Zenezi 31

Zaco, Labãhã wi isimanizé wasu'u

1Tawamhã Zaco, Labãhã 'ra norĩ, te te nasi inharĩ za'ra zé ma tô waihu'u:

— Wamama za'ra te, Zaco hã ma tô uburé sima sani za'ra. Taha zarina ma tô oto sisibro pese ãma.

2Tawamhã Zaco ma tô duré 'madâ'â waihu'u, Labã imorĩ'rata na isiwaihu'u na tãma ihâimana nei õ na isihâi'rézém na hã. 3Tawamhã Uburé Danhib'apito te Zacoho ma tinha ãne:

— Aimama norĩ nhipti'ai u te za oto apâ aimo, asiré a'uwẽ asisãnawã norĩ 're ihâimana za'ra mono zéb u. Wa hã wa za asiré ĩhâiba.

4Tahawa Zaco, te Raqueu norĩ zô, Léiaha me sô tihârâ zahuré, isimizama norĩ rom na isimasabzéb u itẽme neb da. 5Tawamhã itẽme simasisi wamhã, te ãne tãma nharĩ zahuré:

— Aimama 'wa ĩsiwaihu'u na imorĩ'rata na ĩma ihâimana nei õ na isihâi'rézém na wa tô 'madâ'â waihu'u. Tane nherẽ, ĩmama te, 'Re ihâimana u'âsi mono hã te ĩsiré 're hâimana u'âsi. 6Aima hã waihu'u pese aba di, aimama aba ma ĩnhiptete sina te 're iromhuri pese mono zém na hã. 7Tane nherẽ, ma tô ĩma sadawa hapese. 10 na ãma isahu na ĩpawa'âbâ na ma to ĩwĩ ãma ti'awi. Tane nherẽ, 'Re ihâimana u'âsi mono, marĩ hã te te ĩ'ãma i'manharĩ wasété da hã te te tãma ĩhâiba nhomri õ di. 8Ãne te te ĩma nharĩ wamhã: “Pone'ẽrebâ 'ra i'upto na si za aipawa'â hã”, tawamhã ma tô nasi isarina si tipoto zara, i'upto na. Duré te te ĩma nharĩ wamhã ãne: “Pone'ẽrebâ zéré uzé 'ra iwawi na si aipawa'â hã za”, tahawa ma tô duré tô nasi isarina iwawi na si tipoto za'ra. 9Ãne ma tô 'Re ihâimana u'âsi mono, aimama aba wi isimizama hã tiwi sani za'ra, te te ĩma sõmri za'ra da.

10— Tawamhã nimahã bâtâ na pone'ẽrebâ si'aibâ norĩ, tinhipi'õ te te wasã za'ra ré, wa tô te saho ãne. Pone'ẽrebâ zéré uzé si'aibâ norĩ, tinhipi'õ te te iwasã za'ra hã iwawi si, duré i'upto si wa tô ab'madâ. 11Tawamhã taha ré ma tô 'Re ihâimana u'âsi mono ma, Hâiwa ãma Romhuri'wa ĩnhisi na hã ĩ'mahâ. Ãhã wa, wa tô sada'â ãne: “E marĩ! Ãhãta wa ãme ĩhâiba.” 12Timreme na ma duré ãma ĩma uzusi ãne: “Ma'ãpé 'madâ'â za'ra na, uburé pone'ẽrebâ zéré uzé si'aibâ norĩ, tinhipi'õ te te iwasã za'ra hã iwawi si, duré i'upto si. Labã te te aima i'manharĩzé hã te 'madâ'â wa, wa tô ãne wa hã aima 'manha. 13Wa hã, 'Re ihâimana u'âsi mono, Bétéu ãma aima ĩsihâi'ré, ẽne ĩma ipisutu ãma, azeitona wa'u tom na isisiwi ĩma isa'wari ãma, duré asina ĩma iropisutuzé hã i'manharĩzéb ãma. Tahawa awa'awi na te za asima irob'ubumro, ã hã ti'ai hawi aiwatobro da, apâ aimorĩ da, ti'ai 're i'aipotozéb u.”

14Tawamhã Raqueu norĩ Léiaha me, ma tô ãne sada'âbâ zahuré:

— Wamama nhiptiha hã si'mairẽme õ di, i'uirĩ na niwa ãma iwasite da hã. 15Te tô isiré a'uwẽ'õ ne taré titõmo na te te 're wa'madâ'â. Ma tô duré wawede. Taha pari ma tô wawa'âbâzé hã taré pese uprosi. 16'Re ihâimana u'âsi mono, uburé wamama nhiptiha te te tiwi isani za'ra hã ta hã oto wate za'ra, wa'ra norĩ me. Tahawa, te za a hã 'Re ihâimana u'âsi mono te te aima i'ruzé hã tô uburé i'a'manha.

