo hã Ezau te te siwi sõpẽtẽ da, iwana. 4Tahawa, te ãne sina tãma nharĩ za'ra, te te siwi mreme âri da: “Wa hã Zaco, asimiroti zarina wa za marĩ hã te 're ab'manharĩ aima. Wa tô Labãhã nhorõwa ãma 're ĩhâimana hâ pese pari. 5Ĩnhimizama powawẽ hã ahâ di, awaru po're pore hã, pone'ẽrebâ hã, pone'ẽrebâ zéré uzé hã, ĩma romhuri'wa sipi'õ hã, duré ĩma romhuri'wa si'aibâ hã. Ĩnhib'apito, ã hã romreme hã wa ãma aima tisõ, ĩ'âriwẽzéb da hã.”

6Tawamhã romreme 'wapéi'wa norĩ, Ezauhu ma te te sadawa wasu'u za'ra pari, apâ si'aba'réi wamhã, te ãne Zacoho ma rowasu'u za'ra:

— Adub'rada Ezauhu u wa tô aihutu ni. Ta hã te we oto mo, te te sina ai'uzusi da, 400 na aibâ norĩ ihâiba za'ra siré.

7Tawamhã ãne hã Zaco te te wapari wamhã, ma tô tãma tipahi pese. Hâtâ'â uptabi di. Tahawa tinhib'a'uwẽ norĩ ãma ma tô maparane iwa'õtõ na ãma aipo'o. Duré tinhimizama pone'ẽrebâ norĩ na zama, pone'ẽrebâ zéré uzé norĩ na hã, powawẽ norĩ na hã, duré awaru po're pore norĩ na hã ma tô duré aiwa ãma sipo'o za'ra. 8Tawamhã te ãne tipẽ'ẽ na sima rosa'rata: “Ezau, sena tô we watẽme morĩ za'ra wamhã, ãté te za ĩnhib'a'uwẽ wa'õtõ hâiba amo hã a'wapé. Tawamhã ta norĩ na 'rãza'õtõ ré, ãté te za duré ĩnhib'a'uwẽ wa'õtõ hâiba amo hã tiwi aimani za'ra, wanhimizama ré.”

9Tawamhã Zaco, ãne te 'Re ihâimana u'âsi mono ma hã mre:

— Uburé Danhib'apito, ĩhi'rata Abra'ãhã te, duré ĩmama Izaquihi te 'Re ihâimana u'âsi mono, ma'ãpé aima ĩmremezém na hã ĩwapari. A hã ma tô we ĩzatõ, apâ ĩnhipti'ai u we ĩmorĩ da, ĩsiwapru norĩ u. Duré iwẽ na si ĩma romhâimana mono da hã, ma tô ĩma iropisu. 10Wa hã asib'a'uwẽ, tarére na 're ĩhâimana mono nherẽ, ĩma asimizawi pese zé hã duré ai'umnhasi u'âsi wa, ĩ'ãma 're aiwamri mono zé hã aré tô ĩma hã ibâi õ di. Panho'u Zodã pa na te saprĩ wamhã, ĩsiwazusizéb ré si wa tô saprĩ. Tane nherẽ, ãhã na awa'awi na hã wa oto maparane dawa'õtõ na abaze norĩ ré hã apâ ĩsina siri. 11Uburé Danhib'apito, wa aiwi waptẽ, ĩdub'rada Ezauhu wi ĩnho'reptu da. We imorĩzé ma hã wa tô ĩpahi pese, te te ĩwĩrĩ õ'umnhasite, pi'õ norĩ zama, ai'uté norĩ zama te te ĩwi uprosi õ'umnhasite. 12Ma'ãpé ãma aipo're pu'u. A hã ma tô ĩma iropisu, iwẽ na si ĩma romhâimana da hã. Duré ĩnhihudu norĩ, supara â zaihâ na 're isimi'wara mono ne, sa'rata waihu'u ãna 're hâimana za'ra mono da hã ma tô ĩma iropisu.

13Tawamhã taha mara na te Zaco tame nhono. Tawamhã ãma awẽ wamhã, te tinhimizama Ezauhu ma ãma isõprubzéb da hã sima a'upsãtã. 14Pone'ẽrebâ zéré uzé sipi'õ 200 na, pone'ẽrebâ zéré uzé si'aibâ 20 na, pone'ẽrebâ zéré mapure sipi'õ 200 na, pone'ẽrebâ zéré mapure si'aibâ 20 na 1530 na awaru ba'õmore sipi'õ zahadu ti'ra tihâ na te te 're iwapsõmri za'ra mono hã, 40 na powawẽ hã, powawẽ iba'u 10 na, 20 na awaru po're pore sipi'õ hã, duré 10 na awaru po're pore si'aibâ hã ma tô te te a'upsãtã. 16Tawamhã Zaco taha na ma tô oto ãma sipo'o. Duré imono bâ i'madâ'â'wa da hã ma tô tinhib'a'uwẽ norĩ te te sõré. Tahawa, te ãne ta norĩ ma tãma waihu'u za'ra:

— Taha ré te za ĩnhowa asima asa'o hâ na i'upsãtã mono bâ iré ai'aba'réi wa'wa.

17Tawamhã Zaco danhowa imorĩ'rata na i'maimorĩ ma, ma tô ãne tãma tinha:

— Ĩdub'rada Ezau bâdâdi na te te asõpẽtẽ wamhã, ãté te za asadanha ãne: “E 'wa hã asib'ihâ'a. E momo te aimo. E 'wa simizama te duré we isimroi mo.” 18Tawamhã te za ãne ãma isada'â za: “Ã norĩ hã asib'a'uwẽ Zacoho nhimizama, tinhib'ihâ'a Ezauhu ma, we ãma tãma isõprub za'ra. Taha zama te we zahadu waza'u za'ra hã mo.”

19Tawamhã isãna're, si'ubdatõ ãma, duré uburé i'madâ'â'wai mono bâ ihâimana za'ra ma, te ãne Zaco hã tãma nharĩ za'ra:

— Ezau asiwi sõpẽtẽ aba wamhã, te za tô õne tãma inharĩ za'ra wa'wa. 20Ãne na tãma irowasu'u za'ra wa'aba zéb da hã ãma aipo're si'âri za'ra wa'aba õ di za: “Asib'a'uwẽ Zaco hã zahadu te we waza'u za'ra mo.”

Ãne Zaco ma tô rosa'rada sima 'manha: “Ezauhu ma, ĩnhoprum na ĩsisõwa te isõmri za'ra na hã wa za hâimana wahâ. Tahawa oto duré nimahã na wasisõpẽtẽ wamhã, ãté te za ĩ'âri wẽ.” 21Tawamhã taha zarina ma tô, isõprubzéb hã, iwana te te simroi mono da hã, tinhib'a'uwẽ norĩ ma tãma rob'ru za'ra. Tane nherẽ, ma tô Zaco hã isa'u za'ra te te sima i'ri nharĩ 'remhã ãma ti'awẽ.

Zaco Penué ãma, 'Re ihâimana u'âsi mono te te i'wapézé wasu'u

22Tawamhã tô taha mara na Zaco hã ma tô udu. Utu wamhã, ma tô Zaboqui panho'õmo na saprĩ. Ãhã wa, ma tô timro norĩ siré saprõni zahuré. Ma tô duré timro prã norĩ, 11 na ti'ra si'aibâ norĩ me siré te te simro. 23Tawamhã uburé iwana da te saprĩ za'ra pari, ma tô Zaco hã dama ti'ru, iwana isimarĩ ré duré da te saprĩ za'ra da hã. 24Tane nherẽ, te tawamhã daza'u siwaprosi za, zara niwĩ. Taha ré tame siwaprosi hâimana ré, aibâ itẽme we imorĩ hã ma tô Zaco 'wamhâ, ãma irowa'a zahuré zéb u. 25Tawamhã aibâ, Zacoho ãma te te ãma i'ai'uté waihu'u õ na siwaihu'u wa, ma tô upata upi. Ãhã wa, ma tô upata hi watobro, Zaco hã.

26Tawamhã aibâ, te Zacoho ma tinha ãne:

— Ĩma asimirẽme, ĩmorĩ hâ. Ma tô we oto tirowa'a.

Tawamhã Zaco, ma te ãma tãma wa'rã ãne:

— Aima ĩnhimirẽme õ di za a'â, ĩwẽ hã ĩma 're apisutu mono da, asina ĩma ropisutu õ nherẽ.

27Tawamhã aibâ te sadanha ãne:

— E niha asisi hã.

Tawamhã Zaco ma te ãma sada'â ãne:

— Zaco.

28Tawamhã te duré tãma tinha ãne:

— Asisi õ di za oto, Zaco na. 'Re ihâimana u'âsi mono ma tô i'wapé. Duré aibâ norĩ zama ma tô i'wapé za'ra. Tahawa, ma tô ãma i'ai'uté za'ra. Ãhã wa, asisi hã za oto Izaraéu#32.28 Izaraéu hã hebreu norĩ mreme na “Ta hã te 'Re ihâimana u'âsi mono hã 'wapé.” aiwa prã na ne iwapari na hã. na.

29Tawamhã Zaco tãma sisisi da, te duré tiwi waptẽ, aibâ wi hã ãne:

— Ma'ãpé, asa ĩma asisisi na, te waihu'u da, duré wa hã.

Tawamhã aibâ ma te ãma tãma wa'rã ãne:

— E marĩ da, te ĩnhisi asima iwẽ, waihu'u da hã.

Tawamhã tame iwẽ te te tãma 're apisutu mono da, ma tô oto sina tãma ropisutu.

30Tawamhã Zaco te ãne sima tinha:

— 'Re ihâimana u'âsi mono, 'râwi pesere wa tô oto 'madâ. Tane nherẽ, wa zahadu ĩhâiba ré 're ĩhâimana.

Tahawa ma tô ro hã sisi, Penué#32.30 Penué hã hebreu norĩ mreme na “'Re ihâimana u'âsi mono ubu” aiwa prã na ne iwapari na hã. na. 31Tawamhã Zaco, Penué hawi morĩ ré, ma tô bâdâ hã 'rãiwatobro. Tahawa, te morĩ sina 'rãtẽ, te te i'upata upi hawi. 32Tawamhã duré ã hawim haré Izaraéu nhihudu norĩ hã marĩ upata nhi hã te te 're huri mono õ di, tame te te upi wa.

Currently Selected:

Zenezi 32: xavBP

Highlight

Copy