17Tawamhã Zaco, ma tô ti'ra norĩ, duré timro norĩ, awaru ba'õmore ba nhisiwimhã anhoré, oto si'aba'ré da. 18Taha pari ma tô uburé tinhimizama te te simro, Cana'ã ti'ai u imama Izaqui 're ihâimana mono zéb u. Padã-Arã na romnhisi ãma uburé marĩ te te sima 're i'awaibui mono zama ma tô siré tidu. 19Tawamhã Labã, Raqueu mama, tinhimizama pone'ẽrebâ te te azéré nhihâri da, morĩ ré, ma tô i'ra Raqueu, isõrõwa 're, romhâiba norĩ ãma 're iwata za'ra mono hã ma tô tiwi simi'uri za'ra, timama wi. 20Ãne ma tô Zaco hã hâimana nhipese na, Labã arameu hã te te sina po're pu'u ãna hã 21uburé tinhimarĩ ré pi'uriwimhã tiwi aimani, si'aba'ré na. Tawamhã Eufrati â na te te saprĩ wamhã, ma tô Ziliadi ti'ai 're ẽtẽ nho'õmoi baba mo.

Labã, Zacoho zarina imorĩzé wasu'u

22Tawamhã si'ubdatõ bâdâ ãma ne pari, ma tô Labã waihu'u, Zaco isimanizém na hã. 23Tahawa ma tô aibâ isiwapru norĩ, isiré 're ihâimana za'ra mono hã sima 'rã'õtõ. Te te 'rã'õtõ wamhã ma tô Zacoho zarina ai'aba'ré. Tahawa, 7 na bâdâ ãma si'utõrĩ pari, ma tô Labã norĩ, Zaco hã siwi sasĩ, Ziliadi na romnhisi ãma ẽne ihâimana za'ra ãma. 24Tawamhã tô taha mara na sõtõ 'rowi ma tô Labãhã u, 'Re ihâimana u'âsi mono hã sihâi'ré. Tahawa te ãne tãma tinha:

— Ni'ã pé! Niha na Zacoho ma hã tãma rob'manharĩ tõ. Tô'ã!

25Tawamhã tô Ziliadi niwĩ ẽne ihâimana za'ra ãma, ma tô Labã, Zaco hã sasĩ, te te sima i'ri nhorézéb ãma. Labã norĩ, tô tame ma tô duré sima te te 'ri nhoré. 26Tawamhã Labã, ma te Zacoho ma hã pri'i ãne:

— E marĩ da, ma tô ĩwi aihâimana nhipese na hã aihâiba. Ĩ'ra norĩ hã dasi'wapéi wa, da te da'ãma 're ai'uté za'ra mono wa, da te 're idawaibui mono ne ma tô we pi'uriwi isaprõni zahuré. 27E marĩ da, ma tô ãne ĩwi aihâimana nhipese na aihâiba, za we i'aimani na ĩma asiwasu'u ãna. Ĩma asiwasu'u 'wa'âhã, wa aré dasa isa'ẽne hã ai'ãma 'manha, rowẽzé ropta'azém na, duré isõrõta'are na danho'rezém na hã. 28A hã, ĩnhihudu norĩ duré ĩ'ra norĩ, irẽme ma itob'rata hârâ na te sawi za'ra da hã asina ĩpo're pu'u õ di. Ãne na asimi'manharĩzé hã asimiza'rese'õ zarina. 29Ãhã zarina wa aré iwasété uptabi hã tô aima 'manha. Tane nherẽ, mara we isi'utõrĩ na hã aimama te, 'Re ihâimana u'âsi mono hã ma tô ĩma tinha ãne: “Ni'ã pé! Niha na Zacoho ma hã rob'manharĩ tõ.” 30Tô oto ĩhawi i'aiwatobrozé hã ĩma waihu'u pese di, aimama norĩ nhorõwa na aipẽ'ẽzé te te aiwĩrĩ wa. Tane nherẽ, e marĩ da, ma tô bété ĩnhorõwa 're, ĩte romhâibarĩ norĩ hã ĩwi isimi'uri za'ra.

31Tawamhã Zaco, ma te asa ãma sada'â ãne:

— Wa tô ĩpahi pese, ai'ra asiptete na ĩwi ãma ropti zahuré õ'umnhasite. 32Ate romhâibarĩ norĩ, ni'wai ãma sãmri za'ra wamhã, te za ta hã wĩrĩ ni za. Wasiré norĩ nho'a, siwa'ru danhimarĩ ãma marĩ ate 'masãmri wamhã, te za i'â za, apâ.

Tane nherẽ, Zaco, Raqueu romhâibarĩ norĩ te te isimi'uri za'ra na hã te te waihu'u õ di.

33Tawamhã Labã, Zacoho te romhâ 'manharĩ na 'ri u ma tô ãzé. Taha pari ma tô duré ãzé Léiaha nhib'ri u hã, duré maparane tãma iromhuri'wa norĩ nhib'ri u zama. Tane nherẽ, romhâibarĩ hã te te sãmri za'ra õ di. Tawamhã ta norĩ hawi watobro wamhã, Raqueu nhib'ri u hã ma tô duré oto ãzé. 34Tahawa, ma tô uburé na te te sô rowaimrami. Tane nherẽ, te te sãmri za'ra õ di, Raqueu awaru ba'õmore bazadâ siwapsẽrẽ 're te te simi'uri za'ra wa, duré isisiwi sãmra wa. 35Tawamhã Raqueu te timama ma tinha ãne:

— Ĩzada asahi tõ, ĩwahutu õ wa. Wahâzé hã te ĩ'ãma tihâiba.

Ãne Labã tite romhâibarĩ zô hã ma tô 're rĩtĩ, te te 'masãmri da ne.

36Tawamhã Zaco ma tô tinhiti'rui pese. Tahawa, ma te ãne Labãhã ma pri'i:

— E marĩ te 'manharĩ bâ bété, i'upa hã. E marĩ na wa tô bété ĩwasétézé hã aiwi 'manha, asahi sina we ĩzarina i'aimorĩ da hã. 37Ãhã na uburé ĩnhimarĩ hã ma tô sô i'awahui mo. Tahawa, e ma tô asimarĩ norĩ hã i'masã. Ta hã ma'ãpé sa'ra na, uburé wanhib'a'uwẽ norĩ nho'remhã, ta norĩ hã niha hã te te siwi wawaihu'u da, i'uwaibaba a hã i'manharĩ na, niha wamhã, wa hã te i'manharĩ na. 3820 wahum na wa tô te aima 're romhuri. Tane nherẽ, niwamhã pone'ẽrebâ zéré mapure 'ra hã, duré pone'ẽrebâ zéré uzé 'ra hã dâ'â siromomhã 'maipoto õ di, aiwi hã. Duré niwamhã ate pone'ẽrebâ zéré mapure si'aibâ te aiwi 'mai'rẽne õ di. 39Niwamhã asimizama, abaze zahi te te 're isimroi mono hã te aima 're a'ãwisi mono õ di. Wa hã wa tô, tô 're ĩsi'madâ'â, 're isimani za'ra mono na hã. A hã ma tô duré 're ĩwati mo bâtâ na, duré bara na da te 're simi'uri za'ra mono na hã. 40Ãne aré ĩnhimiromhurizé hã: Bâtâ na hã rowa'ro wa tô te 're sépata. Bara na zama wa tô duré mara wahâ hã te 're sépata. Tahawa, ma tô ĩnhotõ ãna ĩ'ãma 're awẽ. 4120 wahum na wa tô asõrõwa 'remhã 're ĩhâimana. Duré 14 wahum na wa tô ai'ra norĩ zô hã te aima 're romhuri. Duré 6 wahum na asimizama norĩ zô, wa tô te aima hã 're romhuri. Ãne nherẽ, ãhã nhisiwimhã ma tô ĩpawa'âbâ na 10 ãma isahu na ãma ĩwi iti'awi. 42Tawamhã duré ĩhi'rata norĩ te, 'Re ihâimana u'âsi mono, Abra'ãhã te, duré Izaquihi te te 're iwazé pese mono hã, ĩsiré 're hâimana mono õ 'wa'âhã, a hã te aré ĩzatõ, ĩnhib'rata baba na ĩmorĩ da. Tane nherẽ, õ hã ma tô te irobzépatazé hã duré te 're iromhuri mono zé hã te te 're 'madâ'â. Tahawa, ahâmhâ bara na ma tô õ hã niha na ai'ãma rowairébé, te te iwaihu'uzéb zarina.

Zaco norĩ, Labãhã me roti na isisaze zahuré zé wasu'u

43Tawamhã Labã, ãne ma te Zaco hã sada'â:

— Ã hã ĩ'ra norĩ hã, duré ĩnhihudu norĩ hã, duré robzari norĩ hã ĩte. Duré uburé marĩ i'a'madâ'â norĩ hã tô ĩte si. Tane nherẽ, ĩ'ra norĩ 'rata duré isé're hawib zahuré i'ra tãma ipoto za'ra 'rata ĩhâimana waihu'u õ wa, 44niha ropisudu hã wa te wasima 'manharĩ da hã wa oto mare. Tahawa oto ẽne hã wa te sa'ra na, wa te wasima iropisutuzém na hã ãma 're iwasipo're pu'u mono zéb da hã.

45Tawamhã Zaco, ẽne itõmo waré pa hã ma tô 'mai'â. Te te 'mai'âri wamhã, ma tô hâiwi para na hã tisã. 46Taha pari ma tô tisiré norĩ ma tãma nharĩ za'ra, ẽne hã te te siwi sa'ra 'rãihâ da. Tawamhã ta norĩ hã ẽne ma tô siwi sa'ra sisiwipsi. Taha pari ma tô isababa tisa hã tihu. 47Tawamhã Labã ma tô taha ro hã sisi, Zega-Sa'aduta#31.47 Zega-Sa'aduta hã Arameu norĩ mreme na “dasipo'repu'uzéb da, ẽtẽ za'ra 'rãihâ” aiwa prã na ne iwapari na hã. na. Duré Zaco ma tô taha ro aimawi isisi amo na sisi, Galeedi#31.47 Galeedi hã hebreu norĩ mreme na “dasipo'repu'uzéb da, ẽtẽ za'ra 'rãihâ” aiwa prã na ne iwapari na hã. na. 48Taha pari te Labã hã tinha ãne:

— Ã hã ẽtẽ za'ra hã roti na iwasisazezém na wa te wasima iropisutuzém na ãma 're iwasipo're pu'u u'âsi mono zéb da hã te za 're sa.

Tahawa ã hã romnhisi hã Galeedi na. 49Mispa#31.49 Mispa hã hebreu norĩ mreme na “rom hawi rob'madâ'âzé” aiwa prã na ne iwapari na hã. na zama isisi hã, Labã te te nharĩ wa ãne:

— Uburé Danhib'apito, niha wasima wasiwãnhizari ré hã te te iwa'madâ'â da si tô iwẽ hã. 50Tawamhã duré ĩ'ra norĩ ma 're rob'manharĩ wasété zahuré mono wamhã, duré ĩma isa'rese õ na nherẽ, aimawi pi'õ norĩ na aimro wamhã, a hã te za ãma aipo're pu za, 'Re ihâimana u'âsi mono wahâiba si'uiwa na te te 're iwa'madâ'â u'âsi mono na hã. 51Ãhãta ẽtẽ za'ra hã duré ẽtẽ tõmo waré pa, wawa'wa isima'wara hã. 52Ã hã ẽtẽ za'ra hã, duré ẽtẽ tõmo waré pa hã wa te wasima iropisutuzém na ãma 're iwasipo're pu'u mono zéb da hã. Tawamhã wa hã niwamhã ã hã ẽtẽ za'ra te ãma isa're da hã mare di za, te i'asusi da hã. Tane duré a hã niwamhã we ẽtẽ za'ra isa're da hã mare di za, we ĩsusi da hã. 53Abra'ãhã te, 'Re ihâimana u'âsi mono, duré Naoho te, 'Re ihâimana u'âsi mono, te za niha wasima wawasété zarina wa'ãma rowairébé'wa na hã 're hâimana.

Tawamhã Zaco, imama Izaqui, 'Re ihâimana u'âsi mono te te 're iwazé mono nhisi na ma tô ropisudu hã 'manha. 54Tawamhã tame ẽtẽ nhisiwi ma tô danhimizama zata na hã oto tinhopru, 'Re ihâimana u'âsi mono ma. Tahawa ma tô tisiré norĩ hã waptẽrẽ za'ra, siré saihuri da. Tawamhã saihuri pari, tô taha mara na ma tô oto tame tinhotõ za'ra.

55Tawamhã awẽm na mararé uptabi ma tô Labã hã udu. Utu wamhã, ma tô ti'ra norĩ hã, duré tinhihudu norĩ hã tob'rata hârâ na azawi, irẽme ma. Taha pari, te oto mo, apâ tinhipti'ai u hã.

Currently Selected:

Zenezi 31: xavBP

Highlight

Copy